କନକ ବ୍ୟୁରୋ: ଜାନୁଆରି ୧୪ ତାରିଖରୁ ଆରମ୍ଭ ହେଉଛି କଂଗ୍ରେସର ନ୍ୟାୟଯାତ୍ରା । ଦିଲ୍ଲୀରେ ସବୁ ରାଜ୍ୟର ପିସିସି ସଭାପତିଙ୍କ ସହ ବୈଠକ ପରେ ଏହି ଯାତ୍ରାକୁ ଭାରତ ଯୋଡ଼ ନ୍ୟାୟଯାତ୍ରା ଭାବେ ନାମକରଣ କରାଯାଇଛି । ଗତବର୍ଷ ରାହୁଲଙ୍କ ଭାରତ ଯୋଡ଼ ଯାତ୍ରାର ସଫଳତାକୁ ଦୃଷ୍ଟିରେ ରଖି ନିର୍ବାଚନ ପୂର୍ବରୁ ଭାରତ ଯୋଡ଼ ନ୍ୟାୟଯାତ୍ରାରେ ବାହାରିବେ ରାହୁଲ ଗାନ୍ଧୀ । ମାର୍ଚ୍ଚ ୨୦ ତାରିଖ ପର୍ଯ୍ୟନ୍ତ ଏହି ଯାତ୍ରା ଚାଲିବ । ଦିଲ୍ଲୀରେ ଅନୁଷ୍ଠିତ ବୈଠକରେ ସାମିଲ ହୋଇଥିଲେ ଓଡ଼ିଶା ପିସିସି ସଭାପତି ଶରତ ପଟ୍ଟନାୟକ । ଓଡ଼ିଶା କାର୍ଯ୍ୟକ୍ରମ ନେଇ ଶୀର୍ଷ ନେତୃତ୍ୱ ସହ ସେ ଆଲୋଚନା କରିଛନ୍ତି । ରାହୁଲଙ୍କ ଭାରତ ଯୋଡ଼ ନ୍ୟାୟଯାତ୍ରାରେ ଓଡ଼ିଶାର ୪ଟି ଜିଲ୍ଲା ସାମିଲ ହେବ ବୋଲି ପ୍ରାଥମିକ ସ୍ତରରେ ନିଷ୍ପତି ନିଆଯାଇଛି । ତେବେ ଏଆଇସିସି ଟିମ୍ ଓଡ଼ିଶା ଆସି ଗସ୍ତସୂଚୀ ଚୂଡ଼ାନ୍ତ କରିବେ । ଓଡ଼ିଶାରେ ୩ ଦିନ ରାହୁଲଙ୍କ କାର୍ଯ୍ୟକ୍ରମ ରହିବ ଏବଂ ୩୪୧ କିଲୋମିଟର ଗସ୍ତ କରିବେ ବୋଲି କୁହାଯାଉଥିବା ବେଳେ ୪ ଦିନ ପାଇଁ ପ୍ରସ୍ତାବ ଦେଇଛି ଓଡ଼ିଶା ପିସିସି । ସେହିପରି ଭୁବନେଶ୍ୱରରେ ଏକ ବିଶାଳ ସମାବେଶ କରିବା ପାଇଁ ରାହୁଲ ଗାନ୍ଧୀଙ୍କୁ ଅନୁରୋଧ କରାଯାଇଛି ।

The post ଭାରତ ଯୋଡ଼ ନ୍ୟାୟଯାତ୍ରାରେ ଓଡ଼ିଶାର ୪ଟି ଜିଲ୍ଲା ବୁଲିବେ ରାହୁଲ ଗାନ୍ଧୀ: ଭୁବନେଶ୍ୱରରେ ବିଶାଳ ସମାବେଶ ପାଇଁ ଅନୁରୋଧ କଲେ ପିସିସି ସଭାପତି  first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ପ୍ରାୟ ୯ ମାସ ପରେ ପୁଣି ଥର ଆନ୍ଦୋଳନକୁ ଓହ୍ଲାଇଛି ଡ୍ରାଇଭର ମହାସଂଘ । ଗତବର୍ଷର ଦାବି ସହ ନୂଆ ଦଣ୍ଡ ବିଧାନ ବ୍ୟବସ୍ଥାକୁ ବିରୋଧ କରି ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଷ୍ଟିଅରିଙ୍ଗ ଛାଡ଼ ଆନ୍ଦୋଳନ ଡାକରା ଦିଆଯାଇଛି । ଆଜି ପ୍ରଥମ ଦିନରେ ଏହାର ଏତେଟା ପ୍ରଭାବ ପଡ଼ିନାହିଁ । କିନ୍ତୁ ଆଗକୁ ସ୍ଥିତି ସଂଗୀନ ହେବା ଆଶଙ୍କା ରହିଛି । ବିବାଦର ସମାଧାନ ନହେଲେ ପରିବାଠାରୁ ଆରମ୍ଭ କରି ପେଟ୍ରୋଲ ପର୍ଯ୍ୟନ୍ତ ନିତ୍ୟ ବ୍ୟବହାର୍ଯ୍ୟ ଜିନିଷଗୁଡ଼ିକର ଦରଦାମ ଉପରେ ଏହାର ପ୍ରଭାବ ପଡିବ ବୋଲି ସତର୍କ କରିଛନ୍ତି ବଜାର ବିଶେଷଜ୍ଞ ।

ଗତବର୍ଷ ଷ୍ଟିଅରିଂ ଛାଡ଼ ଆନ୍ଦୋଳନ କରି ଅଖଚକ ବନ୍ଦ କରି ଦେଇଥିଲେ ଡ୍ରାଇଭର । ବର୍ଷ ଆରମ୍ଭରୁ ପୁଣିଥରେ ଆନ୍ଦୋଳନ ଡାକରା ଦେଇଛି ଡ୍ରାଇଭର ମହାସଂଘ । ଗତବର୍ଷର ଦାବି ସହ ନୂଆ ଦଣ୍ଡ ବିଧାନ ବ୍ୟବସ୍ଥାକୁ ବିରୋଧ କରାଯାଇଛି । ହିଟ୍ ଆଣ୍ଡ ରନ୍ ମାମଲାରେ ଭାରତୀୟ ନ୍ୟାୟ ସଂହିିତାରେ ରଖାଯାଇଥିବା ନୂଆ ବର୍ଦ୍ଧିତ ଦଣ୍ଡ ବ୍ୟବସ୍ଥା ବିରୋଧରେ ଟ୍ରକ ଅପରେଟର ଧର୍ମଘଟ କରିବା ପରେ ଏହି ଆନ୍ଦୋଳନରେ ସାମିଲ ହୋଇଛନ୍ତି ଓଡ଼ିଶା ଡ୍ରାଇଭର ମହାସଂଘ । ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଷ୍ଟିଅରିଙ୍ଗ ଛାଡ଼ ଆନ୍ଦୋଳନ କରାଯିବ ବୋଲି ସୂଚନା ନେଇଛନ୍ତି ଡ୍ରାଇଭର ମହାସଂଘର ସଭାପତି ପ୍ରଶାନ୍ତ ମେଣ୍ଡୁଲି । ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କୁ ଦାବି ଜଣାଇ ଆନ୍ଦୋଳନ ଆରମ୍ଭ କରାଯାଇଛିି । ନୂଆ ଦଣ୍ଡ ବିଧାନ ବ୍ୟବସ୍ଥାକୁ ପ୍ରତ୍ୟାହାର କରିବା ସହ ଡ୍ରାଇଭରଙ୍କୁ ରାଜ୍ୟ ସରକାରଙ୍କ ବୀମା ଯୋଗାଇ ଦେବାକୁ ଦାବି ରଖିଛନ୍ତି । ୩ ମାସ ଭିତରେ ବୀମା ଦେବାକୁ ପ୍ରତିଶ୍ରୁତି ଦିଆଯାଇଥିଲେ ବି ଏପର୍ଯ୍ୟନ୍ତ କାର୍ଯ୍ୟକାରୀ କରାଯାଇନି ବୋଲି ଅଭିଯୋଗ ହୋଇଛି ।

