ଟେଷ୍ଟ ସିରିଜ ପୂର୍ବରୁ ଟିମ ଇଣ୍ଡିଆ ପାଇଁ ଖୁସି ଖବର । ଦଳକୁ ଫେରିବେ ରୋହିତ ଶର୍ମା, ସେପଟେ ଅନୁଷ୍କାଙ୍କ ଡେଲିଭେରି ପାଇଁ ଭାରତ ଫେରିବେ ବିରାଟ ।

କନକ ବ୍ୟୁରୋ : ଟେଷ୍ଟ ସିରିଜ ପୂର୍ବରୁ ଟିମ୍ ଇଣ୍ଡିଆ ପାଇଁ ଖୁସି ଖବର । ଫିଟନେସ୍ ଟେଷ୍ଟ ପାସ୍ କଲେ ରୋହିତ ଶର୍ମା । ଆଇପିଏଲରେ ଆହତ ହେବା ପରେ ଦିନିକିଆ ଓ ଟି-ଟ୍ୱେଂଟିରୁ ବାଦ୍ ପଡିଥିଲେ ରୋହିତ । ଏବେ ପୁଣି ସେ ଟିମକୁ ଫେରିବେ । ନିଜର ଫିଟନେସ୍ ପାଇବା ପାଇଁ ବାଙ୍ଗାଲୋରର ଜାତୀୟ କ୍ରିକେଟ ଏକାଡେମୀରେ ଖୁବ ପରିଶ୍ରମ କରିଥିଲେ ହିଟ୍ ମ୍ୟାନ ରୋହିତ ଶର୍ମା । ରୋହିତଙ୍କୁ ଆଜି ଫିଟ୍ ଘୋଷଣା କରାଯାଇଛି ।

ୟୁଏଇରେ ଅୟୋଜିତ ଆଇପିଏଲ ଖେଳୁଥିବା ବେଳେ ରୋହିତ ଆହତ ହୋଇଥିଲେ । ତେଣୁ ଭାରତ ଫେରିବା ପରେ ସେ ଜାତୀୟ କ୍ରିକେଟ ଏକାଡେମୀରେ ଅଭ୍ୟାସ ଜାରି ରଖିଥିଲେ । ରୋହିତ ଫିଟନେସ ପରୀକ୍ଷାରେ ପାସ୍ ହେବା ପରେ ଶନିବାର ତାଙ୍କୁ ଅଷ୍ଟ୍ରେଲିଆ ପଠାଇବାକୁ ଯୋଜନା ରଖିଛି ବିିସିସିଆଇ ।

ଭାରତ ଓ ଅଷ୍ଟ୍ରେଲିଆ ମଧ୍ୟରେ ୪ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଆୟୋଜିତ ହେବାକୁ ଥିବା ବେଳେ ରୋହିତ ଅଷ୍ଟ୍ରେଲିଆ ଗଲେ ଶେଷ ଦୁଇଟି ଟେଷ୍ଟରେ ଭାରତକୁ ପ୍ରତିନିଧିତ୍ୱ କରିବାର ସମ୍ଭାବନା ରହିଛି । କରୋନା ଭୂତାଣୁ ସଂକ୍ରମଣରେ ରୋହିତ ଅଷ୍ଟ୍ରେଲିଆ ଗଲେ ସେ ସିଧାସଳଖ ଦଳରେ ସାମିଲ ହୋଇପାରିବେ ନାହିଁ । ତାଙ୍କୁ ପ୍ରଥମେ ୧୪ଦିନିଆ ସଙ୍ଗରୋଧରେ ରହିବାକୁ ପଡିବ । ଏହାପରେ ନେଟସରେ ଅଭ୍ୟାସ କରି ସେ ଟେଷ୍ଟ ଖେଳିପାରିବେ । ଭାରତ ଓ ଅଷ୍ଟ୍ରେଲିଆ ମଧ୍ୟରେ ପ୍ରଥମ ଟେଷ୍ଟ ଆସନ୍ତା ୧୭ରୁ ଆଡିଲେଡରେ ଖେଳାଯିବାକୁ ଥିବା ବେଳେ ଦ୍ୱିତୀୟ ଟେଷ୍ଟ ଆସନ୍ତା ୨୬ରୁ ମେଲବର୍ଣ୍ଣରେ ଖେଳାଯିବ । ତୃତୀୟ ଟେଷ୍ଟ ଆସନ୍ତାବର୍ଷ ଜାନୁଆରୀ ୭ରୁ ସିଡନୀରେ ଖେଳାଯିବାକୁ ଥିବା ବେଳେ ରୋହିତ ସେହି ଟେଷ୍ଟ ମ୍ୟାଚରେ ଖେଳିବାର ଆଶା ଅଛି । ସେପଟେ ଅନୁଷ୍କାଙ୍କ ଡେଲିଭେରି ପାଇଁ ଭାରତ ଫେରିବେ ବିରାଟ ।

from Kanak News
via <a href="https://ifttt.com/?

କରୋନା ମୃତ୍ୟୁରେ ଆମେରିକାର ଅଲୋଡା ରେକର୍ଡ । ଗୋଟିଏ ଦିନରେ ୩ହଜାରରୁ ଅଧିକ ମୃତ, ୨ଲକ୍ଷରୁ ଅଧିକ ନୂଆ ସଂକ୍ରମିତ ।

କନକ ବ୍ୟୁରୋ : କରୋନା ଭୂତାଣୁ ସାମ୍ନାରେ ଅସହାୟ ହୋଇପଡିଛି ସୁପରପାୱାର ଆମେରିକା । ଦେଶରେ କରୋନା ସ୍ଥିତି ବିଗୁଡୁଥିବା ବେଳେ ଆମେରିକା କରିଛି ଅଲୋଡା ରେକର୍ଡ । ଲଗାତର ଭାବେ ଦୁଇ ଦିନ ହେଲା ଭୂତାଣୁ ସଂକ୍ରମଣରେ ୩ହଜାରରୁ ଅଧିକ ଲୋକଙ୍କ ମୃତ୍ୟୁ ହେଉଥିବା ବେଳେ ଗୋଟିଏ ଦିନରେ ୨ଲକ୍ଷରୁ ଅଧିକ ସଂକ୍ରମିତ ଚିହ୍ନଟ ହେଉଛନ୍ତି ।

ଆମେରିକାରେ ବିଗୁଡ଼ୁଛି କରୋନା ସ୍ଥିତି । ଗୋଟିଏ ଦିନରେ ୩ହଜାରରୁ ଅଧିକ କରୋନା ମୃତ୍ୟୁ । ୯/୧୧ ଆକ୍ରମଣରୁ ଟପିଲା ଦିନକର ମୃତ୍ୟୁ ସଂଖ୍ୟା । କରୋନାରେ ସବୁଠୁ ଅଧିକ ପ୍ରଭାବିତ ଦେଶ ଆମେରିକାରେ କୋଭିଡ୍ ସ୍ଥିତି ଦିନକୁ ଦିନ ଅଧିକ ବିଗିଡ଼ିବାରେ ଲାଗିଛି । ବିଶେଷକରି ଦୈନିକ ସଂକ୍ରମଣ ସଂଖ୍ୟା ହୁ ହୁ ହୋଇ ବଢ଼ିଚାଲିଛି । ସେପଟେ କରୋନା ଭୂତାଣୁ ଜନିତ ମୃତ୍ୟୁ ସଂଖ୍ୟାରେ ବି ଅଲୋଡା ରେକର୍ଡ କରିଛି ଆମେରିକା । ଏପରିକି ୯/୧୧ ଆକ୍ରମଣକୁ ଟପିଯାଇଛି ୨୪ଘଂଟାରେ ହୋଇଥିବା ମୃତ୍ୟୁ ସଂଖ୍ୟା । ଡିସେମ୍ବର ୯ତାରିଖ ଅର୍ଥାତ ଗତ ବୁଧବାର ଦିନ ୨୪ଘଂଟାରେ ସର୍ବାଧିକ ୩ହଜାର ୧୨୪ ଜଣଙ୍କ ଜୀବନ ନେଇଛି କରୋନା ଭୂତାଣୁ । ସେହିପରି ଲଗାତର ଦ୍ୱିତୀୟ ଦିନରେ ଅର୍ଥାତ ଗୁରୁବାର ଦିନ ମଧ୍ୟ ୩ହଜାରରୁ ଅଧିକ କରୋନା ସଂକ୍ରମିତଙ୍କ ମୃତ୍ୟୁ ହୋଇଛି । ଏବେ ସୁଦ୍ଧା କରୋନାରେ ସବୁଠୁ ଅଧିକ ରହିଛି ଏହି ମୃତ୍ୟୁ ସଂଖ୍ୟା ।

