ଆସିଲା କ୍ୟାଟ୍ରିନା- ଭିକ୍କିଙ୍କ ବିବାହର ବରଯାତ୍ରୀ ତାଲିକା । ଆଗରେ କାହା ନାଁ?

କନକ ବ୍ୟୁରୋ: ବଲିଉଡରେ ଏବେ ସମସ୍ତଙ୍କ ନଜର ବିୟୁଟି ସେନ୍ସେସନ୍ କ୍ୟାଟ୍ରିନା ଓ ଭିକ୍କ୍ି କୌଶଲଙ୍କ ବିବାହ ଉପରେ । ଏହି ବିବାହକୁ ନେଇ ଅନେକ ଖବର ଆସୁଥିବାବେଳେ ଭିକ୍କିଙ୍କ ପକ୍ଷରୁ ବରଯାତ୍ରୀ କିଏ ହେବେ ଏନେଇ ତାଲିକା ପ୍ରକାଶ ପାଇଛି । ତେବେ ତାଲିକାର ଶୀର୍ଷରେ ଅଛନ୍ତି ନିର୍ଦ୍ଦେଶକ ଶଶାଙ୍କ ଖୈତାନ୍ ।

ଭିକ୍କିଙ୍କ ବରଯାତ୍ରୀରେ ପ୍ରଥମ ଅତିଥି ଭାବେ ଶଶାଙ୍କଙ୍କ ନାଁ ଆଗରେ ଥିବା ସୁନିଶ୍ଚିତ କରିଛନ୍ତି ଭିକ୍କ୍ି । ଏହା ସହ ଦୁହିଁଙ୍କ ଘନିଷ୍ଠ ବନ୍ଧୁ କରଣ ଜୋହର ମଧ୍ୟ ସେଠାରେ ରହିବେ । ନିର୍ଦ୍ଦେଶକ ଫରାହ ଖାନ ଏବଂ ଜୋୟା ଅଖତର ମଧ୍ୟ ଯୋଗଦେବେ ।ଏହାସହ କବୀର ଖାନ, ରୋହିତ ସେଟ୍ଟୀ, ସଦ୍ଧାର୍ଥ ମଲହୋତ୍ରା, କିୟାରା ଆଡଭାନୀ, ବରୁଣ ଧାବନ ଓ ଅଲି ଆବାସଙ୍କ ଭଳି ସେଲିବ୍ରିଟି ସାମିଲ ହେବେ ।

ରାଜସ୍ଥାନର ସୱାଇ ମାଧୋପୁରରେ ସୁନ୍ଦର, ୧୪ ତମ ଶତାବ୍ଦୀର ଦୁର୍ଗରେ ପାରମ୍ପାରିକ ପଞ୍ଜାବୀ ରୀତିରେ ବିବାହ ଅନୁଷ୍ଠିତ ହେବ । ଏହି ଦୁର୍ଗରେ ଦୁଇଟି ପ୍ରାସାଦ ଏବଂ ଦୁଇଟି ମନ୍ଦିର ସହିତ, ସିକ୍ସ ସେନ୍ସ ରିସର୍ଟ ଏବଂ ସ୍ପାରେ ପରିଣତ ହୋଇଛି ଯେଉଁଥିରେ ବାରୱାରା ହ୍ରଦ ମଧ୍ୟ ଅଛି ଏବଂ ଏହି ଦମ୍ପତି ସେମାନଙ୍କର ଆଗାମୀ ବିବାହ ପାଇଁ ସମଗ୍ର ରିସର୍ଟ ବୁକ୍ କରାଯାଇଛି ।

କ୍ୟାଟ୍ରିନା ଏବଂ ଭିକ୍କିଙ୍କ ବିବାହ ଡିସେମ୍ବର ୯ ରେ ଅନୁଷ୍ଠିତ ହେବ । ଏହା ପୂର୍ବରୁ ଡିସେମ୍ବର ୭ ଏବଂ ୮ ରେ ନିର୍ବନ୍ଧ, ମେହେନ୍ଦୀ ଏବଂ ସଂଗୀତ ସମାରୋହ ଅନୁଷ୍ଠିତ ହେବ। ଏହା ଉଭୟ ପାରମ୍ପାରିକ ଏବଂ ଆଧୁନିକ ଢଙ୍ଗରେ ଆୟୋଜିତ ହେବ । ଏହି ବିବାହ ଉତ୍ସବକୁ ଜୀବନର ସବୁଠୁ ମୂଲ୍ୟବାନ୍ ସ୍ୃତି ଭାବେ ସାଇତି ରଖିବାକୁ ଚାହାଁନ୍ତି ବୋଲି କହିଛନ୍ତି ଭିକ୍କି ଓ କ୍ୟାଟ୍ରିନା ।

The post ଆସିଲା କ୍ୟାଟ୍ରିନା- ଭିକ୍କିଙ୍କ ବିବାହର ବରଯାତ୍ରୀ ତାଲିକା । ଆଗରେ କାହା ନାଁ? first appeared on Kanak News.

from Kanak News
via <a href="https://ifttt.com/?

ବିଶ୍ୱର ଚିନ୍ତା ବଢାଇଲା ଓମିକ୍ରନ । କଟକଣା କଡାକଡି ହେଲା, ଆଫ୍ରିକାର ବିମାନ ଦେଶକୁ ବନ୍ଦ ହେଲା ବିମାନସେବା ।

କନକ ବ୍ୟୁରୋ : ଦକ୍ଷିଣ ଆଫ୍ରିକା ପରେ ବ୍ରିଟେନ, ଜର୍ମାନୀ ଓ ଇଟାଲିରେ ଓମିକ୍ରନ ଆକ୍ରାନ୍ତ ଚିହ୍ନଟ ହେବା ବିଶ୍ୱ ସମୁଦାୟଙ୍କ ଚିନ୍ତା ବଢାଇ ଦେଇଛି । ବ୍ରିଟେନ ଓ ଜର୍ମାନୀରେ ଦୁଇ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଶନିବାର ଇଟାଲିରେ ଜଣେ ଓମିକ୍ରମ ଭାରିଆଂଟରେ ସଂକ୍ରମିତ ଚିହ୍ନଟ ହୋଇଛନ୍ତି । ବିଶ୍ୱ ସ୍ୱାସ୍ଥ୍ୟ ସଂଗଠନ ଏହି ଭାରିଆଂଟକୁ ଉଦବେଗଜନ ଶ୍ରେଣୀରେ ରଖିବା ପରେ ବିଭିନ୍ନ ଦେଶରେ ସତର୍କ ସୂଚନା ଜାରି କରାଯାଉଛି । ମହାମାରୀର ଦୁଇ ବର୍ଷ ପରେ ଅଂଟା ସଳଖୁଥିବା ବିଶ୍ୱ ସମୁଦାୟ କରୋନାର ନୂଆ ଷ୍ଟ୍ରେନକୁ ନେଇ ପୁଣି ପ୍ରମାଦ ଗଣିବା ଆରମ୍ଭ କଲେଣି ।