ଆଜି ଆନ୍ଦୋଳନର ପ୍ରଭାବ ଏତେଟା ଦେଖିବାକୁ ମିଳିନି, କିନ୍ତୁ ଆଗକୁ ଆନ୍ଦୋଳନ ଜାରି ରହିଲେ ଚାରିଆଡ଼େ ପଡିବ ଏହାର ପ୍ରଭାବ । ପରିବାଠାରୁ ଆରମ୍ଭ କରି ପେଟ୍ରୋଲ ପର୍ଯ୍ୟନ୍ତ ନିତ୍ୟ ବ୍ୟବହାର୍ଯ୍ୟ ଜିନିଷ ଗୁଡ଼ିକର ଦର ବଢିବା ନେଇ ଆକଳନ କରିଛନ୍ତି ବଜାର ବିଶେଷଜ୍ଞ । ଆନ୍ଦୋଳନ ଜାରି ରହିଲେ ଆକାଶଛୁଆଁ ହୋଇଯିବ ପରିବା ଦର । ଆସନ୍ତା ୨୦ ଦିନ ପାଇଁ ରାସନ ସାମଗ୍ରୀ ମହଜୁଦ ରହିଛି । ତୁରନ୍ତ ଏହି ବିବାଦର ସମାଧାନ ନହେଲେ ସ୍ଥିତି ବିଗିଡ଼ିଯିବ ବୋଲି କହିଛନ୍ତି ବ୍ୟବସାୟୀ ମହାସଂଘର ସଂପାଦକ ସୁଧାକର ପଣ୍ଡା । ସେହିପରି ପରିସ୍ଥିତିକୁ ଆଖି ଆଗରେ ରଖି କେଉଁଭଳି ଭାବେ ଅଧିକରୁ ଅଧିକ ତେଲ ସମସ୍ତ ପେଟ୍ରୋଲ ପମ୍ପକୁ ପଠାଯାଇ ପାରିବ ତାହାର ବ୍ୟବସ୍ଥା କରିବାକୁ ପ୍ରୟାସ ଆରମ୍ଭ ହୋଇଥିବା କହିଛନ୍ତି ପେଟ୍ରୋଲିୟମ ସଂଘର ସଂପାଦକ ।

ବାରମ୍ବାର ସରକାର ଓ ଡ୍ରାଇଭର ମହାସଂଘ ଭିତରେ ହେଉଥିବା ବିବାଦ ଯୋଗୁଁ ବଳି ପଡ଼ୁଛନ୍ତି ସାଧାରଣ ଲୋକ । ପ୍ରଭାବ ପଡ଼ିବା ଆଗରୁ ତୁରନ୍ତ ଏହାର ସମାଧାନ ପାଇଁ ଦାବି ହେଉଛି ।

The post ଆନ୍ଦୋଳନକୁ ଓହ୍ଲାଇଲା ଓଡ଼ିଶା ଡ୍ରାଇଭର ମହାସଂଘ: ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଷ୍ଟିଅରିଙ୍ଗ ଛାଡ଼ ଆନ୍ଦୋଳନ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ଗଣତନ୍ତ୍ର (ସାଧାରଣତନ୍ତ୍ର) ଦିବସ‌ ପରେଡ୍‌ରେ ଏଥର ଓଡ଼ିଶାର ପ୍ରଜ୍ଞାପନ ମେଢ଼ ସ୍ଥାନ ପାଇବ। ଓଡ଼ିଶାର ପ୍ରଜ୍ଞାପନ ମେଢ଼ ମାଧ୍ୟମରେ କର୍ତ୍ତବ୍ୟପଥରେ ଦର୍ଶକମାନେ ଓଡ଼ିଶାର କଳାକୁ ଆଖି ଆଗରେ ଦେଖିବାର ସୁଯୋଗ ପାଇପାରିବେ। ଓଡ଼ିଶାର ପ୍ରଜ୍ଞାପନ ମେଢ଼ ମଡେଲ ମନୋନୀତ ହୋଇଥିବା ସୂଚନା ମିଳିଛି। ଏନେଇ ରାଜ୍ୟ ମୁଖ୍ୟ ଶାସନ ସଚିବଙ୍କୁ ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ଗୁରୁବାର ଦିନ ଚିଠି ଜାରି ହୋଇଛି।

ଚିଠିରେ ଉଲ୍ଲେଖ ‌ହୋଇଛ ଯେ, ନୂଆଦିଲ୍ଲୀର କର୍ତ୍ତବ୍ୟପଥରେ ଆୟୋଜିତ ହେବାକୁ ଥିବା ସାଧାରଣତନ୍ତ୍ର ଦିବସ ସମାରୋହରେ ଆନ୍ଧ୍ରପ୍ରଦେଶ, ଅରୁଣାଚଳ ପ୍ରଦେଶ, ଛତିଶଗଡ଼, ଗୁଜରାଟ, ହରିୟାଣା, ଝାଡ଼ଖଣ୍ଡ, ଲଦାଖ, ମଧ୍ୟପ୍ରଦେଶ, ମହାରାଷ୍ଟ୍ର, ମଣିପୁର, ମେଘାଳୟ, ଓଡ଼ିଶା, ରାଜସ୍ଥାନ, ତାମିଲନାଡୁ, ତେଲେଙ୍ଗାନା ଓ ଉତ୍ତରପ୍ରଦେଶରରୁ ପ୍ରଜ୍ଞାପନ ମେଢ଼ ପାଇଁ ମନୋନୀତ କରାଯାଇଛି। ଯେଉଁ ରାଜ୍ୟରୁ ପ୍ରଜ୍ଞାପନ ମେଢ଼ଗୁଡ଼ିକ ଆସିବ ସେଠାକାର ସରକାରଙ୍କ ଦ୍ବାରା ଏହାକୁ ୨୦୨୪ ଜାନୁଆରି ୧୯ ମଧ୍ୟରେ ସଂପୂର୍ଣ୍ଣ ରୂପେ ପ୍ରସ୍ତୁତି କରାଯିବାର ଆବଶ୍ୟକତା ଅଛି। ସାଧାରଣତନ୍ତ୍ର ଦିବସ ପୂର୍ବରୁ ଆସନ୍ତା ୨୩ ତାରିଖ ଦିନ ପ୍ରଜ୍ଞାପନ ମେଢ଼ଗୁଡ଼ିକର ରିହରସଲ ହେବ।

