କନକ ବ୍ୟୁରୋ: ବିଧାନସଭାର ଶୀତ ଅଧିବେଶନ । କାର୍ଯ୍ୟଦିବସ ଥିଲା ୩୦ ଦିନ ହେଲେ ୪ ଦିନରେ ବନ୍ଦ ହେଲା । ବାକି ରହିଗଲା ୨୬ କାର୍ଯ୍ୟଦିବସ । ହଠାତ୍ ଶୀତ ଅଧିବେଶନ ବନ୍ଦ ହୋଇଯିବା ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କୁ ଟାର୍ଗେଟ୍ କରିଛନ୍ତି ଉଭୟ କଂଗ୍ରେସ ଓ ବିଜେପି । କଂଗ୍ରେସ ବିଧାୟକ ଦଳର ନେତା ନରସିଂହ ମିଶ୍ର ଅଭିଯୋଗ ଆଣି କହିଛନ୍ତି, ବିରୋଧୀଙ୍କୁ ଭୟ କରୁଛନ୍ତି ସରକାର । ବିରୋଧୀଙ୍କ ପ୍ରଶ୍ନର ଉତ୍ତର ନଥିବାରୁ ଗୃହକୁ ମୁଲତବୀ କରାଯାଇଛି । ଅଗଣତାନ୍ତ୍ରିକ ଭାବେ ବିଧାନସଭାକୁ ବନ୍ଦ ରଖାଯାଇଛି ବୋଲି ନରସିଂହ ଅଭିଯୋଗ କରିଛନ୍ତି ।

ସେହିପରି ସମାନ ଢ଼ଙ୍ଗରେ ସରକାରକୁ ଟାର୍ଗେଟ କରିଛନ୍ତି ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ । କଟାକ୍ଷ କରି ସେ କହିଛନ୍ତି, ୪ ଦିନରେ ଶୀତ ଅଧିବେଶନକୁ ବନ୍ଦ କରି ରାଜ୍ୟ ସରକାର ଇତିହାସ ସୃଷ୍ଟି କରିଛନ୍ତି । ଏପଟେ ବିରୋଧୀଙ୍କ ଅଭିଯୋଗର ଜବାବ ରଖିଛନ୍ତି ଶ୍ରମମନ୍ତ୍ରୀ ।

ହଙ୍ଗମା-ହଟ୍ଟଗୋଳ-କକ୍ଷତ୍ୟାଗ-ମୁଲତବୀ ଭିତରେ ଯଦି ୪ ଦିନର ହିସାବ-କିତାବ କରାଯାଏ, ତେବେ ଶୀତ ଅଧିବେଶନର ପ୍ରଥମ ଦିନରେ ଶୋକ ପ୍ରସ୍ତାବ ପରେ ମଲତବୀ ହୋଇଥିଲା ଗୃହ । ଆଦିବାସୀ ଜମି ପ୍ରସଙ୍ଗରେ ବିରୋଧୀଙ୍କ ହଟ୍ଟଗୋଳ ଯୋଗୁଁ ଧୋଇ ହୋଇଗଲା ଦ୍ୱିତୀୟ ଦିନ । ତୃତୀୟ ଦିନରେ ଯଦିଓ ପ୍ରଥମାର୍ଦ୍ଧ ବିରୋଧୀଙ୍କ ହଙ୍ଗାମା ଯୋଗୁଁ ବନ୍ଦ ରହିଥିଲା, କିନ୍ତୁ ଦ୍ୱିତୀୟାର୍ଦ୍ଧରେ ସ୍ୱାଭାବିକ ଥିଲା ଗୃହକାର୍ଯ୍ୟ । ଆଉ ଚତୁର୍ଥ ଦିନରେ ଶିଳ୍ପ ବିଭାଗର ଆଲୋଚନା, କୋଶଳୀ ଭାଷାରେ କଥା କଟାକଟି ଏବଂ ମୁଲତବୀ ପ୍ରସ୍ତାବ ଉପରେ ଆଲୋଚନାରେ ଏହା ସୀମିତ ରହିଗଲା ।

ତେବେ ଶୀତ ଅଧିବେଶନର ୪ଦିନ ଯାକ ଆଦିବାସୀ ଜମି ହସ୍ତାନ୍ତର ପ୍ରସଙ୍ଗ ଚର୍ଚ୍ଚାରେ ରହିଥିଲା । ଆଉ ବିବାଦ ପରେ ନିଷ୍ପତିର ଅଧିକ ତଜର୍ମା ପାଇଁ ଉପଦେଷ୍ଟା କମିଟିକୁ ପଠାଇବାକୁ ନିଷ୍ପତି ନେଇଥିଲେ ସରକାର ।

The post ଶୀତ ଅଧିବେଶନ ବନ୍ଦକୁ ନେଇ ତେଜିଲା ରାଜନୀତି । ରାଜ୍ୟ ସରକାରଙ୍କୁ ଟାର୍ଗେଟ କଲେ କଂଗ୍ରେସ ଓ ବିଜେପି । ବିଜେଡ଼ି କହିଲା, ବିରୋଧୀଙ୍କ ଅଭିଯୋଗ ଭିତ୍ତିହୀନ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ଉତ୍ତରକାଶୀ ଟନେଲରେ ଫଶିଥିବା ଶ୍ରମିକମାନେ ଯେତେ ଶୀଘ୍ର ବାହାରକୁ ଆସିବେ ବୋଲି ଆଶା କରାଯାଉଥିଲା, ତାହା ବିଳମ୍ବ ହେବାର ଆଶଙ୍କା ସୃଷ୍ଟି ହୋଇଛି । ଶୁକ୍ରବାର ଖନନ ସମୟରେ ବାରମ୍ବାର ଲୁହା ଆସୁଥିବାରୁ ଅଗର ମେସିନର ବ୍ଲେଡ ବାରମ୍ବାର ଭାଙ୍ଗିବା ପରେ ଏହି ଆଶଙ୍କା ସୃଷ୍ଟି ହୋଇଛି । ତେବେ ପୁଣି ଥରେ ଆରମ୍ଭ ହୋଇଛି ରେସ୍କ୍ୟୁ ଅପରେସନ । ପାହାଡର ଉପର ପଟୁ ସୁଡଙ୍ଗ କରି ଉଦ୍ଧାର ପାଇଁ ବିକଳ୍ପ ପନ୍ଥା ଆପଣାଇଛନ୍ତି ଉଦ୍ଧାରକାରୀ ଦଳ । ଭର୍ଟିକାଲ ଡ୍ରିଲିଂ ପାଇଁ ମଧ୍ୟ ଯୋଜନା କରାଯାଇଛି । ତେବେ ଟନେଲ ନିକଟରେ ପହଞ୍ଚିଛି ଭର୍ଟିକାଲ ଡ୍ରିଲିଂ ମେସିନ ।

• ସୁଡଙ୍ଗ ଭିତରେ ଶ୍ରମିକ
• ବିଳମ୍ବ ହେବ ଉଦ୍ଧାର!

