ଛାଡ଼ିଗଲା ଲଘୁଚାପ ବର୍ଷା । ୨୨ରୁ ପଡ଼ିବ ଶୀତ ।

କନକ ବ୍ୟୁରୋ : ରାଜ୍ୟରୁ ଦକ୍ଷିଣ-ପଶ୍ଚିମ ମୌସୁମୀ ବାୟୁର ପ୍ରତ୍ୟାହାର ପ୍ରକ୍ରିୟା ଏବେ ଜାରି ରହିଛି । ଏହି ଧାରା ଅବ୍ୟାହତ ରହିଲେ ଆସନ୍ତା ଅକ୍ଟୋବର ୨୩ ତାରିଖ ସୁଦ୍ଧା ସମଗ୍ର ରାଜ୍ୟରୁ ଦକ୍ଷିଣ-ପଶ୍ଚିମ ମୌସୁମୀ ବାୟୁ ସଂପୂର୍ଣ୍ଣ ରୂପେ ବିଦାୟ ନେଇଯିବ ବୋଲି ଆଜି ଅପରାହ୍ନରେ ଭୁବନେଶ୍ୱର ସ୍ଥିତ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ଜାରି ଏକ ସୂଚନାରେ କୁହାଯାଇଛି ।

ଅପରପକ୍ଷରେ ବଙ୍ଗୋପସାଗରରେ ସୃଷ୍ଟି ହୋଇଥିବା ଦୁଇ ଦୁଇଟି ଲଘୁଚାପ ଓ ଘୂର୍ଣ୍ଣିବଳୟ ପ୍ରଭାବରେ ରାଜ୍ୟରେ ଗତ ୫ଦିନ ଧରି ବର୍ଷା ଲାଗି ରହିବା ପରେ ରାଜ୍ୟ ଉପରେ ଏବେ ଆଉ ବର୍ଷାର ପ୍ରଭାବ ନାହିଁ । ଆଜି ରାଜ୍ୟର ଉପକୂଳ ଓ ଆଭ୍ୟନ୍ତର ଜିଲ୍ଲାର କାଁ ଭାଁ ସ୍ଥାନରେ ପାଗ ମେଘୁଆ ରହିଛି । ଏବଂ କିଛି ସ୍ଥାନରେ ସାମାନ୍ୟରୁ ହାଲୁକା ବର୍ଷା ମଧ୍ୟ ହୋଇପାରେ । ତେବେ, ଆସନ୍ତାକାଲି ଠାରୁ ରାଜ୍ୟରେ ଆଉ ବର୍ଷାର ସମ୍ଭାବନା ନାହିଁ । ୨୧ ତାରିଖ ଠାରୁ ରାଜ୍ୟରେ ପାଗ ଶୁଖିଲା ରହିବ । ତେବେ ଗଞ୍ଜାମ ଓ ଗଜପତିରେ ୨୫ ତାରିଖ ପର୍ଯ୍ୟନ୍ତ ପାଗ ମେଘୁଆ ରହିବା ସହ ବିକ୍ଷିପ୍ତ ବର୍ଷା ସମ୍ଭାବନା ରହିଛି । ଅପରପକ୍ଷେ ରାଜ୍ୟର ତାପମାତ୍ରା ମଧ୍ୟ ଧୀରେଧୀରେ କମିବା ଆରମ୍ଭ କରିବ । ଅକ୍ଟୋବର ଶେଷ ସପ୍ତାହ ସୁଦ୍ଧା ରାଜ୍ୟରେ ଶୀତ ଅନୁଭୂତ ହେବ ବୋଲି ଅନୁମାନ କରାଯାଉଛି ।

୨୫ ତାରିଖରୁ ରାଜ୍ୟ ମଧ୍ୟକୁ ଜମ୍ମୁ-କଶ୍ମୀର ଅଞ୍ଚଳରୁ ଉତ୍ତରା ପବନ ବହିବା ଆରମ୍ଭ ହେବ । ଏଣୁ ୨୬ ତାରିଖରୁ ରାଜ୍ୟରେ ଉଭୟ ଦିନ ଓ ରାତିର ତାପମାତ୍ରା କମିବ । ୨୬ ରୁ ୨୮ ତାରିଖ ମଧ୍ୟରେ କେତେକ ସ୍ଥାନରେ ସର୍ବନିମ୍ନ ତାପମାତ୍ରା ପ୍ରାୟ ୨.୫ ଡିଗ୍ରି କମିବ । ତେବେ ୨୨ ତାରିଖରୁ ରାଜ୍ୟର ଭୁବନେଶ୍ୱର ସମେତ ଉପକୂଳ ଓ ଆଭ୍ୟନ୍ତରୀଣ ଦକ୍ଷିଣ ଓଡ଼ିଶାର କେତେକ ସ୍ଥାନରେ ୧.୯ରୁ ୧.୫ ଡିଗ୍ରି ପର୍ଯ୍ୟନ୍ତ ସର୍ବନିମ୍ନ ତାପମାତ୍ରା କମିବା ଯୋଗୁଁ ହାଲୁକା ଶୀତ ଅନୁଭୂତ ହେବ ।

The post ଛାଡ଼ିଗଲା ଲଘୁଚାପ ବର୍ଷା । ୨୨ରୁ ପଡ଼ିବ ଶୀତ । first appeared on Kanak News.

from Kanak News
via <a href="https://ifttt.com/?

ସଫେଇ କର୍ମଚାରୀଙ୍କ ମୃତ୍ୟୁ ଘଟଣା, ପରିବାରକୁ ଭେଟିବାକୁ ଗଲାବେଳେ ପ୍ରିୟଙ୍କାଙ୍କୁ ହେପାଜତକୁ ନେଲା ପୋଲିସ

କନକ ବ୍ୟୁରୋ : ୟୁପିର ଆଗ୍ରାରେ ପୋଲିସ ହେପାଜତରେ ଜଣେ ସଫେଇ କର୍ମଚାରୀଙ୍କ ମୃତ୍ୟୁକୁ ନେଇ ପୁଣି ୟୁପି ରାଜନୀତି ସରଗରମ ହୋଇଛି । ମୃତ ଯୁବକଙ୍କ ପରିବାରକୁ ଭେଟିବାକୁ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଯିବା ବେଳେ ଆଗ୍ରା ଠାରେ ପୋଲିସ ପ୍ରିୟଙ୍କାଙ୍କୁ ହେପାଜତକୁ ନେଇଛି ।