ସୂଚନାଯୋଗ୍ୟ, ଗତବର୍ଷ ସ୍ଵାଧୀନତାର ୭୫ତମ ଉତ୍ସବ ପାଳନ କରାଯାଇଥିବାରୁ ସ୍ବାଧୀନତା ସଂଗ୍ରାମ ସମ୍ପର୍କିତ ପ୍ରଜ୍ଞାପନ ମେଢ଼ ପଠାଇବାକୁ ବିଭିନ୍ନ ରାଜ୍ୟକୁ କେନ୍ଦ୍ର ପ୍ରତିରକ୍ଷା ମନ୍ତ୍ରଣାଳୟରୁ ନିମନ୍ତ୍ରଣ କରାଯାଇଥିଲା। ସେହି ଅନୁସାରେ ଓଡ଼ିଶାର ଅନ୍ୟାନ୍ୟ ଚାରିଟି ପ୍ରଜ୍ଞାପନ ମେଢ଼ର ଚିତ୍ର ସହ ବକ୍ସି ଜଗବନ୍ଧୁଙ୍କ ନେତୃତ୍ବରେ ସଂଗଠିତ ପାଇକ ବିଦ୍ରୋହର ବୃ୍ତ୍ତଚିତ୍ର ପ୍ରଦାନ କରାଯାଇଥିଲା। ଏହାକୁ ଦିଲ୍ଲୀର ଚୟନ କମିଟି ତୃତୀୟ ରାଉଣ୍ଡ ପର୍ୟ୍ୟନ୍ତ ନେଇଥିଲେ। ମାତ୍ର ହଠାତ୍ ଏହାକୁ ବାଦ୍ ଦିଆଗଲା। ଗତବର୍ଷ ଦିଲ୍ଲୀରେ ଆୟୋଜିତ ସାଧାରଣତନ୍ତ୍ର ଦିବସ‌ ପରେଡ୍‌ରେ ଓଡ଼ିଶାର ପ୍ରଜ୍ଞାପନ ମେଢ଼କୁ ସ୍ଥାନ ଦିଆନଯିବା ପ୍ରତିବାଦରେ ଓଡ଼ିଶା ପାଇକ ଏକାଡେମି, ସମରକଳା ଏକାଡେମି ସମେତ ଏକାଧିକ ଅନୁଷ୍ଠାନ ପକ୍ଷରୁ ରାଜଭବନ ସମ୍ମୁଖରେ ପ୍ରତିବାଦ କରାଯାଇଥିଲା।

The post କର୍ତ୍ତବ୍ୟପଥରେ ଝଲସିବ ଓଡିଶାର ପ୍ରଜ୍ଞାପନ ମେଢ: ସାଧାରଣତନ୍ତ୍ର ଦିବସରେ ଓଡିଶାର କଳା ଦେଖିବ ଦେଶ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ମାଲକାନଗିରି ଜିଲା । ମନମୋହୁଛି ଆଦିବାସୀ ପାହାଡ ଘେରି ରହିଥିବା ଗାରିଆ ଡୁଡୁମା ଜଳପ୍ରପାତ । ମାଲକାନଗିରି ଜିଲ୍ଲା ଗୋବିନ୍ଦପାଲି ଛକରୁ ମାତ୍ର ୭ କିଲୋମିଟର ଗଲା ପରେ ପଡେ ଏହି ଜଳପ୍ରପାତ । ପାହାଡ ଘେରା ବଣଜଙ୍ଗଲର ମନୋର ପରିବଶେ ଭତରେ ଏହି ଝରଣା ପ୍ରତିଟି ପର୍ଯ୍ୟଟକଙ୍କୁ ଆକର୍ଷିତ କରୁଛି ।। ଯାହାପାଇଁ ଏଠାକୁ ପ୍ରତିଦିନ ଲାଗୁଛି ଦୂରଦୂରାନ୍ତରୁ ଲୋକଙ୍କ ଭିଡ । ପ୍ରକୃତିକୁ ମନଭରି ଉପଭୋଗ କରିବା ସହିତ ଜମୁଛି ବଣଭୋଜିର ଆସର । ପାହାଡି ଝରଣାକୁ ପାହାଡ ଉପରୁ ସିଧାସଳଖ ଦେଖିବାର ମଜାନେଉଛନ୍ତି ପର୍ଯ୍ୟଟକ । ଏନେଇ ସମସ୍ତ ପ୍ରକାର ବ୍ୟବସ୍ଥା କରିଛନ୍ତି ପଂଚାୟତର ଲୋକ ମାନେ ।

ମୋରମ ରାସ୍ତା ସହିତ ସେହିସ୍ଥାନରେ ଯାନବାହାନ ମଧ୍ୟ ଯିବାର ସୁବିଧା ରହିଛି । ତେବେ ମାଲକାନଗିରିଜିଲା ର ମାଥିଲିବ୍ଲକ ଅନ୍ତର୍ଗତ ଉଦୁଲିବେଡା ପଂଚାୟତ ଅଧିନରେଏହି ଜଳପ୍ରପାତରହିଛି । ଗୋବିନ୍ଦପାଲିଠାରୁ ମାତ୍ର ୭ କିମି ଦୂରତାରେ ରହିଥିବା ଏହିସ୍ଥାନରେ ଗଲା ପରେ କାଠପୋଲ , ପ୍ରକୃତି ଝରଣା ର କୂଳକୂଳ ଶଦ୍ଦ ନିତିଦିନ ପ୍ରକୃତି ପ୍ରେମୀଙ୍କୁ ଟାଣି ନେଉଛି ।

ଗାରିଆ ଡୁଡୁମା ଜଳପ୍ରପାତକୁ ମନଭରି ଉପଭୋଗ କରୁଛନ୍ତି ପ୍ରକୃତିପ୍ରେମୀ । ଆଦିବାସୀ ଇଲାକାରେ ରହିଥିବା ଏହି ସୌନ୍ଦର୍ଯ୍ୟ ସ୍ଥାନରେ ଭୋଜିଭାତ ଆସର ବଢିବାରେ ଲାଗିଛି ।