ସେପଟେ ଉଦ୍ଧାରକାର୍ଯ୍ୟରେ ସହାୟତା ପାଇଁ ହାଇଦ୍ରାବାଦରୁ ଆସୁଛି ପ୍ଲାଜମା କଟର । ରବିବାର ସକାଳୁ ମେସିନ ଡ୍ରିଲିଂ ବଦଳରେ ମାନୁଆଲ ଡ୍ରିଲିଂ କରାଯିବ । ଏହା ସମୟ ସାପେକ୍ଷ ହେବା ଯୋଗୁଁ ଉଦ୍ଧାରକାର୍ଯ୍ୟରେ ବିଳମ୍ବ ହେବାର ଆଶଙ୍କା କରାଯାଉଛି । ତେବେ ଫସିଥିବା ସମସ୍ତ ଶ୍ରମିକ ସୁସ୍ଥ ଅଛନ୍ତି ବୋଲି ସୂଚନା ଦେଇଛନ୍ତି ଉତ୍ତରାଖଣ୍ଡ ମୁଖ୍ୟମନ୍ତ୍ରୀ । ଅନ୍ୟପଟେ ଟନେଲ ଭିତରେ ୫ଜଣ ଓଡିଆ ଫସିଥିବାରୁ ଉତ୍ତରକାଶୀକୁ ଯାଇଛନ୍ତି ଓଡ଼ିଶାର ଶ୍ରମମନ୍ତ୍ରୀ ସାରଦା ନାୟକ । ଏଥିସହ ରାଜ୍ୟ ସରକାରଙ୍କ ସହାୟତାରେ ଫସିଥିବା ଓଡିଆଙ୍କ ସମ୍ପର୍କୀୟମାନେ ମଧ୍ୟ ଉତ୍ତରକାଶୀକୁ ଯାଇଛନ୍ତି । ଶ୍ରମିକଙ୍କ ସମ୍ପର୍କୀୟମାନେ ଉତ୍ତରକାଶୀ ଯିବା ପୂର୍ବରୁ ସେମାନଙ୍କୁ ବିମାନବନ୍ଦରରେ ଭେଟିଥିଲେ ୫-ଟି ତଥା ନବୀନ ଓଡ଼ିଶା ଅଧ୍ୟକ୍ଷ ଭି.କେ ପାଣ୍ଡିଆନ୍ ।

ଏହାରି ଭିତରେ ସୁଡ଼ଙ୍ଗରେ ଫସିରହିଥିବା ୪୧ ଜଣ ଶ୍ରମିକଙ୍କ ଉଦ୍ଧାରକାର୍ଯ୍ୟ ୧୪ ଦିନରେ ପହଞ୍ଚିଛି । ତେବେ ବାରମ୍ବାର ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହେଉଥିବାରୁ ଶ୍ରମିକଙ୍କୁ ଉଦ୍ଧାର କାର୍ଯ୍ୟ ବିଳମ୍ବିତ ହେବ ବୋଲି କୁହାଯାଉଛି ।

The post ଶ୍ରମିକଙ୍କୁ ଉଦ୍ଧାର ପାଇଁ ହାଇଦ୍ରାବାଦରୁ ଆସିବ ପ୍ଲାଜମା କଟର । ଟନେଲ ଉପରପଟୁ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିବା କହିଲେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ । first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ନବରଙ୍ଗପୁରରେ ଘଟିଥିବା ଏକ ହତ୍ୟାକାଣ୍ଡ ଏବେ ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଛି । ହତ୍ୟାକାରୀ କେତେ ନୃଶଂସ ହୋଇପାରେ, କେତେ ଜଘନ୍ୟ ଓ ଘୃଣ୍ୟ କାଣ୍ଡ ଭିଆଇପାରେ, ଏଥିରୁ ପ୍ରମାଣ ମିଳିଛି । ଜଣେ ଯୁବତୀଙ୍କୁ ହତ୍ୟା କରିବା ପରେ ଅଭିଯୁକ୍ତ ୩୧ ଖଣ୍ଡ କରି କାଟି ପକାଇଛି । ମୁରମଡିହି ଜଙ୍ଗଲରୁ ମୃତକଙ୍କ ଖଣ୍ଡ ବିଖଣ୍ଡିତ ଶବ ଉଦ୍ଧାର କରିଛି ପୋଲିସ ।

• ଜହ୍ଲାଦର ଜଘନ୍ୟକାଣ୍ଡ
• ଯୁବତୀଙ୍କୁ ନିର୍ମମ ହତ୍ୟା
• ୩୧ ଖଣ୍ଡ କରି ପୋତିଦେଲା ଅଭିଯୁକ୍ତ!

ନୃଶଂସ ହତ୍ୟାକାଣ୍ଡର ଏ ଏପରି ଏକ କାହାଣୀ, ଯାହା କେବଳ ନବରଙ୍ଗପୁରରେ ନୁହେଁ, ସାରା ରାଜ୍ୟରେ ଚାଞ୍ଚଲ୍ୟ ଖେଳାଇ ଦେଇଛି । ଯୁବତୀଙ୍କୁ ହତ୍ୟା କରିବା ପରେ ୩୧ ଖଣ୍ଡ କରି ଜଙ୍ଗଲ ଭିତରେ ପୋତି ଦେଇଛି ଅଭିଯୁକ୍ତ ।

• ତିଲାବତୀ ଗଣ୍ଡ
• ବୟସ ପାଖାପାଖି ୨୫ ବର୍ଷ
• ଘର: ନବରଙ୍ଗପୁର ରାଇଘର ଥାନା ବାଗବେଡ଼ା ଗାଁ

ବୁଧବାର ଠାରୁ ନିଖୋଜ ଥିଲେ ତିଲାବତୀ । ତିନି ଦିନ ପରେ ମୁରମଡିହି ଜଙ୍ଗଲରୁ ମିଳିଛି ଖଣ୍ଡ ବିଖଣ୍ଡିତ ମୃତଦେହ । କିନ୍ତୁ ଯେପରି ଅବସ୍ଥାରେ ମୃତଦେହ ମିଳିଛି, ତାହା ସମସ୍ତଙ୍କ ଛାତି ଥରାଇ ଦେଇଛି । ଜଙ୍ଗଲ ଭିତରେ ପୋତି ହୋଇଥିଲା ମୃତଦେହ । ହାତ, ଗୋଡ଼, ଆଙ୍ଗୁଠି ସବୁ କିଛି ଖଣ୍ଡ ଖଣ୍ଡ କରି କଟାଯାଇଥିବା ଦେଖି ଆଶ୍ଚର୍ଯ୍ୟ ହୋଇଯାଇଛନ୍ତି ପୁଲିସ ଅଧିକାରୀ । କୁହାଯାଉଛି, ଯୁବତୀଙ୍କୁ ହତ୍ୟା କରିବା ପରେ ମୃତଦେହକୁ ୩୧ ଖଣ୍ଡ କରି ପୋତି ଦେଇଛି ଅଭିଯୁକ୍ତ । ପ୍ରମାଣ ନଷ୍ଟ ପାଇଁ ଜୋରଦାର ଉଦ୍ୟମ କରିଛି ସଇତାନ । ମୃତଦେହ କିପରି ଶୀଘ୍ର ନଷ୍ଟ ହେବ, ସେଥିରେ ଲୁଣ ଦିଆଯାଇଥିବା ଜଣାପଡ଼ିଛି । ଘଟଣାସ୍ଥଳରେ ସାଇଣ୍ଟିଫିକ୍ ଟିମ ପହଞ୍ଚି ଛାନଭିନ ଆରମ୍ଭ କରିଛି । ମୃତଦେହ ନିକଟରେ ଏକ କାତି ଜବତ କରିଛି ପୁଲିସ ।