କହିରଖୁ କି ଅରୁଣ କୁମାର ନାମରେ ଜଣେ ସଫେଇ କର୍ମଚାରୀଙ୍କୁ ପୋଲିସ କଷ୍ଟଡି ଭିତରେ ପିଟି ପିଟି ମାରିଦେଇଥିବା ଅଭିଯୋଗ ହୋଇଛି । ବାଲ୍ମୀକି ସମାଜର ଯୁବକ ଅରୁଣଙ୍କୁ ପୋଲିସ ଚୋରୀ ଅଭିଯୋଗରେ ଗିରଫ କରିଥିଲା । ଆସନ୍ତା ବର୍ଷ ୟୁପିରେ ବିଧାନସଭା ନିର୍ବାଚନ ଥିବାରୁ ଏହାକୁ ନେଇ ବିରୋଧୀମାନେ ହୋହାଲ୍ଲା କରିଛନ୍ତି ।

ଅନ୍ୟପଟେ ପ୍ରିୟଙ୍କା ଗାନ୍ଧୀଙ୍କୁ ପୋଲିସ ଅଟକାଇବା ପରେ ପ୍ରିୟଙ୍କା କହିଛନ୍ତି କି “ଶାସକଙ୍କ ଚାପରେ ପୋଲିସର ସ୍ଥିତି ଏଭଳି ହୋଇଯାଇଛି କି,ନିଜେ କିଛି କହିବାର କ୍ଷମତା ପୋଲିସ ହରାଇଛି, ସେମାନଙ୍କ ଅଧିକାରୀ ବି ଜାଣିଛନ୍ତି ଏଭଳି ଅଟକ ରଖିବା ବେଆଇନ କିନ୍ତୁ ସବୁ ସ୍ଥାନରେ ଧାରା ୧୪୪ର ଆଳ ଦେଖାଇ ପୋଲିସ ନିଜେ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି କରୁଛି ”

କେବଳ ସେତିକି ନୁହେଁ, ଏହା ପୂର୍ବରୁ ବି ପ୍ରିୟଙ୍କା ଗାନ୍ଧୀ ଟ୍ୱିଟ କରି କହିଥିଲେ କି “ଅରୁଣ ବାଲ୍ମୀକିଙ୍କ ମୃତ୍ୟୁ ପୋଲିସ ହେପାଜତରେ ହୋଇଛି । ତାଙ୍କ ପରିବାର ନ୍ୟାୟ ମାଗୁଛି, ମୁଁ ସେମାନଙ୍କ ପରିବାରକୁ ଭେଟିବାକୁ ଚାହୁଁଛି, ହେଲେ କେଉଁ ଭୟରେ ୟୁପି ସରକାର ମୋତେ ସେଠାକୁ ଯିବାକୁ ଦେଉ ନାହିଁ ?”

ଜାତୀୟ ଗଣମାଧ୍ୟମକୁ ପ୍ରିୟଙ୍କା ଗାନ୍ଧୀ କହିଛନ୍ତି କି ସେ ପୀଡିତ ପରିବାର ସହ କିଛି ଦୁଖ ବାଣ୍ଟିବାକୁ ଆଗ୍ରା ଯିବାକୁ ଚାହୁଁଛନ୍ତି । ହେଲେ ବିରୋଧୀ ନେତାଙ୍କ ଅଗ୍ରଗତିକୁ ଡରି ସରକାର ଆମକୁ ସେଠାକୁ ଯିବାକୁ ଦେଉ ନାହାଁନ୍ତି ।
କହିରଖୁ କି ସେହି ଉତ୍ତରପ୍ରଦେଶର ଖେରି ଠାରେ ହୋଇଥିବା ହିଂସକ ଘଟଣାରେ ମୃତ ଚାଷୀଙ୍କ ପରିବାରକୁ ଭେଟିବାକୁ ଯିବା ବେଳେ ପ୍ରିୟଙ୍କାଙ୍କୁ ବି ପୋଲିସ ହେପାଜତକୁ ନେଇଥିଲା । ଏହାକୁ ନେଇ ସେତେବେଳେ ରାଜନୈତିକ ମାହୋଲ ବେସ୍ ସରଗରମ ହୋଇଥିଲା ।

The post ସଫେଇ କର୍ମଚାରୀଙ୍କ ମୃତ୍ୟୁ ଘଟଣା, ପରିବାରକୁ ଭେଟିବାକୁ ଗଲାବେଳେ ପ୍ରିୟଙ୍କାଙ୍କୁ ହେପାଜତକୁ ନେଲା ପୋଲିସ first appeared on Kanak News.

from Kanak News
via <a href="https://ifttt.com/?

ସନସାଇନ୍ କଲେଜରେ ଏମିତି ଥାଲା ନିୟମ । ନିଜ ଭଉଣୀ ସହ ବି କଲେଜରେ କଥାହେବାକୁ ମିଳୁନଥିଲା ଅନୁମତି, ନିୟମ ନମାନିଲେ ମିଳୁଥିବା ଟିସି ଦେବାର ଧମକ

