ବାଉଁଶ ଓ ବେତରୁ ପ୍ରସ୍ତୁତ ହେଉଛି ଭଳିକି ଭଳି ସାମଗ୍ରୀ । ଘର କାମ ସହ ବାଉଁଶରେ ବିଭିନ୍ନ ଘରକରଣା ଜିନିଷ ତିଆରି କରୁଛନ୍ତି ମହିଳା ।

କନକ ବ୍ୟୁରୋ : ବାଉଁଶରେ ବିଭିନ୍ନ ପ୍ରକାର ସାମଗ୍ରୀ ତିଆରି କରି ସ୍ୱାବଲମ୍ବୀ ହୋଇଛନ୍ତି କଟକ ଜିଲ୍ଲା ବାଙ୍କି ତାଳବସ୍ତ ଅଞ୍ଚଳର ମହିଳା ଓ ପୁରୁଷ । ବାଉଁଶ ପାତିଆରେ ତିଆରି ହେଉଥିବା ଘରୋଇ ଉପକରଣ ସହ ନିଖୁଣ କାରୁକାର୍ଯ୍ୟ ଅନ୍ୟମାନଙ୍କୁ ଆକୃଷ୍ଠ କରୁଛି । ପାଖାପାଖି ୧୫ରୁ ୨୦ କୁଶଳୀ କାରିଗର ବାଉଁଶ ଓ ବେତରୁ ପ୍ରସ୍ତୁତ କରୁଛନ୍ତି ଭଳିକି ଭଳି ସାମଗ୍ରୀ । କୁଟୀର ଶିଳ୍ପ ପାଇଁ ସ୍ୱତନ୍ତ୍ର ପରିଚୟ ପାଲିଟିଥିବା ତାଳବସ୍ତ ଗାଁର କାରିଗରଙ୍କ କଳାକୃତି ଅନ୍ୟ ମାନଙ୍କ ପାଇଁ ପ୍ରେରଣା ପାଲଟିଛି । ଅନ୍ୟପଟେ କଂଚା ମାଲର ଦରଦାମ ବୃଦ୍ଧି ପାଉଥିବାରୁ ଚିନ୍ତା ପ୍ରକଟ କରିଛନ୍ତି କାରିଗର ।

ବୁଡିବାକୁ ବସିଲାଣି ବାଉଁଶ ବ୍ୟବସାୟ । ସାହାଯ୍ୟ ଅପେକ୍ଷାରେ ବ୍ୟବସାୟୀ । ଚେୟାର, ଟେବୁଲ, ବ୍ୟାଗ, ମୋବାଇଲ ଷ୍ଟାଣ୍ଡ, ବେଡଲାଇଟ, ପେନ୍ ଷ୍ଟାଣ୍ଡ, ହ୍ୟାଣ୍ଡବ୍ୟାଗ, ଆସନ, ଅଳଙ୍କାର, ଘରୋଇ ଉପକରଣ । ବାଉଁଶ ପାତିରେ ତିଆରି ହେଉଛି ଭଳିକି ଭଳି ସୁନ୍ଦର କାରୁକାର୍ଯ୍ୟରେ ଆର୍କଷଣୀୟ ସାମଗ୍ରୀ । ମନମୋହୁଛି ନିଖୁଣ କାରୁକାର୍ଯ୍ୟର ସାମଗ୍ରୀ । ବାଉଁଶ ପାତିରେ ପାଖାପାଖି ୫୦ ପ୍ରକାରର ଘରୋଇ ଉପକରଣ ତିଆରି କରୁଛନ୍ତି ବାଙ୍କୀ ତାଳବସ୍ତ ଅଂଚଳର ଏକାଦଶୀ ବାରିକ । ନିଜେ ସ୍ୱାବଲମ୍ବୀ ହେବା ସହ ଆଖପାଖ ଅଂଚଳର ଯୁବକ ଓ ଯୁବତୀଙ୍କୁ ସ୍ୱାବଲମ୍ବୀ କରିପାରିଛନ୍ତି ।

ଘର କାମରୁ ସମୟ ବାହାର କରି ପତ୍ନୀ ସୁଲୋଚନା ବାରିକ ସ୍ୱାମୀ ଏକାଦଶୀ ବାରିକଙ୍କୁ ସହଯୋଗର ହାତ ବଢାଇଛନ୍ତି । ଏମାନଙ୍କ ସହ ପାଖାପାଖି ୧୫ରୁ ୨୦ କୁଶଳୀ କାରିଗର ବାଉଁଶ ଓ ବେତରୁ ପ୍ରସ୍ତୁତ କରୁଛନ୍ତି ଭଳିକି ଭଳି ସାମଗ୍ରୀ । କୁଟୀର ଶିଳ୍ପ ପାଇଁ ସ୍ୱତନ୍ତ୍ର ପରିଚୟ ପାଲିଟିଥିବା ଏହି ତାଳବସ୍ତ ଗାଁର କାରିଗର ମାନେ ଅଭାବ ଅନଟନ ଭିତରେ କଳାକୁ ବଂଚାଇ ରଖିଛନ୍ତି ।

ଗାଁ ଗହଳିରେ ପୂର୍ବରୁ କଂଚାମାଲ ସୁଲଭ ଦରରେ ମିଳୁଥିବାବେଳେ ବର୍ତମାନ ଦରଦାମ ବୃଦ୍ଧି ବ୍ୟବସାୟ ପାଇଁ ବାଧକ ସାଜିଛି । ଆସାମ ଦେଇ ପଶ୍ଚିମବଙ୍ଗରୁ ଆସୁଥିବା ବେତ ବାଉଁଶର ବର୍ଦ୍ଧିତ ଦରକୁ ନେଇ କଂଚାମାଲ କିଣିବା ବ୍ୟବସାୟଙ୍କ ପାଇଁ କଷ୍ଟକର ହୋଇପଡିଛି । ଅନ୍ୟପଟେ କିଛି ନିଦ୍ଧିଷ୍ଟ ମେଳାରେ ହିଁ ସାମଗ୍ରୀ ଗୁଡିକର ବିକ୍ରି ହେଉଛି ଅନ୍ୟ ସମୟରେ ହାତବାନ୍ଧି ବସୁଛନ୍ତି କାରିଗର । ଗୋଟେ ପଟେ କଞ୍ଚାମାଲ ଅଭାବ ଅନ୍ୟପଟେ ଅଭାବୀ ବିକ୍ରି କାରିଗରଙ୍କ ପାଇଁ ବଡ ସମସ୍ୟା ଆଣିଛି । ସରକାରଙ୍କ ତରଫରୁ ଯଦି କାରିଗରଙ୍କୁ ଉନ୍ନତମାନର ତାଲିମ ପ୍ରଦାନ ସହ ବିକ୍ରି ବ୍ୟବସ୍ଥା ହୁଅନ୍ତା ତେବେ କାରିଗରଙ୍କ ଭବିଷ୍ୟତ ସୁରକ୍ଷିତ ଓ କଳାକୁ ବଂଚାଇ ରଖି ହୁଅନ୍ତା ବୋଲି ଏକାଦଶୀ ବାରିକ କହିଛନ୍ତି । ସରକାରଙ୍କୁ ସାହାଯ୍ୟ ଓ ସହଯୋଗ ପାଇଁ ନିବେଦନ କରିଛନ୍ତି କୁଶଳୀ କାରିଗର ।