ହତ୍ୟାର କାରଣ ନେଇ ପୁଲିସ କିଛି ସ୍ପଷ୍ଟ କରିନଥିବା ବେଳେ ପରକୀୟା ପ୍ରୀତିକୁ ନେଇ ଏହି ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଉଛି । ଏହି ମାମଲାରେ ମୁରମଡିହି ଗାଁର ଚନ୍ଦ୍ର ରାଉତ ଓ ତାଙ୍କ ପତ୍ନୀଙ୍କୁ ଅଟକ ରଖିଛି । କୁହାଯାଉଛି, ୫ଟି ପିଲା ବାପା ହୋଇଥିଲେ ବି ତିଲାବତୀଙ୍କ ସହ ସଂପର୍କ ରଖିଥିଲା ଚନ୍ଦ୍ର । ଘଟଣା ପଦାକୁ ଆସିବା ପରେ ଚନ୍ଦ୍ର ରାଉତ ପରିବାରରେ ଅଶାନ୍ତି ସୃଷ୍ଟି ହୋଇଥିଲା । ତିଲାବତୀଙ୍କୁ ରାସ୍ତାରୁ ହଟାଇବା ପାଇଁ ଚନ୍ଦ୍ର ଓ ତା’ର ସ୍ତ୍ରୀ ଯୋଜନାବଦ୍ଧ ହତ୍ୟାକାଣ୍ଡ ଘଟାଇଥିବା ଅଭିଯୋଗ ହୋଇଛି । ସ୍ଥାନୀୟ ଅଞ୍ଚଳରେ ଏହାକୁ ନେଇ ପ୍ରବଳ ଉତେଜନା ସୃଷ୍ଟି ହୋଇଥିବା ବେଳେ ଅଭିଯୁକ୍ତ ଘର ଆଗରେ ମୃତ ଦେହ ପୋତିବାକୁ ଗାତ ଖୋଳିଛନ୍ତି ସ୍ଥାନୀୟ ବାସିନ୍ଦା ।

The post ନବରଙ୍ଗପୁରରେ ଚାଞ୍ଚଲ୍ୟ । ଯୁବତୀଙ୍କୁ ମାରି ୩୧ ଖଣ୍ଡ କଲା ଅଭିଯୁକ୍ତ । ଜଙ୍ଗଲରୁ ଖଣ୍ଡ ବିଖଣ୍ଡିତ ଶବ ଉଦ୍ଧାର କଲା ପୋଲିସ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ଆଜି ସେଞ୍ଚୁରିଅନ ବିଦ୍ୟାଳୟ ପରିସରରେ ଆନ୍ତଃ ବିଦ୍ୟାଳୟ କ୍ରିକେଟ ଟୁର୍ଣ୍ଣାମେଣ୍ଟ ଉଦଯାପିତ ହୋଇଯାଇଛି । ଟୁର୍ଣ୍ଣାମେଣ୍ଟରେ ବଲାଙ୍ଗୀର ସହରର ବିଭିନ୍ନ ବିଦ୍ୟାଳୟ ଯେପରି ବିଶ୍ୱତ୍ମା ବିଦ୍ୟା ମନ୍ଦିର, ପୃଥ୍ଵୀରାଜ ଉଚ୍ଚ ବିଦ୍ୟାଳୟ, ପତିତପାବନ ଏକାଡେମୀ, ସେମଫୋର୍ଡ ଉଚ୍ଚ ବିଦ୍ୟାଳୟ,ଏକାଡେ଼ମିକ ହାଇଟ ଉଚ୍ଚ ବିଦ୍ୟାଳୟ, ବିଦ୍ୟାଭାରତୀ ଉଚ୍ଚ ବିଦ୍ୟାଳୟ, ଆଇ. ଡି. ଏମ ଉଚ୍ଚ ବିଦ୍ୟାଳୟ ପ୍ରଭୃତି ଭାଗ ନେଇଥିଲେ । ସେଞ୍ଚୁରିଅନ ବିଦ୍ୟାଳୟ ଟୁର୍ଣ୍ଣାମେଣ୍ଟର ପୃଷ୍ଠପୋଷକତା କରିଥିଲା । ସକାଳ ୭.୩୦ ରେ ଉତ୍ସବଟି ଅନୁଷ୍ଠାନର ଆଞ୍ଚଳିକ ନିର୍ଦେଶକ ଡ଼. ପ୍ରଦୀପ କୁମାର ଷଡ଼ଙ୍ଗୀଙ୍କ ଦ୍ୱାରା ଉଦଘାଟିତ ହୋଇଥିଲା ।

ସକାଳ ୮ ଟାରେ ପ୍ରଥମ ମ୍ୟାଚ ବିଶ୍ୱାତ୍ମା ବିଦ୍ୟା ମନ୍ଦିର ଉଚ୍ଚ ବିଦ୍ୟାଳୟ ଓ ଏକାଡେ଼ମିକ ଉଚ୍ଚ ବିଦ୍ୟାଳୟ ମଧ୍ୟରେ ଅନୁଷ୍ଠିତ ହୋଇଥିଲା । ଚାରୋଟି ସେମି ଫାଇନାଲ ମ୍ୟାଚ ଅନୁଷ୍ଠିତ ହୋଇଥିଲା । ସେମିଫାଇନାଲ ମ୍ୟାଚ ଗୁଡିକରେ ବିଜୟୀ ହୋଇଥିବା ଦଳ ଗୁଡିକ ମଧ୍ୟରେ ଫାଇନାଲ ମ୍ୟାଚ ଅନୁଷ୍ଠିତ ହୋଇଥିଲା । କ୍ରିକେଟ ଟୁର୍ଣ୍ଣାମେଣ୍ଟଟି ଅନୁଷ୍ଠାନର ଆଞ୍ଚଳିକ ନିର୍ଦେଶକ ଡ଼. ପ୍ରଦୀପ କୁମାର ଷଡ଼ଙ୍ଗୀଙ୍କର ପ୍ରତ୍ୟକ୍ଷ ତତ୍ତ୍ୱାବଧାନରେ ସମାପିତ ହୋଇଥିଲା । ଉତ୍ସବରେ ଜେ. ଆଇ. ଟି. ଏମ (ସି. ଏଚ. ଏସ. ଇ ) ବିଜ୍ଞାନର ଉପାଧ୍ୟକ୍ଷା ଅଙ୍କିତା ଶୁଭ୍ରସ୍ମିତା ଗଡ଼ତ୍ୟା, ବିଦ୍ୟାଳୟର ଅଧ୍ୟକ୍ଷ ତମାଳ ଚକ୍ରବର୍ତ୍ତୀ, ଉପାଧକ୍ଷା ପୂଣ୍ୟତୋୟା ବିଶ୍ୱାଳ ଉପସ୍ଥିତ ରହି ସହଯୋଗ କରିଥିଲେ। ଅନୁଷ୍ଠାନର କ୍ରୀଡା ଶିକ୍ଷୟତ୍ରୀ କ୍ରିଷ୍ଣାମୟୀ ଭଇଁସାଲ, କରାଟେ ପ୍ରଶିକ୍ଷକ ଚନ୍ଦ୍ରଶେଖର ସେଠ,ତଥା ବିଦ୍ୟାଳୟର ଅନ୍ୟାନ୍ୟ ଶିକ୍ଷକ, ଶିକ୍ଷୟତ୍ରୀ ମାନେ ଉପସ୍ଥିତ ରହି ଉତ୍ସବଟିର ସଫଳ ପରିଚାଳନା ପାଇଁ ସହଯୋଗ କରିଥିଲେ ।