The post ମାଲକାନଗିରିର ବଣପାହାଡ ଘେରା ମନୋରମ ପରିବେଶ । ଆକର୍ଷିତ କରୁଛି ଗାରିଆଡୁଡୁମା ଜଳପ୍ରପାତ, ପ୍ରତିଦିନ ଲାଗୁଛି ପ୍ରକୃତି ପ୍ରେମୀଙ୍କ ଭିଡ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ଚିନ୍ତାରେ ପଡିଛନ୍ତି ମତ୍ସ୍ୟଜୀବୀ । ସମୁଦ୍ରରୁ ମାଛ ମାରି ମତ୍ସ୍ୟଜୀବୀ ପରିବାର ପ୍ରତିପୋଷଣ କରୁଥିବା ବେଳେ ଏବେ ମାଛ ଚୋରା ଚାଲାଣକାରୀଙ୍କ ଯୋଗୁ ବଢୁଛି ଚିନ୍ତା । ଅସ୍ତରଙ୍ଗ ଦେବୀ ମୁହାଣରେ ମାଛ ଯାଆଁଳ ଚୋରା ଚାଲାଣକାରୀଙ୍କ ଦୌରାତ୍ମ୍ୟ ବଢିଚାଲିଛି । କିଛି ବର୍ଷ ହେଲା କୋଲକାତାରୁ କିଛି ଚାଲାଣକାରୀ ଏହି ଅଂଚଳରେ ନିଜ ଆଡ୍ଡା ଜମାଇ ବସିଛନ୍ତି । ଦେବୀ ମୁହାଣ ନିକଟରେ କ୍ୟାମ୍ପ ବସାଇ ଲକ୍ଷାଧିକ ଯାଆଁଳ ଧରି ବାହାରକୁ ଚ।।ଣ କରୁଛନ୍ତି । ପ୍ରତିଦିନ ଖୁଲମଖୁଲ।। ଭାବେ ଖଇଙ୍ଗାରୁ ନେଇ ଚିଙ୍ଗୁଡି ଯାଆଁଳ ଧରି କୋଲକାତା ଚାଲାଣ କରୁଛନ୍ତି । ଯେଉଁ ଖଇଙ୍ଗା ମାଛ ଆଦିକୁ ସ୍ଥାନୀୟ ମତ୍ସ୍ୟଜୀବୀ ଧରି ବାହାରେ ବିକ୍ରି କରି ଦୁଇ ପଇସା ରୋଜଗାର କରୁଥିଲେ । ତାହା ସେମାନଙ୍କ ପାଇଁ ସ୍ୱପ୍ନ ପାଲଟିଛି । ଲୋକଙ୍କୁ ଖଇଙ୍ଗା ମାଛ ମିଳୁନଥିବା ବେଳେ ମାଛ ମାରି ପରିବାର ଚଳାଉଥିବା ମତ୍ସ୍ୟଜୀବୀଙ୍କ ଜୀବିକା ଏବେ ସଙ୍କଟରେ ପଡିଛି ।

ଅସ୍ତରଙ୍ଗ ବ୍ଲକରେ ୧୨ ହଜାରରୁ ଅଧିକ ମତ୍ସ୍ୟଜୀବୀ ପରିବାର ରହୁଛନ୍ତି । ଦେବୀ ନଦୀ ଓ ସମୁଦ୍ରରୁ ମାଛ ମାରି ପରିବାର ପୋଷୁଛନ୍ତି । ଦିନ ସାରା ପରିଶ୍ରମ କରି ମାଛ ମାରୁଛନ୍ତି । ହେଲ ସବୁଠୁ ବେଶୀ ଚାହିଦା ଥିବା ଖଇଙ୍ଗା ମାଛ ଆଉ ମିଳୁନି । ଚାଲାଣକାରୀ ମୁହାଣ ଟାପୁରେ କ୍ୟାମ୍ପ କରି କୁଇଂଟାଲ କୁଇଂଟାଲ ମାଛ ବାହାରକୁ ଚାଲାଣ କରୁଛନ୍ତି । ଦିନ ଦିପହରରେ ଯାଆଁଳ ମାଫିଆଙ୍କ ଦୌରାତ୍ମ୍ୟ ବଢିଚାଲିଥିବା ବେଳେ ପ୍ରଶାସନ ପାଲଟିଛି ନୀରବଦ୍ରଷ୍ଟା ।

ଯାଆଁଳ ମାଫିଆଙ୍କ ଯୋଗୁ ଖଇଙ୍ଗା ଭଳି ଭଲ ମାଛ ସବୁ ଧୀରେ ଧୀରେ କମିଗଲାଣି । ଏବେଠାରୁ ପଦକ୍ଷେପ ନିଆନଗଲେ ଏହି ମାଛ ବଂଶ ସମ୍ପୁର୍ଣ୍ଣ ଲୋପପାଇଯିବ ।

The post ଦେବୀ ମୁହାଣରେ ମାଛ ଚୋରା ଚାଲାଣକାରୀଙ୍କ ଆଡ୍ଡା । ବାହାରକୁ ଚାଲାଣ କରୁଛନ୍ତି କୁଇଂଟାଲ କୁଇଂଟାଲ ମାଛ ଯାଆଁଳ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ଚାଷ ଜମି ଅଛି ସତ ହେଲେ ଧାନ ଚାଷ ହୋଇଥିବା ମିଛ ରେକର୍ଡ । ଧାନ ଚାଷ ହୋଇଥିବା କହି ପଂଜିକୃତ ହୋଇଛି ଚାଷ ଜମି । ହେଲେ ରଜ୍ୟସ୍ତରୀୟ ସାଟେଲାଇଟ ସର୍ଭେରୁ କୌଣସି ଧାନ ଚାଷ ହୋଇନଥିବା କଥା ପଦାକୁ ଆସିଛି । ଭଂଜନଗର ଉପଖଣ୍ଡର ୧ଲକ୍ଷ ୪୬ ଜହାର ୬୭ ଟି ପ୍ଲଟ୍ରେ ଆଦୌ ଧାନ ଚାଷ ହୋଇନଥିବା ଧରାପଡିଛି । ମଣ୍ଡିରେ ଧାନ ବିକିବା ଲାଗି ଚାଷୀ ପଞ୍ଜିକରଣ କରିଥିବା ଚାଷ ଜମି ପ୍ଲଟରେ ଧାନ ଚାଷ ହୋଇନି । କେଉଁଠି ପୋଖରି ହୋଇଛି ତ ଆଉ କେଉଁଠି ସୁଉଚ୍ଚ ଅଟାଳିକା ତିଆରି ହୋଇଛି । ଆଉ କେଉଁଠି ଚାଷ ଜମି ପଡିଆ ପଡିଛି । ବିଭିନ୍ନ ସ୍ଥାନରେ ଆଖୁ, ଆମ୍ବ,ପଣସ,ନଡିଆ,କାଜୁ ସହ ଭଳିକି ଭଳି ପନିପରିବା ଚାଷ ହୋଇଛି । ସେପଟେ ଏହି କାମ ସରିନଥିବାରୁ ଭଂଜନଗର ଉପଖଣ୍ଡରେ ମଣ୍ଡି ଖୋଲିନି । ଫଳରେ ଚାଷୀ କମ୍ ମୂଲ୍ୟର ଦଲାଲକୁ ବିକ୍ର କ୍ଷତିରେ ପଡୁଛି ।