୪୦ବର୍ଷ ହେବ ଏହି କାର୍ଯ୍ୟରେ ନିମଗ୍ନ ରହିଛନ୍ତି ଏକାଦଶୀ ବାରିକ । କେବଳ ଦୁଇ ପଇସା ରୋଜଗାର ଉଦ୍ଦେଶ୍ୟ ନୁହେଁ ବରଂ ଆଉ କିଛି ଜଣଙ୍କୁ ସ୍ୱାବଲମ୍ବୀ କରିବା, ରୋଜଗାର ବାଟ ଫିଟାଇବା ଲକ୍ଷ୍ୟକୁ ସଫଳ କରିବା ପାଇଁ ନିଜ ପ୍ରୟାସ ଜାରି ରଖିଛନ୍ତି । ଯଦି ସରକାରଙ୍କ ତରଫରୁ ପୋତ୍ସାହନ ଯୋଗାଇ ଦିଆଯାଏ ହୁଏତ ଏମାନେ ବାଉଁଶ କଳା ଦ୍ୱାରା ଅଧିକ ଯୁବକ ଯୁବତୀ ସ୍ୱାବଲମ୍ବୀ ହୋଇ ପାରିବେ ବୋଲି ମତ ପ୍ରକାଶ ପାଇଛି । ଦୁଇ ଦୁଇ ଥର ରାଜ୍ୟସ୍ତରରେ ସମ୍ମାନିତ ହୋଇଛନ୍ତି ଏକାଦଶୀ ବାରିକ ।

The post ବାଉଁଶ ଓ ବେତରୁ ପ୍ରସ୍ତୁତ ହେଉଛି ଭଳିକି ଭଳି ସାମଗ୍ରୀ । ଘର କାମ ସହ ବାଉଁଶରେ ବିଭିନ୍ନ ଘରକରଣା ଜିନିଷ ତିଆରି କରୁଛନ୍ତି ମହିଳା । first appeared on Kanak News.

from Kanak News
via <a href="https://ifttt.com/?

ଆଖୁ ଚାଷ କରି ଲାଭ ପାଉଛନ୍ତି ଚାଷୀ । ୪ ଜଣ ବନ୍ଧୁ ମିଶି ଆରମ୍ଭ କରିଛନ୍ତି ସୁନ୍ଦର ଉଦ୍ୟୋଗ ।

କନକ ବ୍ୟୁରୋ : କୋରାପୁଟ ଜିଲ୍ଲାକୁ ସ୍ୱତନ୍ତ୍ର ପରିଚୟ ଦେଇଛି ଅର୍ଥକାରୀ ଫସଲ ଆଖୁ ଚାଷ । ଅନ୍ୟାନ୍ୟ ଫସଲ ଅପେକ୍ଷା ଆଖୁ ଚାଷରେ ଅଧିକ ଲାଭ କରୁଛନ୍ତି ଚାଷୀ । ପୂର୍ବରୁ ଆଖୁ ବ୍ୟବସାୟ ପାଇଁ ଚାଷୀକୁ ଚିନ୍ତା କରିବାକୁ ପଡ଼ୁଥିଲା ହେଲେ ଏବେ ଏହାର ସମାଧାନର ବାଟ ଫିଟିଛି । ୪ ଜଣ ବନ୍ଧୁ ମିଶି ଏକ ଉଦ୍ୟୋଗ କରିଛନ୍ତି । ନିଜେ ସ୍ୱାବଲମ୍ବୀ ହେବା ସହ ପ୍ରାୟ ୪୦ରୁ ୫୦ ଜଣଙ୍କୁ ରୋଜଗାର ଦେଇଛନ୍ତି ।

ସମସ୍ତେ ନିଜ ନିଜ କାମରେ ବ୍ୟସ୍ତ । କାମ କରୁଥିବା ଶ୍ରମିକ କିଏ ଆଖୁ ଆଣୁଛି ତ କିଏ ଆଖୁରୁ ରସ ବାହାର କରୁଛି ତ କିଏ କରୁଛି ଗୁଡ଼ ତିଆରି । ଆଖୁ ଚାଷୀଙ୍କ ମୁହଁରେ ଫୁଟିଛି ହସ । ଚାଷୀଙ୍କୁ ଆଉ ଆଖୁ ବିକ୍ରି ପାଇଁ ଅପେକ୍ଷା କରିବାକୁ ପଡ଼ିବ ନାହିଁ କି ଆନ୍ଧ୍ର ହାତକୁ ଦେବାକୁ ପଡ଼ିବ ନାହିଁ । ଜୟପୁରରେ ଖୋଲିଛି ବିଘ୍ନେଶ ଫୁଡ଼ ନାମକ ଏକ ଉଦ୍ୟୋଗ । ଯେଉଁଠି ଚାଷୀ ତାର ଅମଳ ଆଖୁକୁ ଉଚିତ ମୂଲ୍ୟରେ ବିକ୍ରି କରିବା ସହ, ବ୍ୟବସାୟ ମଧ୍ୟ କରିପାରିବ ।

ଆତ୍ମନିର୍ଭରଶୀଳ ହେବେ ଆଖୁ ଚାଷୀ । ଆନ୍ଧ୍ର ଉପରେ କରିବେନି ନିର୍ଭର । ୪ ଜଣ ବନ୍ଧୁ ମିଶି ଏହି ଉଦ୍ୟୋଗଟି କରିଛନ୍ତି । ପ୍ରାୟ ଶହେରୁ ଅଧିକ ପୁରୁଷ ଓ ମହିଳା ଏଠାରେ କାମ କରି ଗୁଜୁରାଣ ମେଂଟାଉଛନ୍ତି । ଏହି ଉଦ୍ୟୋଗରେ ଚାଷୀଙ୍କ ଆଖୁ କିଣିବା ସହ ବିନା କେମିକାଲରେ ପ୍ରସ୍ତୁତ ହେଉଛି ଗୁଡ଼ । ଗୁଡ଼ ତିଆରି ଠାରୁ ପ୍ୟାକେଟିଂ ପର୍ଯ୍ୟନ୍ତ ସବୁ କିଛି ଚାଲିଛି ଗୋଟିଏ ସ୍ଥାନରେ । କେବଳ ଗୁଡ଼ ତିଆରି ହେଉନି ବିନା କେମିକାଲରେ ଗୁଣ୍ଡ ଗୁଡ଼ ମଧ୍ୟ ପ୍ରସ୍ତୁତି ହେଉଛି ଯାହାକି ଚିନି ବଦଳରେ ଏହାକୁ ବ୍ୟବହାର କରାଯାଇପାରିବ । ଏଠାରେ ତିଆରି ହେଉଥିବା ପ୍ରତ୍ୟେକ ଉତ୍ପାଦ ଏକ ସ୍ୱତନ୍ତ୍ର ବ୍ରାଣ୍ଡରେ କରାଯାଉଛି ।

ଆଖୁ ଚାଷ ପାଇଁ କୋରାପୁଟ ଜିଲ୍ଳାରେ ଉପଯୁକ୍ତ ଜଳବାୟୁ ରହିଥିଲେ ସୁଦ୍ଧା ବଜାରର ସୁବିଧା ନଥିବାରୁ ଏହି ଚାଷରୁ ମୁହଁ ଫେରାଉଥିଲେ ଚାଷୀ । ଜିଲ୍ଳାରେ ଯେତିକି ଚାଷ ହେଉଥିଲା ତାହା ସବୁ ଟେକି ଦେଉଥିଲେ ଆନ୍ଧ୍ର ହାତକୁ । ଏବେ ଏହି ଚାଷର ସମାଧାନ ମିଳିବା ପରେ ଅନେକ ଚାଷୀ ଏବେ ଆଖୁ ଚାଷକୁ ଆପଣାଇଛନ୍ତି । ଚାଷୀଙ୍କ ସମସ୍ୟାର ସମାଧାନ କରିବା ସହ ନିଜେ ମଧ୍ୟ ଏକ ରୋଜଗାରର ବାଟ ପାଇପାରିଛନ୍ତି । ଆଗକୁ ଚିନି ଉତ୍ପାଦନ ସାଙ୍ଗକୁ ବଜାରରେ ଆଖୁ ରସ ମଧ୍ୟ ଯୋଗାଇଦେବେ ବୋଲି ଉଦ୍ୟୋଗର ମାଲିକ କହିଛନ୍ତି ।

The post ଆଖୁ ଚାଷ କରି ଲାଭ ପାଉଛନ୍ତି ଚାଷୀ । ୪ ଜଣ ବନ୍ଧୁ ମିଶି ଆରମ୍ଭ କରିଛନ୍ତି ସୁନ୍ଦର ଉଦ୍ୟୋଗ । first appeared on Kanak News.

from Kanak News
via <a href="https://ifttt.com/?