ବିଶ୍ୱରେ ଆମେରିକା ହିଁ କରୋନାରେ ସବୁଠୁ ଅଧିକ ପ୍ରଭାବିତ ହୋଇଛି । ଦେଶରେ କରୋନା ଆକ୍ରାନ୍ତ ସଂଖ୍ୟା ଦେଢ କୋଟି ଟପିସାରିଛି । ଜନ୍ ହପକିନସ୍ ୟୁନିଭର୍ସିଟିର ତଥ୍ୟ ଅନୁସାରେ ଆମେରିକାରେ କରୋନା ଭୂତାଣୁ ଜନିତ ମୋଟ ମୃତ୍ୟୁ ସଂଖ୍ୟା ୨ଲକ୍ଷ ୯୨ ହଜାର ୧୭୯ରେ ପହଂଚିଛି । କରୋନା ସଂକ୍ରମଣ ଓ କରୋନା ଜନିତ ମୃତ୍ୟ ସଂଖ୍ୟା ଆମେରିକାରେ ସବୁଠୁ ଅଧିକ ରହିଛି ।

କରୋନା ଭୂତାଣୁ ସଂକ୍ରମଣ ସମ୍ମୁଖରେ ଅସହାୟ ହୋଇପଡିଛି ସୁପରପାୱାର ଆମେରିକା । ମୃତ୍ୟୁ ସଂଖ୍ୟା ସହ ଦିନକୁ ୨ଲକ୍ଷରୁ ଅଧିକ ନୂଆ ସଂକ୍ରମଣ ଚିହ୍ନଟ ହେବା ଆମେରିକାର ଚିନ୍ତାକୁ ଆହୁରି ବଢାଇ ଦେଇଛି । ଆମେରିକାରେ ଏବେ ସୁଦ୍ଧା ସର୍ବାଧିକ ୧କୋଟି ୫୬ ଲକ୍ଷ ୧୬ହଜାର ୩୭୮ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ତେବେ ସବୁଠାରୁ ଚିନ୍ତାଜନକ କଥା ହେଉଛି ପ୍ରତିଦିନ ପ୍ରାୟ ୨ଲକ୍ଷରୁ ଅଧିକ ଲୋକ ନୂଆ ସଂକ୍ରମିତ ଚିହ୍ନଟ ହେଉଛନ୍ତି । ଏହାସହ ଗତ ୫ଦିନରେ ୧୦ଲକ୍ଷରୁ ଅଧିକ କରୋନା ସଂକ୍ରମିତ ଚିହ୍ନଟ ହୋଇସାରିଛନ୍ତି ।

ଆମେରିକାରେ ବଢୁଥିବା ସଂକ୍ରମଣ ଭିତରେ ଫାଇଜର ଟିକାକୁ ମିଳିଛି ଅନୁମତି । ଆମେରିକାର ଖାଦ୍ୟ ଓ ଔଷଧ ପ୍ରାଧୀକରଣ ଫାଇଜର ଟିକାର ଜରୁରୀକାଳିନ ବ୍ୟବହାରକୁ ଅନୁମତି ପ୍ରଦାନ କରିଛନ୍ତି । ଫାଇଜର ଟିକାକୁ ଆମେରିକାର ଏଫଡିଏର ବିଶେଷଜ୍ଞ କମିଟିର ଗ୍ରୀନ୍ ସିଗନାଲ, କରୋନା ମହାମାରୀ ଉପରେ ରୋକ୍ ଲଗାଇବ ବୋଲି ଆଶା କରାଯାଉଛି ।

ଜର୍ମାନର ଫାର୍ମା କମ୍ପାନୀ ବାୟୋ ଆଣ୍ଡ ଟେକ୍ ନିର୍ମାଣ କରିଥିବା କରୋନା ଟିକା ଫାଇଜରକୁ ବୟସ୍କ ଓ ୧୬ ବର୍ଷରୁ ଅଧିକ ବୟସର କିଶୋରଙ୍କ ଠାରେ ବ୍ୟବହାର ନିରାପଦ ବୋଲି ଏକ୍ସପର୍ଟ କମିଟି କହିଛି । ଆସନ୍ତା ସପ୍ତାହରୁ ଆମେରିକାରେ ଆରମ୍ଭ ହେବ ଫାଇଜର ଟିକାକରଣ । ପ୍ରଥମ ପର୍ଯ୍ୟାୟରେ ଅଗ୍ରାଧିକାର ଭିତ୍ତିରେ ସ୍ୱାସ୍ଥ୍ୟକର୍ମୀଙ୍କୁ ମିଳିବ ଟିକା । ଡିସେମ୍ୱର ମାସ ସୁଦ୍ଧା ଆମେରିକାରେ ପ୍ରାୟ ୨୫ ମିଲିୟନ୍ ଟିକାକରଣ କରାଯିବାକୁ ଯୋଜନା ରଖାଯାଇଛି ।

from Kanak News
via <a href="https://ifttt.com/?

ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କ ଶୋଭାଯାତ୍ରା ଉପରେ ଆକ୍ରମଣ ଘଟଣାରେ ମୁହାଁମୁହିଁ ବିଜେପି-ଟିଏମସି । ପଶ୍ଚିମବଙ୍ଗ ଡିଜିପି ଓ ମୁଖ୍ୟ ଶାସନ ସଚିବଙ୍କୁ କେନ୍ଦ୍ର ସରକାରଙ୍କ ସମନ

କନକ ବ୍ୟୁରୋ : ପଶ୍ଚିମବଙ୍ଗରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ଶୋଭାଯାତ୍ରା ଉପରେ ଆକ୍ରମଣକୁ ନେଇ ଦୁଇ ଦିନ ହେଲା ଦୋହଲୁଛି ଜାତୀୟ ରାଜନୀତି । ଆକ୍ରମଣ ଘଟଣାରେ ଟିଏମସି ସମ୍ପୃକ୍ତି ଅଭିଯୋଗ କରିବା ପରେ ଜୋରଦାର ହୋଇଛି ଆରୋପ ପ୍ରତ୍ୟାରୋପ । ସେପଟେ ଆକ୍ରମଣ ଘଟଣାରେ ୩ଟି ମାମଲା ରୁଜୁ ହୋଇଥିବା ବେଳେ ୭ଜଣଙ୍କୁ ଗିରଫ କରାଯାଇଛି ।