ଭଞ୍ଜନଗର ଉପଖଣ୍ଡ ଅଧିନରେ ପଂଜିକୃତ ହୋଇଥିବା ସମସ୍ତ ପ୍ଲଟର ପୁଣିଥରେ ଯାଂଚ କରାଯିବ । ପ୍ରାଥମିକ କୃଷି ସମବାୟ ସମିତିର ସମ୍ପାଦକ କିମ୍ବା ମହିଳା ସ୍ୱୟଂ ସହାୟକ ଗୋଷ୍ଠୀର ମୁଖ୍ୟଙ୍କ ଭଳି ୨୧୯ ଜଣ ସର୍ଭେୟର ସେହିସ୍ଥାନକୁ ଯିବେ । ସବୁ ସନ୍ଦେହଜନକ ପ୍ଲଟକୁ ଯାଇ ଜମି ଉପରେ ରହି ନିଜର ଫଟୋ ଉଠାଇ ନିଜ ଫଟୋ ସହ ଜମିର ଫଟୋ ଉଠାଇ ଜିଓ ଟ୍ୟାଗିଂ କରିବେ । ସନ୍ଦେହ ଜନକ ପ୍ଲଟରେ ବାସ୍ତବରେ ଧାନ ଚାଷ ହୋଇଥିବ ତେବେ ତାହାକୁ ପଞ୍ଜିକରଣ ସୂଚିରେ ସ୍ଥାନିତ କରାଯିବ । ଯଦି ଧାନ ଚାଷ ହୋଇନଥିବ ତେବେ ଉକ୍ତ ଜମିକୁ ପଞ୍ଜିକରଣ ସୂଚୀରୁ ବାଦ୍ ଦିଆଯିବବୋଲି କୁହିଛନ୍ତି ଯୋଗାଣ ଅଧିକାରୀ ।

ଅମଳ ଧାନ ବିକିବାକୁ ବସିଥିବା ଚାଷୀଙ୍କ ପ୍ରତି ପ୍ରଥମେ ଗୁରୁତ୍ୱ ଦିଆଯାଇ ମଣ୍ଡି ଖୋଲିବା ଜରୁରୀ ହୋଇପଡିଛି ।

The post ସାଟେଲାଇଟ ସର୍ଭେରୁ ଧରାପଡିଲା ମିଛ । ପଂଜିକୃତ ପ୍ଲଟରେ ହୋଇନି ଧାନ ଚାଷ, ଅନାବନା ହୋଇ ପଡିଛି ଜମି first appeared on Kanak News.

from Kanak News
via <a href="https://ifttt.com/?

ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନଙ୍କ ସାନ ଝିଅ କିମ ଜୁଏଙ୍କୁ ତାଙ୍କ ପିତାଙ୍କ ଉତ୍ତରାଧିକାରୀ ଭାବରେ ଦେଖାଯାଉଛି । ଗତ ଏକ ବର୍ଷ ଧରି ସର୍ବସାଧାରଣ କାର୍ଯ୍ୟକ୍ରମରେ ତାଙ୍କ ପିତାଙ୍କ ସହ ତାଙ୍କୁ ଯେଉଁଭଳି ଭାବରେ ଦେଖିବାକୁ ମିଳୁଛି ଏଥିରୁ ଏହାର ସମ୍ଭାବନା ଆହୁରି ବଢିଛି ।

କିମ ଜୋଙ୍ଗଙ୍କ ସାନ ଝିଅ କିମ ଜୁ ଏ, ଯିଏକି ମାତ୍ର ୧୦ ବର୍ଷ ବଯସର । ତାଙ୍କୁ ପ୍ରଥମେ ସର୍ବସାଧରଣ ସ୍ଥାନରେ ପିତାଙ୍କ ସହ  ନଭେମ୍ବର ୨୦୨୨ ରେ ଦେଖିବାକୁ ମିଳିଥିଲା ଯେତେବେଳେ ସେ ତାଙ୍କ ପିତାଙ୍କ ସହ ଏକ ଦୂରଗାମୀ କ୍ଷେପଣାସ୍ତ୍ର ପରୀକ୍ଷା ଦେଖୁଥିଲେ ।  ସେବେଠାରୁ ଜୁ ଏ ତାଙ୍କ ପିତାଙ୍କ ସହିତ ସର୍ବସାଧାରଣ କାର୍ଯ୍ୟକ୍ରମରେ କ୍ରମାଗତ ଭାବରେ ଅଂଶଗ୍ରହଣ କରିଆସୁଛନ୍ତି । କୋରିଆ ମିଡିଆ ତାଙ୍କୁ କ୍ରମାଗତ ଭାବରେ କିମଙ୍କର ପ୍ରିୟ ସନ୍ତାନ ବୋଲି କହିଥାଏ । କୋରିଆ ଗଣମାଧ୍ୟମରେ ତାଙ୍କର ବଢୁଥିବା ରାଜନୈତିକ ପ୍ରତିଷ୍ଠା ଏବଂ ତାଙ୍କ ପିତାଙ୍କ ନିକଟତରତାକୁ ପ୍ରମାଣ କରୁଥିବା ଅନେକ ଫଟୋ ଏବଂ ଫୁଟେଜ୍ ଅଛି ।

କିମ ଜୋଙ୍ଗଙ୍କ ସାନ ଝିଅ କିମ ଜୁ ଏ ତାଙ୍କ ପିତାଙ୍କ ନିକଟତର ଅଟନ୍ତି ।  ଉଭୟଙ୍କୁ ସର୍ବସାଧାରଣ କାର୍ଯ୍ୟକ୍ରମରେ ପ୍ରାୟତଃ ଦେଖିବାକୁ ମିଳୁଛି । ସେପ୍ଟେମ୍ବରରେ, ଯେତେବେଳେ ସେ ସାମରିକ ପରେଡ ସମୟରେ ଭିଭିଆଇପି ଷ୍ଟାଣ୍ଡରେ କରତାଳି ଦେଉଥିଲେ, ଜଣେ ଜେନେରାଲ ଆଣ୍ଠୁରେ ବସି କାନରେ କିଛି ଫୁସ୍ଫୁସ୍ କରୁଥିବା ଦେଖିବାକୁ ମିଳିଥିଲା ତାଙ୍କୁ । ନଭେମ୍ବରରେ, ଜୁ ଏ ମଧ୍ୟ ତାଙ୍କ ପିତାଙ୍କ ସହ ବାୟୁସେନା ମୁଖ୍ୟାଳୟ ପରିଦର୍ଶନ କରିଥିଲେ । ଏଥିରେ ସେ ତାଙ୍କ ପିତାଙ୍କ ସାମ୍ନାରେ ଠିଆ ହୋଇଥିବା ସମୟରେ ତାଙ୍କ ଚିତ୍ର ଉତ୍ତୋଳନ କରାଯାଇଥିଲା । ସେଗୁଡିକ ଉପରେ ଅଧିକ ଆଲୋଚନା କରାଯାଇଥାଏ କାରଣ ଏହି ଚିତ୍ରଗୁଡ଼ିକ ମଧ୍ୟରୁ ଅଧିକାଂଶ ଏମିତି  ଯେ ସେମାନଙ୍କୁ ଉତ୍ତର କୋରିଆରେ କଳ୍ପନା କରାଯାଇପାରିବ ନାହିଁ । କିମ୍ ଉତ୍ତରାଧିକାରୀ ସନ୍ଧାନରେ ଅଛନ୍ତି ଦକ୍ଷିଣ କୋରିଆର ମୁଖ୍ୟ ଗୁପ୍ତଚର ସଂସ୍ଥା ନ୍ୟାସନାଲ ଇଣ୍ଟେଲିଜେନ୍ସ ସର୍ଭିସ ଗୁରୁବାର ଦିନ କହିଛି ଯେ ଏହା କିମ ଜୁ ଏଙ୍କୁ ତାଙ୍କ ପିତାଙ୍କ ସମ୍ଭାବ୍ୟ ଉତ୍ତରାଧିକାରୀ ଭାବରେ ଗଣାଯାଉଛି । ତାଙ୍କର ଜନସାଧାରଣ କାର୍ଯ୍ୟକଳାପ ଏବଂ ତାଙ୍କୁ ଦିଆଯାଇଥିବା ପ୍ରୋଟୋକଲ ଯୋଗୁଁ ଏହି ସମ୍ଭାବନା ବୃଦ୍ଧି ପାଇଛି ।

