କନକ ବ୍ୟୁରୋ: ଆଜିର ସବୁଠୁ ବଡ଼ ଖବରରୁ । ବିରୋଧୀଙ୍କ ଏକା ଜିଦ୍, ‘ସ୍ଥଗିତ ନୁହେଁ ପ୍ରତ୍ୟାହାର । ଆଦିବାସୀ ଜମି ହସ୍ତାନ୍ତର ପ୍ରସଙ୍ଗରେ ଗୃହରେ ଜାରି ରହିଛି ହଟ୍ଟଗୋଳ । ଜମିଜମା ବିକ୍ରି ସଂକ୍ରାନ୍ତୀୟ ବିଲ୍କୁ ସଂପୂର୍ଣ୍ଣ ପ୍ରତ୍ୟାହାର ଦାବିରେ ରାଜ୍ୟପାଳଙ୍କୁ ଭେଟିଛନ୍ତି ବିଜେପି ବିଧାୟକ । ସମାନ ଢଙ୍ଗରେ କଂଗ୍ରେସ ସାମ୍ବାଦିକ ସମ୍ମିଳନୀ କରି ନିଷ୍ପତି ପ୍ରତ୍ୟାହାର କରିବାକୁ ଦାବି କରିଛି । ସେପଟେ ବିରୋଧୀଙ୍କ ଆକ୍ରମଣର ଜବାବ ରଖିଛି ବିଜଡି ।

ଯେଉଁ ଗୋଟିଏ ପ୍ରସଙ୍ଗ, ଶୀତ ଅଧିବେଶନ ଆରମ୍ଭରୁ ବିଧାନସଭାକୁ ଦୋହଲାଇ ଦେଇଛି, ସେହି ଆଦିବାସୀ ଜମି ହସ୍ତାନ୍ତର ପ୍ରସଙ୍ଗକୁ ନେଇ ଆଜି ରାଜ୍ୟପାଳଙ୍କ ନିକଟରେ ଫେରାଦ ହୋଇଛନ୍ତି ବିଜେପି ବିଧାୟକ । ଜମିଜମା ବିକ୍ରି ସଂକ୍ରାନ୍ତୀୟ ବିଲ୍କୁ ସଂପୂର୍ଣ୍ଣ ପ୍ରତ୍ୟାହାର ଦାବିରେ ରାଜ୍ୟପାଳଙ୍କୁ ଭେଟିଛନ୍ତି ।

ଶୀତ ଅଧିବେଶନର ପ୍ରଥମ ଦିନ ଭଳି ଦ୍ୱିତୀୟ ଦିନ ମଧ୍ୟ ଗୃହକାର୍ଯ୍ୟ ସ୍ୱାଭାବିକ୍ ଚାଲି ପାରିନଥିଲା । ଏମିତି କି ଦ୍ୱିତୀୟ ଦିନରେ ମାତ୍ର ୬ ମିନିଟ୍୍ ଭିତରେ ସୀମିତ ରହିଲା ଗୃହକାର୍ଯ୍ୟ । ତେବେ ତୃତୀୟ ଦିନରେ ଯଦିଓ ଦ୍ୱିତୀୟାର୍ଦ୍ଧ ଗୃହକାର୍ଯ୍ୟ ଚାଲିଥଲା, ତଥାପି ପ୍ରଥମାର୍ଦ୍ଧ ସଂପୂର୍ଣ୍ଣ ଧୋଇ ହୋଇଯାଇଥିଲା । ନା’ ପ୍ରଶ୍ନକାଳ ଚାଲିପାରିଥିଲା, ନା’ ଶୂନ୍ୟକାଳ । ଗୃହରେ ପ୍ରବଳ ହଟ୍ଟଗୋଳ କରିଥିଲେ ବିରୋଧୀ । ପ୍ଲା-କାର୍ଡ ଧରି ବାଚସ୍ପତିଙ୍କ ପୋଡିଅମ୍ ଆଗରେ ପ୍ରତିବାଦ କରିଥିଲେ ।

ଏହି ପ୍ରସଙ୍ଗରେ ବିଜେପି ବିଧାୟକମାନେ ରାଜ୍ୟପାଳଙ୍କୁ ଭେଟିବା ପାଇଁ ରାଜଭବନ ଅଭିମୁଖେ ଯାଇଥିବା ବେଳେ କଂଗ୍ରେସ, ସାମ୍ବାଦିକ ସମ୍ମିଳନୀ କରି ରାଜ୍ୟ ସରକାରଙ୍କୁ ଟାର୍ଗେଟ୍ କରିଥିଲା ।
ଆଦିବାସୀଙ୍କ ଜମି ହସ୍ତାନ୍ତର ସମ୍ପର୍କୀତ ନିଷ୍ପତି କ୍ୟାବିନେଟରେ ପାରିତ ହେବାର ଠିକ୍ ଦୁଇ ଦିନ ପରେ ଏହି ନିଷ୍ପତିରୁ ଓହରିଯାଇଥିଲେ ସରକାର । ସରକାର ସିନା ନିଷ୍ପତିରୁ ଓହରିଯାଇଥିଲେ, ହେଲେ ଏହି ପ୍ରସଙ୍ଗକୁ ନେଇ କ୍ରମାଗତ ଆକ୍ରମଣ କରି ଆସୁଛନ୍ତି ବିରୋଧୀ ।

The post ବିରୋଧୀଙ୍କ ଏକା ଜିଦ୍, ‘ସ୍ଥଗିତ ନୁହେଁ ପ୍ରତ୍ୟାହାର’: ଆଦିବାସୀ ଜମି ପ୍ରସଙ୍ଗରେ ଜେତିଲା ରାଜନୀତି first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ବାର ଦିନ ପରେ ଅନ୍ଧାର ଭିତରୁ ବାହାରି ଦୁନିଆ ଦେଖିବେ ୪୧ ଶ୍ରମିକ । ଉଦ୍ଧାର ପାଇଁ ଲାଗିବ ଆଉ କିଛି ଘଂଟା । ଶ୍ରମିକଙ୍କ ଜୀବନ ବଂଚାଇବା ପାଇଁ ଉଦ୍ଧାରକାରୀ ଦଳ ଜୋର ଲଗାଇ ଦେଇଛନ୍ତି । ଘଟଣା ସ୍ଥଳରେ ୪୦ଟି ଆମ୍ବୁଲାନ୍ସ ମୁତୟନ ରହିଛି । ଏହାସହ ଗ୍ୟାସ୍ ମାସ୍କ, ଷ୍ଟ୍ରେଚର ଏବଂ ୧୫ ଜଣିଆ ଡାକ୍ତରୀ ଦଳ ଘଟଣା ସ୍ଥଳରେ ସଜାଗ ରହିଛନ୍ତି ।