ଟୁର୍ଣ୍ଣାମେଣ୍ଟରେ ବିଚାରକ ଭାବରେ ବିଦ୍ୟାଳୟର ଅଧ୍ୟାପକ ଅରିନ୍ଦମ ପରିଛା, ଆଲୋକ ବେହେରା, ସ୍ବର୍ଣ୍ଣଜିତ ତ୍ରିପାଠୀ,ରାକେଶ ମେହେର, ପ୍ରଦୀପ୍ତ ମୁଦୁଲି, ସତ୍ୟବ୍ରତ ଷଡ଼ଙ୍ଗୀ ଏବଂ ଚନ୍ଦ୍ରଶେଖର ସେଠ ଦାୟିତ୍ୱ ତୁଲାଇଥଲେ । ମ୍ୟାଚର ଧାରା ବିବରଣୀ ଅନୁଷ୍ଠାନର ଅଧ୍ୟାପକ ଆକାଶ ପଟ୍ଟନାୟକ, ଫର୍ମାସୀ ବିଭାଗର ଛାତ୍ର ଆଶିଷ ଦାଶ ଏବଂ ଵି. ସି. ଏ ର ଛାତ୍ର ତରଣୀସେନ ଭୋଇ ପ୍ରଦାନ କରିଥିଲେ, ଯାହା ଅତ୍ୟନ୍ତ ଆକର୍ଷଣୀୟ ଥିଲା । ମ୍ୟାଚର ସ୍କୋରର ଭାବରେ ଅନୁଷ୍ଠାନର ଅଧ୍ୟାପିକା ଭକ୍ତି ପଢାରିଆ ଦାୟିତ୍ୱ ତୁଲାଇଥିଲେ ।

ପରିଶେଷରେ ଫାଇନାଲ ମ୍ୟାଚ ଆଇ. ଡି. ଏମ ଉଚ୍ଚ ବିଦ୍ୟାଳୟର ଦଳ ଓ ପି. ପି. ଏକାଡେମୀ ଉଚ୍ଚ ବିଦ୍ୟାଳୟର ଦଳ ମଧ୍ୟରେ ଅନୁଷ୍ଠିତ ହୋଇଥିଲା । ପି. ପି ଏକାଡେମୀ ଉଚ୍ଚ ବିଦ୍ୟାଳୟ ଜିତିବା ପାଇଁ ୫୬ ରନର ଲକ୍ଷ୍ୟ ପ୍ରଦାନ କରିଥିଲା, ଯାହାକୁ ଆଇ. ଡି. ଏମ ଉଚ୍ଚ ବିଦ୍ୟାଳୟ ୬ ଉଇକେଟ ବିନିମୟରେ ପୁରଣ କରି ବିଜୟୀ ହୋଇଥିଲା । ଉତ୍ସବର ଉଦଯାପନୀ ସମାରୋହରେ ବେଷ୍ଟ ବ୍ୟାଟ୍ସମ୍ୟାନ ଭାବରେ ବିଶ୍ୱତ୍ମା ବିଦ୍ୟା ମନ୍ଦିର ଉଚ୍ଚ ବିଦ୍ୟାଳୟର ସଂକେତ ରାଜପୁତ ପୁରସ୍କୃତ ହୋଇଥିଲେ । ବେଷ୍ଟ ବୋଲର ଭାବରେ ଆଇ. ଡି. ଏମ. ଉଚ୍ଚ ବିଦ୍ୟାଳୟର ଆକାଶ ମହାକୁର ପୁରସ୍କୃତ ହୋଇଥିଲେ । ମ୍ୟାନ ଅଫ ଦ ଟୁର୍ଣ୍ଣାମେଣ୍ଟ ଭାବରେ ମଧ୍ୟ ଆଇ.ଡି. ଏମ.ଉଚ୍ଚ ବିଦ୍ୟାଳୟର ଆକାଶ ମହାକୁର ପୁରସ୍କୃତ ହୋଇଥିଲେ । ସେ ଟୁର୍ଣ୍ଣାମେଣ୍ଟରେ ସର୍ବାଧିକ ୯ଟି ଉଇକେଟ ସଂଗ୍ରହ କରିଥିଲେ । ଟୁର୍ଣ୍ଣାମେଣ୍ଟର ମ୍ୟାଚ ଗୁଡିକରେ ଖେଳାଳୀମାନଙ୍କର ପ୍ରଦର୍ଶନ ଆକର୍ଷଣୀୟ ଥିଲା । ଅନୁଷ୍ଠାନର ଏହି ପ୍ରୟାସ ଯାହା ଖେଳ ପାଇଁ ଏକ ନୂତନ ଆକର୍ଷଣ ସୃଷ୍ଟି କରିବ, ସେଥିପାଇଁ ସହରର ସବୁ ମହଲରୁ ଏହାକୁ ସ୍ୱାଗତ କରାଯାଇଛି ।

The post ସେଞ୍ଚୁରିଅନ ବିଦ୍ୟାଳୟରେ ଆନ୍ତଃବିଦ୍ୟାଳୟ କ୍ରିକେଟ ଟୁର୍ଣ୍ଣାମେଣ୍ଟ ଉଦଯାପିତ first appeared on Kanak News.

from Kanak News
via <a href="https://ifttt.com/?

ବିଶେଷଜ୍ଞମାନେ କହିଛନ୍ତି ଯେ ଉତ୍ତାପ ସତ୍ତ୍ବେ ଏହି ଆକାରର ଏକ ବରଫ ଖଣ୍ଡ ଦକ୍ଷିଣ ମହାସାଗରରେ ଦୀର୍ଘ ସମୟ ଧରି ସେହିପରି ଅବସ୍ଥାରେ ରହିବାକୁ ସକ୍ଷମ ଅଟେ ।  ଏହା ଦକ୍ଷିଣ ଆଫ୍ରିକା ଆଡକୁ ମଧ୍ୟ ଗତି କରିପାରେ । ଯେଉଁଠାରେ ଏହା ମାଲ  ପରିବହନ କ୍ଷେତ୍ରରେ ବାଧା ସୃଷ୍ଟି କରିବ । ଏହା ମଧ୍ୟ ସମ୍ଭବ ଯେ ଦକ୍ଷିଣ ଜର୍ଜିଆ ଦ୍ୱୀପରେ ଧକ୍କା ଲାଗି ଏହି A23a ନାମକ  ହିମଖଣ୍ଡ  ନଷ୍ଟ ହୋଇଯାଇପାରେ । ଏହା ମଧ୍ୟ ଆଣ୍ଟାର୍କଟିକାରେ ବାସ କରୁଥିବା ହଜାର ହଜାର ସିଲ୍, ପେଙ୍ଗୁଇନ୍ ଏବଂ ସମୁଦ୍ର ପକ୍ଷୀମାନଙ୍କ ପାଇଁ ସମସ୍ୟା ସୃଷ୍ଟି କରିବାର ଆଶଙ୍କା ରହିଛି । ଏହିପରି ବହୁ ଆଶଙ୍କାକୁ ବିଶେଷଜ୍ଞମାନେ ଏଡାଇ ଦେଇପାରୁନାହାନ୍ତି ।