NIS ଜନସମ୍ପର୍କ କାର୍ଯ୍ୟାଳୟ ଏପିଙ୍କୁ କହିଛି ଯେ ଉତ୍ତରାଧିକାର ପ୍ରକ୍ରିୟା ସମ୍ବନ୍ଧରେ ଉତ୍ତର କୋରିଆର ଏକଛତ୍ରବାଦୀ ଶାସକ ସମସ୍ତ ବିକଳ୍ପ ଉପରେ ବିଚାର କରୁଛନ୍ତି, ତେଣୁ ସମୟ ଆସିଲେ କୌଣସି ଅସୁବିଧା ହେବ ନାହିଁ।ଉତ୍ତର କୋରିଆ କୌଣସି ମନ୍ତବ୍ୟ ଦେଇନାହିଁଏପି ସହ ଏକ ଫୋନ୍ ବାର୍ତ୍ତାଳାପରେ ସଂସଦର ଗୁପ୍ତଚର କମିଟିର ସଦସ୍ୟ ୟୁନ୍ ଚୋ କିମଙ୍କ ସାନ ଝିଅକୁ ତାଙ୍କ ଉତ୍ତରାଧିକାରୀ ଭାବରେ ନାମିତ ହେବାର ସମ୍ଭାବନାକୁ ନିଶ୍ଚିତ କରିଛନ୍ତି । ତଥାପି, ଉତ୍ତର କୋରିଆ ଏପରି ଏକ ଦେଶ ଯେଉଁଠାରେ ଘଟୁଥିବା ବିକାଶକୁ ଯାଞ୍ଚ କରିବାରେ NIS ର ଖରାପ ରେକର୍ଡ ରହିଛି । ଉତ୍ତରାଧିକାର ଯୋଜନା ଉପରେ ଉତ୍ତର କୋରିଆର ରାଜ୍ୟ ଗଣମାଧ୍ୟମ ଏପର୍ଯ୍ୟନ୍ତ କୌଣସି  ମନ୍ତବ୍ୟ ଦେଇନାହାଁନ୍ତି ।

ସିଓଲର ଆସାନ୍ ଇନଷ୍ଟିଚ୍ୟୁଟ୍ ଫର୍ ପଲିସି ଷ୍ଟଡିଜର  ବିଶ୍ଳେଷକ ଡୋ ହାଇଓଗାନ୍ ଚା କହିଛନ୍ତି ଯେ କିମ ଜୁ ଏଙ୍କୁ ତାଙ୍କ ପିତାଙ୍କ ଉତ୍ତରାଧିକାରୀ ଭାବରେ ନାମିତ ହେବାର ଏକ ସମ୍ଭାବନା ଥିବାବେଳେ NIS ବର୍ତ୍ତମାନ ଉତ୍ତର କୋରିଆ ନେତୃତ୍ୱ ନେବ ବୋଲି ଭବିଷ୍ୟବାଣୀ କରିପାରନ୍ତି । ପରବର୍ତ୍ତୀ ନେତା କି ନୁହେଁ । ଚା କହିଛନ୍ତି କିମ ଜୁ ଏଙ୍କର ରାଜନୈତିକ ସଫଳତାର ଅଭାବ ରହିଛି ଯାହା ଦେଶର ଭବିଷ୍ୟତର ନେତା ଭାବରେ ଆନୁଷ୍ଠାନିକ ଭାବରେ ନିଯୁକ୍ତ ହେବା ଆବଶ୍ୟକ ବୋଲି ସେ କହିଛନ୍ତି ।NIS ଏବଂ ଦକ୍ଷିଣ କୋରିଆର ଅନ୍ୟ ଅଧିକାରୀମାନେ ପୂର୍ବରୁ କହିଥିଲେ ଯେ କିମ ଜୋଙ୍ଗ ଉନଙ୍କ ଅପେକ୍ଷାକୃତ ଅଳ୍ପ ବୟସ ଏବଂ ଉତ୍ତର କୋରିଆର ପରିସ୍ଥିତିକୁ ଦୃଷ୍ଟିରେ ରଖି କିମ ଜୁ ଏଙ୍କୁ ତାଙ୍କ ପିତାଙ୍କ ଉତ୍ତରାଧିକାରୀ ଭାବରେ ଦେଖିବା ବହୁତ ଶୀଘ୍ର ଥିଲା । ସେ କହିଛନ୍ତି କିମଙ୍କ ଶାସକ ପରିବାର ପାଇଁ ଜନସାଧାରଣଙ୍କ ସମର୍ଥନକୁ ବଢାଇବା ଏବଂ ସେମାନଙ୍କ ମଧ୍ୟରୁ ଜଣେ ପିଲାଙ୍କୁ କ୍ଷମତା ହସ୍ତାନ୍ତର କରିବାର ଯୋଜନା ବୋଲି ସେ କହିଛନ୍ତି। ୧୯୪୮ ମସିହାରେ ଏହାର ପ୍ରତିଷ୍ଠା ଦିନଠାରୁ, ଉତ୍ତର କୋରିଆ କ୍ରମାଗତ ଭାବରେ କିମ ପରିବାରର ପୁରୁଷ ସଦସ୍ୟଙ୍କ ଦ୍ୱାରା ଶାସିତ ହୋଇଆସୁଛି । ୨୦୧୧ ମସିହାରେ ତାଙ୍କ ପିତା କିମ ଜୋଙ୍ଗ ଇଲଙ୍କ ମୃତ୍ୟୁ ପରେ କିମ ଜୋଙ୍ଗ ଉନ କ୍ଷମତା ପାଇଥିଲେ। ୧୯୯୪ ରେ ତାଙ୍କ ପିତା ତଥା ରାଜ୍ୟ ପ୍ରତିଷ୍ଠାତା କିମ ଇଲ ସାଙ୍ଗଙ୍କ ମୃତ୍ୟୁ ପରେ କିମ ଜୋଙ୍ଗ ଇଲ କ୍ଷମତା ଗ୍ରହଣ କରିଥିଲେ ।