ଉତରାଖଣ୍ଡ ଉତରକାଶୀର ସିଲକ୍ୟାରା ସୁଡଙ୍ଗ ସାମ୍ନାରେ ପ୍ରସ୍ତୁତ ହୋଇ ରହିଛି ଆମ୍ବୁଲାନ୍ସ । ଆବଶ୍ୟକ ପଡିଲେ ଅସୁସ୍ଥ ଶ୍ରମିକଙ୍କୁ ଏୟାରଲିଫ୍ଟ ପାଇଁ ବି ପ୍ରସ୍ତୁତ ରହିଛି ହେଲିକପ୍ଟର । ଏପଟେ ହସ୍ପିଟାଲରେ ବି ସଜଡା ଯାଇଛି ୪୧ଟି ବେଡ୍ । ଏସବୁ ପ୍ରସ୍ତୁତି, ଖୁବଶୀଘ୍ର ଶ୍ରମିକଙ୍କ ଉଦ୍ଧାର ନେଇ ସଂକେତ ଦେଉଛି । ହେଲେ ସୁଡଙ୍ଗର ଭଗ୍ନାବଶେଷ ଦେଇ ଯେଉଁ ଉଦ୍ଧାର ପାଇପଟି ଖଞ୍ଜା ଯାଉଛି, ତା’ ରାସ୍ତାରେ ବାରମ୍ବାର ବାଧା ଆସୁଛି । ଆଶଙ୍କା କରାଯାଉଛି ଆଗକୁ ଆଉ ୩ରୁ ୪ଟି ବାଧା ଆସିପାରେ । ଜାତୀୟ ବିପର୍ଯ୍ୟୟ ପରିଚାଳନା କର୍ତୃପକ୍ଷ- ଏନଡିଏମଏ ଅଧିକାରୀ କହିଛନ୍ତି ଆଜି ରାତି କିମ୍ବା କାଲି ସକାଳ ସୁଦ୍ଧା ଉଦ୍ଧାର ହେବେ ଶ୍ରମିକ ।

ବଡକଥା ହେଉଛି ଉଦ୍ଧାର ସମୟ ପାଖେଇ ଆଉସିଥିବାରୁ ଶ୍ରମିକଙ୍କ ଭିତରେ ଉକ୍ରଣ୍ଠା ବଢିବାରେ ଲାଗିଛି । ଏତିକିବେଳେ ସେମାନଙ୍କ ମନୋବଳ ବଢାଇବାକୁ ବାରମ୍ବାର ପ୍ରୟାସ ଜାରି ରଖିଛନ୍ତି ଉଦ୍ଧାରକାରୀ ଦଳ । ନିଜେ ଉତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ମଧ୍ୟ ୱାକିଟକିରେ ସୁଡଙ୍ଗରେ ଫସିରହିଥିବା ଶ୍ରମିକଙ୍କ ସହ ଆଲୋଚନା କରିଛନ୍ତି । ସୁଡଙ୍ଗ ଭିତରେ ଫସିରହିଥିବା ୪୧ ଶ୍ରମିକଙ୍କ ଭିତରେ ଅଛନ୍ତି ୫ ଓଡିଆ । ଉଦ୍ଧାର ସମୟ ପାଖେଇ ଆସୁଥିବାରୁ ପରିବାରରେ ଖୁସି ଖେଳିଯାଇଛି । ଟିଭି, ମୋବାଇଲ କିମ୍ବା ଖବରକାଗଜରୁ ପରିବାର ସଦସ୍ୟ ସେମାନଙ୍କ ଆତ୍ମୀୟଙ୍କ ବାବଦରେ ତାଜା ଖବର ଖୋଜୁଛନ୍ତି । କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ ମଧ୍ୟ ବାରିପଦାରେ ପହଂଚି ଶ୍ରମିକଙ୍କ ପରିବାରକୁ ସାନ୍ତ୍ୱନା ଦେଇଛନ୍ତି ।

ଦୀର୍ଘ ୧୨ ଦିନ ପରେ ଶ୍ରମିକଙ୍କ ଉଦ୍ଧାର ହୋଇଯିବାର ସମ୍ଭାବନା ସୃଷ୍ଟି ହୋଇଛି । ଏହାକୁ ନେଇ ପରିବାରରେ ମଧ୍ୟ ଖୁସିର ମାହୋଲ । ଆଉ କିଛି ଘଂଟା ପରେ ବାହାରିବେ ଉତରାଖଣ୍ଡ ଉତରକାଶି ଟନେଲରେ ଫସି ରହିଥିବା ସମସ୍ତ ଶ୍ରମିକ । ନବରଙ୍ଗପୁର ଜିଲ୍ଲା ଡ଼ାବୁଗାଁ ବ୍ଲକ ତାଲବେଡ଼ା ଗାଁର ଭଗବାନ ଭତ୍ରା ମଧ୍ୟ ଉଦ୍ଧାର ହେବେ । ଶେଷ ପର୍ଯ୍ୟାୟରେ ଉଦ୍ଧାର କାମ ପହଂଚିବା ପରେ ଭଗବାନଙ୍କ ଗାଁରେ ଏବେ ଖୁସିର ମାହୋଲ । ଦୀର୍ଘ ୧୨ ଦିନ ପରେ ଶ୍ରମିକଙ୍କ ଉଦ୍ଧାର ହୋଇଯିବାର ସମ୍ଭାବନା ସୃଷ୍ଟି ହୋଇଛି । ଏହାକୁ ନେଇ ଅନ୍ୟ ଓଡିଆ ଶ୍ରମିକଙ୍କ ପରିବାରରେ ମଧ୍ୟ ଖୁସିର ମାହୋଲ ।