ଆମେରିକା ଏହି ନୂଆ ଭାରିଆଣ୍ଟକୁ ନେଇ ଉଦବେଗ ପ୍ରକାଶ କରିଛି । ନ୍ୟୁୟର୍କ ଗଭର୍ଣ୍ଣର କେଥୀ ହୋକୁଲ ଏନେଇ ଜରୁରୀକାଳିନ ପରିସ୍ଥିତି ଘୋଷଣା କରିଛନ୍ତି । ଆସନ୍ତା ବର୍ଷ ଜାନୁଆରୀ ୧୫ ପର୍ଯ୍ୟନ୍ତ ରାଜ୍ୟରେ ବିପର୍ଯ୍ୟୟ ଜରୁରୀ ପରିସ୍ଥିତି ଘୋଷଣା କରାଯାଇଛି । ସେହିପରି ଆଫ୍ରିକାର ୮ଟି ଦେଶରୁ ଆସୁଥିବା ଯାତ୍ରୀଙ୍କ ପାଇଁ ଆଡଭାଇଜରି ଜାରି କରିଛି ଆମେରିକା । ସେପଟେ ବ୍ରିଟେନରେ ବିଦେଶ ଫେରନ୍ତା ଯାତ୍ରୀଙ୍କୁ ଆରଟିପିସିଆର ଟେଷ୍ଟ ବାଧ୍ୟତାମୂଳକ କରାଯାଇଛି ।

ଅଷ୍ଟ୍ରେଲିଆ ଆଫ୍ରିକାର ୮ଟି ଦେଶକୁ ଉଡାଣ ବାତିଲ କରିଛି । ତେବେ ଆଫ୍ରିକାର ଦକ୍ଷିଣାଂଚଳର ୯ଟି ଦେଶରୁ ରହୁଥିବା ଅଷ୍ଟ୍ରେଲିଆ ନାଗରିକ ଦେଶକୁ ଫେରିଲେ ୧୪ ଦିନ ସଙ୍ଗରୋଧରେ ରହିବା ବାଧ୍ୟତାମୂଳକ କରାଯାଇଛି । ପଡୋଶୀ ରାଷ୍ଟ୍ର ପାକିସ୍ତାନ ମଧ୍ୟ ଆଫ୍ରିକାର ୬ଟି ଦେଶ ଓ ହଂକଂକୁ ବିମାନ ଉଡାଣ ବାତିଲ କରିଛି । ବାଂଲାଦେଶ ଦକ୍ଷିଣ ଆଫ୍ରିକାକୁ ବିମାନ ସେବା ବାତିଲ କରିଥିବା ସୂଚନା ମିଳିଛି ।

ଦକ୍ଷିଣକୋରିଆ, ଶ୍ରୀଲଙ୍କା, ଥାଇଲାଣ୍ଡ, ଓମାନ, ହଙ୍ଗେରୀ ଭଳି ରାଷ୍ଟ୍ର ମଧ୍ୟ ଆଫ୍ରିକାକୁ ଯାଉଥିବା ବିମାନ ସେବା ଉପରେ କଟକଣା ଜାରି କରିଛନ୍ତି । ଦକ୍ଷିଣ ଆଫ୍ରିକାରେ ପ୍ରଥମେ ଚିହ୍ନଟ ହୋଇଥିବା ଓମିକ୍ରନ ଭାରିଆଂଟ ଏବେ ବେଲଜିୟମ, ଇସ୍ରାଏଲ, ହଂକଂ, ବ୍ରିଟେନ, ଜର୍ମାନୀ, ଇଟାଲିକୁ ମାଡି ଗଲାଣି । ତେଣୁ ଡେଲଟା ଭୁତାଣୁ ଭଳି ଓମିକ୍ରାନ ଭାରିଆଂଟ ମଧ୍ୟ ବଡ ବିପର୍ଯ୍ୟୟ ଆଣିବା ସମ୍ଭାବନାକୁ ଏଡାଇ ଦେଇ ହେବ ନାହିଁ ।

The post ବିଶ୍ୱର ଚିନ୍ତା ବଢାଇଲା ଓମିକ୍ରନ । କଟକଣା କଡାକଡି ହେଲା, ଆଫ୍ରିକାର ବିମାନ ଦେଶକୁ ବନ୍ଦ ହେଲା ବିମାନସେବା । first appeared on Kanak News.

from Kanak News
via <a href="https://ifttt.com/?

ଭୁବନେଶ୍ୱର ସ୍କୁଲ ଗୁଡିକ ପାଠପଢା ପାଇଁ ଅନୁପଯୋଗୀ । ୭୫ ପ୍ରତିଶତ ବିଦ୍ୟାଳୟରେ ଇଣ୍ଟରନେଟ ସେବା ନଥିବାରୁ ଆପଣାଇ ପାରିନାହାନ୍ତି ଅନଲାଇନ ଶିକ୍ଷା ।

କନକ ବ୍ୟୁରୋ : ଓଡିଶାର ରାଜଧାନୀର ସ୍କୁଲଗୁଡିକ ପାଠ ପଢା ପାଇଁ ଅନୁପଯୋଗୀ । ଏହି ଉଦବେଗଜନକ ଖବର ପଦାକୁ ଆଣିଛି ନୀତି ଆୟୋଗର ସସଟେନଏବୁଲ ଡେଭଲପମେଂଟ ଗୋଲ ବା ନିରନ୍ତର ବିକାଶ ଲକ୍ଷ୍ୟ ରିପୋର୍ଟ । ନୀତି ଆୟୋଗର ରିପୋର୍ଟ ଅନୁସାରେ ଅଧିକାଂଶ ସ୍କୁଲର ଭିତ୍ତିଭୂମି ଅସଜଡା । ବିଜୁଳି ସଂଯୋଗ, ପିଇବା ପାଣିର ସୁବିଧା ଭଳି ମୌଳିକ ସୁବିଧା ବହୁ ସ୍କୁଲରେ ନାହିଁ । ରାଜଧାନୀର ୨୦ ପ୍ରତିଶତ ସ୍କୁଲରେ ଏବେ ବି  ବିଦ୍ୟୁତ ସଂଯୋଗ ନଥିବା ବେଳେ ସବୁ ସ୍କୁଲରେ ପିଇବା ପାଣିର ସୁବିଧା ନାହିଁ । ସେହିପରି ଭୁବନେଶ୍ୱରରେ ପ୍ରାୟ ୭୫ ପ୍ରତିଶତ ସ୍କୁଲରେ ଇଂଟରନେଟ ସୁବିଧା ନଥିବାରୁ ଅନଲାଇନ୍ ଶିକ୍ଷା ବାଧାପ୍ରାପ୍ତ ହୋଇଛି ।

ସମଗ୍ର ଦେଶରେ ବିଦ୍ୟାଳୟଗୁଡିକରେ ଇଂଟରନେଟ ସେବା ଯୋଗାଇବାରେ ଉତରପ୍ରଦେଶ ଆଗ୍ରା ବିଫଳ ତାଲିକାର ଶୀର୍ଷରେ ଥିବା ବେଳେ କୋଲକାତା ଦ୍ୱିତୀୟ ଓ ତୃତୀୟରେ ରହିଛି ଭୁବନେଶ୍ୱର । ଏହାଛଡା ସ୍ମାର୍ଟସିଟି ଭୁବନେଶ୍ୱରରେ ନବମ ଦଶମ ଶ୍ରେଣୀ ପିଲାଙ୍କୁ ପାଠ ପଢାଇବା ପାଇଁ ଛାତ୍ରଙ୍କ ତୁଳନାରେ ଶିକ୍ଷକଙ୍କ ଅନୁପାତ ମଧ୍ୟ ନୈରାଶ୍ୟଜନକ । ପ୍ରତି ୨୩ଜଣ ପିଲାଙ୍କୁ ଜଣେ ଶିକ୍ଷକ ପାଠ ପଢାଉଥିବା ନୀତି ଆୟୋଗର ଏସଡିଜି ରିପୋର୍ଟରେ ପ୍ରକାଶ ପାଇଛି ।