ପଶ୍ଚିମବଙ୍ଗ ଡାଇମଣ୍ଡ ହାର୍ବରରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କ ଶୋଭାଯାତ୍ରା ଉପରେ ଏହି ଆକ୍ରମଣ ଏବେ ଜାତୀୟ ରାଜନୀତିକୁ ଦୋହଲାଉଛି । ତୃଣମୂଳ କଂଗ୍ରେସ କର୍ମୀ ଏହି ଆକ୍ରମଣ କରିଥିବା ବିଜେପି ଅଭିଯୋଗ କରିବା ପରେ ବିଜେପି ଓ ଟିଏମସି ମଧ୍ୟରେ ଜୋରଦାର ହୋଇଛି ଆରୋପ ପ୍ରତ୍ୟାରୋପ ରାଜନୀତି । ଏହି ଘଟଣାରେ ଗୃହ ମନ୍ତ୍ରାଳୟକୁ ରିପୋର୍ଟ ପ୍ରଦାନ କରିଛନ୍ତି ରାଜ୍ୟପାଳ ଜଗଦୀପ ଧନକଡ । ସେପଟେ ପଶ୍ଚିମବଙ୍ଗ ଡିଜିପି ଓ ମୁଖ୍ୟ ଶାସନ ସଚିବଙ୍କୁ ସମନ କରିଛନ୍ତି କେନ୍ଦ୍ର ସରକାର । ଡିସେମ୍ବର ୧୪ତାରିଖରେ ହାଜର ହେବା ପାଇଁ ଉଭୟଙ୍କୁ କୁହାଯାଇଛି । ଏହି ଘଟଣାରେ ଜାତୀୟ ରାଜନୀତି ସରଗରମ ହୋଇଛି । ମୁହାଁମୁହିଁ ହୋଇଛନ୍ତି ଭାରତୀୟ ଜନତା ପାର୍ଟି ଓ ତୃଣମୂଳ କଂଗ୍ରେସ ।
ଗୁରୁବାର ଦିନ ନଡାଙ୍କ ରାଲିରେ ହୋଇଥିଲା ଆକ୍ରମଣ । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଗଡ କୁହାଯାଉଥିବା ଡାଇମଣ୍ଡ ହାର୍ବରରେ ଆୟୋଜିତ ରାଲିରେ ଯୋଗ ଦେବା ପାଇଁ ନଡ୍ଡା ଯାଉଥିବା ସମୟରେ ବିରୋଧର ସମ୍ମୁଖୀନ ହୋଇଥିଲେ । ଜେପି ନଡ୍ଡାଙ୍କ ଶୋଭାଯାତ୍ରାକୁ ଆକ୍ରମଣ କରିବା ସହ ବିଜେପି ନେତା କୈଳାଶ ବିଜୟବର୍ଗୀୟଙ୍କ ଗାଡିକୁ ମଧ୍ୟ ଆକ୍ରମଣ କରାଯାଇଥିଲା । ବିଜେପି ନେତା ଉପରେ ଟିଏମସିକର୍ମୀ ଆକ୍ରମଣ କରିଥିବା ଅଭିଯୋଗ ପରେ ଏହାର ରାଜ୍ୟର ଆଇନ ଶୃଙ୍ଖଳା ସ୍ଥିତିକୁ ନେଇ ରାଜ୍ୟପାଳଙ୍କୁ ରିପୋର୍ଟ ମାଗିଥିଲା ଗୃହମନ୍ତ୍ରାଳୟ । ଏବେ ପଶ୍ଚିମବଙ୍ଗ ଡିଜିପି ଓ ମୁଖ୍ୟ ଶାସନ ସଚିବଙ୍କୁ ସମନ କରିଛନ୍ତି କେନ୍ଦ୍ର ସରକାର ।

ସେପଟେ ବିଜେପି ବରିଷ୍ଠ ନେତାଙ୍କ ଶୋଭାଯାତ୍ରା ଉପରେ ହୋଇଥିବା ଆକ୍ରମଣକୁ ନେଇ ପ୍ରଶ୍ନ ଉଠାଇଛି ଟିଏମସି । ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କ ଶୋଭାଯାତ୍ରା ଉପରେ ଆକ୍ରମଣକୁ ନେଇ ବିଜେପି ଓ ଟିଏମସି ଭିତରେ ଜୋରଦାର ହୋଇଛି ରାଜନୀତି ।

from Kanak News
via <a href="https://ifttt.com/?

ଭୁବନେଶ୍ୱର ଏସଡିଜେଏମ କୋର୍ଟରେ ହାଜର ହେଲେ ପାଠକ ବାପ-ପୁଅ । ଆକାଶ ପାଠକଙ୍କୁ ୫ ଦିନିଆ ରିମାଣ୍ଡରେ ନେଲା କ୍ରାଇମବ୍ରାଞ୍ଚ ।

କନକ ବ୍ୟୁରୋ : ଓଡିଶାର ସବୁଠାରୁ ବଡ ଭିଜିଲାନ୍ସ ରେଡ୍ ବୋଲି କୁହାଯାଉଥିବା ପାଠକ ପରିବାର ଦୁର୍ନୀତି ଘଟଣାରେ ଆଜି ଦୁଇଟି ଘଟଣା ଘଟିଛି । ଗୋଟିଏ ପଟେ ପୁଅ ଆକାଶ ପାଠକକୁ ରିମାଣ୍ଡରେ ନେଇଛି କ୍ରାଇମବ୍ରାଂଚ । କୋର୍ଟରେ ହାଜର ପରେ ନିଜ କଷ୍ଟଡିକୁ ନେଇଛି କ୍ରାଇମବ୍ରାଂଚ । ଆଉ ଗୋଟିଏ ପଟେ ପାଠକ ପରିବାର ସହ ଟଙ୍କା କାରବାରରେ ଲିପ୍ତ ଥିବା ବିଧାୟକ ପ୍ରଦୀପ ପାଣିଗ୍ରାହୀଙ୍କ ବିରୋଧରେ ତଦନ୍ତ ପାଇଁ ଭିଜିଲାନ୍ସକୁ ନିର୍ଦ୍ଦେଶ ଦେଇଛନ୍ତି ଲୋକାୟୁକ୍ତ । ଆସନ୍ତା ୨ମାସ ଭିତରେ ତଦନ୍ତ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି ଲୋକାୟୁକ୍ତ । ଏପଟେ ଆକାଶ ପାଠକଙ୍କଠାରୁ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ହାସଲ ପାଇଁ ଉଦ୍ୟମ କରିବ କ୍ରାଇମବ୍ରାଂଚ ।

ଦିନେ ଭଡାରେ ବିମାନ ନେଇ ଆକାଶରେ ଉଡୁଥିବା ଓ ତାଜ ପାଲେସ ଭଳି ଦେଶର ସବୁଠାରୁ ଦାମୀ ହେଟେଲରେ ଦିନ ବିତାଉଥିବା ଏହି ୩୨ ବର୍ଷୀୟ ଯୁବକ ଆକାଶ ପାଠକର ଏବେ ସମୟ ବଦଳି ଯାଇଛି । ଆଗରୁ ଆକାଶ ଯୁଆଡେ ଯାଉଥିଲେ ତାଙ୍କୁ ଘେରି ରହି ସୁରକ୍ଷା ଦେଉଥିଲେ ୮ରୁ ୧୦ ବାଉଁସର, ଆଉ ଏବେ ତାଙ୍କୁ ଘେରି ରହୁଛନ୍ତି ପୁଲିସ କର୍ମୀ ।

ନୂଆ ମାମଲାକୁ ନେଇ କୋର୍ଟଙ୍କୁ ଜଣାଇବା ସହ ୬୫ ଲକ୍ଷ ଠକେଇ ମାମଲାରେ ମଧ୍ୟ କୋର୍ଟଙ୍କୁ ଅବଗତ କରାଯାଇଛି । ଆକାଶଙ୍କ ବିରୋଧରେ ୪୧୯, ୪୨୦, ୪୬୮, ୪୭୧ ୫୦୬, ୩୪ ଆଇପିସି ଦଫା ଲାଗିଛି । ଟାଟା ମୋଟର୍ସର ଠକେଇ ସିଣ୍ଡିକେଟର ଅଧିକ ଖୋଳତାଡ ପାଇଁ ଆକାଶଙ୍କୁ ୫ ଦିନିଆ ରିମାଣ୍ଡରେ ନେବାକୁ ଭୁବନେଶ୍ୱର ଏସଡିଜେଏମ କୋର୍ଟ ଅନୁମତି ଦେଇଛନ୍ତି ।

ନିଜକୁ ନୀରିହ କହୁଥିବା ଆକାଶ, ନିଜ ସପକ୍ଷରେ କଣ ପ୍ରମାଣ ଦେବେ ତାହା ସବୁଠାରୁ ବଡ ପ୍ରଶ୍ନ । ଏପଟେ ବିଧାୟକ ପ୍ରଦୀପ ପାଣିଗ୍ରାହୀଙ୍କ ମାମଲାର ତଦନ୍ତ ପାଇଁ ଭିଜିଲାନ୍ସକୁ ନିର୍ଦ୍ଦେଶ ଦେଇଛନ୍ତି ଲୋକାୟୁକ୍ତ । ପାଠକ ପରିବାର ସହ ମିଶି ଦୁର୍ନୀତିର ଅଭିଯୋଗ ଆସିଥିବା ପ୍ରଦୀପ ପାଣିଗ୍ରାହୀଙ୍କ ମାମଲାରେ ତଦନ୍ତ କରି ୨ ମାସ ମଧ୍ୟରେ ରିପୋର୍ଟ ଦେବା ପାଇଁ ନିର୍ଦ୍ଦେଶ ଦିଆଯାଇଛି ।

from Kanak News
via <a href="https://ifttt.com/?

