୨୭ ବର୍ଷରେ ପାଦ ଦେଲା ବିଜୁ ଜନତା ଦଳ । ଆନନ୍ଦ ଭବନରୁ ଶଙ୍ଖ ଭବନ ସାଇକେଲ ରାଲି । ନବୀନ ଓଡ଼ିଶା ଗଠନ ପାଇଁ ଶପଥ ନେଲେ ଦଳୀୟ ନେତା

କନକ ବ୍ୟୁରୋ: ୨୭ ବର୍ଷରେ ପାଦ ଥାପିଛି ବିଜେଡି । ଆଉ ଏହି ୨୭ ବର୍ଷରେ ଦେଶର ରାଜନୈତିକ ଦୃଶ୍ୟପଟ୍ଟରେ ନିଜ ପାଇଁ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଛି ଦଳ । ଆଜି ପ୍ରତିଷ୍ଠା ଦିବସରେ ଦଳର ନେତାମାନେ ‘ନବୀନ ଓଡ଼ିଶା’ ଗଠନ ପାଇଁ ବ୍ରତୀ ହେବାକୁ ଶପଥ ନେଇଛନ୍ତି । ଆଉ ବିଜେଡିର ଏହି ପ୍ରତିଷ୍ଠା ଦିବସକୁ କଟାକ୍ଷ କରିଛି ବିଜେପି ।

• ୨୭ ବର୍ଷରେ ବିଜେଡି
• ରାଜ୍ୟବ୍ୟାପି ପ୍ରତିଷ୍ଠା ଦିବସ ପାଳନ
• ଶପଥ ନେଲେ ନେତା

ରାଜନୈତିକ ଦୃଶ୍ୟପଟ୍ଟରେ ସ୍ୱତନ୍ତ୍ର ସ୍ଥାନ ସୃଷ୍ଟି କରିଥିବା ବିଜୁ ଜନତା ଦଳ ୨୭ ବର୍ଷରେ ପଦାର୍ପଣ କରିଛି । ଏହି ପ୍ରତିଷ୍ଠା ଦିବସକୁ ରାଜ୍ୟବ୍ୟାପି ମହାଆଡମ୍ବରରେ ପାଳନ କରିଛି ବିିଜେଡି । ରାଜ୍ୟସ୍ତରରୁ ଆରମ୍ଭ କରି, ଜିଲ୍ଲା, ବ୍ଲକ ଓ ପଞ୍ଚାୟତ ସ୍ତରରେ ପ୍ରତିଷ୍ଠା ଦିବସକୁ ଉତ୍ସବ ଭଳି ପାଳନ କରିଛନ୍ତି ବିଜେଡି ନେତା ଓ କର୍ମୀ । ବିଜେଡି ମୁଖ୍ୟ କାର୍ଯ୍ୟାଳୟ ଶଙ୍ଖ ଭବନରେ ଦଳୀୟ ପତାକା ଉତ୍ତୋଳନ କରିବା ସହ ବିଜୁ ବାବୁଙ୍କ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରିଛନ୍ତି ବିଜେଡି ନେତା । ଏଥିସହ ଏକ ସମୃଦ୍ଧ, ସଶକ୍ତ ଓ ସ୍ୱାଭିମାନୀ ‘ନବୀନ ଓଡ଼ିଶା’ ଗଠନ ପାଇଁ ବ୍ରତୀ ହେବା ଲାଗି ନେତା ମାନେ ଶପଥପାଠ କରିଛନ୍ତି ।

ପ୍ରତିଷ୍ଠା ଦିବସ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଫରେଷ୍ଟ ପାର୍କ ସ୍ଥିତ ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଛନ୍ତି । ବିଜୁ ବାବୁଙ୍କୁ ବୀରତ୍ୱର ଗାଥାକୁ ସ୍ମରଣ କରିଛନ୍ତି । ଅନ୍ୟପଟେ ପ୍ରତିଷ୍ଠା ଦିବସରେ ବିଜୁ ବାବୁଙ୍କ ସ୍ମୃତିକୁ ସ୍ମରଣୀୟ କରିବା ପାଇଁ ଦଳ ପକ୍ଷରୁ ସ୍ୱତନ୍ତ୍ର ଭାବେ ସାଇକେଲ ଶୋଭାଯାତ୍ରାର ଆୟୋଜନ କରାଯାଇଛି । ଦଳୀ ମନ୍ତ୍ରୀ, ସାଂସଦ, ବିଧାୟକ, ନେତା ଓ କର୍ମୀ କଟକ ଆନନ୍ଦଭବନରୁ ଭୁବନେଶ୍ୱର ବିମାନବନ୍ଦର ପର୍ଯ୍ୟନ୍ତ ସାଇକେଲ ଶୋଭାଯାତ୍ରା କରିଛନ୍ତି । ବିମାନବନ୍ଦର ନିକଟରେ ଥିବା ବିଜୁବାବୁଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଛନ୍ତି ।

ଏହି ଅବସରରେ ନିର୍ବାଚନ ମଣ୍ଡଳୀ-ପୌରାଞ୍ଚଳ ଏବଂ ପଞ୍ଚାୟତରେ ଦଳ ପକ୍ଷରୁ ଗଣଦୌଡ, ସଭା, ରକ୍ତଦାନ ଶିବିର ଏବଂ ବୃକ୍ଷରୋପଣ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଛି । ତେବେ ବିଜେଡିର ଏହି ପ୍ରତିଷ୍ଠା ଦିବସକୁ କଟାକ୍ଷ କରିଛି ବିଜେପି । ତେବେ କୁହାଯାଉଛି, ୨୦୨୪ ନିର୍ବାଚନକୁ ହାତ ଗଣତି କେଇଟା ମାସ ବାକି ଥିବାରୁ, ଭୋଟରଙ୍କ ନିକଟତର ହେବାକୁ ଦଳର ପ୍ରତିଷ୍ଠା ଦିବସକୁ ପ୍ରଭାବୀ ଢଙ୍ଗରେ ପାଳୁଛି ବିଜୁ ଜନତା ଦଳ ।

The post ୨୭ ବର୍ଷରେ ପାଦ ଦେଲା ବିଜୁ ଜନତା ଦଳ । ଆନନ୍ଦ ଭବନରୁ ଶଙ୍ଖ ଭବନ ସାଇକେଲ ରାଲି । ନବୀନ ଓଡ଼ିଶା ଗଠନ ପାଇଁ ଶପଥ ନେଲେ ଦଳୀୟ ନେତା first appeared on Kanak News.

from Kanak News
via <a href="https://ifttt.com/?