ଫୁଲ ଚାଷ ପ୍ରତି ବଢୁଛି ଆଦର । ଗେଣ୍ଡୁଫୁଲ ଚାଷ କରି ସ୍ୱାବଲମ୍ବୀ ହୋଇଛନ୍ତି ମହିଳା ।

କନକ ବ୍ୟୁରୋ : ପନି ପରିବା ପରେ ଏବେ ଫୁଲ ଚାଷ ପ୍ରତି ବଢୁଛି ଆଦର । ବିଶେଷ କରି ମହିଳା ମାନେ ଏବେ ଫୁଲ ଚାଷ କରି ସ୍ୱାବଲମ୍ବୀ ହବା ସହ ନିଜ ଅଂଚଳ ପାଇଁ ଏକ ଭିନ୍ନ ପରିଚୟ ସୃଷ୍ଟି କରି ପାରୁଛନ୍ତି । ମାଲକାନଗିରି ଜିଲ୍ଲାର ସ୍ୱୟଂ ସହାୟ ଗୋଷ୍ଠୀର ମହିଳା ମାନେ ଏବେ ଗେଣ୍ଡୁ ଫୁଲ ଚାଷ କରି ବେଶ ଦୁଇ ପଇସା ରୋଜଗାର କରିପାରୁଛନ୍ତି ।

ହସୁଛି କ୍ଷେତ, ହସୁଛନ୍ତି ଚାଷୀ । ମାଲକାନଗିରିରେ ମହିଳାଙ୍କ ଗେଣ୍ଡୁ ଚାଷ । ଫୁଲ ଯୋଗାଉଛି ଆହାର । ଗେଣ୍ଡୁ ଫୁଲ ଚାଷ କରି ସ୍ୱାବଲମ୍ବୀ ମାଲକାନଗିରି ମହିଳା । ଏକଦା ମାଓ ଉପଦ୍ରବ ଯୋଗୁ ଭିନ୍ନ ପରିଚୟ ବହନ କରୁଥିଲା ମାଲକାନଗିରି ଜିଲ୍ଲା । ତେବେ ଏବେ ଚାଷବାସ ଓ କୃଷି କ୍ଷେତ୍ରରେ ବେଶ ଆଗେଇ ଚାଲିଛି ମାଲକାନଗିରି ଜିଲ୍ଲା । ପନିପରିବା ସାଙ୍ଗକୁ ଫୁଲ ଚାଷ ପ୍ରତି ମନ ବଳାଉଛନ୍ତି ମହିଳା ଚାଷୀ । ଏବେ ଧାନ ବିରି ମୁଗ ସହ କ୍ଷେତରେ ହସୁଛି ସୁନାର ଗେଣ୍ଡୁ ଫସଲ ।

ଜିଲ୍ଲାର ସଦର ବ୍ଲକ ଅନ୍ତର୍ଗତ ଏମଭି ୧୦ ଗାଁର ଜୟ ମାଁ ତାରିଣୀ ଓ ତୁଳସୀ ଦେବୀ ସ୍ୱୟଂ ସହାୟକ ଗୋଷ୍ଠିର ୨୦ ମହିଳା ନିଜ ନିଜ ବିଲ ବାଡରେ ଗେଣ୍ଡୁ ଫୁଲ ଚାଷ କରିଛନ୍ତି । ପ୍ରତିଟି ଗ୍ରୁପକୁ ମିଳିଥିବା ଏକ ଲକ୍ଷ ଟଙ୍କା ଗୋଷ୍ଠୀ ବିନିଯୋଗ ପାଣ୍ଠିର ସତ ବିନିଯୋଗ କରିବା ସହ ଗୃପ ପିଛା ୫ ହଜାର ଭିଆରଏଫ ପାଣ୍ଠିକୁ ଖର୍ଚ୍ଚ କରି ଭିନ୍ନ ଭିନ୍ନ ସ୍ଥାନରେ ଗେଣ୍ଡୁ ଚାରା ରୋପଣ କରିଛନ୍ତି ମହିଳା ମାନେ । ଆଉ ଏବେ ଗେଣ୍ଡୁ ଅମଳ କରି ବେଶ ଦୁଇ ପଇସା ରୋଜଗାର କରୁଛନ୍ତି ସୟଂ ସହାୟକ ଗୋଷ୍ଠୀର ମହିଳା ମାନେ ।

କେବଳ ବ୍ୟବସାୟ ନୁହଁ । ରବି ପନିପରିବା କ୍ଷେତରେ ଗେଣ୍ଡୁ ଫୁଲ ଚାଷ କରିବାର ଭିନ୍ନ ଉପକାରିତା ମଧ୍ୟ ରହିଛି । ଗେଣ୍ଡୁ ଫୁଲର ମହକ ଯୋଗୁ କିଟ ପତଙ୍ଗ ସବୁ ପନି ପରିବା ଫସଲ ଠାରୁ ଦୁରେଇ ରହିଥାଏ । ତେଣୁ ରବି ରୁତୁରେ ପନିପରିବା ମଧ୍ୟରେ ଗେଣ୍ଡୁ ଚାଷ ଲାଗି ପରାମର୍ଶ ଦେଇଛି ଉଦ୍ୟାନ ବିଭାଗ । ତେଣୁ ଉଦ୍ୟାନ ବିଭାଗର ତତ୍ୱାବଧାନରେ ଓଡିଶା ଜୀବିକା ମିଶନ ପକ୍ଷରୁ ପ୍ରଥମ ପର୍ଯ୍ୟାୟରେ ୨ଟି ଗୋଷ୍ଠିର ୨୦ ମହିଳାଙ୍କୁ ନେଇ ୭ ହଜାର ୫୦୦ ଗେଣ୍ଡୁ ଚାରା ରୋପଣ କରାଯାଇଛି । ଆଉ ଗୋଟିଏ ଗୋଟିଏ ଫୁଲକୁ ୫୦ ପଇସା ଠାରୁ ଏକ ଟଙ୍କା ଦରରେ ବିକ୍ରି ହେଉଥିବା ଜଣାପଡିଛି । ପର୍ବ ପର୍ବାଣୀ ସମୟରେ ଫୁଲର ଚାହିଦା ବଢୁଥିବା ବେଳେ ସୁନ୍ଦର ସୁନ୍ଦର ବୁକେ ଓ ଫ୍ଲୋରା ଡେକୋରେଶନର ଚାହିଦା ମଧ୍ୟ ବଢିବାରେ ଲାଗିଛି । ତେଣୁ ଆଗାମି ଦିନରେ ଗେଣ୍ଡୁ ସମେତ ଗୋଲାପ, ଜରବେରା ଆଦି ଫୁଲ ଚାଷକୁ ବ୍ୟାପକ କରିବାକୁ ଲକ୍ଷ ରଖିଛି ଓଡିଶା ଜୀବିକା ମିଶନ ।

The post ଫୁଲ ଚାଷ ପ୍ରତି ବଢୁଛି ଆଦର । ଗେଣ୍ଡୁଫୁଲ ଚାଷ କରି ସ୍ୱାବଲମ୍ବୀ ହୋଇଛନ୍ତି ମହିଳା । first appeared on Kanak News.

from Kanak News
via <a href="https://ifttt.com/?