ବର୍ଷା-ଅନୁଭବ ବିବାଦ ଭିତରେ ଜାଗୃତି ଶୁକ୍ଳାଙ୍କ ଫଟୋକୁ ନେଇ ବଢ଼ିଲା ଚର୍ଚ୍ଚା । ଜାଗୃତିଙ୍କୁ ଜଣେ ଉତ୍ତମ ଓ ବିପଦ ବେଳର ବନ୍ଧୁ ବୋଲି ବର୍ଣ୍ଣନା କରିଛନ୍ତି ଅନୁଭବ ।

କନକ ବ୍ୟୁରୋ : ବର୍ଷା ପ୍ରିୟଦର୍ଶିନୀଙ୍କ ସହ ବିବାଦ ସମୟରେ ଚର୍ଚ୍ଚାକୁ ଆସିଛି ଅନୁଭବ ମହାନ୍ତି ଓ ଜାଗୃତି ଶୁକ୍ଲାଙ୍କ ଫଟୋ । ସୋସିଆଲ ମିଡିଆରେ ଫଟୋ ପୋଷ୍ଟ କରି ପୁଣି ଚର୍ଚ୍ଚାରେ କେନ୍ଦ୍ରାପଡା ସାଂସଦ ଅନୁଭବ ମହାନ୍ତି । ବାନ୍ଧବୀ ଜାଗୃତି ଶୁକ୍ଳାଙ୍କ ବନ୍ଧୁ ଅଶ୍ୱିନୀ ଦୁବେଙ୍କ ସହ ସାକ୍ଷାତ ବେଳର ଫଟୋକୁ ନିଜ ଫେସବୁକ୍ ପେଜରେ ସେୟାର କରିଛନ୍ତି ଅନୁଭବ । ଏହି ପୋଷ୍ଟରେ ଅନୁଭବ, ଅଶ୍ୱିନୀ ଦୁବେଙ୍କୁ ଜନ୍ମଦିନର ଶୁଭେଛା ଜଣାଇବା ସହ ଜାଗୃତିଙ୍କୁ ପ୍ରକୃତ ବନ୍ଧୁ ବୋଲି ଦର୍ଶାଇ ଢ଼େର ପ୍ରଶଂସା କରିଛନ୍ତି ।

ଅନୁଭବ ମହାନ୍ତି, ଜାଗୃତି ଶୁକ୍ଳା, ଅଶ୍ୱିନୀ ଦୁବେ । ଦୀର୍ଘ ଦିନର ନିରବତା ପରେ ସୋସିଆଲ ମିଡିଆରେ ସୁପରଷ୍ଟାର ତଥା ସାଂସଦ ଅନୁଭବ ମହାନ୍ତିଙ୍କ ଏହି ପୋଷ୍ଟକୁ ନେଇ ଅନେକ କଥା ଉଠୁଛି । ଫଟୋରେ ଅନୁଭବଙ୍କ ସହିତ ଅଛନ୍ତି ତାଙ୍କ ବାନ୍ଧବୀ ଜାଗୃତି ଶୁକ୍ଳା ଏବଂ ଅଶ୍ୱିନୀ ଦୁବେ । ଫଟୋଟିକୁ ନିଜ ଫେସବୁକ ପେଜରେ ସେୟାର କରି ବନ୍ଧୁ ଅଶ୍ୱିନୀ ଦୁବେଙ୍କୁ ଜନ୍ମଦିନର ଶୁଭେଚ୍ଛା ଜଣାଇଛନ୍ତି ଅନୁଭବ । ଏଥିସହ ବାନ୍ଧବୀ ଜାଗୃତିଙ୍କୁ ବିପଦ ସମୟର ବନ୍ଧୁ ବୋଲି ଦର୍ଶାଇ ଢେର ପ୍ରଶଂସା କରିଛନ୍ତି ।

ଫଟୋଟି ଓକିଲ ଅଶ୍ୱିନୀ ଦୁବେଙ୍କ କାର୍ଯ୍ୟାଳୟରେ ଉଠାଯାଇଥିବା ପରି ମନେ ହେଉଛି । ଯିଏ ଦିଲ୍ଲୀ କୋର୍ଟରେ ବର୍ଷାଙ୍କଠାରୁ ବିବାହ ବିଚ୍ଛେଦ ପାଇଁ ଅନୁଭବ କରିଥିବା ଆବେଦନ ମାମଲାର ପରିଚାଳନା କରୁଛନ୍ତି । ଚେୟାରର ଗୋଟିଏ ପଟେ ଅଶ୍ୱିନୀ ଏବଂ ଅନ୍ୟପଟେ ଅନୁଭବ ଓ ଜାଗୃତି ଖୁବ ପାଖାପାଖି ଛିଡା ହୋଇଛନ୍ତି ।

ଏହି ଫଟୋଟି ସେହି ସମୟରେ ସାମ୍ନାକୁ ଆସିଛି, ଯେତେବେଳେ ଅନୁଭବ ତାଙ୍କ ପତ୍ନୀ ବର୍ଷାଙ୍କଠାରୁ ଅଲଗା ହେବା ପାଇଁ ଦିଲ୍ଲୀର ସାକେତ କୋର୍ଟରେ ବିବାହ ବିଚ୍ଛେଦ ମାମଲା କରିଛନ୍ତି । ଏହା ପୂର୍ବରୁ ବର୍ଷା ମଧ୍ୟ କଟକ ଫ୍ୟାମିଲି କୋର୍ଟରେ ଅନୁଭବଙ୍କଠାରୁ ଭରଣ ପୋଷଣ ପାଇଁ ଆବେଦନ କରିଥିଲେ । ଯେଉଁଥିରେ ଅନୁଭବଙ୍କ ବିରୋଧରେ ସାଂଘାତିକ ଅଭିଯୋଗ ସବୁ ବାଢିଥିଲେ ବର୍ଷା ପ୍ରିୟଦର୍ଶିନୀ । ଏହି ଷ୍ଟାର କପଲଙ୍କ ଭିତରେ ବିବାଦ ଏବେ ଦାଣ୍ଡରେ ପଡି ହାଟରେ ଗଡୁଛି । ଦୁହେଁ ଦୁହିଁଙ୍କ ବିରୋଧରେ ଅତି ସାଂଘାତିକ ଅଭିଯୋଗ ସବୁ ବାଢିଆସୁଛନ୍ତି । ସୋସିଆଲ ମିଡିଆରେ ପରସ୍ପରକୁ ଆକ୍ଷେପ କରି ଫଟୋ ଓ ଭିଡିଓ ମଧ୍ୟ ପୋଷ୍ଟ କରିଛନ୍ତି ।