କନକ ବ୍ୟୁରୋ : ସନସାଇନ୍ କଲେଜରେ ଚାଲିଥିଲା ଅଜବ ନିୟମ । ଗୋବିନ୍ଦ ସାହୁ ତିଆରି କରିଥିବା ନିୟମକୁ ମାନି ସେଠାରେ ପାଠ ପଢୁଥିଲେ ଛାତ୍ରଛାତ୍ରୀ । ନିୟମ ନମାନିଲେ କଲେଜରୁ ବାହାର କରିଦେବା ପାଇଁ ଧମକ ଦିଆଯାଉଥିଲା । ସବୁ ଜାଣି ସବୁ ଦେଖି ଚୁପଚାପ୍ ରହୁଥିଲେ ଛାତ୍ରଛାତ୍ରୀ ।
ସନସାଇନ୍ କଲେଜରେ ପାଠ ପଢୁଥିବା ଛାତ୍ରଛାତ୍ରୀଙ୍କ କହିବା ଅନୁସାରେ, କଲେଜରେ ପୁଅ ଝିଅ କଥାବାର୍ତ୍ତା କରିବା ଉପରେ କଟକଣା ଲଗାଯାଇଥିଲା । ଯଦି କୌଣସି ପୁଅ-ଝିଅ କଲେଜ ଭିତରେ କଥା ହେଉଥିଲେ ତାହେଲେ ତାଙ୍କୁ କଲେଜରୁ ବାହାର କରିଦିଆଯାଉଥିଲା । ପୁଅ-ଝିଅ କଥା ହେଲେ ପାଠ ପଢା ଉପରେ ପ୍ରଭାବ ପଡିବ କହି ଏପରି ନିୟମ କରାଯାଇଥିଲା । ଏପରିକି ନିଜ ଭଉଣୀ ସହ ବି କଥା ହେବା ଉପରେ କଟକଣା ଲଗାଯାଇଥିଲା । କଲେଜ ଭିତରେ ନିଜ ଭାଇ ତାର ଭଉଣୀ ସହ କଥା ହୋଇ ପାରିବ ନାହିଁ । ଯଦି ଏହାକୁ ନେଇ କିଏ ଆପତ୍ତି କରେ ତେବେ ଟିସି ଦେବା ପାଇଁ ଧମକ ମିଳୁଥିଲା । ସବୁ ଦେଖି ସବୁ ଶୁଣି ଚୁପ୍ ରହୁଥିଲେ ଛାତ୍ରଛାତ୍ରୀ ।
ଆଜିର ଏହି ଆଧୁନିକ ଯୁଗରେ ବି ସେଠାରେ ପୁଅ-ଝିଅଙ୍କ ଭିତରେ ଦୂରତା ବଢାଯାଉଥିଲା । ପାର୍ଥକ୍ୟ ସୃଷ୍ଟି କରାଯାଉଥିଲା । ପିଲାଙ୍କ ମୁଣ୍ଡରେ ଭର୍ତିକରାଯାଉଥିଲା କି, ଯଦି ଗୋଟିଏ ପୁଅ ଗୋଟିଏ ଝିଅ ସହିତ କଥା ହୁଏ ତାହେଲେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢିଉଠିବ ଆଉ ପାଠପଢାରେ ଖରାପ ହେବ । ଏହିଭଳି କଥା ଛାତ୍ରଛାତ୍ରୀଙ୍କ ମୁଣ୍ଡରେ ଭର୍ତ୍ତି କରାଯାଉଥିଲା । ଗୋଟିଏ କଲେଜରେ ପୁଅ ଝିଅ ପାଠ ପଢିବି ପରସ୍ପର ପରସ୍ପର ସହ କଥା ହୋଇପାରୁନଥିଲେ । ଯିଏ କଲେଜର ନିୟମକୁ ଉଲଂଘନ କରୁଥିଲା ତାକୁ କଲେଜରୁ ବାହାର କରିଦିଆଯାଉଥିଲା ଅବା ଟିସି ଦେବାକୁ ଧମକ ଦିଆଯାଉଥିଲା । ଏବେ ଗୋବିନ୍ଦଙ୍କ କଳା କାରନାମାର ପର୍ଦ୍ଦାଫାସ ହେବା ପରେ ଗୋଟିଏ ପରେ ଗୋଟିଏ ଗୁମର ଫିଟୁଛି ।

The post ସନସାଇନ୍ କଲେଜରେ ଏମିତି ଥାଲା ନିୟମ । ନିଜ ଭଉଣୀ ସହ ବି କଲେଜରେ କଥାହେବାକୁ ମିଳୁନଥିଲା ଅନୁମତି, ନିୟମ ନମାନିଲେ ମିଳୁଥିବା ଟିସି ଦେବାର ଧମକ first appeared on Kanak News.

from Kanak News
via <a href="https://ifttt.com/?

ଅନଲାଇନ୍ କ୍ଲାସ ହେଲା କାଳ । ମୋବାଇଲ ଫାଟି ଚାଲିଗଲା ଛାତ୍ରଙ୍କ ଜୀବନ ।

କନକ ବ୍ୟୁରୋ: ଚାଲିଥିଲା ଅନଲାଇନ୍ କ୍ଲାସ୍ । ଲଗାତାର କ୍ଲାସ ଯୋଗୁଁ ମୋବାଇଲରୁ ଚାର୍ଜ ସରିଯାଇଥିଲା । ହେଲେ ଅନ୍ୟ କ୍ଲାସ ଥିବାରୁ ମୋବାଇଲକୁ ଚାର୍ଜରେ ବସାଇ ଛାତ୍ର ଜଣକ କରୁଥିଲେ କ୍ଲାସ୍ । ଏହି ସମୟରେ ଅଚାନକ ଫାଟିଥିଲା ମୋବାଇଲ । ଏହି ନିଆଁରେ ଛାତ୍ର ଜଣଙ୍କର ପୋଷାକରେ ନିଆଁ ଲାଗିଯିବାରୁ ତାଙ୍କ ଦେହରେ ନିଆଁ ଲାଗିଯାଇଥିଲା । ଏଥିରେ ଅବସ୍ଥାରେ ତାଙ୍କୁ ହସ୍ପିଟାଲ ନିଆଯାଇଥିଲେ ବି ତାଙ୍କର ମୃତ୍ୟୁ ହୋଇଛି ।

 

ଏହି ଘଟଣା ଭିଏତନାମର । ‘ ଦ ସନ୍ ୟୁକେ’ର ରିପୋର୍ଟ ମୁତାବକ କରୋନା ଯୋଗୁଁ ସ୍କୁଲ ଗୁଡିକ ବନ୍ଦ ରହିଥିବାରୁ ଏବେ ଅନଲାଇନ୍ କ୍ଲାସ୍ ଚାଲିଛି । ୧୧ ବର୍ଷର ଛାତ୍ର ଏହି କ୍ଲାସ ନେଉଥିଲା । ମଙ୍ଗଳବାର ମୋବାଇଲରୁ ଚାର୍ଜ ସରିଯିବାରୁ ମୋବାଇଲକୁ ଚାର୍ଜରେ ବସାଇ କାନରେ ଇଅର ଫୋନ ଦେଇ କ୍ଲାସ୍ ଆଟେଣ୍ଡ କରୁଥିଲେ । ଏହି ସମୟରେ ମୋବାଇଲ ଫାଯି ତାଙ୍କ ପୋଷାକରେ ନିଆଁ ଲାଗିଯିବାରୁ ଗୁରୁତର ଭାବେ ପୋଡିଯାଇଥିଲେ ଛାତ୍ର ଜଣକ । ଏହି ଘଟଣାର ଯାଞ୍ଚ ଆରମ୍ଭ କରିଛି ପୋଲିସ ।

ପୋଲିସର କହିବା ଅନୁସାରେ ଭିଏତନାମର ଦାନ୍ ଜିଲ୍ଲାରେ ସମସ୍ତ ସ୍କୁଲ ଖୋଲିଯାଇଥିବାବେଳେ ସପ୍ତାହକୁ କିଛି ଦିନ ଅନଲାଇନ୍ କ୍ଲାସ୍ ହେଉଛି । ଏହି ଛାତ୍ର ଜଣକ ମଧ୍ୟ ଅନଲାଇନ୍ ଆଟେଣ୍ଡ କରୁଥିଲା ।

The post ଅନଲାଇନ୍ କ୍ଲାସ ହେଲା କାଳ । ମୋବାଇଲ ଫାଟି ଚାଲିଗଲା ଛାତ୍ରଙ୍କ ଜୀବନ । first appeared on Kanak News.

from Kanak News
via <a href="https://ifttt.com/?