ଦୂନିଆର ସବୁଠୁ ବଡ ଆଇସବର୍ଗ(ହିମ ପର୍ବତ)ଭାଙ୍ଗି ଦକ୍ଷିଣ ମହାସାଗର ଆଡକୁ ଗତି କରୁଛି ।

ଶୁକ୍ରବାର ଦିନ ଏହି ସୂଚନା ପ୍ରଦାନ କରି ବୈଜ୍ଞାନିକମାନେ କହିଛନ୍ତି ଯେ ଦୀର୍ଘ ୩୦ ବର୍ଷରୁ ଅଧିକ ସମୟ ପରେ ଏପରି ଘଟିଛି ଯେ ବିଶ୍ଵର ସବୁଠୁ ବଡ ଆଇସବର୍ଗ ଖସି ଖସି ଯାଉଛି । ଏହି ଆଇସବର୍ଗର ଆକଳନ ଏହିଥିରୁ କରାଯାଇପାରେ ପ୍ରାୟ ଯେ ଆକାରରେ ଏହା ଆଇସବର୍ଗ ନ୍ୟୁୟର୍କ ସହରର ଠାରୁ ତିନି ଗୁଣ ବଡ଼  । ୪୦୦୦  ବର୍ଗ କିଲୋମିଟର (୧୫୦୦  ବର୍ଗ ମାଇଲ) ଉପରେ ବ୍ୟାପିଥିବା A23a ନାମକ ଏହି ଆଣ୍ଟାର୍କଟିକ୍ ହିମଖଣ୍ଡ ଦୁନିଆର ସର୍ବ ପୁରାତନ ଆଇସବର୍ଗ ମଧ୍ୟରୁ ଗୋଟିଏ ।

୧୯୮୬ ରେ ପଶ୍ଚିମ ଆଣ୍ଟାର୍କଟିକାର ଫିଲଚନର୍-ରୋନ୍ ଆଇସ୍ ସେଲଫରୁ ଏହା ଭାଙ୍ଗିବା ପରେ ଏହ ୱେଡେଲ ସାଗରର ଚଟାଣରେ ଚାପି ହୋଇ ରହିଥିବା ଯୋଗୁ ଏହି ଆଇସବର୍ଗ ଭାଙ୍ଗି ନଥିଲା । ବର୍ତ୍ତମାନ ଉପଗ୍ରହ ଚିତ୍ରଗୁଡ଼ିକ ଦେଖାଉଛି  ଯେ ପ୍ରାୟ ଏକ ଟ୍ରିଲିୟନ୍ ମେଟ୍ରିକ୍ ଟନ୍ ଓଜନ ବିଶିଷ୍ଟ ଏହି ହିମଖଣ୍ଡ ବର୍ତ୍ତମାନ ଶକ୍ତିଶାଳୀ ପବନ ଏବଂ ସ୍ରୋତ ସାହାଯ୍ୟରେ ଆଣ୍ଟାର୍କଟିକ୍ ଉପଦ୍ୱୀପର ଉତ୍ତର ଦିଗକୁ ଦ୍ରୁତ ଗତିରେ ଗତି କରୁଛି। ଯେଉଁ କାରଣରୁ ବିଶେଷଜ୍ଞମାନେ ଏହା ଉପରେ ନଜର ରଖିଛନ୍ତି ।

ବୈଜ୍ଞାନିକମାନେ ଏହି ବରଫଖଣ୍ଡ ଉପରେ ନଜର ରଖିଛନ୍ତି

ବ୍ରିଟିଶ ଆଣ୍ଟାର୍କଟିକ୍ ସର୍ଭେର  ଗ୍ଲାସିଓଲୋଜିଷ୍ଟ୍ ଅଲିଭର ମାର୍ଶ କହିଛନ୍ତି ଯେ ଏହି ଆକାରର ଏକ ହିମଖଣ୍ଡକୁ ଭାସମାନ ଅବସ୍ଥାରେ ଦେଖିବା ଅତ୍ୟନ୍ତ ବିରଳ ଅଟେ ।  ତେଣୁ ବୈଜ୍ଞାନିକମାନେ ଏହାର ଗତିବିଧି ଉପରେ ତୀକ୍ଷ୍ଣ ନଜର ରଖିବେ । ବାଷ୍ପ ଗ୍ରହଣ କରିବା ମାତ୍ରେ ଏହି ବିଶାଳ ପଥର ଆଣ୍ଟାର୍କଟିକ୍ ସର୍କମ୍ପୋଲାର୍ କରେଣ୍ଟରେ ଲଞ୍ଚ ହେବ । ଏହା ଆଇସବର୍ଗ ଗଲି ନାମକ ଏକ ପଥରେ ଦକ୍ଷିଣ ମହାସାଗରକୁ ନେଇଯିବ, ଯେଉଁଠାରେ ଏହା ପରି ଅନ୍ୟ ଆଇସବର୍ଗଗୁଡିକ ପାଣିରେ ଭାସୁଥିବା ଦେଖିବାକୁ ମିଳିବ ।

ଅଲିଭର ମାର୍ଶ କହିଛନ୍ତି ଯେ ସମୟ ସହିତ ଏହା ବୋଧହୁଏ ଟିକେ ପତଳା ହୋଇଯାଇଛି ଏବଂ ଅତିରିକ୍ତ ବାଉନ୍ସ ହାସଲ କରିଛି । ଯେଉଁଥିପାଇଁ ଏହା ସମୁଦ୍ର ପତ୍ତନରୁ ଉପରକୁ ଉଠିବା ଏବଂ ସମୁଦ୍ର ସ୍ରୋତରେ ପ୍ରବାହିତ ହେବା ସହଜ ହେବାରେ ଲାଗିଛି । ଏହା ସମ୍ଭବ ଯେ ଦକ୍ଷିଣ ଜର୍ଜିଆ ଦ୍ୱୀପରେ A23a ପୁନର୍ବାର ଭୂମିରେ ଲାଗି ରହିଯାଇ ପାରେ ।

ଏହା ଦ୍ୱାରା କେଉଁମାନେ  ପ୍ରଭାବିତ ହୋଇପାରନ୍ତି ?

ଯଦି ଏହା ଘଟେ ତେବେ ଏହା ଆଣ୍ଟାର୍କଟିକାର ବନ୍ୟଜନ୍ତୁ ପାଇଁ ଏହା ଏକ ସମସ୍ୟା ସୃଷ୍ଟି କରିବ ।  ଲକ୍ଷ ଲକ୍ଷ ସଂଖ୍ୟାରେ ସିଲ୍, ପେଙ୍ଗୁଇନ୍ ଏବଂ ସମୁଦ୍ର ପକ୍ଷୀ ଏହି ଦ୍ୱୀପରେ ପ୍ରଜନନ କରନ୍ତି ଏବଂ ଏହାର ଆଖପାଖ ଅଞ୍ଚଳରେ ଖାଦ୍ଯ ଅନ୍ଵେଷଣ କରିଥାନ୍ତି ।

୨୦୨୦ ରେ ଏହିପାରି ଅନ୍ୟ ଏକ ବୃହତ୍ ଆଇସବର୍ଗ A68 ଦକ୍ଷିଣ ଜର୍ଜିଆକୁ ଧକ୍କା ଦେଇ ସମୁଦ୍ରର ସାମୁଦ୍ରିକ ଜୀବନକୁ ନଷ୍ଟ କରିଦେବା ଏବଂ ଖାଦ୍ୟର ସୁବିଧା ବନ୍ଦ କରିଦେବା ଆଶଙ୍କା ସୃଷ୍ଟି କରିଥିଲା ।  ଆଇସବର୍ଗ ଛୋଟ ଛୋଟ ଖଣ୍ଡରେ ଭାଙ୍ଗିଯିବା ପରେ ଏହିପରି ବିପର୍ଯ୍ୟୟକୁ ଏଡାଇ ଦିଆଯାଇଥିଲା ।  ଏହା A23a ସହିତ ମଧ୍ୟ ହୋଇପାରେ ।