ଏହି ବିବାଦ ଭିତରେ କିନ୍ତୁ ଅନୁଭଙ୍କ ସହିତ ରହିବାକୁ ଚାହୁଁଛନ୍ତି ବର୍ଷା । ତାଙ୍କ ଘର ଛାଡିବାକୁ ବି ପ୍ରସ୍ତୁତ ନୁହନ୍ତି । ସେପଟେ ଅନୁଭବଙ୍କ ଏକା ଜିଦ ବର୍ଷା ତାଙ୍କ ଘର ଛାଡି ଚାଲିଯାଆନ୍ତୁ । କାରଣ ସେ ଏହି ବିବାଦ ବନ୍ଧନରୁ ମୁକ୍ତ ହେବାକୁ ଚାହୁଁଛନ୍ତି ।

ଅନୁଭବଙ୍କ ଅତି ନିକଟରେ ଛିଡା ହୋଇଥିବା ଜାଗୃତି ଶୁକ୍ଳା ଜଣେ ପେଷାଦାର ସାମ୍ବାଦିକା । ରାଜ୍ୟସଭା ଟିଭିରେ ଖବର ଉପସ୍ଥାପନା କରନ୍ତି । ବର୍ଷାଙ୍କ ସହ ଅନୁଭବଙ୍କ ବିବାଦ ସମୟରେ ଚର୍ଚ୍ଚାକୁ ଆସିଥିଲେ ଏହି ଯୁବତୀ । ଆଉ ଏବେ ଅନୁଭବ ଏହି ଫଟୋ ପୋଷ୍ଟ କରିବା ପରେ ଅନେକ ପ୍ରଶ୍ନବାଚୀ ସୃଷ୍ଟି ହେଉଛି । ବର୍ଷାଙ୍କ ସହ ବୈବାହିକ ସଂପର୍କ ଛିନ୍ନ କରି ଜାଗୃତିଙ୍କ ଆହୁରି ନିକଟତର ହେବାକୁ ଚାହୁଁଛନ୍ତି କି ଅନୁଭବ? ହାତରେ ଚା’ କିମ୍ବା କଫି କପ ଧରି ଅନୁଭବ ଓ ଜାଗୃତି ଖୁବ ପାଖାପାଖି ଛିଡା ହେବା ଦୁହିଁଙ୍କ ଭିତରେ ଘନିଷ୍ଠତାକୁ ଦର୍ଶାଉ ନାହିଁ କି? ଜାଗୃତିଙ୍କୁ ଜଣେ ଅତି ସୁନ୍ଦର ବନ୍ଧୁ ବୋଲି ବର୍ଣ୍ଣନା କରିବା ସହ ଆବଶ୍ୟକ ସମୟରେ ସେ ତାଙ୍କ ପାଇଁ ଏକାଧିକ ନିଃସ୍ୱାର୍ଥପର ବନ୍ଧୁ ତିଆରି କରିଦେଇଥିବାରୁ ଧନ୍ୟବାଦ ଜଣାଇଛନ୍ତି । ଯେଉଁମାନେ ତାଙ୍କୁ କେବଳ ଖୁସି ଆଣି ଦେଇଛନ୍ତି ।

from Kanak News
via <a href="https://ifttt.com/?

ପୁରୀ ଶ୍ରୀମନ୍ଦିର ଖୋଲିବା ନେଇ ଆସନ୍ତାକାଲି ଛତିଶା ନିଯୋଗ ବୈଠକ । ଜଗା ଦର୍ଶନ ନେଇ ହେବ ଆଲୋଚନା

କନକ ବ୍ୟୁରୋ : ଆସନ୍ତାକାଲି ପୁରୀ ଶ୍ରୀମନ୍ଦିର ଖୋଲିବା ନେଇ ଗୁରୁତ୍ୱପୂର୍ଣ୍ଣ ଛତିଶାନିଯୋଗ ବୈଠକ ବସିବ । ମନ୍ଦିର ଖୋଲିବା ନେଇ ଏହି ବୈଠକରେ ଆଲୋଚନା କରାଯିବ । ଆଲୋଚନା ପୂର୍ବରୁ କନକ ନ୍ୟୁଜକୁ ସାକ୍ଷାତକାର ଦେଇ ପୁଷ୍ପାଳକ ନିଯୋଗ, ଦଇତାପତି ନିଯୋଗ ଓ ପାଣିଆ ନିଯୋଗର ସଂପାଦକମାନେ କହିଛନ୍ତି ମନ୍ଦିର ଖୋଲିବା ଆବଶ୍ୟକ ଏବଂ ଭକ୍ତ ମହାପ୍ରଭୁଙ୍କ ଦର୍ଶନ ପାଇବା ପାଇଁ ଅପେକ୍ଷା କରିଛି । ଦୀର୍ଘ ୯ ମାସ ହେବ ଶ୍ରୀମନ୍ଦିରରେ ସାଧାରଣ ଦର୍ଶନ ବନ୍ଦ ରହିଛି ।

କରୋନା ମହାମାରୀ ଦୀର୍ଘ ଦିନ ହେବ ବନ୍ଦ ରହିଛି ଶ୍ରୀମନ୍ଦିର । ଏଥିପାଇଁ ଗତ ୯ ମାସ ହେବ ଜଗା ଦର୍ଶନରୁ ବଞ୍ଚିତ ଅଛନ୍ତି ଭକ୍ତ । ହେଲେ ମହାମାରୀକୁ ଆଖି ଆଗରେ ରଖି ପ୍ରଶାସନ ମନ୍ଦିରକୁ ବନ୍ଦ ରଖିଛନ୍ତି । ଆଉ ସାଧାରଣ ଦର୍ଶନ ମଧ୍ୟ ବନ୍ଦ ରହିଛି । ହେଲେ ମନ୍ଦିର ଭିତରେ ମହାପ୍ରଭୁଙ୍କ ସବୁ ନୀତିକାନ୍ତି ନିୟମ ଅନୁସାରେ ଜାରି ରହିଛି ।

ବର୍ତ୍ତମାନ ରାଜ୍ୟରେ କୋଭିଡ ସ୍ଥିତି ଧିରେ ଧିରେ ସୁଧୁରିବାରେ ଲାଗିଛି । ଏଭଳି ସ୍ଥିତିରେ କେନ୍ଦ୍ର ସରକାର ଓ ରାଜ୍ୟ ସରକାର ଅନଲକ ମଧ୍ୟ ଆରମ୍ଭ କରି ସାରିଛନ୍ତି । ଅନ୍ୟ କିଛି ରାଜ୍ୟରେ ମନ୍ଦିର ଖୋଲା ହୋଇଯାଇଛି । ହେଲେ ଓଡିଶାରେ ରାଜ୍ୟ ସରକାର ମନ୍ଦିର ଖୋଲିବାକୁ ଅନୁମତି ଦେଇ ନାହାନ୍ତି । ତେଣୁ ଏଭଳି ପରିସ୍ଥିତିରେ ଭକ୍ତମାନେ ମହାପ୍ରଭୁଙ୍କ ଦର୍ଶନ ପାଇଁ ଚାହିଁ ବସିଛନ୍ତି ।

from Kanak News
via <a href="https://ifttt.com/?