ସୈତାନକୁ ଧରାଇ ଦେଲା ୭୦ ଘଣ୍ଟାର ସିସିଟିଭି ଚିତ୍ର । ଗୋବିନ୍ଦକୁ ଏମିତି ଧରିଥିଲା ପୋଲିସ 

କନକ ବ୍ୟୁରୋ : ଯେତେବେଳେ ମମିତା ନିଖୋଜ ମାମଲାର ଖୋଳତାଡ କରୁଥିଲା ପୋଲିସ୍ ଆଉ ଗୋବିନ୍ଦ ସାହୁଙ୍କୁ ହେପାଜତକୁ ନେଇଥିଲା ସେତେବେଳେ କୌଶଳ କରି ପୋଲିସ ହେପାଜତରୁ ଚମ୍ପଟ ମାରିଥିଲା ଏହି ଅଭିଯୁକ୍ତ ଗୋବିନ୍ଦ ସାହୁ । ପରେ ପୋଲିସ ଗୋବିନ୍ଦକୁ ଖୋଜିବା ପାଇଁ ଲାଗିପଡିଥିଲା । ଗୋବିନ୍ଦକୁ ଧରାଇ ଦେଲେ ୨୦ହଜାର ଟଙ୍କାର ପୁରସ୍କାର ରାଶୀ ପ୍ରଥମେ ଘୋଷଣା କରିଥିଲା ପୋଲିସ । ପରେ ଏହି ପୁରସ୍କାର ରାଶୀକୁ ବଢାଇ ୧ଲକ୍ଷ ଟଙ୍କା କରିଥିଲା ପୋଲିସ । ଅର୍ଥାତ ଗୋବିନ୍ଦକୁ ଧରାଇଦେଲେ ବା ଗୋବିନ୍ଦ କେଉଁଠି ଅଛି ତାର ସୂଚନା ଦେଲେ ୧ଲକ୍ଷ ଟଙ୍କା ମିଳିବ ବୋଲି ପୋଲିସ ପକ୍ଷରୁ ଘୋଷଣା କରାଯାଇଥିଲା । ତେବେ ପୋଲିସକୁ ବିଭିନ୍ନ ଦିଗରୁ ଗୋବିନ୍ଦଙ୍କ ସୂଚନା ମିଳିଥିଲା ।

ଗୋବିନ୍ଦକୁ ଧରାଇଦେଲା ସିସିଟିଭି କ୍ୟାମେରା !  ୪୦ରୁ ୪୫ କିଲୋମିଟର ଭତରେ ଥିବା ସିସିଟିଭି କ୍ୟାମେରାକୁ ଯାଞ୍ଚ କରିଥିଲା ପୋଲିସ । ପ୍ରାୟ ୭୦ ଘଣ୍ଟାରେ ସିସିଟିଭି ଦୃଶ୍ୟକୁ ଯାଞ୍ଚ କରିଥିଲେ ଏକ ଟିମ୍ । ଅନେକ ପ୍ରତ୍ୟେକ୍ଷ୍ୟ ଦର୍ଶୀ ଥିଲେ, ଯେଉଁମାନେ ପୋଲିସକୁ ଗୋବିନ୍ଦଙ୍କ ବାବଦରେ ସୂଚନା ଦେଇଥିଲେ । ଅନେକ ସାଇଣ୍ଟିଫିକ୍ ରିପୋର୍ଟ, ଗୋବିନ୍ଦର ଗତିବିଧିକୁ କ୍ରସ୍ ଚେକ୍ କରି ଘଟଣା ସ୍ଥଳରେ ପହଞ୍ଚିଥିଲା ପୋଲିସ୍ ।

ସେପଟେ ଗୋବିନ୍ଦର ସାନ ଭଉଣୀ ଘର ଉପରେ ନଜର ରଖିଥିଲା ପୋଲିସ । ଯେତେବେଳେ ଗୋବିନ୍ଦ ସାନ ଭଉଣୀ ଘରକୁ ଲୁଚିବା ପାଇଁ ଯାଇଥିଲା ସେଠାରେ ସାନ ଭଉଣୀର ସାସୁଘର ଲୋକେ ଗୋବିନ୍ଦକୁ ଘରେ ଆଶ୍ରୟ ଦେଇନଥିଲେ । ଘର ବାରି ପଛପଟେ ଥିବା ଏକ ଆଖୁ କିଆରିରେ ଲୁଚିବାକୁ କହିଥିଲେ । ଆଉ ଗୋବିନ୍ଦ ଆଖୁ କିଆରି ଭିତରେ ଲୁଚିଥିଲା । ସେଠାରେ ତା’ ପାଖରେ ଖାଇବା ପିଇବା ପହଞ୍ଚାଯାଉଥିଲା । ଯାହା ଉପରେ କିଛି ସ୍ଥାନୀୟ ଲୋକଙ୍କ ନଜର ରହିଥିଲା । ଆଉ ସ୍ଥାନୀୟ ଲୋକଙ୍କ ସହାୟତାରେ ଗୋବିନ୍ଦକୁ ଧରିବାରେ ସଫଳ ହେଲା ପୋଲିସ । ଏବେ ଗୋବିନ୍ଦ ନିଜର ଦୋଷ ସ୍ୱୀକାର କରିବା ପରେ ଅଧିକ ପଚରାଉଚରା ପାଇଁ ରିମାଣ୍ଡ ଆବେଦନ କରିଛି ପୋଲିସ । ମମିତାଙ୍କ ହତ୍ୟା କରିଥିବା କଥା ଗୋବିନ୍ଦ ମାନିଥିଲେ ବି ପୋଲିସ ତାର ତଦନ୍ତ ଜାରି ରଖିଛି । ଏହି ମାମଲାରେ କେବଳ ଗୋବିନ୍ଦଙ୍କ ହାତ ରହିଛି ନା ଅନ୍ୟ କିଏ ଏଥିରେ ସାମିଲ ଅଛନ୍ତି ସେନେଇ ଖୋଳତାଡ ଜାରି ରହିଛି ।

The post ସୈତାନକୁ ଧରାଇ ଦେଲା ୭୦ ଘଣ୍ଟାର ସିସିଟିଭି ଚିତ୍ର । ଗୋବିନ୍ଦକୁ ଏମିତି ଧରିଥିଲା ପୋଲିସ  first appeared on Kanak News.

from Kanak News
via <a href="https://ifttt.com/?