The post ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନଙ୍କ ସାନ ଝିଅ  ହେବେ କି ଉତ୍ତରାଧିକାରୀ ?  first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ପିପିଲିରେ ପ୍ରହସନ ପାଲଟିଛି ବସୁଧା ଯୋଜନା । ସମୁଦାୟ ୬୦ଟି ପାଣି ଟାଙ୍କିରୁ ୩୦ ଟାଙ୍କି ସମ୍ପୁର୍ଣ୍ଣ ଅଚଳ ହୋଇପଡିଛି । କେଉଁଠି ଖାଲି ଟାଙ୍କି ଅଛି ତ ଆଉ କେଉଁଠି ପାଣିର ସୁବିଧା ନାହିଁ । ଆଉ କିଛିସ୍ଥାନରେ ଭୂତଳ ପାଇପ ବିଛାଯାଇଛି । ହେଲେ ପାଣି ଆସିପାରୁନି । ଦୀର୍ଘ ଦିନ ହେଲା ପ୍ରକଳ୍ପ ଗେଟ ନଖୋଲିବାରୁ ଅନାବନା ଗଛରେ ଭର୍ତି ହୋଇଗଲାଣି । ପାଣି ଯୋଗାଇବାକୁ ଲକ୍ଷାଧିକ ଟଙ୍କା ବ୍ୟୟ ବରାଦ ହୋଇଥିଲା । ହେଲେ ଟଙ୍କା ପଡିଛି ପାଣିରେ । ପାଣି ପାଇଁ ଲୋକେ ଏବେ ବି ଅସୁବିଧା ଭୋଗୁଛନ୍ତି । ଅଭିଯୋଗ ପରେ ବି କୌଣସି ସମାଧାନ ହୋଇପାରିନି ।

ସେପଟ ଅବଧି ସରିଗଲାଣି । କେବେ କାର୍ଯ୍ୟକ୍ଷମ ହେବ ଭେଂକଟପଲମ ମେଗା ପାନୀୟ ଜଳ ଯୋଗାଣ ପ୍ରକଳ୍ପ ? ତାକୁ ନେଇ ଉଠିଛି ପ୍ରଶ୍ନ । କାଲିମେଳାବାସୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇବା ଲକ୍ଷ୍ୟରେ ୪ ବର୍ଷ ପୁର୍ବରୁ ଏକ ମେଗା ପାନୀୟ ଜଳ ପ୍ରକଳ୍ପ ନିର୍ମାଣ କରିବାକୁ ଯୋଜନା କରାଯାଇଥିଲା । ଡ଼୍ରିଙ୍କ ଫ୍ରମ ଟ୍ୟାପ ଯୋଜନାରେ ପ୍ରତ୍ୟେକ ଘରକୁ ବିଶୋଧିତ ପାନୀୟ ଜଳ ଯୋଗାଇଦେବାକୁ ପୋଟେରୁ ନଦୀକୁଳରେ ପ୍ରକଳ୍ପ ଆରମ୍ଭ ହୋଇଥିଲା । ହେଲେ ଗତ ବର୍ଷ ଅକ୍ଟୋବର ମାସରୁ ଅବଧି ଶେଷ ହୋଇଯାଇଥିଲେ ମଧ୍ୟ ପ୍ରକଳ୍ପର କାମ ବର୍ତମାନ ସୁଧା ସଂପୂର୍ଣ୍ଣ ହୋଇପାରିନି । ପ୍ରାୟ ୫ଟି ପଂଚାୟତର ୫୮୬୫ ପରିବାର ଏବେ ବିଶୁଦ୍ଧ ପାନୀୟ ଜଳ ପାଇବାରୁ ବଂଚିତ ହେଉଛନ୍ତି ।

ପ୍ରଶାସନ ପକ୍ଷରୁ ଘରେ ଘରେ ବିଶୁଦ୍ଧ ପାନୀୟ ଜଳ ଯୋଗାଇବାପାଇଁ ପାନୀୟ ଜଳ ଯୋଗାଣ ପ୍ରକଳ୍ପ ଆରମ୍ଭ ହୋଇଛି । ହେଲେ ଏହିଭଳି ବହୁ ସ୍ଥାନରେ ପ୍ରକଳ୍ପ ଫେଲ ମାରିଥିବା ବେଳେ ପାଣି ପାଇଁ ଲୋକେ ବହୁ ସମସ୍ୟା ଭୋଗୁଛନ୍ତି ।

The post ଲୋକଙ୍କୁ ମିଳୁନି ପିଇବା ପାଣି । ବିଭିନ୍ନ ସ୍ଥାନରେ ଅଚଳ ପଡିଛି ପ୍ରକଳ୍ପ,ଖତ ଖାଉଛି ଲକ୍ଷ ଲକ୍ଷ ଟଙ୍କା ପ୍ରକଳ୍ପ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ତିଗିରିଆ ଥାନା ବିଷ୍ଣୁପୁରରେ ଝାଡାବାନ୍ତି ଆତଙ୍କ । ୧୫ରୁ ଅଧିକ ଲୋକ ଆକ୍ରାନ୍ତ ହୋଇଛନ୍ତି । ସମସ୍ତଙ୍କୁ ଆଠଗଡ ଓ ତିଗିରିଆ ମେଡିକାଲରେ ଭର୍ତି କରାଯାଇଛି । ଆଠଗଡ ମେଡିକାଲରେ ୬ ଜଣ ଚିକିତ୍ସା ପାଇଁ ଆସିଥିବା ବେଳେ ସେଥିରୁ ଜଣଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଛି । ଗାଁରେ ଏକ ମେଡିକାଲ ଟିମ୍ ପହଂଚି ଚିକିତ୍ସା ଆରମ୍ଭ କରିଛି । ସେହିଭଳି ପ୍ରଶାସନ ପକ୍ଷରୁ ଦୁଇଟି ସ୍ୱତନ୍ତ୍ର ଟିମ୍ ପହଂଚି ଯାଂଚ୍ ଆରମ୍ଭ କରିଛି । ରୋଗର କାରଣ ଓ ନିରାକରଣ ନେଇ ଲୋକଙ୍କୁ ସଚେତନ କରାଯାଉଛି । ଗାଁରେ ଚିକିତ୍ସା ଆରମ୍ଭ ହେବା ସହ ନମୁନା ସଂଗ୍ରହ କରାଯାଇଛି ।