The post ସୁଡ଼ଙ୍ଗରୁ ଶ୍ରମିକ ବାହାରିବାକୁ ଅପେକ୍ଷା: ସତର୍କତାର ସହ ଚାଲିଛି ଡ୍ରିଲିଂ କାମ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ତିଆରି ଚାଲିଛି ଭଳିକି ଭଳି ଡଙ୍ଗା । ବୋଇତ ଡଙ୍ଗା, ମନ୍ଦିର ଡଙ୍ଗା ଭଳି ପ୍ରାୟ ୧୦ରୁ ଅଧିକ ପ୍ରକାରର ଛୋଟ ଠାରୁ ବଡ ଡଙ୍ଗା ତିଆରି ଚାଲିଛି । ପରିବାରର ସମସ୍ତ ସଦସ୍ୟ, ଡଙ୍ଗା ତିଆରିରେ ଲାଗିଛନ୍ତି । କିଏ ସୋଲରେ ରଂଗ ଦେଉଥିବାବେଳେ, ଆଉ କେହି ରଂଗବେରଂଗର କାଗଜରେ ଅଠା ଲଗାଇ ଡଙ୍ଗା ତିଆରି କରୁଛନ୍ତି । କଟକ ଜିଲ୍ଲା ସାଲେପୁର ସପନପୁର ଗାଁର ଚିତ୍ର । ଏହି ଗାଁର ଅଧିକାଂଶ ପରିବାର ଡଂଗା ତିଆରି କରି ବର୍ଷକର ଗୁଜୁରାଣ ମେଂଟାଇଥାନ୍ତି । ଏବର୍ଷ ଭଲ ଦିପଇସା ରୋଜଗାର ହେବ ବୋଲି ଆଶା ରଖିଛନ୍ତି ।

ବହୁ ବର୍ଷ ହେଲା ଏହି ଗାଁର କାରିଗରମାନେ ଡଂଗା ତିଆରି କରିଥାନ୍ତି । ବିଶେଷକରି ପରିବାରର ମହିଳାମାନେ ଘରକାମ ସାରିବା ପରେ ବଳକା ସମୟରେ ଡଂଗା ତିଆରି କରିଥାନ୍ତି । ଆଉ ଡଙ୍ଗା ତିଆରି ସରିବା ପରେ ସେଗୁଡିକୁ ସାଲେପୁର ବଜାର, କଟକ ତଥା ଆଖପାଖ ଅଂଚଳକୁ ବିକ୍ରୟ ପାଇଁ ନେଇଥାନ୍ତି ।

ପରିବାର ପ୍ରତିପୋଷଣ ପାଇଁ ବର୍ଷକରେ ଥରେ ଏହି ବ୍ୟବସାୟ ହୋଇଥାଏ । କିନ୍ତୁ କାରିଗରଙ୍କ କହିବା କଥା ଟଙ୍କା ରୋଜଗାର ପାଇଁ ନୁହେଁ ବରଂ ଡଂଗା ତିଆରି କଳାକୁ ବଂଚାଇ ରଖିବା ପାଇଁ ସେମାନେ ଏହାକୁ ତିଆରି କରୁଛନ୍ତି ।

 

The post କାର୍ତ୍ତିକ ପୂର୍ଣ୍ଣିମାରେ ଡଙ୍ଗା ଭସା ପରମ୍ପରା । ନଇ-ପୋଖରୀରେ ଡଙ୍ଗା ଭସାଇବେ ଲୋକ, ବିଭିନ୍ନ ପ୍ରକାର ଡଙ୍ଗା ବିକି ପେଟ ପୋଷିବେ ସାଲେପୁର ସପନପୁର ଗାଁର କାରିଗର first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ମାଲକାନଗିରି ସହରର ୧୪ ବର୍ଷୀୟ ବାଳକ ଲକ୍ଷ୍ମଣ । ଫୋନ କଲ ପାଇବା ମାତ୍ରେ ଆନିମାଲ ଆମ୍ବୁଲାନ୍ସ ନେଇ ସହ-ଦଳବଳେ ଛୁଟି ଆସନ୍ତି । ଅସୁବିଧାରେ କିମ୍ବା କୌଣସି ଦୁର୍ଘଟଣାର ଶିକାର ହୋଇଥିବା ଗୋ-ମାତାଙ୍କ ଚିକିତ୍ସା କରନ୍ତି । ମାଲକାନଗିରି ବସଷ୍ଟାଣ୍ଡ ନିକଟରେ ବଳଦଟିଏ ଦୁର୍ଘଟଣାର ଶିକାର ହୋଇଥିବା ପାଇ ସେଠାରେ ପହଁଚି ଯାଇଛି ଲକ୍ଷ୍ମଣ ଓ ତାଙ୍କ ଟିମ୍ । ତୁରନ୍ତ ପ୍ରାଥମିକ ଚିକିତ୍ସା ଯୋଗାଇ ଦେଇଦେବା ଚିକିତ୍ସା ପରେ ଆହତ ଗାଇ-ଗୋରୁଙ୍କୁ ନିଜ ଆନିମାଲ ଶେଲଟର ହୋମକୁ ନେଇ ଯତ୍ନ କରନ୍ତି ପଶୁ ପ୍ରେମି ଲକ୍ଷ୍ମଣ ଛତ୍ରୀ ।

ଗାଇ ଗୋରୁଙ୍କ ସେବା ଲାଗି ଲକ୍ଷ୍ମଣ ବିଭିନ୍ନ ସାମାଜିକ ଗଣମାଧ୍ୟମ ଜରିଆରେ କଲ ପାଉ ଥିବା ବେଳେ ତାଙ୍କୁ ତାଙ୍କ ବାପାଙ୍କ ଦୋକାନର କର୍ମଚାରୀ ଓ ସାଙ୍ଗ ସାଥୀମାନେ ସହଯୋଗ କରନ୍ତି । ପଶୁଙ୍କ ପ୍ରାଥମିକ ଚିକିତ୍ସାର ସାମାନ୍ୟ ଜ୍ଞାନ ଆରୋହଣ କରିବା ପରେ ଗତ ଏକ ବର୍ଷ ଧରି ଗାଇ ଗୋରୁଙ୍କ ଚିକିତ୍ସା ଯୋଗାଉଛନ୍ତି ନବମ ଶ୍ରେଣୀ ଛାତ୍ର ଲକ୍ଷ୍ମଣ ଛତ୍ରୀ । ଏଥିପାଇଁ ବାପା ବିମଲ ଛତ୍ରୀ ତାଙ୍କୁ ଗୋଟିଏ ପିକଅପ୍ ଭ୍ୟାନ ଯୋଗାଇବା ସହ ଔଷଧ ପତ୍ର ପାଇଁ ମଧ୍ୟ ସମସ୍ତ ସହାୟତା କରନ୍ତି । ନିଜ ଘରେ ଗୋଟିଏ ଆନିମାଲ ଶେଲଟର ହୋମ ସହ ପ୍ରଧାନିଗୁଡା ଓ ପୋଟେରୁ ଠାରେ ମଧ୍ୟ ଶେଲଟର ହୋମ ଖୋଲିଛନ୍ତି ଲକ୍ଷ୍ମଣ ।

ମାଲକାନଗିରି ଗୋ-ସେବକ ଲକ୍ଷ୍ମଣଙ୍କ କାମକୁ ଚାରିଆଡେ ପ୍ରଶଂସା କରାଯାଉଛି । ଏଭଳି ପଦକ୍ଷେପ ପାଇଁ ନବମ ଶ୍ରେଣୀର ଛାତ୍ରଙ୍କୁ ସାବାସୀ ଦେବା ସହ ତାଙ୍କ ମହତ ଉଦେଶ୍ୟକୁ ଚାରିଆଡେ ଚର୍ଚ୍ଚା କରାଯାଉଛି ।

The post କୁନି ପିଲାର ପଶୁପ୍ରେମ । ବୁଲା ଗାଈ-ଗୋରୁଙ୍କ ମସିହା, ଚର୍ଚ୍ଚାରେ ମାଲକାନଗିରିର ‘ଲକ୍ଷ୍ମଣ ଛତ୍ରୀ’ first appeared on Kanak News.

from Kanak News
via <a href="https://ifttt.com/?