ମୁମ୍ବାଇ ନାରକୋଟିକ୍ ସେଲକୁ ବଡ ସଫଳତା, ୨୧ କୋଟିର ଡ୍ରଗ୍ସ ସହ ମହିଳା ଗିରଫ

କନକ ବ୍ୟୁରୋ : ଦେଶରେ ଦିନକୁ ଦିନ ନିଶା କାରବାର ବଢିବାରେ ଲାଗିଛି । ପ୍ରଥମେ ମୁନ୍ଦ୍ରା ବନ୍ଦର, ପରେ କ୍ରୁଜ ସିପ ଓ ଆଜି ମୁମ୍ବାଇର ଜଣେ ମହିଳାଙ୍କ ଠାରୁ ୨୧ କୋଟି ଟଙ୍କାର ୭ କେଜି ଡ୍ରଗ୍ସ ମିଳିବା ପରେ ଭାରତ ଏକ ନିଶାର ହବ୍ ହେବାକୁ ଯାଉଥିବା ଆଶଂକା କରାଯାଉଛି ।

ମହାରାଷ୍ଟ୍ରରେ ମୁମ୍ବାଇ କ୍ରାଇମବ୍ରାଞ୍ଚର ଏଣ୍ଟି ନାରକୋଟିକ୍ ସେଲ ବୁଧବାର ଦିନ ଏକ କାର୍ଯ୍ୟାନୁଷ୍ଠାନ ନେଇଛି । ଏହି ସେଲ ତରଫରୁ ମୁମ୍ବାଇର ସାୟନ ଅଞ୍ଚଳରେ ଚଢାଉ କରାଯାଇ ୨୧ କୋଟି ଟଙ୍କାର ୭ କେଜି ହେରୋଇନ୍ ଜବତ କରିଛି । ଏହାସହ ଏହି ହେରୋଇନ କାରବାରରେ ସଂପୃକ୍ତ ଜଣେ ମହିଳାଙ୍କୁ ବି ଗିରଫ କରିବାରେ ସଫଳ ହୋଇଛି ଏହି ସେଲ୍ । ଏବେ ମହିଳା ଜଣଙ୍କୁ ପୋଲିସ ନିଜ ହେପାଜତକୁ ନେଇ ପଚରା ଉଚରା ଚଳାଇଛି । ଗିରଫ ହୋଇଥିବା ମହିଳା ଜଣଙ୍କ ମାନଖୁଦ ଅଞ୍ଚଳର ଅମିନା ହମଜା ଶେଖ ଓରଫ ଲାଲି ବୋଲି ପରିଚୟ ମିଳିଛି ।

ମୁମ୍ବାଇ ଏଏନସିର ଜଣେ ଅଧିକାରୀଙ୍କ କହିବା ମୁତାବକ ଜବତ ହୋଇଥିବା ହେରୋଇନ ଅନ୍ୟ କିଛି ବେପାରୀଙ୍କୁ ଦେବା ସହ ଗ୍ରାହକମାନଙ୍କୁ ବିକ୍ରି କରିବାକୁ ଅଣାଯାଇଥିଲା । ଅଧିକାରୀ ଜଣଙ୍କ କହିଛନ୍ତି କି ଏହା ପୂର୍ବରୁ ୨୦୧୫ ଓ ୨୦୧୮ ରେ ଲାଲିକୁ ପ୍ରତିବନ୍ଧିତ ଔଷଧ କାରବାର ଅଭିଯୋଗରେ ଗିରଫ କରାଯାଇଥିଲା ।

The post ମୁମ୍ବାଇ ନାରକୋଟିକ୍ ସେଲକୁ ବଡ ସଫଳତା, ୨୧ କୋଟିର ଡ୍ରଗ୍ସ ସହ ମହିଳା ଗିରଫ first appeared on Kanak News.

from Kanak News
via <a href="https://ifttt.com/?

କୋର୍ଟରେ ହାଜର ହେଲେ ଗୋବିନ୍ଦ ସାହୁ, ଗେଟ ସାମ୍ନାରେ ପୋଲିସ-କଂଗ୍ରେସ କର୍ମୀ ଧସ୍ତାଧସ୍ତି । 

କନକ ବ୍ୟୁରୋ : ମମିତା ହତ୍ୟାକାଣ୍ଡ ଉପରୁ ହଟିଛି ପରଦା । ପରକୀୟା ପ୍ରୀତି ସର୍ମ୍ପକ ବାବଦରେ ଜାଣିଥିବାରୁ ମମିତାଙ୍କୁ ଗୋବିନ୍ଦ ସାହୁ ହତ୍ୟା କରିଥିବା କହିଛି ପୋଲିସ । ଆଉ ଏହାସହ ଅଭିଯୁକ୍ତ ଗୋବିନ୍ଦଙ୍କୁ ବଙ୍ଗୋମୁଣ୍ଡା ଜେଏମଏଫସି କୋର୍ଟରେ ହାଜର କରାଯାଇଛି । କୋର୍ଟରେ ହାର୍ଜର କରାଯିବା ପରେ ଆଜି ଗୋବିନ୍ଦଙ୍କୁ ରିମାଣ୍ଡରେ ଆଣିପାରେ ପୋଲିସ । ରିମାଣ୍ଡରେ ଆଣି ପଚରାଉଚରା ସହ ହତ୍ୟାକାଣ୍ଡ ବାବଦରେ ଆଉ କିଛି ତଥ୍ୟ ହାସଲ କରିବା ଲକ୍ଷ୍ୟରେ ରହିଛି ପୋଲିସ । ଅନ୍ୟପଟେ ଜେଏମଏଫସି କୋର୍ଟରେ ଗୋବିନ୍ଦଙ୍କୁ ହାଜର କରାଯିବା ସମୟରେ କୋର୍ଟର ଗେଟ ଆଗରେ ପୋଲିସ-କଂଗ୍ରେସ କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଛି ।