ସେହିଭଳି ମାଧ୍ୟମିକ ଶିକ୍ଷାରେ ପଢୁଥିବା ପିଲାଙ୍କୁ ପାଠ ପଢାଉଥିବା ୮୩.୯୭ ପ୍ରତିଶତ ଶିକ୍ଷକ ତାଲିମପ୍ରାପ୍ତ ଅର୍ଥାତ୍ ପଢାଇବାକୁ ଯୋଗ୍ୟ ବୋଲି ଏସଡିଜି ସୂଚକାଙ୍କରେ ଉଲ୍ଲେଖ ରହିଛି । ବିଦ୍ୟାଳୟରେ ଶିକ୍ଷା ପଦ୍ଧତିର ୮ଟି ଦିଗକୁ ନେଇ ଦେଶର ବଛା ବଛା ୫୬ଟି ସହରକୁ ନେଇ ନୀତି ଆୟୋଗ ପକ୍ଷରୁ ସର୍ବେକ୍ଷଣ କରାଯାଇଥିଲା । ନୀତି ଆୟୋଗର ନିରନ୍ତର ବିକାଶ ଲକ୍ଷ୍ୟ ରିପୋର୍ଟରେ ଭୁବନେଶ୍ୱରର ବିଦ୍ୟାଳୟଗୁଡିକୁ ମୋଟ ଶହେ ମାର୍କରୁ ୫୦ ମାର୍କ ମିଳିଛି ।

The post ଭୁବନେଶ୍ୱର ସ୍କୁଲ ଗୁଡିକ ପାଠପଢା ପାଇଁ ଅନୁପଯୋଗୀ । ୭୫ ପ୍ରତିଶତ ବିଦ୍ୟାଳୟରେ ଇଣ୍ଟରନେଟ ସେବା ନଥିବାରୁ ଆପଣାଇ ପାରିନାହାନ୍ତି ଅନଲାଇନ ଶିକ୍ଷା । first appeared on Kanak News.

from Kanak News
via <a href="https://ifttt.com/?

ଡ୍ରଗ୍ସ କାରବାରକୁ ନେଇ ଢେଙ୍କାନାଳରେ ଗୁଳିକାଣ୍ଡ । ତିନି ରାଉଣ୍ଡ ଗୁଳିମାଡ, ଜଣେ ଆହତ ।

କନକ ବ୍ୟୁରୋ : ନିଶା କରିବାକୁ ବିରୋଧ କରିବାକୁ ଗୁଳିମାରିଦେଲେ  । ପୂର୍ବ ବିବାଦ ଏବଂ ଡ୍ରଗ୍ସ କାରବାରକୁ ନେଇ ଢେଙ୍କାନାଳରେ ଗୁଳିକାଣ୍ଡ ହୋଇଛି । ଏହି ଗୁଳି ମାଡରେ ଜଣେ ଗୁରୁତର ଆହତ ହୋଇଛନ୍ତି । ଢେଙ୍କାନାଳ ଟାଉନ ଥାନା ଅନ୍ତର୍ଗତ ୨୧ ନମ୍ବର ୱାର୍ଡରେ ଏହି ଗୁଳିମାଡ ହୋଇଛି । ମୋଟ୍ ତିନି ରାଉଣ୍ଡ ଗୁଳିମାଡ ହୋଇଥିବା ସୂଚନା ରହିଛି ।

ସୂଚନା ଅନୁସାରେ କିଛି ଦିନ ତଳେ ନରଣପୁରର କିଛି ଯୁବକ ସଞ୍ଜୟ କଲୋନୀ ଭିତରେ ପଶି ଡ୍ରଗ୍ସ ନେଉଥିଲେ । ଏହାକୁ କଲୋନୀ ଲୋକ ବିରୋଧ କରିଥିଲେ । ପରେ ପୂର୍ବ ରାଗ ରଖି ଗତକାଲି ନିଶାଡି ମାନେ କଲୋନୀ ଭିତରେ ପଶି ଫାଇରିଂ କରିଥଲେ । ଏଥିସହିତ ପ୍ରକାଶ ନାୟକ ନାମକ ବ୍ୟକ୍ତିଙ୍କୁ ମରଣାନ୍ତକ ଆକ୍ରମଣ କରିଛନ୍ତି । ଘଟଣାକୁ ନେଇ ଥାନାର ଦ୍ୱାରସ୍ଥ ହୋଇଛନ୍ତି ସଞ୍ଜୟ କଲୋନୀ ବାସିନ୍ଦା । ପୁଲିସ ଘଟଣାସ୍ଥଳରେ ପହଞ୍ଚିବା ପରେ ଏବେ ଏହାର ତଦନ୍ତ ଆରମ୍ଭ କରିଥିବା ସୂଚନା ମିଳିଛି ।

The post ଡ୍ରଗ୍ସ କାରବାରକୁ ନେଇ ଢେଙ୍କାନାଳରେ ଗୁଳିକାଣ୍ଡ । ତିନି ରାଉଣ୍ଡ ଗୁଳିମାଡ, ଜଣେ ଆହତ । first appeared on Kanak News.

from Kanak News
via <a href="https://ifttt.com/?

ସାବାସ୍ ଶୁଭ୍ରଜିତ୍…! ଲୁଟେରାଙ୍କ ବାଇକକୁ ଗୋଇଠା ମାରିଲେ, ତଳେ ପଡିଯିବା ପରେ ନିଦ୍ଧୁର୍ମ ଛେଚିଲେ ।

କନକ ବ୍ୟୁରୋ : ହାତରୁ ଏଟିଏମ୍‌ କାର୍ଡ ଛଡ଼ାଇ ଫେରାର୍‌ ହେବାକୁ ଚେଷ୍ଟା କରୁଥିବା ଲୁଟେରାକୁ ଜଣେ ୧୬ ବର୍ଷର ନାବାଳକ କାବୁ କରିବା ଘଟଣା ଶନିବାର ବାଲିଅନ୍ତା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ନାବାଳକ ଜଣକ ପାଖାପାଖି ୨ କିଲୋମିଟର ପିଛା କରି ଲୁଟେରାକୁ ଧରିବା ସହ ତା’ ନିକଟରୁ ଏଟିଏମ୍‌ କାର୍ଡ ଜବତ କରିଥିଲେ। ନାବାଳକଙ୍କ ଏହି ସାହସ ଯୋଗୁଁ ପାଖପାଖି ଅଢ଼େଇ ଲକ୍ଷ ଟଙ୍କା ଲୁଟ୍‌ ଉଦ୍ୟମ ବିଫଳ ହୋଇଛି।

ସୂଚନାନୁଯାୟୀ, ଶନିବାର ମଧ୍ୟାହ୍ନ ପ୍ରାୟ ସାଢ଼େ ୧୨ଟାରେ ସ୍ଥାନୀୟ ସତ୍ୟଭାମାପୁର ପଞ୍ଚାୟତ ଅଧୀନ ଗୋତଳବିନ୍ଧା ଗ୍ରାମର ଶୁଭ୍ରଜିତ ସୁନ୍ଦରାୟ ତାଙ୍କ ମାଆ ଗୁନେଇ ସୁନ୍ଦରାୟଙ୍କୁ ସାଙ୍ଗରେ ନେଇ ରଙ୍ଗବଜାର-ବ୍ରାହ୍ମଣଷଡ଼ଙ୍ଗୀ ଗ୍ରାମ ଉନ୍ନୟନ ମୁଖ୍ୟ ରାସ୍ତାର ପେଟ୍ରୋଲ ଟାଙ୍କି ନିକଟରେ ଥିବା ଷ୍ଟେଟବ୍ୟାଙ୍କ ଏଟିଏମ୍‌ କାଉଣ୍ଟରକୁ ଯାଇଥିଲେ। ସେଠାରେ ଏଟିଏମ୍‌ରୁ ୪ ହଜାର ଟଙ୍କା ଉଠାଇଥିଲେ। ସେହି ସମୟରେ ତାଙ୍କ ପଛରେ ଥିବା ଲୁଟେରାଜଣଙ୍କ ସିକ୍ରେଟ୍ ପିନ୍‌ ନମ୍ବର ଦେଖି ଦେଇଥିଲା। ପରେ ଲୁଟେରାଜଣଙ୍କ ଶୁଭ୍ରଜିତ୍‌ଙ୍କ ହାତରୁ ଏଟିଏମ୍‌ କାର୍ଡ ଛଡ଼ାଇ ଦୌଡ଼ିଥିଲା।

