ନ୍ୟାୟ ପାଇଁ ରାଜରାସ୍ତାକୁ ଓହ୍ଲାଇବେ କଂଗ୍ରେସ ନେତା ରାହୁଲ ଗାନ୍ଧୀ । ୧୪ ଜାନୁଆରୀରୁ ଆରମ୍ଭ ହୋଇ ୨୦ମାର୍ଚ୍ଚ ପର୍ଯ୍ୟନ୍ତ ଦେଶର ୮୫ଟି ଜିଲ୍ଲା ବୁଲିବେ ରାହୁଲ

କନକ ବ୍ୟୁରୋ : କନ୍ୟାକୁମାରୀରୁ କାଶ୍ମୀର ଭାରତ ଯୋଡ ଯାତ୍ରା କରି ରାଜନୀତିରେ କମ୍ପନ ସୃଷ୍ଟି କରିଥିଲେ କଂଗ୍ରେସ ନେତା ରାହୁଲ ଗାନ୍ଧୀ । କୁହାଯାଏ, ଦକ୍ଷିଣ ଭାରତରେ ଏହି ଯାତ୍ରା ବେଶ ସଫଳ ହୋଇଥିଲା ଏବଂ କର୍ଣ୍ଣାଟକ ଓ ତେଲେଙ୍ଗାନାରେ ସରକାର ଗଢିବାକୁ ସମର୍ଥ ହୋଇଥିଲା କଂଗ୍ରେସ । ଲୋକସଭା ନିର୍ବାଚନକୁ ଦୃଷ୍ଟିରେ ରଖି ନ୍ୟାୟ ଯାତ୍ରା ପାଇଁ ଅଂଟା ଭିଡିଛନ୍ତି ରାହୁଲ । ଭାରତ ଯୋଡ଼ ଯାତ୍ରା ଦକ୍ଷିଣରୁ ଉତରକୁ ହୋଇଥିବା ବେଳେ ନ୍ୟାୟ ଯାତ୍ରାରେ ପୂର୍ବରୁ ପଶ୍ଚିମ ଭାରତ ବୁଲିବେ କଂଗ୍ରେସର ପୂର୍ବତନ ଅଧ୍ୟକ୍ଷ । ଆର୍ôଥକ ନ୍ୟାୟ, ସାମାଜିକ ନ୍ୟାୟ ଓ ରାଜନୈତିକ ନ୍ୟାୟ ଏହି ତିନି ପ୍ରସଙ୍ଗ ନେଇ ଲୋକଙ୍କୁ ପାଖକୁ ଯିବେ ରାହୁଲ ଗାନ୍ଧୀ ।

ଏହା ହେଉଛି ରାହୁଲଙ୍କ ନ୍ୟାୟ ଯାତ୍ରାର ରୁଟ୍ ମ୍ୟାପ୍ । ମଣିପୁରରୁ ଆରମ୍ଭ ହୋଇ ଏହା ମୁମ୍ବାଇରେ ଶେଷ ହେବ । ମଣିପୁରର ରାଜଧାନୀ ଇମ୍ଫାଲରୁ ଏହି ଯାତ୍ରାର ଶୁଭାରମ୍ଭ କରିବେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ । ଗୁରୁବାର ନାଗପୁରରେ କଂଗ୍ରେସର ପ୍ରତିଷ୍ଠା ଦିବସ ପାଳନ ହେବ । ନ୍ୟାୟ ଯାତ୍ରା କେଉଁ ବାଟେ ଯିବ, ଏହାକୁ ନେଇ ପିସିସି ସଭାପତିଙ୍କ ସହ ରଣନୀତି ପ୍ରସ୍ତୁତ କରାଯିବ ।
ରାହୁଲଙ୍କ ‘ନ୍ୟାୟ ଯାତ୍ରା’
ଜାନୁଆରି ୧୪ରୁ ମାର୍ଚ୍ଚ ୨୦ ପର୍ଯ୍ୟନ୍ତ ବୁଲିବେ ରାହୁଲ
୧୪ରାଜ୍ୟର ୮୫ଟି ଜିଲ୍ଲା ଗସ୍ତ କାର୍ଯ୍ୟକ୍ରମ
୬,୨୦୦ କିଲୋମିଟର ଯାତ୍ରା କରିବେ ରାହୁଲ
ପଦଯାତ୍ରା କରିବା ସହ ସ୍ୱତନ୍ତ୍ର ବସରେ ବି ବୁଲିବେ

ନ୍ୟାୟ ଯାତ୍ରାରେ ଓଡ଼ିଶା ଆସିବେ ରାହୁଲ ଗାନ୍ଧୀ । ଯେଉଁସବୁ ରାଜ୍ୟରେ କଂଗ୍ରେସର ସ୍ଥିତି ଦୁର୍ବଳ ରହିଛି, ସେହି ରାଜ୍ୟକୁ ଗୁରୁତ୍ୱ ଦିଆଯିବ ବୋଲି କୁହାଯାଉଛି ।

ରାହୁଲଙ୍କ ଗସ୍ତକୁ ନେଇ ରାଜ୍ୟ କଂଗ୍ରେସ ଶିବିରରେ ଉତ୍ସାହ ଖେଳିଯାଇଛି । ଓଡ଼ିଶାର କେଉଁ କେଉଁ ଜିଲ୍ଲା ଦେଇ ରାହୁଲଙ୍କ ନ୍ୟାୟ ଯାତ୍ରା ଯିବ, ଏହାକୁ ନେଇ ପ୍ରସ୍ତୁତି ଆରମ୍ଭ ହୋଇଛି । ଏପଟେ ରାହୁଲଙ୍କ ଏହି ଯାତ୍ରାର କିଛି ପ୍ରଭାବ ନାହିଁ ବୋଲି କହିଛନ୍ତି ବିଜେଡି ଓ ବିଜେପି ।

୫ ମାସ ଧରି କନ୍ୟାକୁମାରୀରୁ କାଶ୍ମୀର ଭାରତ ଯୋଡ ଯାତ୍ରା କରିଥିଲେ ରାହୁଲ ଗାନ୍ଧୀ । ଏହାର ପ୍ରଭାବକୁ ଆଧାର କରି ଲୋକସଭା ନିର୍ବାଚନ ପୂର୍ବରୁ ପୁଣି ଥରେ ରାସ୍ତାକୁ ଓହ୍ଲାଇବେ ରାହୁଲ । ତେବେ ଏହି ନ୍ୟାୟ ଯାତ୍ରା କେତେ ସଫଳ ହେବ, ତାହା ୨୦୨୪ ନିର୍ବାଚନର ଫଳାଫଳ ହିଁ କହିବ ।

The post ନ୍ୟାୟ ପାଇଁ ରାଜରାସ୍ତାକୁ ଓହ୍ଲାଇବେ କଂଗ୍ରେସ ନେତା ରାହୁଲ ଗାନ୍ଧୀ । ୧୪ ଜାନୁଆରୀରୁ ଆରମ୍ଭ ହୋଇ ୨୦ମାର୍ଚ୍ଚ ପର୍ଯ୍ୟନ୍ତ ଦେଶର ୮୫ଟି ଜିଲ୍ଲା ବୁଲିବେ ରାହୁଲ first appeared on Kanak News.

from Kanak News
via <a href="https://ifttt.com/?