The post ଦୁନିଆର ସବୁଠୁ ବଡ଼ ହିମଖଣ୍ଡ ଭାଙ୍ଗି ଦକ୍ଷିଣ ମହାସାଗରରେ ମିଶିବାକୁ ଯାଉଛି । ଆକାରରେ ନ୍ୟୂୟର୍କ ସହର ଠାରୁ ତିନିଗୁଣ ବଡ଼ । first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ବ୍ୟକ୍ତିଗତ ଜାଗାରେ ପାନୀୟ ଜଳ ପ୍ରକଳ୍ପ । ଚାକିରି ଦେବେ କହି ଜାଗା ନେଲେ, ହେଲେ ଚାକିରି ଦେଲେ ନାହିଁ କି ଲିଖିତ ପ୍ରତିଶୃତି ଦେଲେ ନାହିଁ । ଚିନ୍ତାରେ ଜମି ମାଲିକ, ପାଚେରୀ ନିର୍ମାଣ ହୋଇ ନଥିବାରୁ ବାଡ ଘେରି ରଖିଛନ୍ତି ଜମି ମାଲିକ । ଅଧାପନ୍ତରିଆ କାମ ହୋଇଥିବାରୁ ବଢୁଛି ଅସନ୍ତୋଷ । ସରକାର ଘରେ ଘରେ ପାନୀୟ ଜଳ ଯୋଇବା ପାଇଁ ପ୍ରତି ପଞ୍ଚାୟତରେ ଉଚ୍ଚ କ୍ଷମତା ସମ୍ପନ୍ନ ପାଣି ଟାଙ୍କି ନିର୍ମାଣ କରୁଛନ୍ତି । ଏଥିପାଇଁ କୋଟି କୋଟି ଟଙ୍କା ବ୍ୟୟ ବରାଦ କରୁିଛନ୍ତି । ମାତ୍ର ବିଭିନ୍ନ ସ୍ଥାନରେ ଅତ୍ୟନ୍ତ ନିମ୍ନମାନର କାର୍ଯ୍ୟ ହେଉଥିବା ଅଭିଯୋଗ ହୋଇଛି । ବିଭାଗୀୟ ଅଧିକାରୀଙ୍କ କାର୍ଯ୍ୟାଳୟର ସବୁ ସମୟରେ ତାଲା ପଡୁତିବା ବେଳେ ଫୋନ କଲେ ଅଧିକାରୀ ଉଠାଉ ନଥିବା ଅଭିଯୋଗ ହୋଇଛି । ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକ ନାମ୍ପୋ ତାଳବଣିଆରେ ଜମି ମାଲିକକୁ ଚାକିରି ଦେବେ କହି ବ୍ୟକ୍ତିଗତ ଜାଗାରେ ବସୁଧା ଯୋଜନାରେ ଟାଙ୍କି ନିର୍ମାଣ କଲେ । ୫ ମାସ ତଳୁ ଟାଙ୍କି ନିର୍ମାଣ ହୋଇସାରିଥିଲେ ବି ଏଯାଏଁ ଚାକିରି ଦେଲେ ନାହିଁ । ତେଣୁ ପାଣି ଟାଙ୍କି ହୋଇଥିବା ସ୍ଥାନକୁ ବାଢ ଘେରାଇ ଜଗି ରହିଛନ୍ତି ଜାଗା ମାଲିକ କାହ୍ନୁ ହେମ୍ରମ ।

The post କଥା ଦେଇ କଥା ରଖିଲେ ନାହିଁ ସରକାର । ବ୍ୟକ୍ତିଗତ ଜାଗାରେ ପାଣି ଟାଙ୍କି କଲେ, ପ୍ରତିଶ୍ରୁତି ମୁତାବକ ଚାକିରି ଦେଲେନି first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ଚର୍ଚ୍ଚାରେ ହାତ ତିଆରି ସୋଲ ଡଙ୍ଗା। ଆଗକୁ ଆସୁଛି କାର୍ତ୍ତିକ ପୂର୍ଣ୍ଣିମା। ପୂର୍ଣ୍ଣିମାରେ ଡ଼ଙ୍ଗା ଭସାଇବା ପାଇଁ ଲୋକ ମାନେ ବିଭିନ୍ନ ପ୍ରକାରର ଡ଼ଙ୍ଗା ବଜାରରୁ କିଣିଥାନ୍ତି। ହେଲେ ଚଳିତ ବର୍ଷ ଡଙ୍ଗାଭଷା ପାଇଁ ସୋଲରେ ଡଙ୍ଗା ତିଆରି କରି ଚର୍ଚ୍ଚାରେ କଟକ କନ୍ଦରପୁର ଅଞ୍ଚଳର ଚିତ୍ତରଞ୍ଜନ।

ସୋମବାର କାର୍ତ୍ତିକ ପୂର୍ଣ୍ଣିମା । ପୂର୍ଣ୍ଣିମା ଦିନ ଜଳାଶୟରେ ଭାସିବ କଟକ କନ୍ଦରପୁରର ଯୁବ ଚିତ୍ରକର କାହ୍ନୁ ତିଆରି କରିଥିବା ସୋଲ ଡଙ୍ଗା । ଧର୍ମ ମାସ କାର୍ତ୍ତିକରେ ପ୍ରତିଟି ଓଡିଆ ନଦୀ, ନାଳ ଓ ପୋଖରୀରେ ଡଙ୍ଗା ଭସାଇଥାନ୍ତି । ଏଥିପାଇଁ ବଜାରରେ ଭଳିକି ଭଳି ଡଙ୍ଗା ବିକ୍ରି ହେଉଛି । ତେବେ ଲୋକଙ୍କ ଚାହିଦା ଅନୁସାରେ ସୋଲରେ ଖୁବ୍ ସୁନ୍ଦର ସୁନ୍ଦର ଡଙ୍ଗା ପ୍ରସ୍ତୁତ କରିଛନ୍ତି ଯୁବ ଚିତ୍ରକର କାହ୍ନୁ ।

୬ ଇଞ୍ଚରୁ ଆରମ୍ଭ କରି ୧୦ ଫୁଟ ଲମ୍ବର ଡଙ୍ଗା ତିଆରି କରିବାରେ କାହ୍ନୁଙ୍କୁ ସହଯୋଗ କରିଥାନ୍ତି ତାଙ୍କ ଝିଅ । ସୋଲ କାଟିବା ଠାରୁ ଆରମ୍ଭ କରି ଅଠା ଲଗାଇବା, ରଙ୍ଗ ଦେବା, ରଙ୍ଗୀନ କାଗଜ ମାରିବା ଓ କଣ୍ଟା ପିଟିବା କାମ କରନ୍ତି ବାପା-ଝିଅ । ଦୁଇ ମାସ ପୂର୍ବରୁ ଡଙ୍ଗା ତିଆରି କରିଛନ୍ତି । ଆଉ ଏସବୁ ଡଙ୍ଗାର ଦର ୧୦ ଟଙ୍କାରୁ ଆରମ୍ଭ କରି ୩ ହଜାର ଟଙ୍କା ରହିଛି । ତେବେ ଗ୍ରାହକମାନେ ଛୋଟ ଛୋଟ ଡଙ୍ଗା କିଣି ନେଉଥିବା ବେଳେ ବଡ ବଡ ଡଙ୍ଗା ପ୍ରସ୍ତୁତି ପାଇଁ ଆଗୁଆ ବରାଦ ଦେଇଥାନ୍ତି ।