ଏଟିଏମ୍‌ ବାହାରେ ଅପେକ୍ଷା କରିଥିବା ଗୁନେଇ ତାକୁ ଅଟକାଇବାକୁ ଚେଷ୍ଟା କରିବାରୁ ସେ ତାଙ୍କୁ ଧକ୍କା ମାରି ତଳେ ପକାଇ ଦେଇଥିଲା। ପରେ ବାଇକ୍‌ରେ ଫେରାର୍‌ ହୋଇଯାଇଥିଲା। ଶୁଭ୍ରଜିତ୍‌ ମଧ୍ୟ ତାକୁ ବାଇକରେ ପିଛା କରିଥିଲେ। ପାଖାପାଖି ୨ କିମି ପରେ ପୁରୁଣା ଜଗନ୍ନାଥ ରାସ୍ତାର ସୁଦର୍ଶନ ଦେବଙ୍କ ଦାରୁପୀଠ ନିକଟରେ ଶୁଭ୍ରଜିତ୍‌ ଲୁଟେରାର ବାଇକକୁ ଏକ ଶକ୍ତ ଗୋଇଠା ମାରିଦେବାରୁ ଲୁଟେରାଜଣଙ୍କ ତଳେ ପଡ଼ି ଯାଇଥିଲା। ଏହା ପରେ ସ୍ଥାନୀୟ ଲୋକେ ତାକୁ ନିର୍ଧୁମ୍‌ ଛେଚି ବାଲିଅନ୍ତା ପୁଲିସ ଜିମା ଦେଇଥିଲେ। ପୁଲିସ ଲୁଟେରାକୁ ଗିରଫ କରି ପଚରାଉଚରା ଚଳାଇଛି।

ଶୁଭ୍ରଜିତଙ୍କ ବାପା ସୁଭାଷ ସୁନ୍ଦରାୟ ବାଲିଅନ୍ତା ଥାନାରେ ଅଭିଯୋଗ କରିବାରୁ ପୁଲିସ ଏକ ମାମଲା ରୁଜୁ କରି ତଦନ୍ତ ଚଳାଇଛି। ଉଲ୍ଲେଖଯୋଗ୍ୟ, ଉକ୍ତ ଆକାଉଣ୍ଟରେ ପ୍ରାୟ ଅଢ଼େଇ ଲକ୍ଷ ଟଙ୍କା ଜମା ରହିଛି ଓ ପିନ୍ ଜାଣିଯାଇଥିବାରୁ ଲୁଟେରା ସହଜରେ ଟଙ୍କା ଉଠାଇବା ଆଶଙ୍କା ଥିଲା।

The post ସାବାସ୍ ଶୁଭ୍ରଜିତ୍…! ଲୁଟେରାଙ୍କ ବାଇକକୁ ଗୋଇଠା ମାରିଲେ, ତଳେ ପଡିଯିବା ପରେ ନିଦ୍ଧୁର୍ମ ଛେଚିଲେ । first appeared on Kanak News.

from Kanak News
via <a href="https://ifttt.com/?

ଓମିକ୍ରନକୁ ନେଇ ଡବ୍ଲୁଏଚଓର ସତର୍କ ବାଣୀ । ଗମନାଗମନ ନେଇ ବିଶ୍ୱ ବ୍ୟାପୀ କଟକଣା ।

କନକ ବ୍ୟୁରୋ: କରୋନାର ନୂଆ ଭ୍ୟାରିଆଣ୍ଟ ନେଇ ସାରା ବିଶ୍ୱକୁ ସତର୍କ କରିଛି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ । ଏହି ଭୂତାଣୁ ପୂର୍ବ ସମସ୍ତ ପ୍ରଜାତିଠାରୁ ଭୟଙ୍କର ହୋଇପାରେ ବୋଲି କହିଛି ଡବ୍ଲୁଏଚ୍‌ଓ ।ଏହି ପ୍ରଜାତିର ମ୍ୟୁଟେସନ ଅନ୍ୟ ପ୍ରଜାତି ଠାରୁ ଅଧିକ ।ତେଣୁ ଏହାର ପ୍ରଭାବକୁ ଦୃଷ୍ଟିରେ ରଖି ଏହାକୁ ସବୁଠୁ ଉଦବେଗର କାରଣ ବା ‘ଭାରିଆଣ୍ଟ ଅଫ୍ କନସର୍ନ’ ଭାବେ ନାମିତ କରାଯାଇଛି । ଏନେଇ ବିଶ୍ୱବ୍ୟାପୀ ସତର୍କତା ଅବଲମ୍ବନ କରିବାକୁ ଚେତାଇ ଦେଇଛି ଡବ୍ଲୁଏସଓ । ବ୍ରିଟେନରେ ଓମିକ୍ରନର ୨ଠଟି ମାମଲା ଚିହ୍ନଟ କରାଯିବା ପରେ ଟେଷ୍ଟିଙ୍ଗକୁୁ ବଢାଇ ଦିଆଯାଇଛି । ତେବେ ଏହା ଉପରେ ଅଧିକ ଅନୁସନ୍ଧାନ ଓ ଗବେଷଣା ଜାରି ରହିଛି । ଏହା ଉପରେ ବିସ୍ତୃତ ତଥ୍ୟା ଆସିବାକୁ ଆହୁରି ସପ୍ତାହେ ସମୟ ଲାଗିବ ବୋଲି ଡବ୍ଲୁଏଚଓ ମୁଖ୍ୟ ଡକ୍ଟର ଟେଡ୍ରୋସ୍ ଆଧାନୋମ୍ ଘେବ୍ରେୟେସୁସ୍ କହିଛନ୍ତି ।

ଆଫ୍ରିକାରେ ଗତ କିଛି ସପ୍ତାହ ଭିତରେ ଏହାର ସଂକ୍ରମଣ ବୃଦ୍ଧି ପାଇଛି ଏବଂ ବିଭିନ୍ନ ରାଷ୍ଟ୍ର ଆଫ୍ରିକୀୟ ଦେଶଗୁଡ଼ିକ ଉପରେ କଟକଣା ଲଗାଇଛନ୍ତି। ଭାରତରେ ମଧ୍ୟ ଆଫ୍ରିକୀୟ ରାଷ୍ଟ୍ରରୁ ଆସୁଥିବା ଯାତ୍ରୀଙ୍କ ଉରେ ସତର୍କ ନଜର ରଖାଯାଇଛି। ଦକ୍ଷିଣ ଆଫ୍ରିକା ପରେ ୟୁରୋପ୍‌ରେ ଓମିକ୍ରନ୍ ସଂକ୍ରମଣ ମାମଲା ବୃଦ୍ଧି ପାଉଛି। ଇସ୍ରାଏଲରେ ମଧ୍ୟ ଏହି ନୂଆ ଭାଇରସ୍‌ ଦେଖିବାକୁ ମିଳିଲାଣି। ଇସ୍ରାଏଲକୁ ମାଲାୱି, ବଟ୍‌ସ୍ବାନା, ବେଲଜିୟମ୍ ଓ ହଂକଂରୁ ଆସିଥିବା ଲୋକଙ୍କଠାରେ ଏହା ଦେଖିବାକୁ ମିଳିଛି। ‌ତେବେ ଗତ ୬୦ ଦିନ ଭିତରେ ଯେତେ ନମୁନା ପରୀକ୍ଷା ହୋଇଛି ସେଥିରୁ ୯୯.୮ ପ୍ରତିଶତ ଡେଲ୍‌ଟା ଥିବା ଜଣାପଡ଼ିଛି।