ମୋବାଇଲରୁ ମିଳିବ କି ପରୀ ହତ୍ୟାକାରୀର ସୁରାକ୍? ଜଣେ କଲେଜ ଛାତ୍ର ଆଡକୁ କେନ୍ଦ୍ରୀଭୂତ ହୋଇଛି ଏସଆଇଟି ତଦନ୍ତ, ପରୀ ମୃତ୍ୟୁ ମାମଲାରେ ଆସୁଛି ରୋଚକ ମୋଡ ।

କନକ ବ୍ୟୁରୋ : ପରୀ ହତ୍ୟା ଘଟଣାରେ ଏସଆଇଟି ତଦନ୍ତ ବେଳେ ଏକ ରୋଚକ ମୋଡ ସାମ୍ନାକୁ ଆସିଛି । ପରୀ ଘର ନିକଟରେ ଥିବା ଜଣେ ୧୮ ବର୍ଷିୟ ଯୁବକର ମୋବାଇଲ୍ ଫୋନରେ ଝୁଂଟି ହୋଇପଡିଥିଲା ଏସଆଇଟିର ତଦନ୍ତ । ପୂର୍ବରୁ ଏହି ଯୁବକର ମୋବାଇଲକୁ ପୁଲିସ ସିଜ୍ କରିଥିଲା । କିନ୍ତୁ ମୋବାଇଲ ଭିତରେ ଥିବା ଏକ ଫୋଲଡରକୁ ପୁଲିସ ବହୁ ଚେଷ୍ଟା କରି ବି ଖୋଲିପାରିନଥିଲା । କାରଣ ଏହାକୁ ପାସୱାର୍ଡ ଦେଇ ଲକ୍ କରାଯାଇଥିଲା । ଏହି ପାସୱାର୍ଡ ପାଇଁ ସେହି ଯୁବକ ପାଖରେ ପହଂଚିଥିଲେ ଏସଆଇଟି ମୁଖ୍ୟ ଅରୁଣ ବୋଥ୍ରା ।

ପରୀ ମାମଲାର ଛାନଭିନ କରିବାକୁ ଯେତେଥର ଏସଆଇଟି ମୁଖ୍ୟ ଅରୁଣ ବୋଥ୍ରା ଯଦୁପୁର ଗାଁକୁ ଯାଉଛନ୍ତି, ଏହି ବହୁଚର୍ଚ୍ଚିତ ମୃତ୍ୟୁ ରହସ୍ୟ ଉପରୁ ପରଦା ଉଠିବା ନେଇ ଉତ୍କଣ୍ଠା ସେତିକି ବଢିବଢି ଯାଉଛି । ହେଲେ ତଦନ୍ତ କେତେ ବାଟ ଗଲା? କେଉଁମାନଙ୍କ ଉପରେ ସନ୍ଦେହ କରୁଛି ଯାଂଚକାରୀ ଦଳ? ଏପରିକି ପରୀକୁ ହତ୍ୟା କରାଯାଇଛି ନା ବଳି ଦିଆଯାଇଛି? ଏହିଭଳି ଏକାଧିକ ପ୍ରଶ୍ନ ଏବେ ବି ସମସ୍ତଙ୍କୁ ଆନ୍ଦୋଳିତ କରୁଛି । ଏବେ ଏହି ମାମଲାରେ ଏସଆଇଟିର ତଦନ୍ତ ଜଣେ କଲେଜ ଛାତ୍ରଙ୍କ ଉପରେ କେନ୍ଦ୍ରୀଭୂତ ହୋଇଥିବା ଜାଣିବାକୁ ମିଳିଛି । ଗତକାଲି ଯଦୁପୁର ଗାଁରେ ପହଞ୍ଚି ସଂପୃକ୍ତ ଛାତ୍ରଙ୍କୁ ପଚରା ଉଚରା କରିଥିଲେ ଖୋଦ ଏସଆଇଟି ମୁଖ୍ୟ ।

ମିଳିଥିବା ସୂଚନା ଅନୁସାରେ କିଛିଦିନ ତଳେ ଏହି ଛାତ୍ରଙ୍କ ରକ୍ତ ଓ ଲାଳ ଆଦି ପରୀକ୍ଷା କରାଇଥିଲା ଏସଆଇଟି । ଏପରିକି ଗତ ୨ ତାରିଖରୁ ତାଙ୍କ ମୋବାଇଲ ଫୋନକୁ ସାଙ୍ଗରେ ନେଇ ଯାଇଥିଲା । ହେଲେ ମୋବାଇଲରେ କିମ୍ବା ସେଥିରେ ଥିବା କିଛି ଫାଇଲରେ ପାସୱାର୍ଡ ପକାଇ ରଖିଥିବାରୁ ଏହାକୁ ଖୋଲିପାରିନଥିଲେ ଏସଆଇଟି କର୍ତ୍ତୃପକ୍ଷ । ଯେଉଁଥିପାଇଁ ପାସୱାର୍ଡ ଖୋଲିବାକୁ ପୁଣି ସେହି ଛାତ୍ରଙ୍କ ନିକଟକୁ ଯଦୁପୁର ଆସିଥିଲେ ଏସଆଇଟି ମୁଖ୍ୟ । ହେଲେ ଛାତ୍ରଜଣକ କୌଣସି ପାସୱାର୍ଡ ପକାଇନଥିବା କହିବାରୁ ବିରକ୍ତି ପ୍ରକାଶ କରିବା ସହ ପୁନର୍ବାର ମୋବାଇଲଟିକୁ ସାଙ୍ଗରେ ନେଇଯାଇଛନ୍ତି ।

ତେବେ କାହିଁକି ଏହି ଯୁବକଙ୍କ ଉପରେ କେନ୍ଦ୍ରୀଭୂତ ହୋଇଛି ଯାଂଚକାରୀ ଦଳର ତଦନ୍ତ । ପରୀ ହତ୍ୟାକାରୀ ସଂପର୍କରେ କିଛି ଠୋସ ସୂଚନା ପାଇଛି କି କ୍ରାଇମବ୍ରାଂଚ ଏସଆଇଟି । ପଚରା ଉପରା ପରେ ଜଣାପଡିଛି ପରୀ ନିଖୋଜ ହେବା ପୂର୍ବଦିନ ଏହି ଯୁବକଙ୍କଠାରୁ ଜାମୁକୋଳି ଖାଇଥିଲା । ତେବେ ଏହି ମୋବାଇଲରେ ଏମିତି କ’ଣ ଅଛି ଯାହାକୁ ପାସୱାର୍ଡ ପକାଇ ରଖାଯାଇଛି । ଏବଂ ଏସଆଇଟି କାହିଁକି ଏହି ମୋବାଇଲ ପଛରେ ପଡିଛି ତାହା ହିଁ ସବୁଠାରୁ ଅଧିକ ଚର୍ଚ୍ଚାର ବିଷୟ ହୋଇଛି ।

from Kanak News
via <a href="https://ifttt.com/?

୪ ବର୍ଷ ହେଲା ଜେଲର ଅନ୍ଧାର କୋଠରୀରେ ଡି-ବ୍ରଦର୍ସ  । ହେଲେ ଘରେ ଚାଲିଛି କ୍ରାଇମ ସିଣ୍ଡିକେଟ୍ । ବନ୍ଧୁକ ସହ ହଜାରେରୁ ଅଧିକ ଗୁଳି ଜବତ ।

କନକ ବ୍ୟୁରୋ : ବୋଧହୁଏ ଏତେ ପରିମାଣର ବନ୍ଧୁକ ଓ ଗୁଳି, ପୂର୍ବରୁ ରାଜ୍ୟର କୌଣସି ଗ୍ୟାଙ୍ଗଷ୍ଟରଙ୍କ ଘରୁ ଜବତ କରି ନଥିବ ପୁଲିସ । ଏପରିକି ମାଓ କ୍ୟାମ୍ପରୁ ଏତେ ଗୁଳି ଜବତ ହେବା ଘଟଣା ବି ବିରଳ । ଏହି ଭିଜୁଆଲକୁ ନଦେଖିଲେ ଆପଣ ବିଶ୍ୱାସ କରିପାରିବେନି ଯେ ଜଣେ ଗାଙ୍ଗଷ୍ଟରଙ୍କ ଘରେ ରହିଛି ଏତେ ପରିମାଣର ଅସ୍ତ୍ରଶସ୍ତ୍ର । ହଜାରେ ଅଧିକ ଗୁଳି, ଭଳି କି ଭଳି ଅତ୍ୟାଧୁନିକ ବନ୍ଧୁକ ଦେଖିଲେ, ଲାଗିବ ସତେ ଯେପରି ବ୍ୟବସ୍ଥା ବିରୋଧରେ ଲଢ଼େଇ ପାଇଁ ପ୍ରସ୍ତୁତି ଚାଲିଛି । ତେବେ ଏସବୁ ବାହାରିଛି ଗାଙ୍ଗଷ୍ଟର ଧଳବ୍ରଦର୍ସଙ୍କ ଘରୁ । ଯେଉଁ ଗାଙ୍ଗଷ୍ଟର ଭାଇ ୪ ବର୍ଷ ହେଲା ଜେଲର ଅନ୍ଧାରୀ କୋଠରୀରେ ଦିନ କାଟୁଛନ୍ତି ।