ଉତ୍ତର ପୂର୍ବ ଦିଲ୍ଲୀରେ ଡକାୟତି ସମୟରେ ଜଣେ ଯୁବକଙ୍କୁ ହତ୍ୟା କରିଥିବା ଅଭିଯୋଗରେ ଦିଲ୍ଲୀ ପୋଲିସ ଜଣକୁ ଗିରଫ କରିଛି । ସିସିଟିଭି ଫୁଟେଜରେ ଦେଖିବାକୁ ମିଳୁଛି ​​ଯେ ଅଭିଯୁକ୍ତ ମୃତକ  ଯୁବକର ମୁହଁକୁ ଚାପି ଧରିଥିଲା । ଯେଉଁଥିପାଇଁ ସେ ଚେତାଶୂନ୍ୟ ହୋଇଯାଇଥିଲେ । ଅଭିଯୁକ୍ତ ମାତ୍ର ୩୫୦  ଟଙ୍କା ଛଡ଼ାଇବା ପୂର୍ବରୁ ୧୦୦ ଥର ଛୁରୀ ମାରିଥିବାର ଜଣାପଡିଛି ।

ମଙ୍ଗଳବାର ରାତିରେ ଦିଲ୍ଲୀର ୱେଲକମ ଅଞ୍ଚଳର ଜନତା ଶ୍ରମିକ ବସ୍ତି କଲୋନୀରେ ଘଟିଥିବା ଏହି ଘଟଣାର ସିସିଟିଭି ଫୁଟେଜ ସାମ୍ନାକୁ ଆସିଛି । ଏଥିରେ ଦେଖାଯାଉଛି ଯେ ଅଭିଯୁକ୍ତ ଜଣକ ଲୁଟ କରିବାପାଇଁ ଜଣେ ଯୁବକକୁ ଥରେ କିମ୍ବା ଦୁଇ ଥର ନୁହେଁ ପ୍ରାୟ ୧୦୦ ରୁ ଉର୍ଦ୍ଧ ଥର ଛୁରୀରେ ଆକ୍ରମଣ କରିଛି । ୱେଲକମ ଅଞ୍ଚଳରେ କ୍ୟାମେରାରେ କଏଦ ହୋଇଥିବା ଘଟଣା ଦେଖିବା ଅତ୍ୟନ୍ତ କଷ୍ଟକର । ଘଟଣାଟି ଏତେ ଭୟଙ୍କର ହେଇଛି ଯେ ଆପଣ ସେ ଫୁଟେଜକୁ ପୁର ଦେଖି ପାରିବେନି । ଫୁଟେଜରେ ଦେଖିବାକୁ ମିଳୁଛି ଯେ ଯେ ଜଣେ ପ୍ରାୟ ୧୬ ବର୍ଷ ବୟସ୍କ ପିଲା  ଅର୍ଥାତ୍ ନାବାଳକ ଆଉ ଜଣକୁ ଛୁରୀରେ ଅତି ନୃଶଂସ ଭାବେ ଆକ୍ରମଣ କରୁଛି । ଥରେ କିମ୍ବା ଦି’ଥର ନୁହେଁ କ୍ରମାଗତ ଭାବରେ ଛୁରୀ ମାରିଚାଲିଛି । କେତେବେଳେ ବେକରେ ତ କେବେ ମୁଣ୍ଡରେ ତ କେବେ ପେଟରେ । କେବଳ ଏତିକି ନୁହେଁ, ଏହା ପରେ ମୃତକଙ୍କ ଗଳାକୁ ଛୁରୀରେ କାଟି ଦେଉଥିବାର ମଧ୍ୟ ଦେଖିବାକୁ ମିଳୁଛି । ପାଟିତୁଣ୍ଡ ଶୁଣି ସ୍ଥାନୀୟ ମହିଳାମାନେ ବାହାରକୁ ଆସିବା ପରେ ଅଭିଯୁକ୍ତ ସମସ୍ତଙ୍କୁ ଛୁରୀ ଦେଖାଇ ଭୟଭୀତ କରିଥିଲା । ସେ ଛୁରୀ ନେଇ ଅନ୍ୟଦିଗକୁ ପଳାଇଥିଲା । କେବଳ ଏତିକି ନୁହେଁ କିଛି ସମୟ ପରେ ଫେରିଆସି ପୁନର୍ବାର ସେ ଲୋକକୁ  ଛୁରୀରେ ନିର୍ଦ୍ଦୟଭାବେ ହତ୍ୟା କରିଥିଲା ଏବଂ ବଡ଼ ପାଟିରେ ଚିତ୍କାର କରି ଲୋକଙ୍କୁ ଭୟଭୀତ କରିବାକୁ ଚେଷ୍ଟା ମଧ୍ୟ କରିଥିଲା ।