ଅନ୍ୟପଟେ ନୂଆ ପ୍ରଜାତି ଭୂତାଣୁ ଓମିକ୍ରନ ଦେଖାଦେବା ପରେ ବିଶ୍ବରେ ଏହାକୁ ନେଇ ଚିନ୍ତା ପ୍ରକଟ କରାଯାଇଛି। ବିଶ୍ବ ସ୍ବାସ୍ଥ୍ୟ ସଂଗଠନ ଉକ୍ତ ଭୂତାଣୁକୁ ଚିନ୍ତାଜନକ ଭୂତାଣୁ ବର୍ଗରେ ତାଲିକାଭୁକ୍ତ କରିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଏକ ସମୀକ୍ଷା ବୈଠକ କରିଛନ୍ତି। ପ୍ରାୟ ୨ ଘଣ୍ଟା ଧରି ହୋଇଥିବା ଏହି ସମୀକ୍ଷା ବୈଠକରେ ପ୍ରଧାନମନ୍ତ୍ରୀ ନୂଆ କରୋନା ଭୂତାଣୁ ଚିହ୍ନଟ ପରିପ୍ରେକ୍ଷୀରେ ଅଧିକ ସତର୍କ ରହିବା ସହିତ ସକ୍ରିୟ ପଦକ୍ଷେପ ନେବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଅନ୍ୟପକ୍ଷରେ ଲୋକମାନେ ମଧ୍ୟ ସଚେତନ ରହିବାକୁ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି। ମାସ୍କ ପିନ୍ଧିବା ଏବଂ ସାମାଜିକ ଦୂରତା ରକ୍ଷା କରିବା ଉପରେ ପ୍ରଧାନମନ୍ତ୍ରୀ ଗୁରୁତ୍ବ ଦେଇଛନ୍ତି। ଭାରତକୁ ବିଦେଶରୁ ଆସୁଥିବା ସବୁ ଯାତ୍ରୀଙ୍କ ଅନୁଧ୍ୟାନ ପାଇଁ ପ୍ରଧାନମନ୍ତ୍ରୀ କହିଛନ୍ତି। ନିର୍ଦ୍ଦେଶାବଳି ଅନୁସାରେ ସେମାନଙ୍କର ଟେଷ୍ଟିଂ କରିବା ପାଇଁ କହିଛନ୍ତି। ବିଶେଷକରି ବିପଦ ବର୍ଗରେ ଥିବା ଦେଶଗୁଡ଼ିକରୁ ଆସୁଥିବା ଯାତ୍ରୀଙ୍କ ଉପରେ ନିର୍ଦ୍ଦିଷ୍ଟ ଭାବେ ଧ୍ୟାନ ଦେବା ଲାଗି ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି।

The post ଓମିକ୍ରନକୁ ନେଇ ଡବ୍ଲୁଏଚଓର ସତର୍କ ବାଣୀ । ଗମନାଗମନ ନେଇ ବିଶ୍ୱ ବ୍ୟାପୀ କଟକଣା  । first appeared on Kanak News.

from Kanak News
via <a href="https://ifttt.com/?

ଫୋର୍ବସ ତାଲିକାରେ ଓଡିଶାର ଆଶାକର୍ମୀ । ଅନ୍ଧବିଶ୍ୱାସ ଏବଂ ଲୋକଙ୍କୁ ସଚେତନ କରାଇ ସାମିଲ ହେଲେ ଫୋର୍ବସ ତାଲିକାରେ ।

କନକ ବ୍ୟୁରୋ : ସେ ଜଣେ ଆଶାକର୍ମୀ । କିନ୍ତୁ ତାଙ୍କର ବଡ ହୃଦୟ ତାଙ୍କୁ ବିଶ୍ୱରେ ପରିଚୟ ଦେଇଛି । ଦେହ ଖରାପ ହେଲେ ଗୁଣି ଗାରେଡିକୁ ଯେଉଁ ଗାଁ ଭରସା କରୁଥିଲେ ସେହି ଗାଁକୁ ଏହି ଆଦିବାସୀ ମହିଳା ଦେଖାଇଛନ୍ତି ହସ୍ପିଟାଲର ରାସ୍ତା । ଆଉ ଏବେ ସେହି ଗାଁ ଗୁଣି ଗାରେଡିଠୁ ବହୁ ଦୂରରେ । ଏହି ମହିଳା ଜଣଙ୍କ ହେଉଛନ୍ତି ସୁନ୍ଦରଗଡର ଆଶାକର୍ମୀ ମାତିଲଦା କୁଲୁ । ଯିଏକି ଏବେ ଫୋର୍ବସ ତାଲିକାରେ ସାମିଲ୍ ହୋଇ ସାରା ଦୁନିଆରେ ପରିଚୟ ପାଇଛନ୍ତି ।

ଆଗଧାଡିର କୋଭିଡ୍ ଯୋଦ୍ଧା ଭାବେ ମହାମରୀ କରୋନା ମୁକାବିଲାରେ ପ୍ରମୁଖ ଭୂମିକା ଗ୍ରହଣ କରିଥିବା ସୁନ୍ଦରଗଡ ଆଦିବାସୀ ମହିଳା ମାତିଲଦା କୁଲୁ ସମ୍ମାନଜନକ ଫୋର୍ବସ୍ ଇଣ୍ଡିଆ ଶକ୍ତଶାଳୀ ମହିଳା ତାଲିକାରେ ସ୍ଥାନ ପାଇଛନ୍ତି । ଗତ ୧୫ ବର୍ଷ ଧରି ମାତିଲଦା ବଡଗାଁ ବ୍ଲକ ଗରଗଡବାହାଲ ଗାଁ ର ଆଶାକର୍ମୀ ଭାବେ କାର୍ଯ୍ୟକରିଆସୁଛନ୍ତି । ଅନ୍ଧ ବିଶ୍ୱାସ ଏବଂ ଜାତିବାଦ ବିରୋଧରେ ଯୁଦ୍ଧଂ ଦେହି ଡାକରା ଦେଇ ଫୋର୍ବସ ତାଲିକାରେ ଆଶାକର୍ମୀ ମାତିଲଦା କୁଲୁ । ଦେଶରେ ଅନେକ ଆଶାକର୍ମୀ ରହିଛନ୍ତି । ହେଲେ ସୁନ୍ଦରଗଡ ବଡ ଗାଁ ବ୍ଲକ ଗରଗଡବାହାଲର ମାତିଲଦାଙ୍କ ନିଷ୍ଠା ଏବଂ କର୍ମ ପାଇଁ ଭିଡ ଭିତରୁ ବାରି ହୋଇପଡିଛନ୍ତି । ବୟସ ପାଖାପାଖି ୪୫, ଆଜିକୁ ଠିକ୍ ୧୫ ବର୍ଷ ପୂର୍ବେ ଏହି କାମରେ ମାତିଲଦା ନିଜକୁ ସାମିଲ୍ କରିଥିଲେ । ଯାହାକି ତାଙ୍କୁ ଫୋର୍ବସ୍ ଇଣ୍ଡିଆରେ ସ୍ଥାନିତ ହେବାକୁ ସୁଯୋଗ ଦେଇଛି ।