ମମିତା ହତ୍ୟାକାଣ୍ଡକୁ ନେଇ ଏବେ ସରକାରଙ୍କୁ ଟାର୍ଗେଟ କରି ଆସୁଛନ୍ତି ବିରୋଧୀ ବିଜେପି ଓ କଂଗ୍ରେସ । କାରଣ ମମିତା ହତ୍ୟାକାଣ୍ଡର ମାଷ୍ଟରମାଇଣ୍ଡ ଗୋବିନ୍ଦ ସାହୁଙ୍କ ସହ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କର ଘନିଷ୍ଠ ସମ୍ପର୍କ ରହିଛି । ଏପରିକି ମମିତା ଯେଉଁ ସ୍କୁଲର ଅଧ୍ୟକ୍ଷା ଥିଲେ ସେହି ସ୍କୁଲକୁ ଅନେକଥର ଯାଇଛନ୍ତି ଦିବ୍ୟଶଙ୍କର । ଯେଉଁଥିପାଇଁ ମନ୍ତ୍ରୀ ଦିବ୍ୟଶଙ୍କରଙ୍କୁ ନେଇ ମଧ୍ୟ ସାଧାରଣରେ ଅନେକ ଚର୍ଚ୍ଚା ହେଉଛି । ଏପରିକି ଗୋବିନ୍ଦ ସାହୁଙ୍କର ଯେଉଁ କଲେଜକୁ ଦିବ୍ୟଶଙ୍କର ଯାଉଥିଲେ ସେଠାରେ ଅନୈତିକ କାର୍ଯ୍ୟକଳାପ ଚାଲୁଥିବା ନେଇ ସ୍ଥାନୀୟ ଲୋକେ କହିଛନ୍ତି । ଯାହା ବାବଦରେ ମମିତା ଜାଣିଥିଲେ, କିଛି ଭିଡ଼ିଓ ମଧ୍ୟ ମମିତା ରଖିଥିବା ନେଇ ଅଡିଓ ଟେପ୍ ଭାଇରାଲ ହୋଇଥିଲା । ଯେଉଁଥିପାଇଁ ମମିତାଙ୍କୁ ହତ୍ୟା କରାଯାଇଥିବା କୁହାଯାଉଛି । ତେଣୁ ମମିତା ମୃତ୍ୟୁକୁ ନେଇ ରାଜ୍ୟରେ ପ୍ରବଳ ବିରୋଧ ଦେଖାଦେଇଥିବା ବେଳେ ମନ୍ତ୍ରୀ ନିଜ ପଦରୁ ଇସ୍ତଫା ଦିଅନ୍ତୁ ବୋଲି ବିରୋଧୀ ଦାବି କରିଛନ୍ତି ।

The post କୋର୍ଟରେ ହାଜର ହେଲେ ଗୋବିନ୍ଦ ସାହୁ, ଗେଟ ସାମ୍ନାରେ ପୋଲିସ-କଂଗ୍ରେସ କର୍ମୀ ଧସ୍ତାଧସ୍ତି ।  first appeared on Kanak News.

from Kanak News
via <a href="https://ifttt.com/?

ପରକୀୟା ସମ୍ପର୍କ ଜାଣିଥିଲେ ମମିତା, ଯେଉଁଥିପାଇଁ ଯୋଜନାବଦ୍ଧ ଭାବେ ହତ୍ୟା କରିଛି ଗୋବିନ୍ଦ  । ସୂଚନା ଦେଲେ ଉତ୍ତରାଞ୍ଚଳ ଡିଆଇଜି । 

କନକ ବ୍ୟୁରୋ : ମମିତା ମର୍ଡର ମିଷ୍ଟ୍ରି ଉପରୁ ହଟିଛି ପରଦା । ପ୍ରେସମିଟ୍ କରି ବଡ ସୂଚନା ଦେଇଛନ୍ତି ଉତ୍ତରାଞ୍ଚଳ ଡିଆଇଜି । ମମିତାଙ୍କୁ ଯୋଜନାବଦ୍ଧ ଭାବେ ହତ୍ୟା କରିଥିଲା ଅଭିଯୁକ୍ତ ଗୋବିନ୍ଦ ସାହୁ । ମମିତାଙ୍କୁ କାର ଭିତରେ ହତ୍ୟା କରାଯାଇଥିଲା । ଗୋବିନ୍ଦଙ୍କ ପରକୀୟା ପ୍ରୀତି ସମ୍ପର୍କ ବାବଦରେ ଜାଣିଥିଲେ ମମିତା । ଏପରିକି ବାରମ୍ବାର ଏନେଇ ଗୋବିନ୍ଦଙ୍କୁ ଧମକ ଦେଉଥିଲେ ମମିତା । କାଳେ ଏହି ଘଟଣା ବାହାରକୁ ଆସିଯିବ ସେଥିପାଇଁ ମମିତାଙ୍କୁ ହତ୍ୟା କରାଯାଇଥିବା କହିଛି ପୋଲିସ ।

ମମିତାଙ୍କୁ ହତ୍ୟା କରିବାକୁ ପୂର୍ବରୁ ଯୋଜନା କରିଥିଲା ଗୋବିନ୍ଦ । ଆଉ ଯୋଜନା ଅନୁସାରେ ମମିତାଙ୍କୁ ଭବାନୀପାଟଣା ଡାକିଥିଲେ ଗୋବିନ୍ଦ । ଆଉ ୮ ତାରିଖ ଦିନ ଭବାନୀପାଟଣାରୁ କେ ଗାଁକୁ ଫେରୁଥିବା ରାସ୍ତାରେ ମମିତାଙ୍କୁ ହତ୍ୟା କରାଯାଇଥିଲା । ତେବେ ତଣ୍ଟି ଚିପି ହତ୍ୟା କରାଯାଇଛି କି ନାହିଁ ତାହା ଏଯାଏଁ ସ୍ପଷ୍ଟ ହୋଇନାହିଁ । ହତ୍ୟା କରିବା ପରେ ମମିତାଙ୍କ ମୃତଦେହକୁ ସାଥୀରେ ନେଇଯାଇଥିଲା ଗୋବିନ୍ଦ । ହତ୍ୟା ପରେ ଅନ୍ଧାର ହେଲା ପରେ  ମୃତଦେହକୁ ଷ୍ଟାଡିୟମକୁ ନେଇ ପୋଡିଥିଲେ ଗୋବିନ୍ଦ । ପରଦିନ ସକାଳେ ଜେସିବି ମେସିନରେ ଉକ୍ତ ମୃତଦେହକୁ ପୋତାଯାଇଥିଲା ।