ଓଡ଼ିଆ ଝିଅ ନୀଳିମା ପାତ୍ରଙ୍କ ହର୍ବାଲ ଛେନାପୋଡ଼: ତୁଳସୀ, ପୋଦିନା, ବିଟ୍, ଗାଜର ଓ ଡ୍ରାଏ ଫ୍ରୁଟ୍ସ ପକାଇ ପ୍ରସ୍ତୁତ ହେଉଛି ଛେନାପୋଡ଼

କନକ ବ୍ୟୁରୋ: ଛେନାପୋଡ଼ କାହାକୁ ବା ଭଲ ଲାଗେନି । ତେବେ ଓଡ଼ିଆ ଝିଅ ନୀଳିମା ପାତ୍ରଙ୍କର ମିଠା ପ୍ରତି ଥିବା ଅହେତୁକ ଦୁର୍ବଳତା ତାଙ୍କୁ ଏକ ସଫଳ ମିଠା ଉଦ୍ୟୋଗୀ ଭାବେ ପରିଚୟ ସୃଷ୍ଟି କରିଛି । ଓଡ଼ିଶାର ପାରମ୍ପରିକ ମିଠା ତଥା ପିଠା ଛେନାପୋଡ଼କୁ ନୂଆ ଏକ ଢ଼ଙ୍ଗରେ ତିଆରି କରୁଛନ୍ତି ଓଡ଼ିଆ ଝିଅ ନୀଳିମା ପାତ୍ର । ନୀଳିମା ଜଣେ ଉଚ୍ଚ ଶିକ୍ଷିତ ହୋଇଥିଲେ ବି ଓଡ଼ିଶାର ମିଠା ପ୍ରତି ଥିବା ତାଙ୍କ ଭଲ ପାଇବା ତାଙ୍କୁ ଏକ ଉଦ୍ୟୋଗୀ ଭାବେ ଗଢ଼ି ତୋଳିଛି ।

ଓଡ଼ିଆ ଝିଅ ନୀଳିମାଙ୍କୁ ଏକ ଭିନ୍ନ ପରିଚୟ ଦେଇଛି ମଲ୍ଟି ଭିଟାମିନ ଛେନାପୋଡ଼ । ଓଡ଼ିଶାର ପାରମ୍ପରିକ ମିଠା ତଥାକୁ ପିଠାକୁ ଏକ ଭିନ୍ନ ଢଙ୍ଗରେ ତିଆରି କରୁଛନ୍ତି ନୀଳିମା । ସେ ଏହି ଛେନାପୋଡ଼ ପାଇଁ ଶୁଖିଲା ତୁଳସୀ ପତ୍ର , ପୋଦିନା ପତ୍ର ସହ ଅଁଳା ଗୁଣ୍ଡ, ଗାଜର ଗୁଣ୍ଡ , ବିଟ୍ ଗୁଣ୍ଡ, ଡ୍ରାଏ ଫ୍ରୁଟର୍ସ ଗୁଣ୍ଡ ଓ ମହୁ ବା ସୁଗାର ଫ୍ରି ଆଦିର ବ୍ୟବହାର କରିଥାନ୍ତି । ଯାହାକି ସ୍ୱାସ୍ଥ୍ୟ ପାଇଁ ହିତକର ବୋଲି ସେ କୁହନ୍ତି । ପୂର୍ବରୁ ନୀଳିମା ବାଙ୍ଗାଲୋରରେ ଜଣେ ସପ୍ଟୱେର ଇଂଜିନିୟର ଭାବେ କାର୍ଯ୍ୟକରୁଥିଲେ । ସେତେବେଳେ ସେ ଓଡ଼ିଆ ମିଠା ଓ ପିଠା ଖାଇବାକୁ ଖୁବ ପସନ୍ଦ କରୁଥିଲେ । ଓଡ଼ିଶାକୁ ଫେରିବା ପରେ ସେ ‘ ମୋମ ହ୍ୟାଣ୍ଡ’ ନାମକ ନିଜର ଏକ ଅନୁଷ୍ଠାନ ଖୋଲିଲେ । ପ୍ରଥମେ ସେ ଛେନାପୋଡ଼ ଠାରୁ ନିଜର ବ୍ୟବସାୟ ଆରମ୍ଭ କରିଥିଲେ । ଏବେ ମିଠା ସବୁ ପ୍ୟାକେଟରେ ମିଳିଯାଉଛି । ହେଲେ ଏଯାଏଁ ଛେନାପୋଡ଼କୁ ଏଥିରେ ସ୍ଥାନ ଦିଆଯାଇ ନାହିଁ । ଏଣୁ ପ୍ରଥମେ ଛେନାପୋଡ଼କୁ ଏଥିରେ ସ୍ଥାନ ଦେବାକୁ ନୀଳିମା ପ୍ରୟାସ କରିଛନ୍ତି ।

ନୀଳିମାଙ୍କ ଏହି ମଲ୍ଟି ଭିଟାମିନ ଛେନାପୋଡ଼କୁ ଲୋକେ ବେଶ ଆଦୃତ କରୁଛନ୍ତି । ପ୍ରଥମେ ଛେନାପୋଡ଼କୁ ପ୍ରସ୍ତୁତ କରି ତାହାକୁ ଭାଟିରେ ପୋଡ଼ୁଛନ୍ତି ନୀଳିମା । ମହିଳା ଉଦ୍ୟୋଗୀ ନୀଳିମା ଏକ ଭିନ୍ନ ରୂପରେ ଲୋକଙ୍କୁ ଭେଟି ଦେଉଛନ୍ତି ସୁସ୍ୱାଦୁ ମଲ୍ଟି ଛେନାପୋଡ଼ । ଏବେ କେବଳ ଛେନାପୋଡ଼ ପ୍ରସ୍ତୁତ କରୁଥିବାବେଳେ ଆଗକୁ ମଲ୍ଟି ଭିଟାମିନ ରସଗୋଲା , ମଲ୍ଟି ଭିଟାମିନ ନିମିକି , କାକରା ଆଦି ପ୍ରସ୍ତୁତ କରିବାର ଯୋଜନା ରଖିଛନ୍ତି । ତାଙ୍କର ଏକ ୟୁନିଟ୍ ପ୍ରସ୍ତୁତ ହେଉଛି । ଏବେ ସେ କେବଳ ଭୁବନେଶ୍ୱରରେ କାମ କରୁଛନ୍ତି । ପରେ ଏହାକୁ ଦେଶ ତଥା ବିଦେଶକୁ ରପ୍ତାନୀ କରିବେ ବୋଲି ଯୋଜନା ରହିଛି ।

କରୋନା ମହାମାରୀ ସମୟରେ ଏହି ମଲ୍ଟି ଛେନାପୋଡ଼ ରୋଗ ପ୍ରତିରୋଧକ ଶକ୍ତି ବୃଦ୍ଧି କ୍ଷେତ୍ରରେ ସହାୟକ ହେବ ବୋଲି ସେ ମତ ରଖିଛନ୍ତି । ନୀଳିମାଙ୍କ ଏପରି ଉଦ୍ୟମ ଫଳରେ ସେ ଅନ୍ୟମାନଙ୍କ ପାଇଁ ପାଲଟିଛନ୍ତି ଉଦାହରଣ ।

The post ଓଡ଼ିଆ ଝିଅ ନୀଳିମା ପାତ୍ରଙ୍କ ହର୍ବାଲ ଛେନାପୋଡ଼: ତୁଳସୀ, ପୋଦିନା, ବିଟ୍, ଗାଜର ଓ ଡ୍ରାଏ ଫ୍ରୁଟ୍ସ ପକାଇ ପ୍ରସ୍ତୁତ ହେଉଛି ଛେନାପୋଡ଼ first appeared on Kanak News.

from Kanak News
via <a href="https://ifttt.com/?