ଗଭୀର ଭାବେ ନିରୀକ୍ଷଣ କଲେ ଏହା ଜଣାପଡୁଛି ଯେ  ପୀଡ଼ିତ ଜଣକ ପୂର୍ବରୁ ମରିଯାଇଛନ୍ତି, ଏବଂ ଅଭିଯୁକ୍ତ  କେବଳ ତା ଶବକୁ ଟାଣିଟାଣି ନେଉଛି । ପୁଣି  ଛୁରାମାଡ଼ କରୁଛି ।  ମୁହଁରେ ଲାତ ମରୁଛି । ଛୁରୀ ଧରି ନାଚ ମଧ୍ୟ କରୁଛି । ପ୍ରତ୍ୟକ୍ଷଦର୍ଶୀ ମାନେ ଏ ଘଟଣା ଦେଖି ଭାବିଲେ ଯେ ବୋଧହୁଏ ମୃତକ ଏବଂ ଅଭିଯୁକ୍ତ ମଧ୍ୟରେ ପୂର୍ବରୁ କିଛି ଶତ୍ରୁତା ଥିଲା । ସେଥିପାଇଁ ବୋଧେ ସେ ହତ୍ୟା କଲାପରେ ଖୁସିରେ ନାଚ କରୁଛି । କିନ୍ତୁ ପରେ ଯେବେ ଜାଣିବାକୁ ପାଇଲେ ଯେ ତାର ଉଦ୍ଦେଶ୍ୟ କେବଳ ଲୁଟ କରିବା ଥିଲା ସେମାନେ ଆଶ୍ଚର୍ଯ୍ୟ ହେଇଯାଇଥିଲେ ଯେ କେମିତି ଜଣେ ଲୋକ ଖାଲି  ଲୁଟ ପାଇଁ ଏମିତି ନୃଶଂସ ଭାବେ ଜଣକୁ ହତ୍ୟା କରିପାରେ । ହତ୍ୟା କଲାପରେ ଅଭିଯୁକ୍ତ ଜଣକ ଜୋରେ ଚିତ୍କାର କରି କହୁଥିଲା ଏବେ ମୁଁ ଜେଲ ଯିବି । ୟାର ଅର୍ଥ ହେଲା ଯେ ଅଭିଯୁକ୍ତର ପୋଲିସ ଜେଲ ଏସବକୁ ଟିକେ ମାତ୍ର ଭୟ ନାହିଁ ।

ପୋଲିସ ସୂତ୍ରରୁ ପ୍ରକାଶ ଯେ ଅଭିଯୁକ୍ତ ଜଣକ  ୨୦୨୦ ମସିହାରେଏକ ହତ୍ୟା ଅଭିଯୋଗରେ ଜେଲ ଯାଇଥିଲା । ସେ ହତ୍ୟାର ଉଦ୍ଦେଶ୍ୟ ମଧ୍ୟ ସେହି ସମାନ ଲୁଟ ଥିଲା । ୩-୪ ନାବାଳକ ମାନଙ୍କର ଏକ ଗ୍ୟାଙ୍ଗ ସେ ଅଞ୍ଚଳରେ ଲୁଟପାଟ କରନ୍ତି ।

ଡିସିପି ଜୟ ତିରକିଙ୍କ କହିବ ଅନୁସାରେ ୨୧ ତାରିଖ ରାତିରେ ସେମାନେ ପିସିଆରରେ ଏକ କଲ ପାଇଥିଲେ । ଘଟଣାସ୍ଥଳରେ ପହଞ୍ଚି ସେମାନେ ମୃତକ ଯୁବକକୁ ଲହୁଲୁହାଣ ଅବସ୍ଥାରେ ଉଦ୍ଧାର କରି ନିକଟସ୍ଥ ମେଡ଼ିକାଲରେ ଭର୍ତ୍ତି କରିଥିଲେ । ଯେଉଁଠି ଡକ୍ଟର ତାଙ୍କୁ ମୃତ ଘୋଷିତ କରିଥିଲେ । ଡିସିପି କହିଲେ ଅଭିଯୁକ୍ତ ଜଣକ ପ୍ରଥମେ ମୁହଁକୁ ଜୋର ଚାପି ଧରିଥିଲେ ଯେଉଥିପାଇଁ ସେ ବେହୋସ ହେଇଯାଇଥିଲେ । ମାତ୍ର ୩୫୦ ଟଙ୍କା ପାଇଁ ତାଙ୍କୁ ହତ୍ୟା କରିଥିଲା ଅଭିଯୁକ୍ତ ।

The post ମାତ୍ର ୩୫୦ ଟଙ୍କା ପାଇଁ ୧୦୦ ଥର ଛୁରୀ ମାରିଲା  ଲୁଟେରା first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ଶିଳ୍ପ ସମୃଦ୍ଧ ରାଜଗାଙ୍ଗପୁର ସିମେଂଟ ନଗରୀ ଭାବେ ପରିଚିତ । ରାଜଗାଂଗପୁର ବ୍ଲକର ୨୦ଟି ପଂଚାୟତ,କୁତ୍ରା ବ୍ଲକର ୧୬ଟି ପଂଚାୟତ ଏବଂ ଲାଠିକଟା ବ୍ଲକର ୧୧ଟି ପଂଚାୟତ ସହିତ ରାଜଗାଙ୍ଗପୁରର ପୌରାଂଚଳକୁ ନେଇ ଗଠିତ ଏହି ନିର୍ବାଚନମଣ୍ଡଳୀ । ୨୦୧୯ ନିର୍ବାଚନରେ ଏହି ଆସନରୁ ବିଜୟୀ ହୋଇଥିଲେ କଂଗ୍ରେସ ପ୍ରାର୍ଥୀ । କିନ୍ତୁ ୨୦୨୪ରେ ଭୋଟର କେଉଁ ଦଳକୁ ଭରସା କରିବେ, ତାକୁ ନେଇ ଆରମ୍ଭ ହୋଇଯାଇଛି ଅଙ୍କକଷା । କୁହାଯାଉଛି, ଏହି ନିର୍ବାଚନମଣ୍ଡଳୀ ଆଦିବାସୀ ବହୁଳ ହୋଇଥିବାରୁ ଆଦିବାସୀଙ୍କ ଅଧିକାର ଓ ବେକାରୀ ସମସ୍ୟା ଆଗାମି ନିର୍ବାଚନରେ ପ୍ରମୁଖ ପ୍ରସଙ୍ଗ ପାଲଟିବ ।

୨୦୧୯ରେ ବିଜେଡି ପ୍ରାର୍ଥୀ ମଂଗଳା କିସାନଙ୍କୁ, କଂଗ୍ରେସ ପ୍ରାର୍ଥୀ ସିଏସ୍ ରାଜନ ଏକ୍କା ହରାଇ ବିଧାନସଭାକୁ ନିର୍ବାଚିତ ହୋଇଥିଲେ । କିନ୍ତୁ ଏଥର ମଂଗଳାଙ୍କୁ ପୁଣି ଥରେ ଏହି ଆସନରୁ ବିଜେଡି ଟିକେଟ ଦେବ କି ନାହିଁ ତାହା ସ୍ପଷ୍ଟ ହୋଇନାହିଁ । ଆଉ ଏହାରି ଭିତରେ ରାଜଗାଂଗପୁରରୁ ବିଜେଡି ଜଣେ ମହିଳାଙ୍କୁ ପ୍ରାର୍ଥୀ କରିପାରେ ବୋଲି ଚର୍ଚ୍ଚା ହେଉଛି । ଯାହା ରାଜଗାଂଗପୁର ରାଜନୀତିକୁ ସରଗରମ କରିଛି ।