ଏହି ହତ୍ୟାକାଣ୍ଡରେ କେତେ ଜଣଙ୍କ ସମ୍ପୃକ୍ତି ରହିଛି ତାହାର ଯାଞ୍ଚ କରୁଛି ପୋଲିସ । ୭୫ରୁ ଅଧିକ ସିସିଟିଭି ଫୁଟେଜ ଦେଖାଯାଇଛି, ସାଇଣ୍ଟିଫିକ୍ ପ୍ରମାଣ ମିଳିଛି ଓ ପ୍ରତ୍ୟକ୍ଷଦର୍ଶୀଙ୍କ ବୟାନକୁ ଆଧାର କରି ତଦନ୍ତ ଆଗକୁ ବଢାଇଥିଲା ପୋଲିସ । ଆଉ ଶେଷରେ ଉକ୍ତ ଷ୍ଟାଡିୟମ ପାଖରେ ପହଞ୍ଚି ମୃତଦେହକୁ ଉଦ୍ଧାର କରାଯାଇଥିଲା । ଖୁବଶୀଘ୍ର ଚାର୍ଜସିଟ୍ ଦାଖଲ ହେବ ବୋଲି କହିଛନ୍ତି ଉତ୍ତରାଞ୍ଚଳ ଡିଆଇଜି ।

The post ପରକୀୟା ସମ୍ପର୍କ ଜାଣିଥିଲେ ମମିତା, ଯେଉଁଥିପାଇଁ ଯୋଜନାବଦ୍ଧ ଭାବେ ହତ୍ୟା କରିଛି ଗୋବିନ୍ଦ  । ସୂଚନା ଦେଲେ ଉତ୍ତରାଞ୍ଚଳ ଡିଆଇଜି ।  first appeared on Kanak News.

from Kanak News
via <a href="https://ifttt.com/?

 ପୁଣି ଜେଲ ଫେରିଗଲେ ଆରୟନ ଖାନ, କୋର୍ଟରେ ଜାମିନ ଆବେଦନ ଖାରଜ

କନକ ବ୍ୟୁରୋ : ବହୁ ଚର୍ଚ୍ଚିତ କ୍ରୁଜ ଡ୍ରଗ୍ସ ମାମଲାରେ ଆଜି ପୁଣିଥରେ ଅଭିନେତା ଶାହାରୁଖ ଖାନଙ୍କ ପୁଅ ଆରୟନ ନିରାଶ ହୋଇଛନ୍ତି । ତାଙ୍କ ଜାମିନ ଆବେଦନ ଉପରେ ଶୁଣାଣି କରି କୋର୍ଟ ଆଜି ଆବେଦନକୁ ଖାରାଜ କରିଦେଇଛନ୍ତି । ଡ୍ରଗ୍ସ ମାମଲାରେ ଫସିଥିବା ଆରୟନଙ୍କ ଜାମିନ ଆବେଦନ ଉପରେ କିଛିଦିନ ହେବ ତାରିଖ ପରେ ତାରିଖ ଦେଇ ଚାଲିଛନ୍ତି କୋର୍ଟ । ଅକ୍ଟୋବର ୧୪ ତାରିଖରେ ସେସନ କୋର୍ଟର ଜଜ୍ ଓକିଲଙ୍କ ଦଲିଲ୍ ଶୁଣିବା ପରେ ନିଷ୍ପତ୍ତି ସୁରକ୍ଷିତ ରଖିଥିଲେ । କେବଳ ଆରୟନ ନୁହଁନ୍ତି ଏହି ମାମଲାରେ ଛନ୍ଦି ହୋଇଥିବା ଅରବାଜ ମଚେଣ୍ଟ ଓ ମୁନମୁନ ଧମେଚାଙ୍କ ଜାମିନ ଆବେଦନ ବି ଖାରଜ କରିଛନ୍ତି କୋର୍ଟର୍ । କହିରଖୁ କି ଆରୟନ ଡ୍ରଗ୍ସ ମାମଲାରେ ଛନ୍ଦି ହୋଇ ଅକ୍ଟୋବର ୩ ତାରିଖ ଦିନ ଗିରଫ ହୋଇଥିଲେ । ସେବେଠାରୁ ୧୭ ଦିନ ହେବ ସେ ଜେଲରେ ଅଛନ୍ତି

ଏନସିବି ଅଭିଯୋଗ କରିଛି କି ଗୋଆ ଯାଉଥିବା ଏକ କ୍ରୁଜ ସିପ୍ ରେ  ଡ୍ରଗ୍ସ ପାର୍ଟି ଆୟୋଜନ କରାଯାଇଥିଲା । ଏହି ପାର୍ଟିରେ ଆରୟନ ସାମିଲଥିଲେ । ଅନ୍ୟପଟେ ଆରୟନଙ୍କ ଓକିଲ କହିଥିଲେ କି ଆରୟନ ସେହି ପାର୍ଟିରେ ସାମିଲ ଥିଲେ ବି ଏନସିବି ତାଙ୍କ ନିକଟରୁ କୌଣସି ମାଦକ ଦ୍ରର୍ବ୍ୟ ଜବତ୍ କରିନାହିଁ । ତେଣୁ ତାଙ୍କୁ ଜାମିନରେ ଛାଡିବାକୁ କୋର୍ଟରେ ଯୁକ୍ତି ବାଢିଥିଲେ ଆରୟନଙ୍କ ଓକିଲ । ହେଲେ କୋର୍ଟ ଏହି ମାମଲାରେ ଆରୟନଙ୍କ ସମେତ ତାଙ୍କ ସହ ଗିରଫ୍ ହୋଇଥିବା ଅରବାଜ ମଚେଣ୍ଟ ଓ ମୁନମୁନ ଧମେଚାଙ୍କ ଜାମିନ ଆବେଦନକୁ ଖାରଜ କରିଦେଇଛନ୍ତି ।

The post  ପୁଣି ଜେଲ ଫେରିଗଲେ ଆରୟନ ଖାନ, କୋର୍ଟରେ ଜାମିନ ଆବେଦନ ଖାରଜ first appeared on Kanak News.

from Kanak News
via <a href="https://ifttt.com/?