ପରିଚୟ ଖୋଜୁଛି କଳାହାଣ୍ଡି ଜିଲ୍ଲାରେ ତିଆରି ହେଉଥିବା ହାବସପୁରୀ ଶାଢୀ । ପ୍ରଚାର ପ୍ରସାରରେ ସରକାରଙ୍କ ଉଦାସିନତା ଅଭିଯୋଗ ।

କନକ ବ୍ୟୁରୋ : ପଶ୍ଚିମ ଓଡ଼ିଶାରେ ପ୍ରସ୍ତୁତ ହେଉଥିବା ମଧ୍ୟରେ ବରପାଲି ଶାଢୀ, ସୋନପୁର ଶାଢୀ, ବାନ୍ଧ ଶାଢୀ, ବଉଦ ଶାଢୀ ଓ ସମ୍ବଲପୁରୀ ଶାଢୀ ନିଜର ପରିଚୟ ସୃଷ୍ଟି କରିଛି । ସେଥି ମଧ୍ୟରୁ କଳାହାଣ୍ଡିର ହାବସପୁରୀ ଶାଢୀ ଜିଲ୍ଲା, ରାଜ୍ୟ, ଦେଶ ଓ ଦେଶ ବାହାରେ ନିଜୟ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲା । କିନ୍ତୁ ହାବସପୁରୀ ଶାଢୀର ପ୍ରଚାର ଓ ପ୍ରସାରରେ ସରକାରଙ୍କ ଉଦାସୀନତା ପାଇଁ କମ୍ ବିକ୍ରି ହେଉଥିବା ଅଭିଯୋଗ ଆଣିଛନ୍ତି ବୁଣାକାର । ପିଢି ପିଢି ଧରି କୌଳିକ ବୃତିକୁ ଆପଣାଇଥିଲେ ମଧ୍ୟ ମିଳୁନି ଉପଯୁକ୍ତ ମୁଲ୍ୟ । ଫଳରେ ଦୁର୍ଦ୍ଦିନରେ କାଳ କାଟୁଛନ୍ତି ବୁଣାକାର ପରିବାର ।

ପରିଚୟ ଖୋଜୁଛି କଳାହାଣ୍ଡିର ବୟନଶିଳ୍ପ ହାବସପୁରୀ ଶାଢୀ । ବରପାଲି ଶାଢୀ, ସୋନପୁର ଶାଢୀ, ବାନ୍ଧ ଶାଢୀ, ବଉଦ ଶାଢୀ, ସମ୍ବଲପୁରୀ ଶାଢୀ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ବେଳେ କଳାହାଣ୍ଡି ହାବସପୁରୀ ଶାଢୀର ପ୍ରଚାର ପ୍ରସାର ହେଉନଥିବା ଅଭିଯୋଗ ହୋଇଛି । ସରକାର କିମ୍ବା ପ୍ରଶାସନ ତତ୍ପରତା ଦେଖାଉନଥିବାରୁ ବୁଣାକାର ମାନେ ରୋଜଗାର ହରାଇବାକୁ ବସିଲେଣି । ବର୍ତମାନ ସମୟରେ ବିଭିନ୍ନ ମେସିନ୍ ତିଆରି ଶାଢୀ ବଜାରକୁ ଆସିବା ଯୋଗୁଁ ହାତବୁଣା ଶାଢୀର ଚାହିଦା କମିବାକୁ ଲାଗିଲାଣି । ତେଣୁ ଏହାକୁ କୌଳିକ ବୃତି କରି ନିଜର ଜୀବିକା ନିର୍ବାହ କରୁଥିବା କାରିଗର ଏବେ ଚିନ୍ତାରେ ପଡ଼ିଛନ୍ତି ।

କଳାହାଣ୍ଡି ହାବସପୁରରେ ରହୁଥିବା ଭୁଲିଆ ଓ ମେହେର ସମ୍ପ୍ରଦାୟର ଲୋକେ ଏହି ଶାଢୀ ବୁଣା କାମ କରନ୍ତି । ବର୍ତମାନ ଏହି ଶାଢୀ ବୁଣା କାମ ହାତଗଣତି କିଛି ପରିବାରରେ ସୀମିତ ଥିବା ବେଳେ ଏହାର ପ୍ରଚାର ପ୍ରସାର ପାଇଁ ଲୋକେ ଦାବି କରିଛନ୍ତି । ହାବସପୁରୀ ଶାଢୀରେ କଳାହାଣ୍ଡି ଜିଲ୍ଲାର ଆଦିବାସୀ ମାନଙ୍କ ବିଭିନ୍ନ କଳାକୃତି ବୁଣାଯାଉଥିଲା । ବୟନଶିଳ୍ପକୁ ଭାରତର ବିଭିନ୍ନ ରାଜ୍ୟରେ ଗୁରୁତ୍ୱ ଦିଆଯାଉଥିବାବେଳେ ପ୍ରଚାର ପ୍ରସାର ଓ ସହାୟତା ମିଳୁଥିବାରୁ ଏହା ଆଗକୁ ବଢିପାରୁଛି । ସରକାରଙ୍କ ଅଣଦେଖା ଯୋଗୁଁ ହାବସପୁରୀ ଶାଢୀ ଭଳି ବୟନଶିଳ୍ପ ଏବେ ଲୋପ ପାଇବାକୁ ବସିଥିବା ଅଭିଯୋଗ କରିଛନ୍ତି ବୁଣାକାର ।

The post ପରିଚୟ ଖୋଜୁଛି କଳାହାଣ୍ଡି ଜିଲ୍ଲାରେ ତିଆରି ହେଉଥିବା ହାବସପୁରୀ ଶାଢୀ । ପ୍ରଚାର ପ୍ରସାରରେ ସରକାରଙ୍କ ଉଦାସିନତା ଅଭିଯୋଗ । first appeared on Kanak News.

from Kanak News
via <a href="https://ifttt.com/?

ବାଟ ମଝିରେ ମିଳେଇଗଲା ବାହାଘରର ଖୁସି । ମାଉସୀ ଝିଅ ବାହାଘର ପାଇଁ ଯାଇ ପହଞ୍ଚିପାରିଲାନି କୁନିଝିଅ । ଦୁର୍ଘଟଣାରେ ବିଦାୟ ନେଲା ବିଜୟଲକ୍ଷ୍ମୀ…

କନକ ବ୍ୟୁରୋ: ବାହାଘର ପାଇଁ ଖୁସିଥିଲେ ସମସ୍ତେ । ମାଉସୀ ଝିଅ ବାହାଘର ପାଇଁ ଖୁସି ବି ଥିଲା ୧୦ ବର୍ଷର ଝିଅ ବିଜୟଲକ୍ଷ୍ମୀ । ମାମୁଘରେ ପହଞ୍ଚି, ମାଉସୀ ଘରକୁ ଯାଇଥାନ୍ତେ ଆଉ ସେଠି ଭଉଣୀ ବାହାଘରରେ ଧୂମ ମଜାମସ୍ତି କରିଥାନ୍ତା । ଏଇ ଖୁସି ନେଇ ମାଆ ଓ ବଡ ଭଉଣୀ ଭାଗ୍ୟଲକ୍ଷ୍ମୀ ସହ ମାମୁଘର ଆସୁଥିଲା କୁନିଝିଅ । ହେଲେ କିଏ ଜାଣିଥିଲା ଝିଅର ଖୁସି ନିମିଷକରେ ଉଭେଇଯିବ ବୋଲି । ମାମୁଘର ପହଞ୍ଚିବା ଆଗରୁ ମୃତ୍ୟୁ ବାଟ ମଝିରେ ମାଡି ବସିବ ବୋଲି ଆଉ ବାହାଘରରେ ହସଖୁସି କରିବା ବଦଳରେ କୁନିଝିଅ ବିଜୟଲକ୍ଷ୍ମୀ ସବୁଦିନ ପାଇଁ ବିଦାୟ ନେଇଯିବ ବୋଲି… ସୋର ବିଦୁଛକର ଛାତିଥରା ବସ ଦୁର୍ଘଟଣାରେ ୬ ଜଣ ପ୍ରାଣ ହରାଇଥିବା ବେଳେ ମୃତକଙ୍କ ମଧ୍ୟରେ ଥିଲା ୧୦ ବର୍ଷର ଝିଅ ବିଜୟଲକ୍ଷ୍ମୀ । ଯିଏ ନିଜ ମାଉସୀ ଝିଅର ବାହାଘର ପାଇଁ ବସରେ ଆସୁଥିଲା…