ଆଶାକର୍ମୀ ଭାବରେ ମାତିଲଦାଙ୍କ ଦାୟିତ୍ୱ ପ୍ରଥମ ଆରମ୍ଭ ହୋଇଥିଲା ବଣପାହାଡ ଘେରା ଆଦିବାସୀ ଗାଁ ଗରଗଡବାହାଲରୁ । ଗର୍ଭବତୀ ମହିଳାଙ୍କ ଦାୟିତ୍ୱ ତୁଲାଉ ତୁଲାଉ ମାତିଲଦା ଅନ୍ଧବିଶ୍ୱାସ ଦୂର କରିବା ଦିଗରେ ଆରମ୍ଭ କରିଥିଲେ ସଚେତନତା ଅଭିଯାନ । ସାଇକଲରେ ଗାଁ ଗାଁକୁ ବୁଲି ଲୋକଙ୍କ ସ୍ୱାସ୍ଥ୍ୟବସ୍ଥା ନୀରିକ୍ଷଣ କରନ୍ତି । ସେତେବେଳେ ମେଡିକାଲ ବଦଳରେ ଝଡାଫୁଙ୍କା ପାଇଁ ଗୁଣିଆ ପାଖକୁ ଲୋକେ ଯାଉଥିଲେ । ହେଲେ ମାତିଲଦାଙ୍କ ପ୍ରୟାସ ଅନେକଙ୍କୁ ଠିକ୍ ବାଟ ଦେଖାଇଛି । ଏମିତିକି କୋଭିଡ ଟିକା ବିଷୟରେ ଲୋକଙ୍କୁ ଜାଗୃତ କରି ସେ ଆଜି ଦୁନିଆରେ ପରିଚିତ ହୋଇଛନ୍ତି ।
ମାତିଲଦା ଯଦି ନିଜକୁ ଏକ ଛୋଟ କର୍ମଚାରୀ ଭାବି କେବଳ ନିଜର ଦାୟିତ୍ୱ ସମ୍ପାଦନ କରିଥାନ୍ତେ ତାହାଲେ ହୁଏତ ଆଜି ସେ ଏହି ସ୍ଥାନରେ ନଥାନ୍ତେ । କିନ୍ତୁ ତାଙ୍କର ମାନବିକତା ଏବଂ ସମାଜ ସଂସ୍କାର ଦିଗରେ ଥିବା ନିଜସ୍ୱ ଚିନ୍ତାଧାରା ଆଜି ତାଙ୍କୁ ଏହି ସମ୍ମାନ ଦେଇଛି ।

The post ଫୋର୍ବସ ତାଲିକାରେ ଓଡିଶାର ଆଶାକର୍ମୀ । ଅନ୍ଧବିଶ୍ୱାସ ଏବଂ ଲୋକଙ୍କୁ ସଚେତନ କରାଇ ସାମିଲ ହେଲେ ଫୋର୍ବସ ତାଲିକାରେ । first appeared on Kanak News.

from Kanak News
via <a href="https://ifttt.com/?

ଭାରତ ଆସିଲା କି ଆଫ୍ରିକା ଭୂତାଣୁ? ବାଙ୍ଗାଲୋରରେ ୨ ଆଫ୍ରିକୀୟ କରୋନା ରୋଗୀ ଚିହ୍ନଟ ପରେ ବଢ଼ିଲା ଚିନ୍ତା, ‘ଓମିକ୍ରନ’ ବାବଦରେ ଜାଣିବା ପାଇଁ ଅଧିକ ପରୀକ୍ଷାକୁ ଅପେକ୍ଷା ।

କନକ ବ୍ୟୁରୋ : ଦକ୍ଷିଣ ଆଫ୍ରିକାରେ ଚିହ୍ନଟ କରୋନାର ନୂଆ ପ୍ରଜାତି ‘ଓମିକ୍ରନ’କୁ ନେଇ ସାରା ବିଶ୍ୱରେ ଉଦବେଗ ପ୍ରକାଶ ପାଇଛି । ଏହାରି ଭିତରେ ଦକ୍ଷିଣ ଆଫ୍ରିକାରୁ ବାଙ୍ଗାଲୋର ଆସିଥିବା ଦୁଇ ଆଫ୍ରିକୀୟ ଯାତ୍ରୀ କରୋନା ସଂକ୍ରମିତ ଚିହ୍ନଟ ହେବା ଚିନ୍ତା ବଢାଇ ଦେଇଛି । ବିମାନ ବନ୍ଦରରେ ଦୁଇ ଆଫ୍ରିକୀୟ କରୋନା ପଜିଟିଭ ଚିହ୍ନଟ ପରେ ଭାରତକୁ ଓମିକ୍ରନ ଭୂତାଣୁ ପଶି ଆସିଥିବା ଆଶଙ୍କା କରାଯାଉଛି ।

ତେବେ ତାଙ୍କ ଶରୀରରେ ଚିହ୍ନଟ ହୋଇଥିବା ଭାରିଆଣ୍ଟ ଓମିକ୍ରନ କି ନୁହେଁ ତାହା ଜାଣିବା ପାଇଁ ନମୁନାକୁ ଜିନୋମ ସିକ୍ୱେନ୍ସିଂ ପାଇଁ ପଠାଯାଇଛି । ତେବେ ପରୀକ୍ଷଣ ରିପୋର୍ଟ ଆସିବା ପରେ ଦୁଇ ଆକ୍ରାନ୍ତ ଓମିକ୍ରନ ଭୁତାଣୁରେ ସଂକ୍ରମିତ ହୋଇଛନ୍ତି ନା ନାହିଁ ଜଣା ପଡିବ ବୋଲି କୁହାଯାଉଛି ।

ବାଙ୍ଗାଲୋରରେ ଆଫ୍ରିକୀୟ ଯାତ୍ରୀ ସଂକ୍ରମିତ ଚିହ୍ନଟ ପରେ ମୁମ୍ବାଇ ବିମାନ ବନ୍ଦରରେ ଯାଞ୍ଚ କଡାକଡି କରାଯାଇଛି । ଆଫ୍ରିକାରୁ ଆସୁଥିବା ଯାତ୍ରୀଙ୍କୁ ସଙ୍ଗରୋଧରେ ରହିବା ବାଧ୍ୟତାମୂଳକ କରାଯାଇଥିବା ସୂଚନା ମିଳିଛି । ସେପଟେ ବିଶ୍ୱ ସ୍ୱାସ୍ଥ୍ୟ ସଂଗଠନ କହିଛି ଓମିକ୍ରନ ଭୂତାଣୁ ବାବଦରେ ସବିଶେଷ ତଥ୍ୟ ଏକ ସପ୍ତାହ ଭିତରେ ଆସିଯିବ । କୋଭିଡ ୧୯ର ବି ଡଟ୍ ୱାନ ଡଟ୍ ୱାନ ଫାଇବ୍ ଟ୍ୱେଂଟିନାଇନ ଷ୍ଟ୍ରେନକୁ ଓମିକ୍ରନ ଭାବେ ନାମିତ କରିଛି ଡବ୍ଲୁଏଚଓ । ଏହାକୁ ଭାରିଆଂଟ ଅଫ୍ କନସର୍ନ ଶ୍ରେଣୀରେ ଡବ୍ଲୁଏଚଓ ରଖିଥିବା ବେଳେ ସାରା ବିଶ୍ୱ କରୋନାର ଏହି ନୂଆ ରୂପକୁ ନେଇ ବିଶେଷ ସତର୍କତା ଅବଲମ୍ବନ କରିଛନ୍ତି ।