ଧଳସାମନ୍ତ ଜେଲରେ ରହିବା ପରେ ସେମାନଙ୍କ ନେଟ୍ୱର୍କ ଦୁର୍ବଳ ହୋଇପଡିଛି ବୋଲି ଯାହା ଅନୁମାନ କରାଯାଉଥିଲା, ତାହା ମିଛ ବୋଲି ପ୍ରମାଣିତ ହୋଇଛି । କଟକ ସିଡିଏ ସ୍ଥିତ ଗାଙ୍ଗଷ୍ଟରର ଘରେ ଚଢ଼ାଉ ପରେ ୧୭ଟି ବନ୍ଧୁକ ଓ ହଜାରେ ୯୫ ଗୁଳି ଜବତ କରିଛି କମିସନରେଟ୍ ପୋଲିସ । ଚୌଦ୍ୱାର ଜେଲର ଜଣେ ଚୋରା ବନ୍ଧୁକ କାରବାରର ଅଭିଯୁକ୍ତକୁ ପୋଲିସ ପଚରା ଉଚରା କରିବା ପରେ ଜଣାପଡିଥିଲା ଯେ ବିହାରରୁ ଧଳବ୍ରଦର୍ସଙ୍କ ସହଯୋଗୀଙ୍କ ପାଖକୁ ଯାଉଛି ଚୋରା ବନ୍ଧୁକ ଓ ଗୁଳି । ଏହି ତଥ୍ୟକୁ ଆଧାର କରି ଗୁରୁବାର ରାତି ୮ଟାରୁ ଶୁକ୍ରବାର ଦିନ ୧୨ ଟା ପର୍ଯ୍ୟନ୍ତ ଚାଲିଥିଲା ପ୍ରାୟ ୧୬ ଘଂଟା ଧରି ପୋଲିସ ରେଡ୍ କରିଥିଲା । ସମୟ ଯେତିକି ଗଡୁଥିଲା, ଧଳସାମନ୍ତ ଘରୁ ବନ୍ଧୁକ ଓ ଗୁଳିର ପରିମାଣ ସେତିକି ବଢ଼ି ଚାଲିଥିଲା । ଯାହାକୁ ଦେଖି ତାଜୁବ ହୋଇ ଯାଇଥିଲେ ପୋଲିସ ଅଧିକାରୀ ।

କମିସନରେଟ୍ ପୋଲିସ ଅନୁମାନ କରୁଛି, କେବଳ ନିଜ ବ୍ୟବହାର ପାଇଁ ନୁହେଁ, ଜେଲ ଭିତରୁ ବନ୍ଧୁକ ସ୍ମଗଲିଂର ବଡ଼ କାରବାର ଚଳାଇଥିଲା ଧଳବ୍ରଦର୍ସ । ନିଜ ଗାଙ୍ଗକୁ ବଡ଼ କରୁଥିଲା, ଅନ୍ୟ ଅପରାଧୀଙ୍କୁ ଯୋଗାଉଥିଲା ବନ୍ଧୁକ ଓ ଗୁଳି । ପୋଲିସ ସଂଦେହ କରୁଛି, ଆହୁରି ବହୁ ପରିମାଣର ବନ୍ଧୁକ ଧଳସାମନ୍ତ ଘରେ ରହିଛି କିମ୍ବା ସେମାନଙ୍କ ସହଯୋଗୀ ଘରେ ଲୁଚାଇ ରଖାଯାଇଛି । ଏହି ମାମଲାରେ ୮ ଜଣଙ୍କୁ ଗିରଫ କରାଯାଇଥିବା ବେଳେ ଦୁଇ ଭାଇଙ୍କୁ ରିମାଣ୍ଡରେ ଆଣି ପୂରା କ୍ରାଇମ୍ ସିଣ୍ଡିକେଟ୍କୁ ଧରିବାକୁ ଯୋଜନା କରିଛି ପୋଲିସ ।

ସୁଶାନ୍ତ ଧଳସାମନ୍ତ ଓ ସୁଶୀଲ ଧଳସାମନ୍ତ, ଏହି ଦୁଇ ଭାଇ ଟ୍ୱିନ୍ ସିଟିରେ ଆଡ୍ଡା ଜମାଇଥିଲେ ବି ସାରା ଓଡ଼ିଶାରେ ତାଙ୍କର ନେଟ୍ୱକ୍ ଚାଲିଥିଲା । ୨୦୧୬ରେ ଦୁଇ ଭାଇଙ୍କୁ ସେମାନଙ୍କ ଭୁବନେଶ୍ୱର ପୋଖରୀପୁଟ ଘରୁ ଗିରଫ କରିଥିଲା କମିସନରେଟ୍ ପୋଲିସ । ହତ୍ୟା, ଅପହରଣ, ଦାବାବଟି, ବନ୍ଧୁକ ସ୍ମଗଲିଂ ଠାରୁ ଆରମ୍ଭ କରି ଟେଣ୍ଡର ଫିକ୍ସି ଭଳି ସଂଗୀନ ମାମଲା ରହିଥିଲା ଏହି ଦୁଇ ଗ୍ୟାଙ୍ଗଷ୍ଟରଙ୍କ ବିରୋଧରେ । ସେହିଦିନଠାରୁ ସେମାନେ ଜେଲରେ ରହିଥିଲେ । ସମସ୍ତେ ଭାବୁଥିଲେ ଏହି ଦୁଇ ଦୁର୍ଦ୍ଦାନ୍ତ ଅପରାଧୀଙ୍କ କ୍ରାଇମ୍ ସିଣ୍ଡିକେଟ୍ ଭୁଶୁଡି ପଡିଛି । ହେଲେ, ଏବେ ଲାଗୁଛି ଦୁଇ ଭାଇର ଅପରାଧ ସାମ୍ରାଜ୍ୟ ଏହାରି ଭିତରେ ବହୁଗୁଣିତ ହୋଇଛି । ଜେଲରେ ଗାଙ୍ଗଷ୍ଟର ରହିଛି, କିନ୍ତୁ ତାରି ଇଙ୍ଗିତରେ ଚାଲିଛି କ୍ରାଇମ୍ ଓ କଳା କାରବାର ।

from Kanak News
via <a href="https://ifttt.com/?