The post ତିଗିରିଆ ଥାନା ବିଷ୍ଣୁପୁରରେ ଝାଡାବାନ୍ତି ଆତଙ୍କ । ୧୫ରୁ ଅଧିକ ଆକ୍ରାନ୍ତଙ୍କୁ ମେଡିକାଲରେ ଭର୍ତି, ଜଣଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତର first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ : ଦୀର୍ଘ ଦୂରକୁ ଟ୍ରେନରେ ଯାତ୍ରା କରିବା ଅନେକ ଲୋକମାନଙ୍କର ପ୍ରଥମ ପସନ୍ଦ ହୋଇଥାଏ । ପ୍ରତ୍ୟେକ ଦିନ ଲକ୍ଷ ଲକ୍ଷ ଲୋକ ଟ୍ରେନରେ ଯାତ୍ରା କରନ୍ତି । ଯଦିଓ ରେଳ ବିଭାଗ ଠିକ୍ ସମୟରେ ଟ୍ରେନ ଚଲାଇବା ପାଇଁ ଚେଷ୍ଟା କରନ୍ତି ହେଲେ କିଛି କାରଣ ପାଇଁ ବେଳେବେଳେ କିଛି ଟ୍ରେନ ବିଳମ୍ବ ହୋଇଥାଏ । ଏହା ଆପଣ ମାନେ ମଧ୍ୟ ଦେଖିଥିବେ । ଅନେକ ଥର ଟ୍ରେନ ୬ ରୁ ୭ ଘଣ୍ଟା ପର୍ଯ୍ୟନ୍ତ ମଧ୍ୟ ବିଳମ୍ବ ହୋଇଥାଏ । ଯଦି ଟ୍ରେନ ଗୁଡିକ ଠିକ୍ ସମୟରେ ଚାଲୁ ନଥାଏ, ତେବେ ଯାତ୍ରୀମାନଙ୍କୁ ଅନେକ ପ୍ରକାରର ଅସୁବିଧାର ସମ୍ମୁଖୀନ ହେବାକୁ ପଡିଥାଏ । ଯଦି ଟ୍ରେନ ବିଳମ୍ବ ହୁଏ ସେଥିପାଇଁ ରେଳ ପକ୍ଷରୁ ଯାତ୍ରୀମାନଙ୍କୁ କିଛି ସୁବିଧା ମଧ୍ୟ ଦିଆଯାଇଥାଏ । ଆଜି ଆପଣମାନଙ୍କୁ ରେଳବାଇର ଏକ ବିଶେଷ ସୁବିଧା ବିଷୟରେ ଜଣାଇବା ପାଇଁ ଯାଉଛୁ । ଏହି ସବୁ ନିୟମ ବିଷୟରେ ଆପଣମାନେ ବହୁତ କମ ଜାଣିଥିବେ । ଯଦି ଆପଣ ଟ୍ରେନରେ ଯାତ୍ରା କରୁଥିବେ ତାହାଲେ ଏହା ଜାଣିବା ଆପଣଙ୍କ ପାଇଁ ବହୁତ ଗୁତୁତ୍ୱପୂର୍ଣ୍ଣ ।

ରେଳ ଟିକେଟ୍ ର ଯୋଗ୍ୟତା କଣ ଜାଣନ୍ତୁ ।
ଯଦି କୌଣସି ଯାତ୍ରୀ କନଫର୍ମ, ଆରଏସି କିମ୍ବା ୱେଟିଂଲିଷ୍ଟ ଟିକେଟ୍ ରଖିଥିବା ଯାତ୍ରୀଙ୍କ ଟ୍ରେନ ଆସିବାରେ ୩ ଘଣ୍ଟାରୁ ଅଧିକ ବିଳମ୍ବ ହୁଏ ଓ ଯାତ୍ରୀ ଜଣଙ୍କ ସେହିଦିନ ସେହିଟ୍ରେନରେ ଯାତ୍ରା ନ କରିବାକୁ ନିଷ୍ପତ୍ତି ନିଅନ୍ତି ତେବେ ରେଳ ବିଭାଗ ସଂପୃକ୍ତ ଯାତ୍ରୀଙ୍କୁ ସମ୍ପୂର୍ଣ୍ଣ ଟିକେଟ ଅର୍ଥ ଫେରାଇବାକୁ ବାଧ୍ୟ । ଯଦି ଅପଣଙ୍କର ଏକ ଇ-ଟିକେଟ୍ ଅଛି, ତେବେ ସମ୍ପୂର୍ଣ୍ଣ ଅନୁମତି ପାଇବା ପାଇଁ ଆପଣଙ୍କୁ ଟ୍ରେନ୍ ଛାଡିବାର ୧ ଘଣ୍ଟା ପୂର୍ବରୁ ଏକ ଅନଲାଇନ ଟିଡିଆର ଭରିବାକୁ ପଡିବ । ଯଦି ଆପଣ ରିଜର୍ଭେସନ କାଉଣ୍ଟରରୁ ଟିକେଟ କିଣିଛନ୍ତି ତେବେ ଆପଣଙ୍କୁ କାଉଣ୍ଟରକୁ ଯାଇ ଟିକେଟ୍ କ୍ୟାନସଲ କରିବାକୁ ପଡିବ ।

ଇ-ଟିକେଟଧାରୀ ଯଦି ଟ୍ରେନ ବିଳମ୍ବ ପାଇଁ ଟିକେଟ କ୍ୟାନସଲ କରୁଛନ୍ତି ତେବେ ୩ ରୁ ୭ ଦିନ ମଧ୍ୟରେ ସେ ତାଙ୍କର ଟିକେଟ ଅର୍ଥ ଫେରିପାଇବେ । ହେଲେ ଟ୍ରେନ ଆପଣଙ୍କ ଷ୍ଟେସନ ଛାଡିବା ପରେ ଯଦି ଆପଣ ଇ-ଟିକେଟ୍ କ୍ୟାନସଲ କରୁଛନ୍ତି ତେବେ ଆପଣଙ୍କୁ କୌଣସି ଅର୍ଥ ଫେରସ୍ତ କରାଯିବ ନାହିଁ ।

ଯଦି ଆପଣ ଅପେକ୍ଷା କରିଥିବା ଟ୍ରେନଟି ୩ ଘଣ୍ଟାରୁ ଅଧିକ ବିଳମ୍ବରେ ଆସୁଛି ତେବେ ଆପଣ ଆଇଆରସିଟିସି ଅନଲାଇନ ପ୍ଲାଟଫର୍ମ ମାଧ୍ୟମରେ କିମ୍ବା ରିଜରର୍ଭେସନ କାଉଣ୍ଟରକୁ ଯାଇ ଟିକେଟ କ୍ୟାନସଲ କରି ଟିକେଟ୍ ଅର୍ଥ ଫେରସ୍ତ ପାଇପାରିବେ ।

ରେଳବାଇର ନିୟମ ଅନୁସାରେ, ସମ୍ପୂର୍ଣ୍ଣ ଟିକେଟ ଅର୍ଥ ଫେରସ୍ତ ପାଇଁ ଆପଣ ସେତେବେଳେ ଆବେଦନ କରିପାରିବେ, ଯେତେବେଳେ ଟ୍ରେନ ତିନି ଘଣ୍ଟାରୁ ଅଧିକ ସମୟ ବିଲମ୍ବ ହେବ । ଅନ୍ୟପଟେ ଆପଣ ଯଦି ଆପଣଙ୍କ ଭ୍ରମଣ ପରିବର୍ତ୍ତନ କରୁଛନ୍ତି ବା କୌଣସି ଅନ୍ୟ କାରଣରୁ ଟିକେଟ କ୍ୟାନସଲ କରୁଛନ୍ତି ସେତେବେଳେ ଆପଣଙ୍କୁ କ୍ୟାନସଲ ଚାର୍ଜ ଦେବାକୁ ପଡିବ । କ୍ୟାନସଲ ଚାର୍ଜ ଆପଣଙ୍କର ଟିକେଟ ଟାଇପ ଓ ସମୟ ଆଧାରରେ ଲାଗିବ ।

The post ଟ୍ରେନ ଟିକେଟକୁ ନେଇ ନୂଆ ନିୟମାବଳୀ । ଟ୍ରେନ ବିଳମ୍ବ ହେଲେ ଯାତ୍ରୀ ଫେରିପାଇବେ ସମ୍ପୂର୍ଣ୍ଣ ଟିକେଟ ଟଙ୍କା first appeared on Kanak News.

from Kanak News
via <a href="https://ifttt.com/?