ବିଶ୍ୱସ୍ତରରେ ଆତଙ୍କ ଖେଳାଇଥିବା ଡେଲଟା ଭାରିଆଂଟ ସହ ଆଲଫା, ବିଟା ଗାମା ଷ୍ଟ୍ରେନ ମଧ୍ୟରୁ ଓମିକ୍ରାମ ସବୁଠାରୁ ଘାତକ ବୋଲି ବର୍ତମାନର ତଥ୍ୟ ଆଧାରରେ କୁହାଯାଉଛି । ଦକ୍ଷିଣ ଆଫ୍ରିକା ପରେ ଏବେ ୟୁରୋପରେ ଓମିକ୍ରାନ ଆକ୍ରାନ୍ତ ଚିହ୍ନଟ ହୋଇଛନ୍ତି ।

The post ଭାରତ ଆସିଲା କି ଆଫ୍ରିକା ଭୂତାଣୁ? ବାଙ୍ଗାଲୋରରେ ୨ ଆଫ୍ରିକୀୟ କରୋନା ରୋଗୀ ଚିହ୍ନଟ ପରେ ବଢ଼ିଲା ଚିନ୍ତା, ‘ଓମିକ୍ରନ’ ବାବଦରେ ଜାଣିବା ପାଇଁ ଅଧିକ ପରୀକ୍ଷାକୁ ଅପେକ୍ଷା । first appeared on Kanak News.

from Kanak News
via <a href="https://ifttt.com/?

ମୁଁ ଦେଶର ଅନଅଫିସିଆଲ ସ୍ୱାସ୍ଥ୍ୟମନ୍ତ୍ରୀ, ମୁଁ କେବେ ବଦଳିବି ନାହିଁ : ବାବା ରାମଦେବ

କନକ ବ୍ୟୁରୋ : ଓଡ଼ିଶା ନିର୍ମାଣ କନକ୍ଲେଭ-୨୦୨୧ରେ ଯୋଗ ଦେଇ ଯୋଗଗୁରୁ ବାବା ରାମଦେବ ବଡ ବୟାନ ଦେଇଛନ୍ତି । ରାମଦେବ କହିଛନ୍ତି, ମୁଁ ଦେଶର ଅନଅଫିସିଆଲ ସ୍ୱାସ୍ଥ୍ୟମନ୍ତ୍ରୀ । ସରକାରରେ ଥିବା ସ୍ୱାସ୍ଥ୍ୟମନ୍ତ୍ରୀ ବଦଳିଥାନ୍ତି । କିନ୍ତୁ ମୁଁ କେବେ ବଦଳିବି ନାହିଁ । ୭ରୁ ୮ ପିଢୀଙ୍କୁ ଯୋଗ ଶିଖାଇବା ସହ ନିରୋଗ ରଖି ଦେଶକୁ ଆଗକୁ ବଢାଇବି ।

ଏହାସହ ଓଡିଶାର ପ୍ରାକୃତିକ ସମ୍ପଦର ବ୍ରାଣ୍ଡ ଆମ୍ବାସଡର ହେବାକୁ ରାଜି ଥିବା କହିଛନ୍ତି ବାବା ରାମଦେବ । ଭର୍ଚୁଆଲରେ ରାମଦେବ ଏହି କାର୍ଯ୍ୟକ୍ରମରେ ଯୋଡି ହେବା ସହ ‘ଆତ୍ମ ନିର୍ଭର ଓଡିଶା’ ପ୍ରସଙ୍ଗରେ ନିଜର ମତ ରଖି କହିଛନ୍ତି । ରାମଦେବ କହିଛନ୍ତି,ଆତ୍ମନିର୍ଭରଶୀଳ ହେବା ପାଇଁ ଶାରୀରିକ ସୁସ୍ଥତା ଜରୁରୀ ଏବଂ ଶାରିରୀକ ସୁସ୍ଥତା ପାଇଁ ଯୋଗ ଜରୁରୀ । ପ୍ରଚାର ହିଁ ବିସ୍ତାରର ମାଧ୍ୟମ ବୋଲି କହିଛନ୍ତି ରାମଦେବ । । ମୁଁ ଜଣେ ଆତ୍ମନିର୍ଭର ସନ୍ନ୍ୟାସୀ । ଲୋକେ କହୁଥିଲେ ମୁଁ ବେପାର କରୁଛି । କିନ୍ତୁ ମୁଁ ଲୋକଙ୍କ ଉପଚାର କରୁଛି । ଲୋକଙ୍କୁ ସ୍ୱାବଲମ୍ବୀ କରୁଛି । ସ୍ୱାସ୍ଥ୍ୟ କ୍ଷେତ୍ରରେ ଆତ୍ମନିର୍ଭର ହେବାର ଆବଶ୍ୟକତା ରହିଛି । ଆତ୍ମନିର୍ଭର ଦ୍ୱାରା ରାଷ୍ଟ୍ରନିର୍ମାଣ ହୋଇପାରିବ । ସ୍ୱାସ୍ଥ୍ୟ ହିଁ ସମ୍ପଦ । ଶାରୀରିକ ସୁସ୍ଥତା ପାଇଁ ଯୋଗ ନିହାତି ଜରୁରୀ । ଯୋଗ ଦ୍ୱାରା ଆତ୍ମନିର୍ମାଣ ହେବ, ଏହାଦ୍ୱାରା ରାଷ୍ଟ୍ର ନିର୍ମାଣ ମଧ୍ୟ ହେବ । ଯାହାର ଯେତେ ପ୍ରଚାର ହେବ ତାହାର ସେତେ ବିସ୍ତାର ହେବ । ତେଣୁ ନିଜର ସାମଗ୍ରୀକୁ ବିଭିନ୍ନ ପ୍ଲାଟଫର୍ମରେ ପ୍ରଚାର ପ୍ରସାର କରିବା ଆବଶ୍ୟକ । ଏବେ ପୂରା ଦେଶକୁ ଓଡ଼ିଶା ଚଳାଉଛି କହିଲେ ଅତ୍ୟୁକ୍ତି ହେବ ନାହିଁ । ସବୁ କ୍ଷେତ୍ରରେ ଓଡ଼ିଶାର ଲୋକ ଉଚ୍ଚ ପଦବୀରେ ରହିଛନ୍ତି ।