ଜାମିନ ପାଇଁ ହାଇକୋର୍ଟ ଗଲେ ପ୍ରଦୀପ ପାଣିଗ୍ରାହୀ । ପୂର୍ବରୁ ଏଡିଜେ କୋର୍ଟରେ ଜାମିନ ଆବେଦନ ଖାରଜ ହୋଇଥିଲା ।

କନକ ବ୍ୟୁରୋ : ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଜାମିନ ପାଇଁ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଟାଟା ମୋଟର୍ସରେ ଚାକିରି ନାଁରେ ଠକେଇ ମାମଲାରେ ଗିରଫ ହୋଇଥିବା ଶ୍ରୀ ପାଣିଗ୍ରାହୀଙ୍କ ଜାମିନ ଗତ ୭ ତାରିଖ ଦିନ ଭୁବନେଶ୍ୱରର ଅତିରିକ୍ତ ଦୌରା ଜଜ୍ ଅଦାଲତରେ ଖାରଜ ହେବା ପରେ ସେ ହାଇକୋର୍ଟରେ ଜାମିନ ଆବେଦନ ଦାୟର କରିଛନ୍ତି।

ଏଠାରେ ସୂଚନାଯୋଗ୍ୟ ଯେ ଆୟ ବହିର୍ଭୂତ ସଂପତ୍ତି ଠୁଳ ଅଭିଯୋଗରେ ଆଇଏଫଏସ ଅଫିସର ଅଭୟକାନ୍ତ ପାଠକ ଓ ତାଙ୍କ ପୁଅ ଆକାଶ ଗତ ନଭେମ୍ବର ୨୭ ତାରିଖରେ ଗିରଫ ହୋଇ ଜେଲ ଯାଇଥିଲେ। ଏହାପରେ ଟାଟା ମୋଟର୍ସରେ ନକଲି ଏମଡ଼ି ସାଜି କୋଟି କୋଟି ଟଙ୍କା ଆକାଶ ଠକିଥିବା ଅଭିଯୋଗ ହୋଇଥିଲା।

ଏ ନେଇ କ୍ରାଇମବ୍ରାଞ୍ଚ ତଦନ୍ତ କରିବା ସହିତ ଗତ ଡିସେମ୍ବର ୩ରେ ଶ୍ରୀ ପାଣିଗ୍ରାହୀଙ୍କୁ ଗିରଫ କରିଥିଲା। ଦୌରା ଅଦାଲତରେ ଶ୍ରୀ ପାଣିଗ୍ରାହୀଙ୍କ ପକ୍ଷରୁ ଦର୍ଶାଯାଇଥିଲା ଯେ ଉଦ୍ଦେଶ୍ୟମୂଳକ ଭାବେ ତାଙ୍କ ବିରୋଧରେ ମାମଲା ରୁଜୁ କରାଯାଇଛି। ରାଜନୈତିକ ଅଭିସନ୍ଧି ରଖି ତାଙ୍କୁ ଫସାଇ ଦିଆଯାଇଛି ।

from Kanak News
via <a href="https://ifttt.com/?

ପ୍ରସିଦ୍ଧ କୋରିଓଗ୍ରାଫର ରେମୋ ଡିସୋଜା ଅସୁସ୍ଥ । ହାର୍ଟ ଆଟାକ୍ କାରଣରୁ କୋକିଳାବେନ ହସ୍ପିଟାଲରେ ଭର୍ତ୍ତି

କନକ ବ୍ୟୁରୋ : ବିଶିଷ୍ଠ କୋରିଓଗ୍ରାଫର ତଥା ନିର୍ଦ୍ଦେଶକ ହାର୍ଟ ଆଟାକରେ ଶିକାର ହୋଇଛନ୍ତି । ତାଙ୍କୁ କୋକିଳାବେନ ହସ୍ପିଟାଲରେ ଭର୍ତ୍ତି କରାଯାଇଛି । ହସ୍ପିଟାଲରେ ତାଙ୍କର ବଦ୍ଭଶସକ୍ଟକ୍ଟ୍ରକ୍ଷବଗ୍ଦଗ୍ଧଚ୍ଚ ଅପରେଶନ ହୋଇଥିବା ସୂଚନା ମିଳିଛି  । କୁହାଯାଇଛି କି ଏବେ ତାଙ୍କର ସ୍ୱାସ୍ଥ୍ୟାବସ୍ଥା ସ୍ଥିର ରହିଛି ।
ସୂଚନା ମୁତାବକ ରେମୁ ଡିସୋଜାଙ୍କୁ ଶୁକ୍ରବାର ୨.୩୦ ମିନିଟ୍ ସମୟରେ ହାର୍ଟ ଆଟାକ୍ ହୋଇଥିଲା । କୁହାଯାଇଛି କି ରେମୋଙ୍କ ହାଟରେ ଥିବା ବ୍ଲକେଜ କାଢିଦେବା ପରେ ତାଙ୍କୁ ଆଇସିୟୁକୁ ସ୍ଥାନାନ୍ତର କରାଯାଇଥିଲା । ସେଠାରେ ତାଙ୍କ ସହିତ ତାଙ୍କ ସ୍ତ୍ରୀ ଲିଜେଲ ରହିଛନ୍ତି ।
କହିରଖୁ କି ରେମୋଙ୍କ ଅସୁସ୍ଥତା ଖବର ବଲିଉଡର ଅନ୍ୟତମ କୋରିଓଗ୍ରାଫର ଅହମ୍ମଦ ଖାନ ଏକ ଜାତୀୟ ଗଣମାଧ୍ୟକୁ ସୂଚନା ଦେଇଥିଲେ। ରେମୋ ଅହମ୍ମଦଙ୍କ ସହ ଦୀର୍ଘ ୬ ବର୍ଷ କାଲ କରିଥିଲେ । ସେ କେତକ ସିନେମା ଅହମ୍ମଦ ଖାନଙ୍କ ସହଯୋଗୀ ଭାବେ ବି କାମ କରିଛନ୍ତି ।
ରେମୋଙ୍କ କଥା କୁହାଗଲେ ସେ ବଲିଉଡର ଜଣେ ଜଣାଶୁଣା କୋରିଓଗ୍ରାଫର ଭାବେ ନାମ କମାଇଛନ୍ତି । ବଲିଉଡରେ ଅନେକ ବଡ ବଡ ସିନେମାରେ ସେ କାମ କରିଛନ୍ତି । ସେ ତାଙ୍କର କ୍ୟାରିଅର ୧୯୯୫ ରେ ଆରମ୍ଭ କରିଥିଲେ ।
ସେ କୋରିଓଗ୍ରାଫି କରିଥିବା ସିନେମା ମଧ୍ୟରେ ତହଜୀବ, ଷ୍ଟୁଡେଣ୍ଟ ଅଫ୍ ଦି ଇୟର, ୟେ ଯବାନୀ ହେ ଦିୱାନୀ, ଏବିସିଡି ୨, ବାଜିରାଓ ମସ୍ତାନୀ, ଓ କଳଙ୍କ ବକ୍ସ ଅଫିସ୍ ରେ ବେସ ହିଟ୍ ହୋଇଥିଲା । ଏହି ସବୁ ସିନେମା ପାଇଁ ବି ତାଙ୍କୁ ଅନେକ ପୁରସ୍କାର ମିଳିଛି ।
କୋରିଓଗ୍ରାଫି ସହ ରେମୋ ନିର୍ଦ୍ଦେଶକ ଭାବେ ବି କାମ କରିଛନ୍ତି । ସେ ଫ୍ଲାଇଙ୍ଗ୍ ଜେଟ୍,ରେସ୍ ୩ , ଫାଲତୁ, ଏବିସିଡି, ଏବିସିଡି-୨ ଓ ଷ୍ଟ୍ରିଟ୍ ଡ୍ୟାନସର ଭଳି ସିନେମାରେ ନିର୍ଦ୍ଦେଶକ ଭାବେ କାମ କରିଛନ୍ତି ।
ବଲିଉଡ ବ୍ୟତିତ ଟିଭି ଦୁନିଆରେ ବି ରେମୋ ବେସ୍ ପରିଚିତ । ସେ ଡ୍ୟାନ୍ସ ଇଣ୍ଡିଆ ଡ୍ୟାନ୍ସ ଭଳି ପ୍ରତିଯୋଗିତା ମୂଳକ ସୋ ରେ ଜଜ୍ ଭାବେ ଦାୟିତ୍ୱ ତୁଲାଇଛନ୍ତି । ଏହା ବ୍ୟତିତ ଝଲକ୍ ଦିଖି ଲାଜା, ନଚ ବଲିଏ, ଓ ଡ୍ୟାନ୍ସ ପ୍ଲସ ଭଳି କାର୍ଯ୍ୟକ୍ରମରେ ବି ଜଜ୍ ଭାବେ ଦାୟିତ୍ୱ ତୁଲାଇଛନ୍ତି ।

from Kanak News
via <a href="https://ifttt.com/?

Create your website with WordPress.com
Get started