ରବିବାର ବାହାଘର ଥିବାରୁ ଶନିବାର ଉଦଳାରୁ ଶାନ୍ତିଲତା ବସରେ ବସି ସୋର କୁରୁଡା ଆସୁଥିଲେ ମାଆ ଓ ଦୁଇଝିଅ । ଷ୍ଟପେଜ୍ ପରେ ଷ୍ଟପେଜ୍ ଯାଉଥିଲା, ମାମୁଘର ପାଖେଇ ଆସୁଥିଲା । ଆଉ ମନରେ ବି ମାମୁଘରେ ପହଞ୍ଚିବାର ଉତ୍ସୁକତା ବଢୁଥିଲା । ଆଉ କିଛି ଦୂର ଥିଲା । ବସ ସୋର ପହଞ୍ଚିଥିଲେ ସମସ୍ତେ ବସରୁ ଓହ୍ଲାଇଥାନ୍ତେ ଆଉ ମାମୁଘରକୁ ଯାଇଥାନ୍ତେ । ହେଲେ ମାମୁଘରର କିଛି ଦୂରରୁ ହିଁ ସବୁକିଛି ଓଲଟପାଲଟ ହୋଇଗଲା । ବିଦୁଛକରେ ଛିଡା ହୋଇଥିବା ଶାନ୍ତିଲତା ବସକୁ କୋଇଲା ବୋଝେଇ ଟ୍ରକ ହଠାତ୍ ପଛରୁ ପିଟିଲା । ଆଉ ଘଟଣାସ୍ଥଳରରେ କୁନିଝିଅର ପ୍ରାଣବାୟୁ ଉଡିଗଲା ।

ଡାଇଭର ପାଖ କ୍ୟାବିନରେ ମାଆ ଓ ଦୁଇ ଝିଅ ବସିଥିବା ବେଳେ ଦୁର୍ଘଟଣା ପରେ ଗୋଟିଏ ସିଟ୍ ଛିଟକି ଆସି ବିଜୟଲକ୍ଷ୍ମୀଙ୍କ କାନମୁଣ୍ଡରେ ଶକ୍ତ ଆଘାତ ଦେଇଥିଲା । ଆଉ ସେଇଠି ହିଁ ମାଆ ଆଗରେ ଗୋଟେ ଝିଅ ସବୁଦିନ ପାଇଁ ଆଖିବୁଜିଦେଲା, ମୃତ୍ୟୁ ମାଆର ହାତ ମୁଠାରୁ ତା ଛୁଆକୁ ଛଡେଇ ନେଲା । ଆଖି ସାମ୍ନାରେ ସାନଝିଅକୁ ହରାଇ ମାଆ ସ୍ଥାଣୁ ପାଲଟିଥିବା ବେଳେ ବାହୁନି ବାହୁନି କାନ୍ଦୁଛି… ଆଉ ଏ ଅଘଟଣ ପୂରା ପରିବାରରେ ଶୋକର ଛାୟା ଖେଳାଇଦେଇଛି ।

ତେବେ ହସଖୁସିର ମୁହୂର୍ତ୍ତରେ ଯେ ମୃତ୍ୟୁ ଏମିତି ଏକ କଳାଦାଗ ବୋଳିଦେବ ତାହା କେହି କେବେ ଭାବି ନଥିବା ବେଳେ ମାମୁଘର ଯିବା ବାଟରୁ ଯମ କୁନିଝିଅର ଜୀବନ ନେଇଯିବ ତାହା ସମସ୍ତଙ୍କୁ ହତବାକ୍ କରିଛି । ସତରେ ଏମିତି ଦୁଃଖ କାହାକୁ ନଆସୁ, କାହା ସହ ନଘଟୁ…

The post ବାଟ ମଝିରେ ମିଳେଇଗଲା ବାହାଘରର ଖୁସି । ମାଉସୀ ଝିଅ ବାହାଘର ପାଇଁ ଯାଇ ପହଞ୍ଚିପାରିଲାନି କୁନିଝିଅ । ଦୁର୍ଘଟଣାରେ ବିଦାୟ ନେଲା ବିଜୟଲକ୍ଷ୍ମୀ… first appeared on Kanak News.

from Kanak News
via <a href="https://ifttt.com/?

ଓଡ଼ିଶାରେ ହରିୟାଣା ପୋଲିସର ଦବଙ୍ଗଗିରି: ତଦନ୍ତ ବେଳେ ଫଟୋ ଉଠାଇବାରୁ ସାମ୍ବାଦିକଙ୍କ ମୁଣ୍ଡରେ ଲଗାଇଲେ ବନ୍ଧୁକ

କନକ ବ୍ୟୁରୋ: ଏକ ଚୋରି ଘଟଣାର ତଦନ୍ତ କରିବାକୁ ଓଡିଶା ଆସିଥିବା ହରିଆଣା ପୋଲିସର ଦବଙ୍ଗଗିରି ଦେଖିବାକୁ ମିଳିଛି ବାଲେଶ୍ୱର ଜିଲ୍ଲାରେ । ଅଭିଯୁକ୍ତ ସମେତ ପରିବାରର ସମସ୍ତଙ୍କ ଉଠାଇ ନେଇଥିବା ପୋଲିସକୁ ଛାଡିଦେବାକୁ ଗ୍ରାମବାସୀ ନେହୁରା ହେବାରୁ ବନ୍ଧୁକ ଦେଖାଇ ଡରାଇଛି ହରିୟାଣା ପୋଲିସ । ଖବର ସଂଗ୍ରହ କରିବାକୁ ଯାଇଥିବା ସାମ୍ବାଦିକଙ୍କୁ ବି ଛାଡି ନଥିଲା ।

ବାଲେଶ୍ୱର ଖନ୍ତାପଡା ଥାନାରୁ ଆସିଛି ଅଭାବନୀୟ ଦୃଶ୍ୟ । କୌଣସି ଏକ ମାମଲାରେ ଅଭିଯୁକ୍ତକୁ ଧରିବା ପାଇଁ ଓଡିଶା ଆସିଥିବା ହରିୟାଣା ପୁଲିସର ଏକ ଟିମ୍ ଖନ୍ତାପଡା ଥାନାରେ ସ୍ଥାନୀୟ ଲୋକଙ୍କୁ ଭୟଭୀତ କରିଥିଲେ । ଏପରକିକି ଫଟୋ ଉଠାଉଥିବା ଜଣେ ସାମ୍ବାଦିକଙ୍କୁ ବି ମାଡ ମାରିଥିବା ଅଭିଯୋଗ ହୋଇଛି ।