ଯେଉଁଠି ଓଡ଼ିଶାର ଆତ୍ମନିର୍ଭରତା ରହିଛି, ଯେଉଁଠି ଦେଶର ଆତ୍ମନିର୍ଭରତା ସନ୍ନିହିତ ଅଛି ତାହାର ବ୍ରାଣ୍ଡ ଆମ୍ବାସଡର ହେବାକୁ ମୁଁ ପ୍ରସ୍ତୁତ ।ଓଡ଼ିଶାର ପରମ୍ପରା ଓ ସଂସ୍କୃତିକୁ ଆଗକୁ ନେବାକୁ ବିନା କୌଣସି ସ୍ୱାର୍ଥରେ ମୁଁ ପ୍ରତିବଦ୍ଧ ଅଛି ବୋଲି କହିଛନ୍ତି ରାମଦେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ମୋର ଭଲ ସମ୍ପର୍କ ରହିଛି । ଓଡ଼ିଶାରେ ପତଞ୍ଜଳୀ ସଂସ୍ଥାନ ନିର୍ମାଣ ହେଉ ଏବଂ ଏଥିରୁ ରାଜ୍ୟବାସୀ ଲାଭ ପାଆନ୍ତୁ ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ମୁଁ ସରକାରୀ ସ୍କୁଲରେ ପଢିଛି । ମୋ ପାଖରେ ପିନ୍ଧିବାକୁ ପୂର୍ବରୁ ଗରମ କପଡା ମଧ୍ୟ ନଥିଲା । କିନ୍ତୁ ଏବେ ଗରମ କପଡା ପିନ୍ଧିବାର ବି ଆବଶ୍ୟକତା ବି ନାହିଁ । ପୂର୍ବରୁ ଟଙ୍କା ନଥିଲା,ଏବେ ଟଙ୍କାର ଆବଶ୍ୟକତା ନାହିଁ । ଯାହା ବି ସମ୍ପତ୍ତି ଅଛି ସବୁ ଦେଶବାସୀଙ୍କ ପାଇଁ । ମୁଁ ଏଯାବତ୍ ବ୍ୟାଙ୍କ ଆକାଉଣ୍ଟ ଖୋଲିନି ବୋଲି କହିଥିଲେ ରାମଦେବ । ଏହାଛଡା ରାମଦେବ କହିଛନ୍ତି, ଲୋକେ କହୁଥିଲେ ଗୁରୁକୁଳରେ ପଢିଛି ମୋ ଦ୍ୱାରା କିଛି ହେବନି । କିନ୍ତୁ ନିଜ ମାତୃଭାଷା ବଳରେ ଲୋକେ ସଫଳତାର ଶୀର୍ଷରେ ପହଞ୍ଚିପାରିବ । ଏଥିପାଇଁ ପ୍ରଚଣ୍ଡ ଏକାଗ୍ରତା ଓ ପରିଶ୍ରମ ଆବଶ୍ୟକ । ଆଉ ଏଥିପାଇଁ ନିଜ ସ୍ୱପ୍ନ ପଥରେ ନିରନ୍ତର ଚାଲିବାକୁ ପଡିବ ।

କରୋନାକୁ ନେଇ ରାମଦେବ କହିଥିଲେ, ମୋତେ କରୋନା ତ ଦୂରର କଥା କୌଣସି ଥଣ୍ଡା, ଜ୍ୱର ମଧ୍ୟ ହେଉନାହିଁ । ଆଉ ଏହାର କାରଣ ହେଲା ଯୋଗ । ୪୫ ବର୍ଷରୁ ଅଧିକ ଦିନ ହେବ ଯୋଗ କଲିଣି, ଦିନେ ବି ରୋଗରେ ପିଡୀତ ହୋଇନି । ବିନା ବିଶ୍ରାମରେ ମୁଁ ବେଶ ଖୁସି ଅଛି । କୋଟି କୋଟି ଲୋକଙ୍କୁ କରୋନାରୁ ରକ୍ଷା କରିଛି । ଯେଉଁମାନଙ୍କୁ କରୋନା ହୋଇଥିଲା ସେମାନଙ୍କୁ ବଞ୍ଚାଇବାରେ ସାଥ୍ ଦେଇଛି । ଏମ୍ସ ନିର୍ଦ୍ଦେଶକ କହିଥିଲେ, ୯୦ ପ୍ରତିଶତ କରୋନା ରୋଗୀଙ୍କୁ ହସ୍ପିଟାଲ ଯିବାର ଆବଶ୍ୟକତା ନାହିଁ । ମୁଁ ମଧ୍ୟ ସମାନ କଥା କହିଥିଲି, ୯୦ରୁ ୯୫ ପ୍ରତିଶତ କରୋନା ରୋଗୀ ଯୋଗ କରି ନିଜକୁ ସୁସ୍ଥ କରିପାରିବେ ।

ଏହାସହ ରାମଦେବ କହିଥିଲେ, ପ୍ରକୃତି ସହ ନିଜକୁ ଯୋଡିଲେ ଜୀବନରେ କୌଣସି ବିକୃତି ଆସିବନି । ଏହା ମାଧ୍ୟମରେ ଅନେକ ଲୋକଙ୍କୁ ସ୍ୱାସ୍ଥ୍ୟ କ୍ଷେତ୍ରରେ ଆତ୍ମନିର୍ଭର କରିପାରିଛି । ଭାରତକୁ ଆତ୍ମନିର୍ଭର କରିବାକୁ ହେଲେ ପ୍ରଚଣ୍ଡ ପରିଶ୍ରମ କରିବାକୁ ପଡିବ । ସବୁ ଲୋକ ପରିଶ୍ରମ କଲେ, ଆଗାମୀ ୨୦ ବର୍ଷ ଭିତରେ ପ୍ରତ୍ୟେକ କ୍ଷେତ୍ରରେ ଭାରତ ପୂରା ବିଶ୍ୱର ନେତୃତ୍ୱ ନେଉଥିବ ।

The post ମୁଁ ଦେଶର ଅନଅଫିସିଆଲ ସ୍ୱାସ୍ଥ୍ୟମନ୍ତ୍ରୀ, ମୁଁ କେବେ ବଦଳିବି ନାହିଁ : ବାବା ରାମଦେବ first appeared on Kanak News.

from Kanak News
via <a href="https://ifttt.com/?

ସୋମବାର ଶୀତକାଳୀନ ଅଧିବେଶନ ପୂର୍ବରୁ ଆଜି ବସିବ ସର୍ବଦଳୀୟ ବୈଠକ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉପସ୍ଥିତ ରହିବା ନେଇ ସୂଚନା

କନକ ବ୍ୟୁରୋ : ଆସନ୍ତାକାଲି ଠାରୁ ସଂସଦର ଶୀତକାଳିନ ଅଧିବେଶନ ଆରମ୍ଭ ହେଉଛି । ତେବେ ଏହା ପୂର୍ବରୁ ଆଜି ବସୁଛି ସର୍ବଦଳୀୟ ବୈଠକ । ଏହି ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଅନ୍ୟ ଦଳର ବରିଷ୍ଠ ନେତାମାନେ ଉପସ୍ଥିତ ରହିବେ ବୋଲି ସୂଚନା ରହିଛି ।
ସଂସଦରେ କିଭଳି ରଣନୀତି ରହିବ ଏବଂ କଣ କଣ କାର୍ଯ୍ୟସୂଚୀ ରହିଛି ଏନେଇ ବୈଠକରେ ଆଲୋଚନା ହେବ । ସଂସଦର ଚଳିତ ଅଧିବେଶନରେ ବିଭିନ୍ନ ଗୁରୁତ୍ୱପର୍ଣ୍ଣ ପ୍ରସଙ୍ଗ ଆସିବାର ଅଛି । ନୂଆ କୃଷି ଆଇନ ପ୍ରତ୍ୟାହାର କରିବାକୁ ପ୍ରଧାନମନ୍ତ୍ରୀ ଘୋଷଣା କରିଥିବା ବେଳେ ଏନେଇ ସାମ୍ବିଧାନିକ ପ୍ରକିୟା ଆରମ୍ଭ ହୋଇସାରିଛି । କେନ୍ଦ୍ର କ୍ୟାବିନେଟ ଏହାକୁ ମଂଜୁରୀ ଦେଇସାରିଥିବା ବେଳେ କୃଷି ଆଇନ ପ୍ରତ୍ୟାହାର ବିଲକୁ ସଂସଦର ଚଳିତ ଅଧିବେଶନରେ ଆଗତ କରିବେ ମୋଦି ସରକାର ।

The post ସୋମବାର ଶୀତକାଳୀନ ଅଧିବେଶନ ପୂର୍ବରୁ ଆଜି ବସିବ ସର୍ବଦଳୀୟ ବୈଠକ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉପସ୍ଥିତ ରହିବା ନେଇ ସୂଚନା first appeared on Kanak News.

from Kanak News
via <a href="https://ifttt.com/?

Create your website with WordPress.com
Get started