ସେହିପରି ବିଜେପି ମଧ୍ୟ ଏହି ଆସନ ଉପରେ ନଜର ରଖିଛି । କିନ୍ତୁ ଏଥର କାହା କାହା ମଧ୍ୟରେ ଲଢ଼େଇ ହେବ ତାହା ସ୍ପଷ୍ଟ ହୋଇନାହିଁ । ୧୯୮୫ ପରଠାରୁ ଏହି ଆସନକୁ ମଂଗଳା କିସାନଙ୍କ ଗଡ ବୋଲି କୁହାଯାଉଥିଲା । ହେଲେ, ୨୦୨୪ କଣ ହେବ ତା ଉପରେ ସମସ୍ତଙ୍କ ନଜର ରହିଛି ।

The post ୨୦୨୪ ସାଧାରଣ ନିର୍ବାଚନରେ ରାଜଗାଙ୍ଗପୁର ଗାଦି ହାତେଇବ କିଏ । ରାଜନ ଏକ୍କା ବନାମ ମଂଗଳା କିଶାନ ନା ଆଉ କିଏ? first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ଉନ୍ନତିକରଣ କାମ ଆଳରେ ଲୋକଙ୍କ ଅର୍ଥ ହରିଲୁଟ୍ ଅଭିଯୋଗ । ବିଧାୟକଙ୍କ ପାଣ୍ଠିରୁ ଅର୍ଥ ଆତ୍ମସାତ ହୋଇଥିବା ଅଭିଯୋଗ କରିଛନ୍ତି ବିଧାୟକଙ୍କ ପୁତୁରା । ଚିତ୍ରକୋଣ୍ଡା ବିଧାୟକ ପୂର୍ଣ୍ଣଚନ୍ଦ୍ର ବାକାଙ୍କ ବିରୋଧରେ ଅଭିଯୋଗ ଆଣିଛନ୍ତି ପୁତୁରା ବିଷ୍ଣୁପ୍ରସାଦ ବାକା । ମାଲକାନଗିରି ମାଥିଲି ବ୍ଲକ ଅନ୍ତର୍ଗତ ନାୟକଗୁଡା ପଂଚାୟତ ଅଧିନ ଆରଡି ରୋଡ଼ ଠାରୁ କନ୍ଧଗୁଡ଼ା ଗାଁକୁ ସଂଯୋଗ କରୁଥିବା ରାସ୍ତା କାମକୁ ନେଇ ମୁହାଁମୁହିଁ ହୋଇଛନ୍ତି ଦାଦା-ପୁତୁରା । ରାସ୍ତା ଉନ୍ନତିକରଣ ପାଇଁ ୨୦୨୦ – ୨୧ ଆର୍ଥିକ ବର୍ଷରେ ବିଧାୟକ ଫଣ୍ଡରୁ ୩ ଲକ୍ଷ ଟଙ୍କା ଖର୍ଚ୍ଚ ହୋଇଛି । ସେହିପରି ଏହି ସମାନ ରାସ୍ତା ପାଇଁ ସମାନ ଆର୍ଥିକ ବର୍ଷରେ ସିଜିଏପ୍ ଯୋଜନାରୁ ୬ ଲକ୍ଷ ଖର୍ଚ୍ଚ ହୋଇଥିବା ଦର୍ଶା ଯାଇଛି । କାମ କିଛି ନକରି ୨ ଥର ବିଲ ହୋଇଥିବା ଅଭିଯୋଗ ଆଣିଛନ୍ତି ବିଧାୟକଙ୍କ ପୁତୁରା ବିଷ୍ଣୁ ।

ସେହିପରି ମାଳିଗୁଡା ଖେଳ ପଡିଆର ଉନ୍ନତୀକରଣ ପାଇଁ ୨ ଥରରେ ବିଧାୟକ ପାଣ୍ଠିରୁ ୫ ଲକ୍ଷ ଟଙ୍କା ଖର୍ଚ୍ଚ ହୋଇଛି । ଏପରି ଅନେକ କାମ ଆଳରେ ଲକ୍ଷ ଲକ୍ଷ ଟଙ୍କା ଆତ୍ମସାତ କରିଥିବା ଅଭିଯୋଗ ଆଣିଛି କଂଗ୍ରେସ ଦଳ  । ମାଥିଲି ବ୍ଲକରୁ କଂଗ୍ରସକୁ ମିଳିଥିବା ତଥ୍ୟ ଅନୁସାରେ, ନାୟକଗୁଡା ପଂଚାୟତରେ ୨୦୨୦–୨୧, ୨୧–୨୨ ଏବଂ ୨୨–୨୩ ଆର୍ଥିକ ବର୍ଷରେ ୩୦ଟି ପ୍ରକଳ୍ପ ହୋଇଛି । ପଂଚାୟତ ଅଧିନରେ ବିଧାୟକ ପାଣ୍ଠି ଓ ବ୍ଲକର ବିଭିନ୍ନ ଯୋଜନାରୁ ଏକ କୋଟି ୨୨ ଲକ୍ଷ ଟଙ୍କା ଖର୍ଚ୍ଚ ହୋଇଛି । ଠିକାଦାର ଓ ଯନ୍ତ୍ରୀଙ୍କ ସଲାସୁତୁରରେ ଲୋକଙ୍କ ଅର୍ଥ ଆତ୍ମସାତ ହୋଇଥିବା ଯୁକ୍ତି ବାଡିଛନ୍ତି କଂଗ୍ରେସ ନେତା ଶରତ ଚନ୍ଦ୍ର ବୁରୁଦା ।

ପ୍ରଶାସନର ଅପାରଗତା ଓ ସାଲିସ୍ ନିତି ଉପରେ କଂଗ୍ରେସ ନେତା ବର୍ଷଥିବା ବେଳେ ଚିତ୍ରକୋଣ୍ଡା ବିଧାୟକ ଏନେଇ କ୍ୟାମେରା ସାମ୍ନାରେ ମୁହଁ ଖୋଲି ନାହାନ୍ତି । କ୍ୟାମେରା ପଛରେ କିନ୍ତୁ ଏହି ପ୍ରକଳ୍ପ ଦୁର୍ନୀତି ଘଟଣାକୁ ସଂପୃର୍ଣ ମିଥ୍ୟା କହିବା ସହ ରାଜନୈତିକ ଦୃଷ୍ଟି କୋଣରୁ ବିରୋଧୀ ଏପରି ଆରୋପ କରୁଥିବା କହିଛନ୍ତି ଚିତ୍ରକୋଣ୍ଡା ବିଧାୟକ ପୂର୍ଣଚନ୍ଦ୍ର ବାକା ।