ମମିତା ମେହେର ମୃତ୍ୟୁ ମାମଲା : ଫେରାର ପରେ କେମିତି ଲୁଚିଥିଲେ ଗୋବିନ୍ଦ, କିଏ କରିଥିଲା ସାହାଯ୍ୟ ?

କନକ ବ୍ୟୁରୋ : ମମିତା ମେହେର ମୃତ୍ୟୁ ମାମଲାରେ ଆଉ ଏକ ଖବର ସାମ୍ନାକୁ ଆସିଛି । ଗିରଫ ହୋଇଥିବା ଗୋବିନ୍ଦ ସାହୁ କେଉଁଠି ଥିଲେ, କେମିତି ଲୁଚିଥିଲେ । ଯାହାକୁ ନେଇ ପ୍ରଶ୍ନବାଚୀ ଲାଗିରହିଥିଲା, ତା ଉପରେ ପୂର୍ଣ୍ଣଚ୍ଛେଦ ପଡିଛି । ବୁଢିପଦରରେ ଥିବା ସାନଭଉଣୀ ଘର ପଛପଟ ଆଖୁକିଆରିରେ ଗୋବିନ୍ଦ ସାହୁ ଲୁଚିଥିଲେ । ଆଖୁକିଆରି ଭିତରେ ଗୋବିନ୍ଦଙ୍କୁ ଖାଇବା ପିଇବା ପାଇଁ ଦିଆଯାଉଥିଲା । ଘର ଭିତରେ ରହିବାକୁ ସାନ ଭଉଣୀ ଘରଲୋକ ମନା କରିଦେଇଥିଲେ । ପୋଲିସର ଏକ ଟିମ୍ ବୁଢିପଦର ସାନଭଉଣୀ ଘର ଉପରେ ନଜର ରଖିଥିଲା । ତେବେ ଗତକାଲି ପୋଲିସ ହାତରେ ଧରାପଡିବା ପରେ ପ୍ରଥମେ କିଛି କହିବାକୁ ମନାକରିଦେଇଥିଲା ଗୋବିନ୍ଦ ସାହୁ । ପରେ ପୋଲିସ ସାମ୍ନାରେ ସବୁ କଥା ମାନିନେଇଥିଲା ।

ତେବେ ଗୋବିନ୍ଦ ସାହୁ ସବୁ ସମୟରେ ପାୱାର କରିଡରରେ ଥିବା ବ୍ୟକ୍ତିଙ୍କ ସହ ମିଳାମିଶା କରୁଥିଲେ । ମନ୍ତ୍ରୀରୁ ନେଇ ଅଫିସର ସମସ୍ତଙ୍କ ସହ ଥିଲା ଯିବାଆସିବା । କଲେଜ ଓ ସ୍କୁଲ କାର୍ଯ୍ୟକ୍ରଗୁଡ଼ିକରେ ମନ୍ତ୍ରୀମାନଙ୍କୁ ମନ କଲେ ଡାକୁଥିଲେ। ମନ୍ତ୍ରୀମାନେ ବି ଘଣ୍ଟା ଘଣ୍ଟା ସମୟ ଦେଉଥିଲେ । ଏପରିକି ମନ୍ତ୍ରୀମାନେ ହେଲିକପ୍ଟରରେ ଯାଇ କାର୍ଯ୍ୟକ୍ରମରେ ଯୋଗଦେଉଥିଲେ । ସ୍କୁଲ କାର୍ଯ୍ୟକ୍ରମରେ ମନ୍ତ୍ରୀମାନଙ୍କ ବକ୍ତବ୍ୟ ବି ବେଶ୍‌ ଦମଦାର ରହୁଥିଲା । ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ସହ ବେଶ୍‌ ଘନିଷ୍ଠତା ଥିଲା । ପୂର୍ବର କିଛି ଭିଡିଓ ଏବେ ଭାଇରାଲ ହୋଇଛି । ଯେଉଁଥିରେ ଗୃହ ରାଷ୍ଟ୍ରମନ୍ତ୍ରୀ ସ୍କୁଲ ମାଲିକଙ୍କୁ ଭୁରିଭୁରି ପ୍ରଶଂସା କରୁଛନ୍ତି ।

ଆଉ ଏକ ଭିଡିଓରେ ହେଲିକପ୍ଟରରେ ଗସ୍ତ କରିଥିଲେ ରାଜ୍ୟର ପାୱାରଫୁଲ ମନ୍ତ୍ରୀ ପ୍ରତାପ ଜେନା । ତାଙ୍କ ଅଭିଭାଷଣରେ ସେ କହିଥିଲେ, ମହାଲିଙ୍ଗ କଲେଜକୁ ଆସିବାକୁ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ବାରବାର ଅନୁରୋଧ କରିଥିଲେ ଓ ସେ ଆସିଥିବା କହିଥିଲେ। ଏପରିକି ମନ୍ତ୍ରୀ ପ୍ରତାପ ଜେନା ମହାଲିଙ୍ଗ ଘରୋଇ ପ୍ରତିଷ୍ଠାନକୁ ରାଜ୍ୟର ଅଗ୍ରଣୀ ଶିକ୍ଷାନୁଷ୍ଠାନ ରେଭେନ୍ସା ସହ ତୁଳନା କରିଥିଲେ । ମୁଖ୍ୟତଃ ସ୍କୁଲ୍‌ ମାଲିକ ଗୋବିନ୍ଦଙ୍କ ସହ ମନ୍ତ୍ରୀ ଦିବ୍ୟଶଙ୍କରଙ୍କ ବେଶ୍‌ ଘନିଷ୍ଠତା ରହିଥିଲା । ଏହାସହ ସେ ଆଉ ବଡ଼ବଡ଼ିଆ ଲୋକଙ୍କ ସହ ବି ସଂପର୍କରେ ଥିଲେ। କଳାହାଣ୍ଡିରେ ଯେଉଁ ଜନପ୍ରତିନିଧି ପାୱାର କରିଡରରେ ରହିଲେ ସେ ତାଙ୍କ ନିକଟତର ହେବାକୁ ଚେଷ୍ଟା କରୁଥିଲେ ।

The post ମମିତା ମେହେର ମୃତ୍ୟୁ ମାମଲା : ଫେରାର ପରେ କେମିତି ଲୁଚିଥିଲେ ଗୋବିନ୍ଦ, କିଏ କରିଥିଲା ସାହାଯ୍ୟ ? first appeared on Kanak News.

from Kanak News
via <a href="https://ifttt.com/?

Create your website with WordPress.com
Get started