The post ଦିନକ ପରେ କାର୍ତ୍ତିକ ପୂର୍ଣ୍ଣିମା । ଲୋକଙ୍କ ମନପସନ୍ଦର ସୋଲ ଡଙ୍ଗା ତିଆରି କରୁଛନ୍ତି କଟକ କନ୍ଦରପୁରର ଯୁବ ଚିତ୍ରକର first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ଅମଳ ବେଳକୁ ଚାଷୀଙ୍କ ଅଣ୍ଟା ଦୋହଲିଗଲାଣି । ଧାନ ନା ଘରକୁ ନେଇପାରୁଛି ନା ବିଲରେ ଛାଡ଼ିପାରୁଛି । ଅଦିନିଆ ବର୍ଷା ସାଙ୍ଗକୁ କୋହଲା ପାଗ ଚାଷୀଙ୍କ ପାଇଁ ଉପରେ ବୋଝ ଉପରେ ଲଳିତା ବିଡ଼ା ସଦୃଶ୍ୟ ପଲଟିଛି । କୋରାପୁଟ ଜିଲ୍ଲାରେ ଅଦିନିଆ ବର୍ଷା ଚାଷୀଙ୍କ ଆହାର ଛଡେଇ ନେବାକୁ ବସିଛି ।

ବିଲରେ ପଡ଼ି ରହିଛି କଟା ଧାନ । କେତେ ବିଡ଼ା ବନ୍ଧା ହୋଇଛି, ଆଉ କେତେ କଟା ହୋଇ ପଡ଼ିଛି । ବାକି କିଛି କଟା ନହୋଇ ଜମିରେ ରହିଛି । ଧାନ ଥୋଡ ଧରିବା ବେଳେ ବିଲରେ ଚକଡ଼ା ଚଡକ ପଡିଥିଲା । ଆଉ ଏବେ ଅମଳ ବେଳକୁ ଅଦିିନିଆ ବର୍ଷା ସାଙ୍ଗକୁ କୋହଲା ପାଗ ଚାଷୀଙ୍କ ପାଇଁ କାଳ ହୋଇଛି । କୋରାପୁଟ ଜିଲ୍ଳାର କୋରାପୁଟ, ବୋରିଗୁମ୍ମା ଓ ଜୟପୁର ବ୍ଳକରେ ଚାଷୀଙ୍କ ଆହାର ଛଡେଇ ନେବାକୁ ବସିଛି ବର୍ଷା ।

ଅମଳ ବେଳେ ଧାନ ଓଦା ହୋଇଯିବାରୁ ଧାନର ଏଫଏକ୍ୟୁ ମାନ କମି ଯିବାର ଆଶଙ୍କା ରହିଛି । ଅମଳ ବେଳେ ଧାନ ଓଦା ହୋଇଯିବାରୁ ଧାନର ମାନ କମି ଯିବାର ଆଶଙ୍କା ରହିଛି । ଭିଜି ଯାଇଥିବା ଧାନକୁ ଚାଷୀ କୁଆଡେ ନେବେ, ଓଦା ଧାନ ନା ଘରେ ସାଇତି ରଖି ହେବ ନା ମଣ୍ଡିରେ ବିକ୍ରି କରି ହେବ । ଏମିତି ଆଶା ଆଶଙ୍କାରେ ଥିବା ଚାଷୀ ଏବେ ଜମିରେ ପଡ଼ିଥିବା ଧାନକୁ ସାଉଁଟୁଛି । ଚଳିତ ଖରିଫ ଋତୁରେ କୋରାପୁଟ ଜିଲ୍ଳାରେ ୮୬ ହଜାର ହେକ୍ଟର ଜମିରେ ଧାନ ଚାଷ ହୋଇଛି । ତେବେ ଚକଡ଼ା ପୋକ ହେଉ କି ଅଦିନିଆ ବର୍ଷା, ନିଜର ଅମଳକୁ ନେଇ ସନ୍ତୁଳି ହେଉଛି କୋରାପୁଟ ଜିଲ୍ଲାର ଚାଷୀ ।

The post ଅମଳ ବେଳେ ଆଶା ଭସେଇ ଦେଲା ଅଦିନିଆ ବର୍ଷା । ପାଣିରେ ଭିଜିଗଲା ପାଚିଲା ଧାନ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: ସାଧାରଣ ନିର୍ବାଚନ ଯେତିକି ପାଖେଇ ଆସୁଛି, ନିର୍ବାଚନ ଲଢ଼ିବା ପାଇଁ ଦଳୀୟ ଟିକେଟ ଆଶାୟୀଙ୍କ ସଂଖ୍ୟା ମଧ୍ୟ ବୃଦ୍ଧି ପାଇଛି। ଜଗତସିଂହପୁର ଜିଲ୍ଲାର ବାଲିକୁଦା-ଏରସମା ବିଧାନସଭା ନିର୍ବାଚନ ମଣ୍ଡଳୀରେ ତିନି ପ୍ରମୁଖ ଦଳ ବିଜେଡି,ବିଜେପି ଓ କଂଗ୍ରେସ ପରି ପ୍ରତ୍ୟେକ ଦଳରୁ ଏକାଧିକ ଟିକେଟ ଆଶାୟୀ, ନିଜେ ନିଜର ଦଳୀୟ କାର୍ୟ୍ୟକ୍ରମ ଜାରି ରଖିବା ସହ ସମର୍ଥକ ବୃଦ୍ଧି ପାଇଁ ଉଦ୍ୟମ ଜାରି ରଖିଛନ୍ତି ।

ଜଗତସିଂହପୁର ଜିଲ୍ଲାର ବାଲିକୁଦା-ଏରସମା ନିର୍ବାଚନ ମଣ୍ଡଳୀ । ୨୦୦୯ରୁ ବିଜେଡି କବଜାରେ ରହି ଆସିଛି ଏହି ବିଧାନସଭା କ୍ଷେତ୍ର । ୨୦୦୯ ଓ ୧୪ରେ ବିଜେଡି ଟିକେଟ୍ରୁ ପ୍ରଶାନ୍ତ ମୁଦୁଲି ବିଧାୟକ ହୋଇଥିବା ବେଳେ ୨୦୧୯ରେ କଂଗ୍ରେସ ପ୍ରାର୍ଥୀ ଲଲାଟେନ୍ଦୁ ମହାପାତ୍ରଙ୍କୁ ହରାଇ ରଘୁନନ୍ଦନ ଦାସ ବିଜୟ ମୁକୁଟ ପିନ୍ଧିଥିଲେ । କିନ୍ତୁ ୨୦୨୪ ପାଇଁ ଏକାଧିକ ବିଜେଡି ଟିକେଟ୍ ଆଶାୟୀ ରହିଛନ୍ତି । ବର୍ତମାନର ବିଧାୟକ ରଘୁନନ୍ଦନ ଦାସ, ଯୁବ ଚେହେରା ସଂଜୀବ ବିଶ୍ୱାଳ, ବିଜେଡି ଜିଲ୍ଲା ଯୁବ ସଭାପତି ସୌମ୍ୟଜିତ୍ ମହାପାତ୍ର ଓ କଂଗ୍ରେସ ଛାଡି ବିଜେଡିରେ ମିଶିଥିବା ସାରଦା ଜେନା ଶଙ୍ଖ ଚିହ୍ନରେ ମଇଦାନକୁ ଓହ୍ଲାଇବା ପାଇଁ ସେମାନଙ୍କ ସଂଗଠନ ଚଳାଇଛନ୍ତି ।