The post ଗୋଟିଏ ପ୍ରକଳ୍ପ ପାଇଁ ଦୁଇ ଥର ବିଲ୍ । ଚିତ୍ରକୋଣ୍ଡା ବିଧାୟକଙ୍କ ବିରୋଧରେ ସାଙ୍ଘାତିକ ଅଭିଯୋଗ ଆଣିଲେ ପୁତୁରା first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ଏଣିକି ଯୁକ୍ତ ୨ରେ ବାୟୋଲଜି ରଖିନଥିଲେ ବି ପଢିପାରିବେ ଡାକ୍ତରୀ । ଏଥିପାଇଁ ନ୍ୟାସନାଲ ମେଡିକାଲ କମିଶନ ଲାଗୁ କରିବାକୁ ଯାଉଛି ନୂଆ ଗାଇଡ ଲାଇନ୍ । ଯୁକ୍ତ ୨ରେ ପ୍ରମୁଖ ବିଷୟ ବାୟୋଲଜି ନରଖିଲେ ମଧ୍ୟ ଅତିରିକ୍ତ ବିଷୟ ଭାବେ ବାୟୋଲଜି ବା ବାୟୋଟେକ୍ନୋଲୋଜି ରଖି ଡାକ୍ତରୀ ପରୀକ୍ଷା ଦେଇହେବ । ପୂର୍ବରୁ ଡାକ୍ତରୀ ପରୀକ୍ଷା ଦେବାକୁ ହେଲେ ବାୟୋଲଜିକୁ ବାଧ୍ୟତାମୂଳକ ପାଠ୍ୟକ୍ରମରେ ରଖିବାକୁ ପଡୁଥିଲା ।ଏବେ କିନ୍ତୁ ଏହି କଟକଣାକୁ ହଟାଇ ଦେବାକୁ କରିଛି ଏନଏମସି ।

ଏବେ ମାଟ୍ରିକ ଏବଂ ଯୁକ୍ତ ଦୁଇରେ ବାୟୋଲଜି ବା ବାୟୋଟେକନଲୋଜି ରଖି ନଥିବା ଆଶାୟୀ ମଧ୍ୟ ଡାକ୍ତରୀ ପାଠ ପଢିବାର ସୁଯୋଗ ପାଇପାରିବେ । ବିଜ୍ଞପ୍ତି ଅନୁସାରେ, ଯେଉଁ ଆଶାୟୀ ଫିଜିକ୍ସ, କେମେଷ୍ଟ୍ରି, ବାୟୋଲଜି ବା ବାୟୋଟେକନଲୋଜି ଏବଂ ଇଂରାଜୀକୁ ଅତିରିକ୍ତ ବିଷୟ ରଖି ଉତୀର୍ଣ୍ଣ ହୋଇଥିବେ ଏମବିବିଏସ, ବିଡିଏସ ପାଠ୍ୟକ୍ରମ ଲାଗି ହେଉଥିବା ଏନଇଇଟି-ୟୁଜି ଟେଷ୍ଟ ଲାଗି ଯୋଗ୍ୟ ବିବେଚିତ ହେବେ । ନୂଆ ଗାଇଡ ଲାଇନ୍ ଅନୁଯାୟୀ ବାୟୋଲଜି ନନେଇଥିଲେ ମଧ୍ୟ ପରୀବର୍ତୀ ସମୟରେ ମାଟ୍ରିକ ଓ ଯୁକ୍ତ ଦୁଇ ସ୍ତରର ବାୟୋଲଜି ବା ବାୟୋଟେକନଲଜି ପରୀକ୍ଷା ଦେଇ ନିଟ୍ ପରୀକ୍ଷା ଦେଇ ଯୋଗ୍ୟ ବିବେଚିତ ହୋଇପାରିବେ ।

The post ବିନା ଜୀବବିଜ୍ଞାନରେ ଡାକ୍ତର! ନ୍ୟାସନାଲ ମେଡିକାଲ କମିଶନ ଆଣିଲା ନୂଆ ଗାଇଡଲାଇନ୍, ମାର୍ଗଦର୍ଶିକାକୁ ନେଇ ଆରମ୍ଭ ହେଲା ବିତର୍କ । first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ଘରର ମେରୁଦଣ୍ଡ ହୁଇଲ୍ ଚେୟାରରେ । ଦୁଇ ଭେଣ୍ଡିଆ ପୁଅ ଅକାଳରେ ଆରପାରିକୁ ଚାଲି ଯିବା ପରେ ଦୁଇ ବିଧବା ବୋହୂ, ସ୍ତ୍ରୀ ଓ ୪ ନାତି ନାତୁଣୀଙ୍କ ଦାୟିତ୍ୱ ଏଇ ଦିବ୍ୟାଙ୍ଗ ବୁଢା ବାପାଙ୍କ ଉପରେ । ପେଟକୁ ଦାନା ଗଣ୍ଡାଏ ଯୋଗାଇବା ପାଇଁ ସଂଘର୍ଷ କରୁଛନ୍ତି ହାଟଡିହି ବ୍ଲକ ପଂଚୁଗୋଚ୍ଛିଆ ପଂଚାୟତ ତରଭା ଗାଁର ଦିବ୍ୟାଙ୍ଗ ନାରାୟଣ ଜେନା । ପେଟକୁ ମୁଠାଏ ଖାଇବା ଯୋଗାଡ କରିପାରୁନଥିବା ବେଳେ ମୁଣ୍ଡ ଗୁଂଜିବାକୁ ଘର ଖଣ୍ଡିଏ ନାହିଁ । ପଲିଥିନ୍୍ ତଳେ ବିତୁଛି ଏ ଅସହାୟ ପରିବାର ଜୀବନ । ପରିବାର ଦୁଃଖ ନେଇ ବହୁବାର ଜଣାଇଛନ୍ତି ହେଲେ ସେମାନଙ୍କୁ ଦୁଃଖ ଶୁଣିବାକୁ ଯେମିତି କେହି ନାହିଁ ।