ସୂଚନା ଅନୁସାରେ ଏକ ମାମଲାରେ ଅଭିଯୁକ୍ତ ଥିବା ଜଣେ ଯୁବକଙ୍କୁ ଖୋଜିବା ପାଇଁ ଖନ୍ତାପଡାର ସଠି ଗାଁକୁ ଯାଇଥିଲେ ହରିୟାଣା ପୋଲିସ । ଆଉ ଗାଁରୁ ଜଣେ ମହିଳା, ଜଣେ ନାବାଳିକା ଓ ଜଣେ ଯୁବକଙ୍କୁ ଧରି ଖନ୍ତାପଡା ଥାନାକୁ ଆଣିଥିଲା । ଖବର ପାଇ ପଛେପଛେ ଥାନାରେ ପହଁଚିଯାଇଥିଲେ ଗ୍ରାମବାସୀ । ଆଉ ସେମାନଙ୍କୁ ଛାଡି ଦେବାକୁ ଅନୁରୋଧ କରିଥିଲେ । ଏଥିରେ ଉତକ୍ଷିପ୍ତ ହୋଇ ଗ୍ରାମବାସୀମାନଙ୍କୁ ଆକ୍ରମଣ କରିଥିଲା ହରିୟାଣା ପୋଲିସ ।

ଥାନା ପରିସରରେ ଉତେଜନା ସୃଷ୍ଟି ହେବା ପରେ ଏସଡିପିଓ ଘଟଣାସ୍ଥଳରେ ପହଁଚି ଉଭୟ ପକ୍ଷଙ୍କୁ ବୁଝୁସୁଝା କରିଥିଲେ । ହରିୟାଣା ପୋଲିସ ଏଭଳି ଘଟଣା ପାଇଁ ଦୁଃଖ ପ୍ରକାଶ କରିବା ସହ ଉଠାଇ ଆଣିଥିବା ତିନି ଜଣଙ୍କୁ ନୋଟିସ ଦେଇ ଛାଡି ଦେଇଥିବା ଜଣାପଡିଛି । ତେବେ ପ୍ରଶ୍ନ ଉଠୁଛି ଉତେଜନା ସମୟରେ ଖନ୍ତାପଡା ଥାନା ପୋଲିସ କୁଆଡେ ଯାଇଥିଲେ?

The post ଓଡ଼ିଶାରେ ହରିୟାଣା ପୋଲିସର ଦବଙ୍ଗଗିରି: ତଦନ୍ତ ବେଳେ ଫଟୋ ଉଠାଇବାରୁ ସାମ୍ବାଦିକଙ୍କ ମୁଣ୍ଡରେ ଲଗାଇଲେ ବନ୍ଧୁକ first appeared on Kanak News.

from Kanak News
via <a href="https://ifttt.com/?

ପଂଚାୟତ ନିର୍ବାଚନରେ ପରିବାର ରାଜନୀତି: ପୁଣି ଚର୍ଚ୍ଚାକୁ ଆସିଲା ମାଲକାନଗିରିର ବାକା ପରିବାର

କନକ ବ୍ୟୁରୋ: ୨୦୧୯ ସାଧାରଣ ନିର୍ବାଚନ ପରେ ପୁଣି ପଂଚାୟତ ନିର୍ବାଚନରେ ଚର୍ଚାରେ ମାଲକାନଗିରିର ବାକା ପରିବାର । ଚିତ୍ରକୋଣ୍ଡା ବିଧାନସଭା ଆସନ ପାଇଁ ଉଭୟ ଦାଦା-ଝିଆରୀ ପ୍ରାର୍ଥୀ ହୋଇଥିଲେ, ଏବେ ଗୋଟିଏ ପରିବାରର ୩ ଭାଇ ପ୍ରାର୍ଥୀ ହୋଇ ଗାଁ ରାଜନୀତିରେ ରୋଚକ ସ୍ଥିତି ସୃଷ୍ଟି କରିଛନ୍ତି । ୩ ଜଣ ଭାଇ ସମିତି ସଭ୍ୟ ଆସନ ଲାଗି ନାମାଙ୍କନ ପତ୍ର ଦାଖଲ କରିଛନ୍ତି । ଯାହାକି ଏବେ ଚର୍ଚ୍ଚାର ବିଷୟ ହୋଇଛି ।

ତିନି ଭାଇ । କିନ୍ତୁ ସମସ୍ତେ ପ୍ରାର୍ଥୀ । ପୁଣି ଗୋଟିଏ ପଂଚାୟତରୁ ସମିତି ସଭ୍ୟ ପ୍ରାର୍ଥୀଭାବେ ନାମାଙ୍କନ ଦାଖଲ କରିଛନ୍ତି । ମାଥିଲି ବ୍ଲକ ଅନ୍ତର୍ଗତ ନାୟକଗୁଡା ପଂଚାୟତରେ ଦେଖିବାକୁ ମିଳିଛି ଏମିତି ଦୃଶ୍ୟ ।

ବିଧାୟକ ପୂର୍ଣଚନ୍ଦ୍ର ବାକାଙ୍କ ପୁଅ ମହେଶ ବାକା ଓ ପୂର୍ଣଙ୍କ ବଡ ଭାଇଙ୍କ ପୁଅ ବିଷ୍ଣୁ ପ୍ରସାଦ ବାକା ଓ ମହେଶ କୁମାର ବାକା ସମିତି ସଭ୍ୟ ପ୍ରାର୍ଥୀ ହୋଇଛନ୍ତି । ତେବେ ୨ ବଡ ବାପାଙ୍କ ଭାଇଙ୍କ ବିପକ୍ଷରେ ପ୍ରାର୍ଥୀ ହେବା କୌଣସି ପ୍ରଭାବ ପକାଇବ ନାହିଁ ବୋଲି କହିଛନ୍ତି ବିଧାୟକଙ୍କ ପୁଅ ତଥା ପ୍ରାର୍ଥୀ ମହେଶ ବାକା ।

ବିଧାନସଭା ନିର୍ବାଚନ ଚିତ୍ରକୋଣ୍ଡା ନିର୍ବାଚନ ମଣ୍ଡଳୀରେ ବିଧାୟକ ଦାଦା ପୂର୍ଣ୍ଣଚନ୍ଦ୍ର ବାକାଙ୍କ ବିରୋଧରେ ଝିଆରୀ ଲକ୍ଷ୍ମୀପ୍ରିୟା ନାୟକ ପ୍ରାର୍ଥୀ ହୋଇ ରାଜ୍ୟରେ ଚର୍ଚ୍ଚାକୁ ଆସିଥିଲେ । ଏବେ ପୁଣି ବିଧାୟକଙ୍କ ପୁଅ ବିରୋଧରେ ପ୍ରାର୍ଥୀ ହୋଇ ଚର୍ଚ୍ଚାକୁ ଆସିଛନ୍ତି ଚାକିରୀ ଛାଡି ପ୍ରାଥୀପତ୍ର ଦାଖଲ କରିଥିବା ବିଷ୍ଣୁ ପ୍ରସାଦ ବାକା । ଆଉ ପଂଚାୟତ ପଲିଟିକ୍ସରେ ବାକା ପରିବାର ଭାଇ-ଭାଇଙ୍କ ଖୋଲା ଲଢ଼େଇ ହେଉଛି ।

ବିଧାୟକଙ୍କ ଝିଅ ତଥା ବିଜେପିର ଜିଲ୍ଲା ପରିଷଦ ସଭ୍ୟ ଶାନ୍ତିଲତା ମାଝି ଓ ବିଧାୟକଙ୍କ ମଧ୍ୟରେ ଜିଲ୍ଲା ପରିଷଦ ବୈ÷ଠକରେ ମୁହାଁମୁହିଁ ଘଟଣା ଚର୍ଚ୍ଚା ସାଉଁଟିଥିଲା । ସେହିପରି ଆଇଟିଡିଏର ସରକାରୀ କାମକୁ କେତେକ ସମ୍ପର୍କୀୟଙ୍କୁ ବାଂଟି ହଟ୍ଟହଟ୍ଟା ହୋଇଥିଲେ ବାକା ପରିବାର । ଏବେ ପଂଚାୟତ ନିର୍ବାଚନରେ ଭାଇ-ଭାଇଙ୍କ ମଧ୍ୟରେ ଲଢେଇ ପୁଣି ବାକା ପରିବାରକୁ ଚର୍ଚ୍ଚା ଆଣିଛି ।

The post ପଂଚାୟତ ନିର୍ବାଚନରେ ପରିବାର ରାଜନୀତି: ପୁଣି ଚର୍ଚ୍ଚାକୁ ଆସିଲା ମାଲକାନଗିରିର ବାକା ପରିବାର first appeared on Kanak News.

from Kanak News
via <a href="https://ifttt.com/?