ବିଜେଡି ଭଳି ବିଜେପିର ମଧ୍ୟ ଟିକେଟ୍ ଆଶାୟୀଙ୍କ ମଧ୍ୟରେ ପ୍ରତିଯୋଗିତା ଆରମ୍ଭ ହୋଇଛି । ଦଳର ବରିଷ୍ଠ ନେତା ସଂଜୟ ମହାନ୍ତି, ଶିବବ୍ରତ ଦାସ ଓ ଯୁବ ନେତା ସତ୍ୟ ସାରଥୀ ମହାନ୍ତି ବିଭିନ୍ନ କାର୍ଯ୍ୟକ୍ରମ ଜରିଆରେ ନିଜ ସପକ୍ଷରେ ଲୋକ ସମର୍ଥନ ଯୋଗାଡିବାରେ ଲାଗିଛନ୍ତି । ତେବେ ବିଜେଡି-ବିଜେପି ଭଳି କଂଗ୍ରେସରେ ମଧ୍ୟ ଏକାଧିକ ଆଶାୟୀ ଅଛନ୍ତି । କଂଗ୍ରେସ ଟିକେଟରୁ ବାରମ୍ବାର ନିର୍ବାଚନ ଲଢୁଥିବା ଲଲାଟେନ୍ଦୁ ମହାପାତ୍ର ଓ କଂଗ୍ରେସ ନେତା ତଥା ଆଇନଜୀବୀ ସୁଶାନ୍ତ କୁମାର କାନୁନଗୋ ଏଥର ମଇଦାନକୁ ଓହ୍ଲାଇବାକୁ ପ୍ରସ୍ତୁତି ଚଳାଇଛନ୍ତି । ତେବେ କିଏ ଦଳୀୟ ହାଇକମାଣ୍ଡରଙ୍କ ଆସ୍ଥା ଭାଜନ ହେବ ଓ କାହାକୁ ଟିକେଟ ମିଳିବ ତାହା ଆଗାମୀ ଦିନରେ ସ୍ପଷ୍ଟ ହେବ ।

The post ସରଗରମ ବାଲିକୁଦା-ଏରସମା ରାଜନୀତି । ୩ ପ୍ରମୁଖ ରାଜନୈତିକ ଦଳରେ ୯ ଟିକେଟ ଆଶାୟୀ first appeared on Kanak News.

from Kanak News
via <a href="https://ifttt.com/?

କନକ ବ୍ୟୁରୋ: କଳାପଟା ଅଛି, ଶ୍ରେଣୀ ଗୃହ କାନ୍ଥରେ ନାନା ପ୍ରକାର ଚିତ୍ର ବି ହୋଇଛି । ହେଲେ ପାଠ ପଢାଯାଉ ନାହିଁ । ଏଠି ରହିଛି କେବଳ ଲୁଗାପଟା, ବାସନ କୁସନ ଓ ବିଭିନ୍ନ ଘରକରଣା ସାମଗ୍ରୀ । ତେବେ ସ୍କୁଲ ଭିତରେ ଏଭଳି ଜିନିଷ ରହିଥିବା ଖବର ଜାଣି ଆପଣମାନେ ଆଶ୍ଚଯ୍ୟ ହେଇଯାଉଥିବେ । ହେଲେ ଏହି ବନ୍ଦ ସ୍କୁଲ ବାରଣ୍ଡାରେ ଗଞ୍ଜାମ ଜିଲ୍ଲା ଧରାକୋଟ ବ୍ଲକ ଅନ୍ତର୍ଗତ କାଠଗଡା ଗାଁର ଟୁକୁନା ସେଠୀଙ୍କ ପରିବାର ୪ ମାସ ହେଲା ରହୁଛନ୍ତି ।

• ଆବାସ ଅବ୍ୟବସ୍ଥାର ବିକଳ ଚିତ୍ର
• ଗରିବ ପରିବାରକୁ ମିଳୁନି କୋଠା ଘର
• ବାସହରାଙ୍କ ପାଇଁ ବିଦ୍ୟାଳୟ ବାରଣ୍ଡା ସାହା

ଦିନ ମଜୁରିଆ ଟୁକୁନାଙ୍କ ପରିବାର ଅତ୍ୟନ୍ତ ଗରିବ ଶ୍ରେଣୀର । ହେଲେ ଏହି ପରିବାର ଭାଗ୍ୟରେ ଜୁଟୁନାହିଁ ସରକାରୀ ଅବାସ । ଟୁକୁନାଙ୍କୁ ଆବାସ ଯୋଜନାରେ ଅନ୍ତର୍ଭୁକ୍ତ କରିଯାଇନାହିଁ । ତେଣୁ ଝାଟି ମାଟିର କୁଡିଆରେ ରହୁଥିଲେ ପୁରା ପରିବାର । ତେବେ ୪ ମାସ ତଳେ ବର୍ଷା ଯୋଗୁଁ ଘରଟି ଭୁଶୁଡି ପଡିଥିଲା । ଗାଁ ଲୋକ ପୁରା ପରିବାରକୁ ଉଦ୍ଧାର କରିିଥିଲେ । ସେବେ ଠାରୁ ୬ ପ୍ରାଣୀ କୁଟୁମ୍ବଙ୍କୁ ନେଇ ସ୍କୁଲ ବାରଣ୍ଡାରେ ରହୁଛନ୍ତି ଟୁକୁନା ସେଠୀ ।

ଏହି ପରିବାର ଅବସ୍ଥାକୁ ଦେଖିବା ପରେ ଧରାକୋଟ ବ୍ଲକରେ ଆବାସ ସ୍ୱଛତା ନେଇ ପ୍ରଶ୍ନ ଉଠିଥିବା ବେଳେ ଭଞ୍ଜନଗର ଉପଜିଲ୍ଲାପାଳ, ଧରାକୋଟ ବିଡିଓଙ୍କ ସହ ଆଲୋଚନା କରି ତୁରନ୍ତ ଥଇଥାନ ପାଇଁ ବ୍ୟବସ୍ଥା କରିବେ ବୋଲି ପ୍ରତିଶୃତି ଦେଇଛନ୍ତି । ତେବେ ସ୍କୁଲ ବାରଣ୍ଡାରେ ରହୁଥିବା ପରିବାରକୁ ଯଥାଶ୍ରୀଘ୍ର ସରକାରୀ ଯୋଜନାରେ ଅନ୍ତର୍ଭୁକ୍ତ କରିବାର ଆବଶ୍ୟକତା ରହିଥିବା ଗ୍ରାମବାସୀମାନେ ଦାବି କରିଛନ୍ତି ।

The post ବର୍ଷା ଭାଙ୍ଗିଦେଲା ବସା । ଝାଟି ମାଟିର ଘର ଭାଙ୍ଗି ଯିବା ପରେ ସ୍କୁଲ ଘରେ ଆଶ୍ରୟ ନେଇଛନ୍ତି ଟୁକୁନା ସେଠୀଙ୍କ ପରିବାର first appeared on Kanak News.

from Kanak News
via <a href="https://ifttt.com/?