ବର୍ଷା ପବନରେ ଭାଙ୍ଗିଯାଇଛି ଘର ଖଣ୍ଡିକ । ଆଉ ସାନ ଭାଇର ଭଙ୍ଗା ଘରେ ପଲିଥିନ୍ ପକାଇ ରହୁଛନ୍ତି ନାରାୟଣଙ୍କ ପରିବାର । ଦିବ୍ୟାଙ୍ଗ ଭତା ପାଇଁ ବହୁବାର ଜଣାଇଥିଲେ ବି ଏଯାଏ ଭତା ମିଳିନି । ଆବାସ ଯୋଜନାରେ ବହୁ ଲୋକଙ୍କୁ ମିଳିଛି ଘର । ହେଲେ ଏହି ପରିବାର ଉପରେ ପ୍ରଶାସନ ନଜର ପଡିନାହିଁ । ଭତାରୁ ନେଇ ଆବାସ ଘର ପାଇଁ ପଂଚାୟତ ଓ ବ୍ଲକ କାର୍ଯ୍ୟାଳୟକୁ ଦଉଡି ଦଉଡି ନୟାନ୍ତ ହେଉଥିବା ଅଭିଯୋଗ କରିଛନ୍ତି ଦିବ୍ୟାଙ୍ଗ ନାରାୟଣ ।

ସମସ୍ୟା ଭିତରେ ରହୁଥିବା ଏହି ଦିବ୍ୟାଙ୍ଗ ନାରାୟଣଙ୍କ ପରିବାର କୁ ସରକାରଙ୍କ ପକ୍ଷରୁ ସହଯୋଗ କରାଯାଇଫାରିଲେ ସେମାନେ ଉପକୃତ ହୋଇପାରିବେ ।

The post ଆଗ ପଛ ହୋଇ ଚାଲିଗଲେ ଦୁଇ ପୁଅ । ବିଧବା ବୋହୂ, ନାତି ନାତୁଣୀ ଓ ସ୍ତ୍ରୀଙ୍କୁ ନେଇ ଦିବ୍ୟାଙ୍ଗ ନାରାୟଣ ଜେନାଙ୍କ ସଂସାର, ମୁଣ୍ଡ ଗୁଂଜିବାକୁ ନାହିଁ ଘର first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ସୁଡ଼ଙ୍ଗରେ ଫଶିଥିବା ଶ୍ରମିକଙ୍କ ସହ କଥା ହୋଇଛନ୍ତି ଉତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମୀ । ଶ୍ରମିକଙ୍କ ସ୍ୱାସ୍ଥ୍ୟାବସ୍ଥା ବୁଝିବା ସହ ଶ୍ରମିକଙ୍କୁ ଆଶ୍ୱାସନା ଦେଇଛନ୍ତି ପୁଷ୍କର ସିଂ ଧାମୀ । ଖୁବ୍ ଶୀଘ୍ର ସମସ୍ତଙ୍କୁ ଉଦ୍ଧାର କରାଯବ ବୋଲି ୱାକି ଟକି ଜରିଆରେ ଶ୍ରମିକଙ୍କୁ ଜଣାଇଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟିକିନିକି ଖବର ନେଉଥିବା ମଧ୍ୟ ଜଣାଇଛନ୍ତି ଉତ୍ତରାଖଣ୍ଡର ମୁଖ୍ୟମନ୍ତ୍ରୀ । ଏହାସହ ସମସ୍ତଙ୍କର ସ୍ୱାସ୍ଥ୍ୟବସ୍ଥା କେମିତି ଅଛି ବୋଲି ପଚାରି ବୁଝିଛନ୍ତି ପୁଷ୍କର ସିଂ ଧାମୀ ।

ଅନ୍ୟପଟେ ସୁରକ୍ଷିତ ଉଦ୍ଧାର ନେଇ ଆଶା ବାନ୍ଧି ବସିଛନ୍ତି ବାରିପଦାର ବିଶେଶ୍ୱର ନାୟକଙ୍କ ପରିବାର । ଏହାରି ଭିତରେ କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ ତାଙ୍କ ଘରେ ପହଁଚି ବିଶ୍ୱେଶ୍ୱରଙ୍କ ପରିବାର ଲୋକଙ୍କୁ ଭେଟି ଆଲୋଚନା କରିଛନ୍ତି । ବିଶ୍ୱେଶ୍ୱରଙ୍କ ସୁରକ୍ଷିତ ଉଦ୍ଧାର ନେଇ ପରିବାର ଲୋକଙ୍କୁ ଆଶ୍ୱାସନା ଦେଇଛନ୍ତି କେନ୍ଦ୍ରମନ୍ତ୍ରୀ । ଦୀର୍ଘ ୧୨ ଦିନ ପରେ ଶ୍ରମିକଙ୍କ ଉଦ୍ଧାର ହୋଇଯିବାର ସମ୍ଭାବନା ସୃଷ୍ଟି ହୋଇଛି ।

କିଛି ଘଣ୍ଟା ମଧ୍ୟରେ ଉତରାଖଣ୍ଡ ଉତରକାଶି ଟନେଲ ରେ ଫସି ରହିଥିବା ସମସ୍ତ ଶ୍ରମିକଙ୍କୁ କରାଯିବ ଉଦ୍ଧାର । ଶ୍ରମିକଙ୍କ ଭିତରେ ଓଡ଼ିଶାର ପାଞ୍ଚ ଶ୍ରମିକ ରହିଛନ୍ତି । ସେମାନଙ୍କ ମଧ୍ୟରୁ ନବରଙ୍ଗପୁର ଜିଲ୍ଲା ଡ଼ାବୁଗାଁ ବ୍ଲକ ତାଲବେଡ଼ା ଗାଁର ଭଗବାନ ଭତ୍ରା । ଉଦ୍ଧାର କାମ ଏବେ ଶେଷ ପର୍ଯ୍ୟାୟରେ ଥିବା ଖବର ମିଳିବା ପରେ ଭଗବାନଙ୍କ ଗାଁରେ ଏବେ ଖୁସିର ମାହୋଲ । ପରିବାର ଓ ଗାଁ ଲୋକେ ପ୍ରତିକ୍ଷଣ ଖବର ନେଉଛନ୍ତି କେତେବେଳେ ଟନେଲ ଭିତରୁ ସୁରକ୍ଷିତ ବାହାରିବେ ଭଗବାନ ।

The post ସୁଡଙ୍ଗ ଭିତରେ ଫଶି ରହିଥିବା ଶ୍ରମିକଙ୍କ ସହ କଥା ହେଲେ ଉତ୍ତରାଖଣ୍ଡର ମୁଖ୍ୟମନ୍ତ୍ରୀ । କହିଲେ, ଖୁବଶୀଘ୍ର ସମସ୍ତଙ୍କୁ କରାଯିବ ଉଦ୍ଧାର । first appeared on Kanak News.

from Kanak News
via <a href="https://ifttt.com/?