ସତ୍ୟବାଦୀରେ ଗାଏବ ହୋଇଗଲା କଂଗ୍ରେସ । ଜିଲ୍ଲା ପରିଷଦ ପାଇଁ ଜଣେ ବି ଦଳୀୟ ପ୍ରାର୍ଥୀ କଲେ ନାହିଁ ନାମାଙ୍କନ

କନକ ବ୍ୟୁରୋ: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ବେଳେ ଚର୍ଚ୍ଚାରେ ପୁରୀର ସତ୍ୟବାଦୀ । ଦିନେ କଂଗ୍ରେସର ଗଡ କୁହାଯାଉଥିବା ସତ୍ୟବାଦୀରେ କଂଗ୍ରେସ ଜିଲ୍ଲାପରିଷଦ ପ୍ରାର୍ଥୀ ନ ଦେବା ଅନେକ ଚର୍ଚ୍ଚା ସୃଷ୍ଟି କରିଛି । ତେବେ କେବଳ ଗୋଟିଏ ଜୋନରେ ଯିଏ ପ୍ରାର୍ଥୀପତ୍ର ଦାଖଲ କରିଥିଲେ ତାହା ମଧ୍ୟ ବିଳମ୍ବର ହୋଇଥିବାରୁ ଏହାକୁ ଗ୍ରହଣ କରାଯାଇନାହିଁ । ତେଣୁ ସେ ସ୍ୱାଧୀନ ଭାବେ ଲଢିବେ ବୋଲି ପ୍ରଶାସନ ସ୍ପଷ୍ଟ କରିଛି । ତେବେ ସତ୍ୟବାଦୀ ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନଙ୍କ ନିର୍ବାଚନମଣ୍ଡଳୀ ହୋଇଥିବାରୁ କାହିଁକି କଂଗ୍ରେସ ପ୍ରାର୍ଥୀ ଦେଇନାହିଁ ତାକୁ ନେଇ ଚର୍ଚ୍ଚା ଜୋର ଧରିଛି ।

ପୁରୀ ଜିଲ୍ଲାର କଂଗ୍ରେସ ଗଡ କହିଲେ ଦିନେ ସତ୍ୟବାଦୀକୁ ବୁଝାଉଥିଲା । କିନ୍ତୁ ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଦଳର ଆଗଧାଡିରେ ନେତା ପ୍ରସାଦ ହରିଚନ୍ଦନଙ୍କ ଗଡରେ କଂଗ୍ରେସ ଜିଲ୍ଲାପରିଷଦ ପ୍ରାର୍ଥୀ ନ ଦେବା ଅନେକ ଚର୍ଚ୍ଚା ସୃଷ୍ଟି କରିଛି । ସତ୍ୟବାଦୀ ନିର୍ବାଚନମଣ୍ଡଳୀର ପ୍ରତ୍ୟେକ ଗାଁରେ କଂଗ୍ରେସ କର୍ମୀ ଭର୍ତ୍ତି ହୋଇ ରହିଛନ୍ତି । କିନ୍ତୁ ଚଳିତ ପଞ୍ଚାୟତ ନିର୍ବାଚନରେ କଂଗ୍ରେସ ଜିଲ୍ଲାପରିଷଦ ପ୍ରାର୍ଥୀ ନଦେବା କର୍ମୀଙ୍କୁ ନିରାଶ କରିଛି । କିନ୍ତୁ ପ୍ରସାଦ ହରିଚନ୍ଦନଙ୍କ ଉପସ୍ଥିତି ସତ୍ୱେ କିଭଳି ସତ୍ୟବାଦୀ କଂଗ୍ରେସ ଶୂନ୍ୟ ହେଲା ତାହା ରାଜନୀତିରେ ଅନେକ ଝଡ ସୃଷ୍ଟି କରିଛି ।

ସତ୍ୟବାଦୀ ନିର୍ବାଚନମଣ୍ଡଳୀରେ ସତ୍ୟବାଦୀ ଓ କଣାସ ନିର୍ବାଚନଣ୍ଡଳୀରେ ୫୨ ପଞ୍ଚାୟତ ରହିଛି । କଣାସ ବ୍ଲକର ୩ଟି ଓ ସତ୍ୟବାଦୀ ବ୍ଲକରେ ୩ଟି ଜିଲ୍ଲାପରିଷଦ ଜୋନ ରହିଛି । ତେବେ ଗୋଟିଏ ଜୋନକୁ ବାଦ ଦେଲେ ଅନ୍ୟ କୌଣସି ଜୋନରୁ ଜଣେ ବି ପ୍ରାର୍ଥୀପତ୍ର ଦାଖଲ କରିନଥିଲେ । ଯିଏ ପ୍ରାର୍ଥୀପତ୍ର ଦାଖଲ କରିଛନ୍ତି ସିଏ ବିଳମ୍ବରେ ଦଳୀୟ ଟିକେଟ ଦେବାରୁ ପ୍ରଶାସନ ଏହାକୁ ଗ୍ରହଣ କରିନାହିଁ । ତେଣୁ ସେ ସ୍ୱାଧୀନ ଭାବେ ଲଢିବେ ବୋଲି ପ୍ରଶାସନ ସ୍ପଷ୍ଟ କରିଛି । ପଞ୍ଚାୟତ ନିର୍ବାଚନ ପାଇଁ ପ୍ରସାଦ ହରିଚନ୍ଦନଙ୍କ ଉପରେ ଦାୟିତ୍ୱ ନ୍ୟସ୍ତ କରାଯାଇଥିଲା । କିନ୍ତୁ ପ୍ରସାଦଙ୍କ ନୀରବତା ଅନେକ ପ୍ରଶ୍ନଚିହ୍ନ ସୃଷ୍ଟି କରିଛି ।

କୁହାଯାଉଛି ସତ୍ୟବାଦୀରେ ଅନେକ ଛାମୁଆ ନେତା ଦଳ ଛାଡିଦେଇଛନ୍ତି । ହେଲେ ପ୍ରଶ୍ନ ଉଠୁଛି…

  • ତୃଣମୂଳ ନେତାଙ୍କ ଦଳତ୍ୟାଗ କଂଗ୍ରେସକୁ ଦୁର୍ବଳ କରିଛି କି?
  • ପ୍ରସାଦ ହରିଚନ୍ଦନଙ୍କ ପାଇଁ ଏଭଳି ଘଟିଲା କି?
  • ପିସିସି ସହିତ ପ୍ରସାଦଙ୍କ ମତାନ୍ତର ରହିଛି କି?

The post ସତ୍ୟବାଦୀରେ ଗାଏବ ହୋଇଗଲା କଂଗ୍ରେସ । ଜିଲ୍ଲା ପରିଷଦ ପାଇଁ ଜଣେ ବି ଦଳୀୟ ପ୍ରାର୍ଥୀ କଲେ ନାହିଁ ନାମାଙ୍କନ first appeared on Kanak News.

from Kanak News
via <a href="https://ifttt.com/?

Create your website with WordPress.com
Get started